1-2. Petro Ginigunana 4:7, 8 heḡereḡerena, dahaka ese baine duruda nega aukadiai baita haheauka?

ITA na “dina gabedia” dokodiai ta nohomu dainai hekwakwanai badadia baita davarimu. (2 Tim. 3:1) Heḡereḡere, Afrika tanona ta ai eleksen kempein ta e heabi murinai, heatu bada herea e vara. Una dainai hua siks lalodiai tadikaka bona taihu na asie loaloava. Dahaka ese e durudia bae haheauka? Idia haida na tadikaka edia ruma ai e nohova. Tadikaka ta na e gwa: “Lau na na moalemu badina una negai tadikaka taihu ida na nohova. Bona a hahegoada heheniva.”

² “Hisihisi badana” be matamamu neganai, tura namodia da ta abi dainai baita moalemu. (Apok. 7:14) Una dainai hari tura namodia baita abi na mai anina bada. (1 Petro 4:7, 8 ba duahi.) Ieremia ena amo ḡau momo baita dibadia diba, badina Ierusalem do se hadikaia neganai, ia na turana ese e durua bena e roho mauri. * Ieremia be ede baita tohotohoa toma?

3. (a) Dahaka dainai Ieremia ese ma haida na se bamodia? (b) Ieremia ese ena seketere Baruku be dahaka e hamaorolaia, bona dahaka e vara?

³ Laḡani 40 mai kahana lalodiai, Ieremia na Iehova asie badinaiava taudia bogaraḡidiai e nohova, idia haida na ia badinai e nohova bona reana varavarana haida danu Anatoto amo. (Ier. 11:21; 12:6) To ia turana namodia haida danu nonoho. Una negai ena hemami na seketere Baruku enai e herevalai bona ita danu iena hemami na ta dibamu badina Baibul ai e tore. (Ier. 8:21; 9:1; 20:14-18; 45:1) Baruku  ese Ieremia sivaraina e torea neganai, ia bona Ieremia edia hetura na namo herea, badina e helalokau heheniva bona e hemataurai heheniva.​—Ier. 20:1, 2; 26:7-11.

4. Iehova ese Ieremia e hamaoroa dahaka baine kara, bona una ese Ieremia bona Baruku edia hebamo be ede e hagoadaia toma?

⁴ Laḡani momo lalodiai, Ieremia na mai lalogoadana ida Ierusalem ai baine vara ḡauna na Israel taudia e hadibadia. (Ier. 25:3) Iehova ese taunimanima bae helalo-kerehai totona ia ese e ḡaukaralaia dalana ma ta na, Ieremia e hamaoroa Iena hahediba herevadia na heloku revarevana ai baine tore. (Ier. 36:1-4) Reana hua haida lalodiai Ieremia bona Baruku na Dirava ese e henidia ḡaukarana na e karaia hebou, bona ta dibamu una negai e herevalai ḡaudia amo e hahegoada heheni.

5. Ede ta diba tomamu Baruku na Ieremia turana namona?

⁵ Unu hahediba herevadia bae halasi negana e kau neganai, Ieremia na e diba momokani ia turana Baruku na heḡereḡere unu hereva baine halasi. (Ier. 36:5, 6) Baruku ese una ḡaukara na e haḡuḡurua ena be ena mauri na bema haboioa diba. Mani a laloa, Baruku ese Ieremia ena hereva heḡereḡerena dubu maḡuna ela bona ena ḡaukara e haḡuḡurua dainai, Ieremia na e moale dikadika. (Ier. 36:8-10) Iuda lohiadia ese Baruku e karaia ḡauna e kamonaia, bona e hamaoroa idia vairadiai una hereva baine duahia hedinarai. (Ier. 36:14, 15) Unu lohia ese Ieremia e gwaurai ḡaudia na King Iehoiakim e hamaorolaia. Idia ese Baruku e laloa bona e hamaoroa eto: “Aola, a komu, oi  bona Ieremia danu, bona tau ta basine diba umui na edeseni ai.” (Ier. 36:16-19) Una na hereva namona.

6. Ieremia bona Baruku na daḡedaḡe e davari neganai, dahaka e kara?

⁶ King Iehoiakim na Ieremia ese e torea herevana e kamonaia neganai e badu dikadika, bena una heloku revarevana na e gabua bona hereva e siai Ieremia bona Baruku bae dogodiatao. To Ieremia na se gari. Ia ese heloku revarevana ta ma e abia, Baruku e henia bena Iehova e herevalai ḡaudia na Baruku ese e toredia unu na “Iehoiakim, Iuda pavapavana, ese lahi ai e doua pepana herevadia iboudiai.”​—Ier. 36:26-28, 32.

7. Ieremia bona Baruku na e ḡaukara hebou neganai dahaka e vara?

⁷ Nega momo, hekwakwanai e haheaukalai heboumu taudia na tura namodia ai e laomu. Ta dibamu Ieremia bona Baruku na King Iehoiakim ese e hadikaia heloku revarevana gabunai, ma matamatana ta e torea hebou neganai, ta ta edia kara e diba namonamo bona tura namodia ai ela. Unu abidadama tataudia edia haheitalai ese ita be ede baine duruda toma?

