1. Taihu momo be dahaka metau e davarimu? (Rau 1 laulauna ba itaia.)

ITA NA ta moalemu badina kongrigeisin ai taihu momo herea ese ḡaukara idauidau e durumu! Heḡereḡere, hebou ai tok e henimu o henanadai e haerelaimu, bona haroro ḡaukara e karaiamu. Haida be Kingdom Hall ihaḡoevana ḡaukarana e duruamu, bona idia ese tadikaka bona taihu e lalodia badamu. To, idia ese metau idauidau e davarimu danu. Haida be tamadia sinadia iahudia e naridiamu. Ma haida be edia ruma taudia ese e daḡedaḡe henidiamu. Bona haida be asi adavadia to e ḡaukara goadamu natudia bae ubudia helaoreana.

2. Dahaka dainai taihu baita durudia na namo?

² Dahaka dainai taihu baita durudia na namo? Badina taunimanima ese hahine na asie matauraidiamu. To Baibul na e gwaumu, namona na hahine baita durudia. Heḡereḡere Roma ai, aposetolo Paulo ese kongrigeisin e noidia Foibe bae abia dae bona ‘ena ḡaukara ai bae durua.’ (Roma 16:1, 2) Guna Paulo na Farisea tauna ta neganai, ia ese hahine na se matauraidiava. To hari ia na Kristen tauna ta dainai, ia ese Iesu e tohotohoa bona hahine e matauraidia bona e hebogahisi henidiava.​—1 Kor. 11:1.

3. Iesu ese hahine be ede e kara henidia tomava? Dirava ena ura e karava hahinedia be ede e lalodia tomava?

³ Iesu ese hahine iboudiai na e matauraidiava. (Ioa. 4:27) Ena be Iuda tomadiho ena hegunalai taudia ese hahine na asie lalodia badava, to Iesu na dia unu bamona. Momokani, Bible Encyclopedia ta na e gwaumu: “Nega ta ai Iesu ese hahine ihahemaraidia herevadia se gwaurai eiava se gwau henidia.” To, Iesu ese ia Tamana ena ura e karava hahinedia na e matauraidia badava. Momokani, ia ese na e gwauraidiava, “taihugu,” bona ia ese idia bona tatau na iena ruma bese  taudia ai e halaodiava na heto.​—Mat. 12:50.

4. Ina stadi ai dahaka baita herevalaimu?

⁴ Iesu ese Dirava ena hesiai hahinedia na nega iboudiai e durudiava. Ena kara amo e hahedinaraiava ia na idia e lalodia badava bona idia daidiai e herevava. Namona na taihu ilalodia bada karana ai Iesu baita tohotohoa daladia mani aita herevalai.

5. Dahaka dainai taihu haida ese ma haida bae bamodia na auka?

⁵ Ita iboudai, tadikaka bona taihu, baita hebamo namonamo na mai anina bada. To taihu haida na e gwaumu idia unu bae kara toma na taina auka. Dahaka dainai? Mani aita itaia. Taihu Jordan * eto: “Lau na singul dainai, nega haida ai na lalomu kongrigeisin ai lau na asi egu ḡaukara.” Gabu idauna ma ta ai painia ḡaukara e karaiamu taihu ta, Kristen, eto: “Kongrigeisin matamatana ta bo laomu neganai, reana bo mamiamu oi na asi bamomu.” Tadikaka taihu haida danu reana unu be gwau tomamu. Taihu haida edia famili na dia Iehova ena Witnes dainai reana ruma ai se noho namonamomu, eiava idia ese e mamiamu tadikaka taihu ese idia na se bamodiamu. Taihu haida na sibodia mo ruma ai e nohomu badina be gorere ta e davaria o ruma ai gorere tauna ta e nariamu. Annette eto: “Ena be tadikaka taihu ese e boiriguva baia moale hebou, to asina laova, badina sinagu na lau sibogu ese na nariava.”

6. Luka 10:38-42 ai, Iesu ese Mareta bona Maria be ede e durudia toma?

⁶ Nega haida ai Iesu ese taihu e bamodiava, bona ia na idia turadia korikorina ai ela. Ia turana Maria bona Mareta aita lalodia, idia raruosi na singul. (Luka 10:38-42 ba duahi.) Iesu ese ena hereva bona kara amo idia na asie hagaridia. Maria na Iesu ena hahediba hahinena ta bona ia na asi ena gari ida Iesu aena badinai e helai. * Bona Maria ese Mareta se durua neganai, Mareta na e lalohisihisi​—ia na asi ena gari ida ena lalohisihisi na Iesu e hamaorolaia. Una nega ai, Iesu ese idia raruosi e durudia namonamo. Bona Iesu ese idia bona mai taihudia, Lasaro, ida e lalokau henidiava, badina nega haida ai ia ese e vadivadi henidiava. (Ioa. 12:1-3) Una dainai, Lasaro e gorere neganai, maoromaoro Maria bona Mareta na Iesu ena heduru e tahua.​—Ioa. 11:3, 5.

