1. Iesu ese haoda tataudia 4 e boiridia dahaka bae kara totona, bona idia be dahaka e kara?

HAHEDIBA taudia Petro, Andrea, Iakobo, bona Ioane na haoda tataudia. Reana idia na e hoa badina Iesu ese e boiridia, eto: “Murigu ai a raka; lau ese taunimanima ihaoda-henidia taumui ai baina halaomui.” * Idia be dahaka e kara? Baibul e gwaumu: “[Maoromaoro] idia ese edia reke e rakatani, ia murinai e raka.” (Mat. 4:18-22; NWT) Una disisin ese edia mauri e haidaua vaitani. Badina idia na dia gwarume korikori e veridiava, lasi, to taunimanima e veridiava. (Luka 5:10) Hari ina negai, Iesu ese hereva momokani e ura heniamu taudia na unu e boiridia tomamu. (Mat. 28:19, 20) Oi be Iesu ena boiboi o abia dae bona taunimanima ihaoda-henidia tauna ai vada ola, a?

2. Taunimanima ihaoda-henidia taudia ai baela ena disisin be daika ese baine lalohadailaia namonamo ḡuna na namo? Bona dahaka ese baine duruda una disisin baita karaia totona?

² Reana oi na Baibul o stadilaia bona sensi momo o kara, bona hari o uramu bavabia hidi ḡauna binai: Pablisa ta ai baola be namo o lasi. Bema Iesu ena boiboi iabi daena na doini o daradaralaiamu, namona na basio lalomanoka. Reana oi na o uramu ba nari sisina badina dibamu ina disisin na mai anina bada. Vaia, Baibul e gwaumu Petro mai bamona ida be “maoromaoro” edia reke korikori e rakatani.  To, idia ese una disisin na asie karaia haraḡa. Idia na hua 6 gunadiai Iesu e dibaia bona e abia dae ia na Mesia. (Ioa. 1:35-42) Reana oi danu Iehova bona Iesu sivaraidia na vada mai dibamu, bona hari o uramu Iehova turana ai baola. To pablisa ai baola ena disisin do asio karaia lalonai, namona na do ba lalohadailaia namonamo guna. Dahaka ese Petro, Andrea bona ma haida e durudia dainai disisin maorona e karaia?

3. Ededia kara ese be durumumu Iesu ena boiboi bavabia dae totona?

³ Iesu ena hahediba taudia ginigunadia edia ura na e bada, idia na mai aonegadia, mai goadadia, bona mai boga auka dibadia. Una dainai, idia na taunimanima ihaoda-henidia taudia namodia ai ela. Ina atikol ai bo itaiamu edena dalai unu kara ba manadalai, unu amo oi na Keriso ena hahediba tauna namona ai baola.

4. Dahaka dainai Petro ese taunimanima ihaoda-henidia ḡaukarana e ura henia?

⁴ Petro na gwarume e veriva, unu amo ena ruma bese e ubuava​—una na iena moni ḡaukara na heto. To danu, haoda na ia ena ura mase ḡauna. (Ioa. 21:3, 9-15) Una dainai, ia ese taunimanima ihaoda-henidia ḡaukarana na e ura henia danu. Bona Iehova ena heduru dainai, Petro ese una ḡaukara na e karaia namonamo.​—Apos. 2:14, 41.

5. Luka 5:8-11 ai, Petro e gari badina be dahaka? Dahaka ese ita baine duruda basita gari totona?

⁵ Ita ese haroro ḡaukara ta karaiamu bona ta ura heniamu badina badana binai: Ita ese Iehova ta lalokau heniamu. Una ese baine duruda diba, lalohadai kereredia baita dadaraidia. Iesu ese Petro e boiria taunimanima ihaoda-henina tauna ai bainela neganai, ia ese e hamaoroa: “Basio gari.” (Luka 5:8-11 ba duahi.) Petro na hahediba tauna ai bainela murinai bae  vara ḡaudia garidia na se gari. To, ia na e hoa dikadika badina be Iesu ese e durudia gwarume momo herea e veri—⁠Petro dibana Iesu na hoa karana ta e karaia, bona ia na se ura Iesu ida baine ḡaukara hebou badina ia na kara dika tauna. Reana oi danu o garimu, eiava Keriso ena hahediba tauna ai baola murinai bae vara ḡaudia garidia o garimu. To bema Iehova, Iesu bona dekemu taudia bo lalokau henidiamu, oi ese Iesu ena boiboi bo abia daemu, taunimanima ihaoda-henidia tauna ai bo laomu.​—Mat. 22:37, 39; Ioa. 14:15.