8. Dahaka ese tura namodia idavaridia dalana baine koua diba, bona dahaka dainai basita hesiku?

⁸ Reana haida ediai eda hemami igwauraina na auka badina guna unu ta kara toma neganai haida ese laloda na e hahisidia. (Her. 18:19, 24) Eiava ta laloamu ita na asi eda nega eiava asi eda goada ma haida baita hetura henidia. To, namona na basita hesiku. Bema ta uramu hekwakwanai negadiai tadikaka bona taihu ese bae duruda, hari idia ediai eda lalohadai bona hemami igwauraina karana na basita daradaralaia. Una na tura korikorina ai baitala dalana ta.​—1 Pet. 1:22.

9. (a) Iesu be dahaka e herevalai turana ediai? (b) Dahaka dainai turamu enai emu lalohadai bona hemami ba herevalai karana ese emui hetura baine hagoadaia? Haheitalai ta ba gwauraia.

⁹ Iesu ese turana ediai ena lalohadai bona hemami e herevalai. (Ioa. 15:15) Ia baita tohotohoa diba bema turada vairadiai ta moalelaimu, ta lalohekwarahilaimu, bona ta lalohisihisilaimu ḡaudia baita herevalai. Ta ese oi e hereva henimumu neganai, ba hakala namonamo, bona reana bo dibamu umui emui lalohadai, hemami bona ura ḡaudia na heḡereḡere. Haheitalai na Cindy laḡanina na 29. Ia turana na Marie-Louise laḡanina na 67. Idia na Thursday daba iboudiai e haroro hebouva bona ḡau idauidau e herevalaiva. Cindy na e gwaumu: “Lau na bamogu ida ḡau mai anidia iherevalaidia karana na na moalelaiamu, badina unu amo na dibadia namonamomu.” Turamu ediai emu lalohadai bona hemami bo herevalaimu bona idia be herevamu neganai oi na bo hakalamu,  emui hetura karana na be goadamu. Una na Cindy e kara heḡereḡerena.​—Her. 27:9.

10. Hereva Lada-isidia 27:17 heḡereḡerena, tadikaka taihu ida baita ḡaukara heboumu neganai dahaka be varamu?

¹⁰ Ieremia bona Baruku ediai e vara bamona, bema ita na tadikaka bona taihu ida baita ḡaukara heboumu bona edia kara namodia baita itamu, idia na baita dibadia namonamomu bona turada namodia ai be laomu. (Hereva Lada-isidia 27:17 ba duahia.) Heḡereḡere, bema o haroro heboumu lalonai turamu na e abi daemu ḡaudia e herevalaimu eiava Iehova bona ena ura e herevalaimu neganai, emu hemami be ede bamona? Una ese emui hetura karana na be hagoadaiamu.

11-12. Ededia haheitalai ese e hahedinaraimu haroro ḡaukara ai ḡaukara hebou karana ese eda hetura karadia baine hagoadaia?

¹¹ Haheitalai rua baita herevalaimu, unu ese be hahedinaraimu haroro ḡaukara ai ḡaukara hebou karana ese eda hetura karana na be hagoadaiamu. Taihu ta, Adeline ia laḡanina na 23, ese turana Candice e noia se haroro momomu gabuna ta ai bae haroro. Ia na e gwa: “Ai na a ura emai haroro ḡaukara na baia goadalaia bona baia moalelaia. Bona lauma dalanai hahegoada baia abi na namo.” Idia raruosi e ḡaukara hebou ena namo be dahaka? Adeline na e gwa: “A haroro hebouva dinadia dokodiai emai hemami, e hagoadamai ḡaudia bona haroro ai Iehova ena hahekau a mamiava daladia a herevalaiva. Una herevahereva karana na a moalelaia bada bona emai hetura karana e hagoadaia.”

¹² Singul taihudia rua, Laila bona Marianne na France amo ela Bangui, una na Central Africa Republic ena kapitol siti, bona unuseniai wiki faiv lalodiai haroro ḡaukara e karaia. Laila na e gwa: “Lau bona Marianne na hekwakwanai momo a davari, to herevahereva namonamo  karana bona lalokau dainai emai hebamo na e goada. Marianne ese una gabu taudia edia noho dalana e manadaia, ena lalokau una gabu taudia ediai bona haroro ḡaukara e goadalaia karadia na ita neganai, egu hemataurai ia enai na e bada.” Oi na dia gabu ta baola bena unu hahenamo ba moalelai. To, emu gabu ai ma ta ida o haroromu neganai, una na nega namona ia ba dibaia bona emu hetura karana ba hagoadaia.

13. Dahaka baine vara diba bema turada ida baita ḡaukara heboumu?

¹³ Nega haida turada ida ta ḡaukara heboumu neganai, dia edia kara namodia mo ta itamu to edia kerere danu ta itamu. Dahaka ese baine duruda bena baita haheauka? Mani Ieremia ena haheitalai a laloa lou. Dahaka ese e durua haida edia namo e lalo bada to edia kerere na se lalodia?