7. Iseda taihu baita hagoadadia dalana ta be dahaka?

⁷ Taihu haida na hebou e maimu badina una na nega namona tadikaka taihu ida bae hebamo totona. Una dainai, ita na ta uramu hebou ai idia baita welkam henidia, baita hereva henidia, bona baita hamaorodia ta moalemu badina hebou ai ta itadiamu. Jordan ma eto: “Lalogu e goadamu badina be hebou ai egu haere daidiai ma haida ese lau e tenkiu henigumu, o haroro ḡaukara ai e bamogumu, o dala ma haida ai e durugumu.” Namona na taihu baita hadibadia idia na ta lalokau henidiamu. Taihu Kia eto: “Bema hebou ta na reaiamu, dibagu ta ese text message be siaiamu, lau be sekegumu. Una ese e hadibagumu, tadikaka bona taihu ese lau na e lalokau henigumu.”

8. Iesu baita tohotohoa diba daladia ma haida be dahaka?

 ⁸ Iesu e kara heḡereḡerena, nega baita ato taihu baita bamodia totona. Reana baita boiridia eda ruma baema, baita aniani hebou eiava moale karadia ma haida baita kara diba. Nega unuhetomadia ai, namona na iseda hereva amo baita hahegoada heheni. (Roma 1:11, 12) Elda taudia ese Iesu bae tohotohoa ḡoevaḡoeva na namo. Iesu dibana, haida ediai singul maurina na mai hekwarahina, to ia ese e hahedinaraia danu, headava maurina o natu ihavarana maurina ena moale na se mia daudaumu ḡauna. (Luka 11:27, 28, NWT) To, Iehova ena hesiai ḡaukara e atoa gunamu taudia be vaia edia moale na asi dokona.​—Mat. 19:12.

9. Elda taudia ese taihu bae durudia daladia haida be dahaka?

⁹ Elda taudia ese Kristen hahinedia na idia taihudia o sinadia ai bae halaodia na namo. (1 Tim. 5:1, 2) Nega haida elda taudia ese hebou vairadiai bona muridiai taihu bae hereva henidia. Kristen ma eto: “Elda ta na e itaia lau na bisi bada hereava dainai, e noigu egu sediual o program baine itaia. Iena kara namona dainai na tenkiu henia.” Nega iboudiai, elda taudia ese nega be atomu taihu ida bae herevahereva neganai,  taihu na be itaiamu elda ese idia na e lalodia badamu. * Annette ese elda taudia ida ba herevahereva hanaihanai ena namo na e herevalaia. Ia na e gwa: “Lau ese idia na dibadia namonamo bona idia ese lau e dibagu namonamo. Una dainai, hekwakwanai negadiai, lau na asina garimu idia baina hereva henidia totona.”

10. Taihu edia hemami baine hanamoa ḡauna ta be dahaka?

¹⁰ Ita iboudai, tatau o hahine, ta moalemu bema iseda ḡaukara namona ta dainai ma haida ese ita e tenkiu henidamu. To, idia ese ita se tenkiu henidamu neganai, asita moalemu. Taihu Abigail na singul bona painia ḡaukara e karaiamu to e laloa ma haida ese ia na se laloamu, ia eto: “Toana na idia ese lau vara bougu bona tamagu sinagu mo e dibadia. Nega haida, na laloamu lau na ta ese se itagumu o se lalogumu.” To, taihu Pam ena hereva mani aita laloa. Iena singul maurina lalonai, ia na laḡani momo misinari ḡaukara e karaia. Gabeai, ia na e lou, tamana bona sinana baine naridia totona. Ena be hari ia laḡanina na 70, to dounu painia ḡaukara e karaiamu. Pam eto, “Lau e durugu badamu ḡauna na, bema haida ese lau e tenkiu henigumu.”