6. Haroro ḡaukara ta ura heniamu badidia ma haida be dahaka?

⁶ Haroro ḡaukara ta ura heniamu badidia ma haida aita herevalai. Ita na ta uramu Iesu ena hahegani baita badinaia, ia eto: “Baola, . . . hahediba ai ba halaodia.” (Mat. 28:19, 20) Danu, ita ese haroro ḡaukara ta karaiamu badina be taunimanima na ‘haida ese e haberodia bona e dadaraidia’ na heheto, bona idia ese Basileia sivaraina bae dibaia haraḡa na ḡau badana. (Mat. 9:36) Iehova na e uramu taunimanima iboudiai ese hereva momokani bae dibaia bona bae mauri.—1 Tim. 2:4.

7. Roma 10:13-15 ai, edena dalai haroro ḡaukara na mai anina bada?

⁷ Ita ese haroro ḡaukara ta karaiamu bona ta ura heniamu badina dibada ina na hahemauri ḡaukarana. Haoda tauna ese e verimu gwarumedia na e animu o e hoihoilaimu, to ita ese taunimanima ta veridiamu, unu amo bae mauri totona. —Roma 10:13-15 ba duahi; 1 Tim. 4:16.

8-9. Haoda tauna ese dahaka ḡau haida baine diba na namo, bona dahaka dainai?

⁸ Iesu ena negai, Israel haoda tauna ese e veriva gwarumedia toadia na dibana. (Lev. 11:9-12) Danu, ia na dibana edena gabu ai gwarume momo e davarimu. Nega momo, gwarume na ranu namona bona aniani momo gabudia ai e nohomu. Haoda negadia be mai anina bada danu, a? Pacific motumotu tadikakana ta ese misinari ta e boiria bae ha haoda neganai, e hamaoroa gwarume iveridia na mai negadia. Misinari eto, “Kerukeru dabai 9 o’klok baita hedavari.” To tadikaka eto, “Lau na uramu ḡau ta baina hadibamu. Gwarume baita veri negadiai baitala be namo, a dia iseda ura negadiai baitala.”

⁹ Una heḡereḡerena, hahediba taudia ginigunadia na taunimanima momo e davaridiava negana bona gabuna ai e harorova. Iesu ena aposetolo taudia na dubu helaḡa, synagogue, ruma-ta-ruma-ta, bona maket gabudiai e harorova. (Apos. 5:42; 17:17; 18:4) Ita danu taunimanima baita davaridia negana bona gabuna baita diba be namo. Plan haida na baita haidau, unu amo momo baita davaridia negana maorona bona gabuna ai baita haroro. —1 Kor. 9:19-23.

10. Iehova ena orea ese ita be dahaka tulu idauidau e henida?

¹⁰ Haoda tauna na tulu maorona baine abia kau bona iḡaukaralaina dalana baine diba na namo. Ita danu haroro ḡaukara ena tulu maorona baita abia kau. Bona una tulu iḡaukaralaina dalana baita diba danu. Iesu ese hahediba taudia na e hadibadia namonamo, edena dalai taunimanima ihaoda-henidia ḡaukarana bae karaia namonamo. Ia ese e hamaorodia dahaka bae abi kau, edeseniai bae haroro, bona dahaka bae gwaurai. (Mat. 10:5-7; Luka 10:1-11) Hari ina negai, Iehova ena orea na Hahediba Toolbox ta mai ena tulu idauidau e halasia. * Bona orea ese e hadibadamu ini tulu idauidau be ede baita ḡaukaralaidia toma. Una  treinini dainai, iseda ḡaukara lalonai asita garimu bona taunimanima ta hadibadia namonamomu.—2 Tim. 2:15.

