1. Iehova ese manau taudia be ede e lalodia tomamu? Ba herevalaia.

IEHOVA ese manau taudia na e lalokau henidiamu. Manau taudia korikoridia na ia turana ai baela diba. To, “hekokoroku taudia na dauha amo e dibadiamu.” (Sal. 138:6) Ita iboudai na ta uramu Iehova baita hamoalea bona ia ese baine lalokau henida, una dainai manau karana baita hahedinaraia na namo.

2. Ina atikol ai be dahaka baita herevalaimu?

² Ina atikol ai ini henanadai toi baita haerelaimu: (1) Manau anina be dahaka? (2) Dahaka dainai baita manau na namo? (3) Bona eda noho daladia bae idau neganai, edena dala ai baita manau? Bona baita itaiamu, manau karana baita hahedinaraiamu neganai, Iehova baita hamoaleamu bona namo baita davarimu.​—Her. 27:11; Isa. 48:17.

3. Manau anina be dahaka?

³ Manau anina na, ta na basine laloamu ia ese ma haida na e hereadiamu bona se hekokorokumu. Baibul ese e hahedinaraiamu manau tauna na ena hetura karana Iehova Dirava ida bona tadikaka taihu ida e laloa badamu. Danu e lalopararamu dala haida ai ma haida ese ia na e hereaiamu.​—Flp. 2:3, 4.

4-5. Dahaka dainai baita laloamu haida na manau taudia?

⁴ Taunimanima haida toadia na vaitani e manaumu, to una na dia idia edia kara korikorina. Reana idia na hemarai taudia bona se herevaherevamu. Edia kastom eiava tamadia bona sinadia ese e hadibadia dainai e hamatauraimu bona ma haida e kara namo henidiamu. To reana hekokoroku karana na edia kara korikorina. Oibe, gabeai edia kara korikorina na be hedinaraimu.​—Luka 6:45.

⁵ Ma haida na asie hemaraimu bona edia lalohadai e gwauraimu, to una ese se hahedinaraiamu idia na e hekokorokumu.  (Ioa. 1:46, 47) Ena be unu bamona to bae henahua toho na namo, sibodia edia diba eiava goada ai bae tabekau na garina. Ena be ita haida na hemarai taudia eiava lasi, to iboudai baita hekwarahi manau karana baita hahedinaraia.

6. Korinto Ginigunana 15:10 heḡereḡerena, aposetolo Paulo ena haheitalai amo dahaka ta dibamu?

⁶ Aposetolo Paulo ena haheitalai mani aita laloa. Iehova ese e ḡaukaralaia hanua idauidau ai kongrigeisin e hamatama. Bona reana iena hesiai ḡaukara ai e kara ḡaudia ese Iesu Keriso ena aposetolo ese e kara ḡaudia na e hereadia. To, ia na se lalo ia ese ma haida na e hereadia. Mai manauna ida e gwa: “Badina be aposetolo iboudiai ese lau e hereagumu; lau na dia namo aposetolo bae gwauraigu, badina be Dirava ena ekalesia oreana na daḡedaḡe heniava.” (1 Kor. 15:9) Paulo ese e kara ḡaudia na momo, to e hahedinaraia Iehova ena hariharibada karana dainai iena hetura karana Iehova ida na goada. (1 Korinto 15:10 ba duahia.) Oibe, Paulo na Korinto ai e nohova Kristen taudia e tore henidia neganai, manau karana e hahedinaraia ena be kongrigeisin taudia haida ese e gwauraia dika.​—2 Kor. 10:10.

7. Edena dalai tadikaka ta ese manau karana e hahedinaraia?

⁷ Manau karana ai haheitalai namona e hahedinaraia tauna ta na Tadikaka Karl F. Klein, ia na guna Gavanin Bodi ena memba ta. Ena mauri sivaraina ese ita na be hagoadadamu. Ia na mai manauna bona mai momokanina ida ena manoka ḡaudia bona e davari hekwakwanaidia e herevalai. Heḡereḡere laḡani 1922 ai, ena nega ginigunana ruma-ta-ruma-ta haroro ḡaukara e karaia neganai, e mamia ienai na auka una dainai laḡani rua una ḡaukara se karaia. Gabeai, Betele ai e ḡaukarava neganai, tadikaka ta ese e sisiba henia murinai,  ia na e badu bona nega daudau lalonai una tadikaka na se hereva henia. Ia na lalometau dainai e gorerea, to gabeai e namo. To ia ese e moalelai hesiai ḡaukaradia na momo. Ia ese ena manoka ḡaudia e herevalai amo e hahedinaraia ia na e manau! Tadikaka bona taihu momo ese Tadikaka Karl bona iena mauri sivaraina na e lalotaomu. *