11. Edena dalai haroro ḡaukara ai Iesu ese ia e bamoava taihu e tenkiu henidia?

¹¹ Iesu ese taihu e tenkiu henidia badina “edia ḡau” o kohu amo ia e durua. (Luka 8:1-3) Dia una mo, to Iesu ese Dirava ena ura na taihu e hadibalaidia danu. Heḡereḡere, ia ese taihu e hamaorodia ia na baine mase to ma baine mauri lou. (Luka 24:5-8) Ia ese aposetolo taudia bona unu taihu e hadibadia namonamo, unu amo gabeai bae vara hahetoho idauidau bae hanaidia totona. (Mar. 9:30-32; 10:32-34) Momokani, Iesu e arestia neganai, ena be aposetolo taudia na e heau, to taihu haida na Iesu badibadinai gini bona e sapotia ela bona Iesu na au ai e mase.​—Mat. 26:56; Mar. 15:40, 41.

12. Iesu ese taihu e henidia ḡaukara badana be dahaka?

¹² Iesu ese ḡaukara badana na taihu e henidia. Heḡereḡere, iena toreisi lou e itaia taudia ginigunadia na taihu. Ia ese unu taihu e henidia ḡaukara badana na, baela aposetolo taudia bae hadibadia, Iesu na mase amo e toreisi lou. (Mat. 28:5, 9, 10) Bona Pentekoste 33 C.E. ai, lauma helaḡa ese taihu danu reana e horodia. Badina, una horoa taihudia ese “Dirava ena hoa ḡaudia” na ma haida e herevalai henidiava, edia gado korikori ai.​—Apos. 1:14; 2:2-4, 11.

13. Hari taihu be ededia ḡaukara idauidau e durumu? Edena dalai taihu baita tenkiu henidia edia ḡaukara namodia daidiai?

¹³ Iehova ena hesiai ḡaukara e goadalaiamu taihudia baita tenkiu henidia be namo. Idia e karamu ḡaukaradia haida bini: Ruma e haginimu bona e hanamomu, idau gado grup taudia ida haroro ḡaukara e karaiamu, bona Bethel ai e ḡaukaramu. Eiava disasta relief ḡaukara, eda pablikeisin ena trensleisin ḡaukara, o painia o misinari ḡaukara e durumu. Tadikaka e karamu heḡereḡeredia, taihu na baela diba painia ḡaukara ena skul, Basileia Evanelia Ena Skul (SKE), bona Gilead Skul. Danu, taihu na adavadia e durudia kongrigeisin bona orea ena maduna badadia bae huaia namonamo totona. Momokani, unu tadikaka, o “harihari ḡaudia,” na e kwalimumu badina be adavadia ese e sapotidia namo hereamu. (Efe. 4:8) Oi be o uramu edena dalai taihu ba durudia edia ḡaukara bae karaia namonamo totona?

14. Salamo 68:11 ai, elda taudia mai aonegadia be dahaka e karamu?

 ¹⁴ Elda taudia mai aonegadia na e lalopararamu, taihu iboudiai na “tuari orea badana ta na heto,” bona nega iboudiai idia ese sivarai namona e harorolaiamu. (Salamo 68:11 ba duahia; NWT) Bona elda taudia na taihu edia ekspiriens ese e durudiamu danu. Taihu Abigail lalona e goadamu badina nega haida elda taudia ese e nanadaia, edena haroro herevana be haroro ḡaukara ai bae ḡaukaralaia diba. Taihu na eto: “Una amo na itaiamu Iehova ena orea lalonai lau na ḡaukara badana ta na karaiamu na heto.” Danu, elda taudia na e lalopararamu lo taihu goadadia ese taihu matamatadia bae durudia, hekwakwanai idauidau bae hanaidia totona. (Tito 2:3-5) Momokani, iseda taihu baita tenkiu henidia badina be maoro!

15. Ededia negai danu taihu baita durudia na namo?

¹⁵ Metau e davarimu taihudia baita durudia na namo. (Isa. 1:17) Heḡereḡere, vabu ta o divorce taihu ta na e uramu lawyer ta baine hereva henia, eiava taihu e uramu adavana ena ḡaukara ta baine karaia. Eiava taihu burukana ta e uramu doctor baine hereva henidia. Eiava painia taihu ta na Iehova ena orea ena project haida e durumu to se haroro momo dainai ma haida ese e maumauraiamu. Iseda taihu be ededia dala ma haida ai baita durudia diba? Mani Iesu ena haheitalai aita laloa lou.