14. Ieremia be dahaka e diba Iehova amo, bona una ese ede e durua toma?

¹⁴ Reana Ieremia bukana bona reana 1 bona 2 Hanua Pavapavadia bukadia na Ieremia ese e tore. Una ḡaukara ese ia na e hadibaia Iehova ese dia ḡoevadae taudia na e bogadia hisimu. Heḡereḡere, ia na e diba King Ahaba na ena dika amo e helalo-kerehai neganai, Iehova ese ia na e hamauria. (1 Han. 21:27-29) Danu, Ieremia na e diba Manase ese Iehova e habadua karadia na dika rohoroho, Ahaba ena dika na e hereaia. Ena be Manase na unu e kara toma, to Iehova ese ena dika na e gwautao badina ia na e helalo-kerehai. (2 Han. 21:16, 17; 2 Sis. 33:10-13) Unu sivarai ese Ieremia na e durua ia turana e kara henidia neganai, Dirava ena haheauka bona hebogahisi karadia e tohotoho.​—Sal. 103:8, 9.

15. Ieremia ese Baruku e durua neganai, edena dalai Iehova ena haheauka karana e tohotohoa?

¹⁵ Baruku na ena ḡaukara lalonai hekwakwanai e davari, to Ieremia ese e durua dalana mani aita laloa. Ieremia na se lalomanoka to turana Baruku iduruna totona ia ese Dirava ena hereva namodia amo e hagoadaia. (Ier. 45:1-5) Edia haheitalai amo dahaka ta dibamu?

16. Hereva Lada-isidia 17:9 heḡereḡerena, haida ida eda hetura basine dika totona dahaka baita kara?

¹⁶ Momokani tadikaka bona taihu na dia ḡoḡoevadadae. Una dainai, ta na turada namona ai bainela neganai namona na baita hekwarahi ia ida eda hetura karana baine goada. Bema turada na kerere ta e karaia, mai momokanida ida Dirava ena Hereva amo sisiba baita henia. (Sal. 141:5) Bona bema e hahisidamu namona na edia dika baita gwautao. Edia dika ta gwautaomu murinai, namona na ena kerere na ma basita gwauraia loulou. (Hereva Lada-isidia 17:9 ba duahia.) Namona na ina nega dikana lalonai tadikaka bona taihu edia kara namodia baita lalo bada, dia edia manoka ḡaudia! Unu baita kara tomamu neganai, eda hetura karana idia ida na be goadamu, badina hisihisi bada hereana lalonai tura unu bamodia ese ita na be durudamu.

17. Dahaka dainai baita gwa diba Ieremia na metau negadiai tura namona ai ela?

¹⁷ Metau negadiai peroveta tauna Ieremia na e hahedinaraia ia na tura namona. Heḡereḡere, pavapava ena ruma ai e ḡaukarava hesiai tauna Ebede-melek ese Ieremia na guri mai kopukopuna amo e hamauria murinai, Ebede-melek na hanua  lohiadia garidia e gariva bae alaia garina. Ieremia na una e diba neganai, se noho kava bona se lalo reana dala ta baine hekoho turana na una hahetoho baine hahanaia. Ena be ia na e hadiburaia, to turana Ebede-melek ihagoadana totona Iehova ena gwauhamata e herevalai henia.​—Ier. 38:7-13; 39:15-18.

18. Hereva Lada-isidia 17:17 heḡereḡerena, turada ta na hekwakwanai e davarimu neganai ede baita kara toma?

¹⁸ Hari ina negai, tadikaka bona taihu na hekwakwanai idauidau e davarimu. Heḡereḡere, disasta idauidau eiava taunimanima ese e havaramu dika ese e hametaudiamu. Nega unu bamodiai, ita haida ese idia na eda ruma ai baita abidia dae diba. Eiava ita haida na moni dalanai baita heduru diba. To iboudai ese Iehova baita noia diba idia baine durudia. Bema ta lalopararamu tadikaka ta o taihu ta na e lalomanokamu, reana basita dibamu dahaka baita gwaurai eiava ede baita kara toma. To ita iboudai na dala idauidau ai baita heduru diba. Heḡereḡere, nega baita ato turada baita bamoa. Bema turada na ḡau ta e herevalaiamu namona na baita hakala namonamo. Bona ia ida hahegoada sirina ta baita duahia hebou. (Isa. 50:4) Ḡau badana na ia heduru e uramu neganai, oi na heḡaeḡae ia ba durua.​—Hereva Lada-isidia 17:17 ba duahia.

19. Hari tadikaka taihu padadai eda hetura karadia baita hagoada ese vaira negai ede baine duruda toma?

¹⁹ Namona na hari tadikaka taihu padadai eda hetura karadia na bae goada. Dahaka dainai? Badina ita inaida na e uramu hereva koikoidia amo ita bae hapararada. Bona ita bogaraḡidai heiriheiri be havaraiamu. To basie kwalimumu. Idia ese eda lalokau karana na basie hadikaiamu. Be karamu ḡaudia ta ese eda hetura karana basine hadikaiamu. Momokani, eda hetura karana na hari nega dikana lalonai be goadamu bona baine mia ela bona hanaihanai!