8. Edena dalai Petro Ginigunana 5:6 ese e hadibadamu Iehova baita hamoalea totona manau karana na mai anina bada?

⁸ Manau karana baita hahedinaraia badina badana na, una ese Iehova na e hamoaleamu. Aposetolo Petero ese una na e hahedinaraia ḡoevaḡoeva. (1 Petro 5:6 ba duahia.) Buka ladana, “Come Be My Follower” ese Petero ena hereva na ini e herevalaia toma: “Hekokoroku karana na poisini ta na heto. Una kara ese dika bada e havaraiamu. Iehova ese unu e kara tomamu tauna na basine ḡaukaralaia dibamu, herevana ena aonega na bada. . . . To Iehova ese asi aonegana tauna baine ḡaukaralaia diba bema baine manau. Bo manaumu neganai Iehova ese be hanamomumu.” * Iseda ura badana na Iehova baita hamoalea!​—Her. 23:15.

9. Dahaka dainai baita manaumu neganai, haida na be uramu ita turada ai baela?

⁹ Manau karana baita hahedinaraiamu neganai, Iehova be moalemu bona hahenamo ma haida danu baita davarimu. Bema baita manaumu, haida na be uramu ita bae hetura henida. Dahaka dainai unu ta gwau tomamu? Mani a laloa, o uramu taunimanima ede bamodia be oi turamu ai baela diba? (Mat. 7:12) Ita na asita uramu baita hetura henia tauna ena kara na ini bamona: Iena ura karadia mo bae kara eiava iena lalohadai mo bae badina. To, bema tadikakada na bae hekaha heheni, bae hebogahisi heheni bona bae manau, idia ibamodia karana na baita moalelaiamu. (1 Pet. 3:8) Bema baita manaumu bona taunimanima unu bamodia baita hetura henidiamu, idia danu be uramu ita bae hetura henida.

10. Manau karana ese ede be duruda tomamu mauri ai e varamu hekwakwanaidia baita haheaukalai?

 ¹⁰ Baita manaumu neganai eda mauri na baita moalelaiamu. Nega haida eda mauri lalodiai e varamu ḡaudia daidiai baita lalohisihisimu. Aonega tauna King Solomon na eto: “Hesiai taudia vada na itadia, hosi ai e guimu; bona hanua lohiadia vada na itadia, aedia amo e rakamu, hesiai taudia na heheto.” (Koh. 10:7) Nega haida taunimanima haida edia diba na bada bona ḡaukara namodia e karamu, to taunimanima ese asie hanamodiamu. Eiava haida na edia diba na dia bada to edia ḡaukara namodia daidiai taunimanima ese e hanamodiamu. Una dainai Solomon na e laloparara aonega karana na mauri ai e varamu ḡaudia na baita haheaukalai to basita lalohisihisilai. (Koh. 6:9) Bema baita manaumu una ese be durudamu eda mauri ai e varamu ḡaudia baita haheaukalaimu.

11. Ta ese e sisiba henidamu neganai, ede baita kara toma?

¹¹ Eda dina ta ta maurina lalonai manau karana baita hahedinaraia. Heḡereḡere: Sisiba ta abimu negadia ai. Bema ta na ita iduruda dainai e sisiba henida, reana badina ita na kerere badana ta ta karaia to asita lalopararalaia. To nega haida unu e vara tomamu neganai, ita ese baita karaiamu ḡauna ginigunana na sisiba na basita abia daemu. Reana una sisiba e heni dalana bona e sisiba henida tauna na basita ura heniamu. To bema baita manaumu, kara maorona baita hahedinaraia.

12. Hereva Lada-isidia 27:5, 6 heḡereḡerena, dahaka dainai ta ena sisiba baita abia dae na namo? Haheitalai ta ba gwauraia.

¹² Manau tauna ese sisiba na e abia daemu. Haheitalai na ina: Oi na Kingdom Hall ai. Tadikaka bona taihu haida ida o herevahereva murinai, oi na ta ese e boirimu tabe bena e hamaoromu oi isemu ai na aniani momorudia mimia. Vaia, oi na bo hemaraimu. To, oi e hamaoromu dainai oi e hadibamu tauna bo tenkiu heniamu. Reana bo laloamu matamanai ta ese bema hamaoromu haraḡa na namo! Una heḡereḡerena, bema tadikaka o taihu ta ese e sisiba henidamu, una sisiba e heni tauna baita tenkiu henia, badina nega e ato unu e kara toma. Unu e kara tomamu tadikaka o taihu na turada ai baita halaoa, basita inai henia.​—Hereva Lada-isidia 27:5, 6 ba duahi; Gal. 4:16.