16. Mareko 14:3-9 ai, edena dalai Iesu ese Maria e durua?

¹⁶ Iesu ese taihu na e durudiava danu. Nega ta ai, Iesu na se ura Mareta ese Maria baine maumauraia. (Luka 10:38-42) Nega iharuana ai, haida na e gwauva Maria na abi hidi kererena e karaia, to Iesu ese edia maumau karana e koua. (Mareko 14:3-9 ba duahi.) Iesu ese Maria ena lalohadai na e lalopararalaia dainai e tenkiu henia, eto: “Kara namona egu ai vada eme karaia. . . . Ena diba heḡereḡerena ai vada e kara henigu.” Bona Maria sivaraina baine bada karana na Iesu ese e perovetalaia, eto: “Sivarai namo bae harorolaia gabudia iboudiai, tanobada heḡeḡemadai, hari eme karaia karana bae gwauraia, ia ihelalolaina”​—hari dina ai, tanobada heḡeḡemadai, ina atikol na unu e kara tomamu. Iesu ese Maria ena kara namona e herevalaia bona ia ma eto tanobada ibounai Maria sivaraina namona bae harorolaia na idau vaitani! Hereva unuhetomadia ese reana Maria lalona e hagoadaia, ena be ma haida ese e gwauraia dikava!

17. Ededia negai oi ese taihu ba durudia diba? (Haheitalai ba gwauraia)

¹⁷ Ededia negai oi ese taihu ba durudia diba? Ina haheitalai a laloa. Taihu ta adavana na dia Iehova ena Witnes, bona pablisa haida ese e itaiamu una taihu na hebou e mai leiti momomu to hebou muridiai be ruma e lao haraḡamu. Bona idia ese e itaiamu, taihu na nega ta ta ai natuna e mailaidiamu hebou. Pablisa ese taihu e maumauraiamu, e uramu taihu ese adavana baine noia goadagoada unu amo natuna na hebou baine mailaidia hanaihanai. To, pablisa ese taihu ena mauri na se lalopararalaiamu. Taihu na dia heḡereḡere ena sediual baine badinaia ḡoevaḡoeva totona, bona tau ese natu ena disisin baine karaia na maoro. Oi ese taihu be ede bo durua tomamu? Bema oi ese taihu bo tenkiu heniamu bona ena hekwarahi sivaraina na ma haida ediai bo herevalaiamu neganai, reana oi ese maumau herevana bo kouamu.

18. Ededia dala ma haida ai iseda taihu baita durudia diba?

¹⁸ Dala ma haida ai danu iseda taihu baita durudia diba. (1 Ioa. 3:18) Taihu Annette  na sinana gorerena e nariamu, bona eto: “Tadikaka bona taihu na e maimu sinagu eme nariamu, una amo ḡau ma haida baina kara diba, eiava ma haida be aniani e mailaimu. Unu amo na itaiamu idia ese lau e lalokau henigumu bona kongrigeisin ai lau na mai egu ḡaukara.” Taihu Jordan danu heduru e abi. Tadikaka ta ese motuka baine hanamoa dalana e hadibaia. Jordan eto: “Lau na moale badina tadikaka bona taihu na egu seifti e laloa badamu.”

19. Elda taudia ese taihu bae durudia diba daladia ma haida be dahaka?

¹⁹ Danu, elda taudia ese taihu e durudiamu. Idia dibadia, Iehova na e uramu taihu na baita kara namo henidia. (Iak. 1:27) Una dainai, idia na Iesu ena aonega karana e tohotohoamu, heḡereḡere taravatu asi anidia na asie atomu to e uramu bae laloparara bona bae heduru. (Mat. 15:22-28) Elda taudia edia heduru dainai, taihu na be mamiamu Iehova bona ena orea ese idia na e lalokau henidiamu. Kia ena grup ena elda na e kamonai Kia na gabu matamatana ta be laomu neganai, maoromaoro dala e kara heduru baine heni totona. Kia eto: “Una ese egu lalohekwarahi ibounai e kokia. Elda taudia edia hahegoada herevadia bona heduru karadia ese e hadibagumu, kongrigeisin ai lau na mai egu ḡaukara badana bona lau be durugumu taudia na momo herea.”

20-21. Edena dalai iseda taihu iboudiai baita lalokau henidia?

²⁰ Eda taihu momo herea edia hekwarahi bona haheitalai namona dainai, namona na baita hagoadadia. Iesu ena haheitalai amo tame itaia, namona na idia baita bamodia o baita dibadia namonamo. Dirava ena hesiai ḡaukara e duruamu dainai baita tenkiu henidia. Bona dala idauidau ai baita durudia diba.

²¹ Aposetolo Paulo ese ena revareva dokonai, ia ese taihu 9 ladadia e gwaurai o e tore hedinarai. (Roma 16:1, 3, 6, 12, 13, 15) Unu taihu na reana Paulo ena hahenamo o tenkiu herevadia ese lalodia e hagoada. Ita danu, namona na kongrigeisin taihudia iboudiai baita hagoadadia. Unu amo idia na bae diba ita na eda ruma bese taudia na heto bona ta lalokau henidiamu.