13. Bema haida na kongrigeisin ai hahenamo e abimu, dahaka dainai nahuada baita toho?

¹³ Bema haida na hahenamo e abimu negadia ai. Elda ta ladana Jason na e gwa: “Bema haida na itadiamu hahenamo e abimu neganai, na lalomu dahaka dainai lau ese una hahenamo na asina abia.” Nega haida unu o hemami tomamu, a? Bema ta uramu Iehova dainai eda hesiai ḡaukara baita habadaia una na asi ena  kerere. (1 Tim. 3:1) To ta lalomu ḡaudia nahuadia baita toho na namo. Bema nahuada basita tohomu, baita hekokorokumu. Heḡereḡere, Kristen tauna ta na be laloamu ia na heḡereḡere kongrigeisin ai maduna baine hua. Eiava taihu ta na be laloamu: ‘Lau adavagu ese ina maduna na baine huaia namonamo diba, dia unu tadikaka haida heḡereḡeredia!’ Bema baita manaumu, ita ese hekokoroku karana baita dadaraiamu.

14. Haida hahenamo e abi neganai, Mose be ede e kara toma, bona iena haheitalai amo dahaka ta dibamu?

¹⁴ Haida na hahenamo e abi neganai, Mose ese e karaia karana amo ita na ḡau ta baita dibaiamu. Mose ese ena hegunalai maduna na e laloa bada. Iehova ese haida e abidia hidi ia ida bae ḡaukara hebou neganai, Mose be dahaka e kara? Ia na se mama. (Num. 11:24-29) Ia na e manau bona e ura ma haida ese bae durua hahemaoro ḡaukarana bae karaia. (Eso. 18:13-24) Una na dala namona unu amo Israel taudia ese heduru bae abi bona hahemaoro ḡaukarana na bae karaia haraḡa. Una ese e hahedinaraia Mose ese ma haida edia namo na e lalopararalai. Ita edai una na haheitalai namona! Bema baita manaumu herevana iseda diba na bada o maraḡi, Iehova ese ita na baine ḡaukaralaida diba. Ena be “Iehova na atai ai, to manau taudia na e haḡerediamu.”​—Sal. 138:6.

15. Laḡani gunadiai ededia sensi na momo ediai e vara?

¹⁵ Eda mauri ai sensi e varamu negadia ai. Laḡani momo lalodiai, Iehova e hesiai henia taudia haida edia asainmen na e idau. Heḡereḡere laḡani 2014 ai, orea amo hahediba herevana e halasia eto distrik inarina ḡaukarana na baine doko, bona unu tadikaka bona adavadia na revareva amo e hadibadia fultaim hesiai ḡaukara idauna ta bae karaia. Una laḡani ai danu sekit ḡaukara e karava taudia laḡanidia bae 70 neganai sekit ḡaukara na bae rakatania.  Bona laḡanidia 80 eiava e hanaia taudia na kongrigeisin ena elda oreana lalonai kodineita ḡaukarana basie karaia. Dia una mo to eme hanai laḡanidia lalodiai, Betele famli ai momo na e siaidia bae painia. Ma haida na fultaim hesiai ḡaukara e rakatania badina gorere, famli madunadia eiava ma ḡau haida daidiai.

16. Tadikaka taihu edia noho dalana e idau neganai, manau karana be ede e hahedinaraia toma?

¹⁶ Unu asainmen e haidau neganai, tadikaka bona taihu momo ediai na e auka. Badina idia na edia asainmen gunana na e manadalaia, bona una na laḡani momo lalodiai e karaia. Haida na edia asainmen gunadia e rakatani dainai e lalohisihisiva. To gabeai una hemami na e hanaia. Dahaka dainai? Badina Iehova enai edia lalokau na bada. Idia na e diba idia na Dirava e gwauhamata henia​—dia edia asainmen. (Kol. 3:23) Herevana edena asainmen e karaiamu to idia na e ura dikadikamu Iehova bae hesiai henia mai manaudia ida. Edia ‘lalo-haguhi na ia enai e taho kau,’ badina dibadia Ia ese e lalodiamu.​—1 Pet. 5:6, 7.

17. Dahaka dainai ta moalemu Baibul ese e hagoadadamu manau karana baita hahedinaraia totona?

¹⁷ Ta moalemu badina Baibul ese e hagoadadamu manau karana baita hahedinaraia. Baita manaumu neganai, ma haida ida eda hetura karana na be namomu. Mauri ena hekwakwanai idauidau baita haheaukalai dibamu. Bona hereadaena na, Iehova, Tamada gubai e nohomu ida, eda hetura karana na be namomu. Ta moalemu badina ena be Ia na “Atai bona Herea-dae Diravana,” to Ia ese manau taudia na e lalokau henidiamu bona e lalodia badamu.​—Isa. 57:15.