11. Dahaka dainai taunimanima ihaoda-henidia ḡaukarana lalonai baita goada be namo?

¹¹ Haoda taudia na mai goadadia. Nega haida davara ai e vara takumu ḡaudia danu e haheaukalaimu. Heḡereḡere, hanuaboi ai idia na ḡaukara haida be karamu badina be hurehure, medu o lai e kau. Taunimanima ihaoda-henidia ḡaukarana lalonai danu baita goada be namo. Badina haroro ḡaukara ta hamatamaia bona ma haida ta hadibadia ita na Iehova ena Witnes neganai, reana ruma bese na asie moale, o turada ese e kirikirilaida, bona iseda haroro herevana e dadaraia. To, una na asita hoalaiamu. Badina Iesu ena sisiba be, ia ese ena hahediba taudia na be siaidiamu, dagedage taudia bogaragidiai na heheto.—Mat. 10:16.

12. Iosua 1:7-9 ai, edena dalai iseda goada baita habadaia diba?

¹² Ededia dalai emu goada ba habadaia diba? Ginigunana be, oi ese bavabia dae Iesu ese guba amo haroro ḡaukara e gunalaiamu. (Ioa. 16:33; Apok. 14:14-16) Iharuana be, bavabia dae Iehova ena gwauhamata na be ḡuḡurumu, o dabumu ḡaudia iboudiai na be henimumu. (Mat. 6:32-34) Emu abidadama unu hetomana ese emu goada baine habadaia. Petro bona aposetolo ma haida ese haoda e rakatania bena Iesu murinai e raka neganai, idia ese e hahedinaraia edia abidadama na goada herea. Oi danu emu ruma taudia bona turamu o hadibadia oi na Iehova ena Witnes  ida Baibul o stadilaiamu bona edia kongrigeisin heboudia o laomu neganai, oi ese o hahedinaraia emu abidadama na goada herea! Bona emu kara bona mauri o haidau, bena Iehova ena taravatu o badinamu. Una na abidadama bona goada taudia edia kara. Nega iboudiai emu goada ba habadaia, bona ba helalotao, “Iehova, emu Dirava, ese e bamomumu, emu laolao iboudiai lalodiai.”​—Iosua 1:7-9 ba duahi.

13. Ededia dalai ḡuriḡuri bona lalohadai loulou karadia amo emu goada be habadaia diba?

¹³ Ededia dala ma rua ai emu goada ba habadaia? Ba ḡuriḡuri ba goada totona. (Apos. 4:29, 31) Iehova ese emu ḡuriḡuri iboudiai be haerelaidiamu bona oi na basine rakatanimumu. Nega iboudiai, ia ese oi na be durumumu. Danu, Iehova ese gunaguna ma haida e hamauridia dalana ba lalohadailaia loulou. Ma danu, ia ese oi e durumu metau idauidau o hanaidiamu bona emu mauri o senisiamu dalana na ba lalohadailaia loulou. Davara Kakakakana ai Israel taudia e hamauridia Diravana na oi be durumumu Keriso ena hahediba tauna ai baola totona. (Eso. 14:13) Salamo e torea tauna ena abidadama ba tohotohoa, eto: “Iehova na lau badibadigu ai dainai lau na asina garimu: taunimanima ese ede bae hadikagu toma?”​—Sal. 118:6.

14. Masae bona Tomoyo edia ekspiriens amo dahaka o dibaiamu?

¹⁴ Emu goada ba habadaia dalana ma ta binai: Iehova ese hemarai taudia e durudia goada taudia ai ela. Taihu Masae ena ekspiriens mani a laloa. Ia na hemarai kekenina, bona asi dibana edena dalai ma haida baine haroro henidia. Ia ese idau taudia baine hereva henidia na auka, una na heḡereḡere ia varanai na haba latana ta gini bona idaena na auka. To, ia na e ḡaukara goada Dirava bona dekena taudia baine lalokau henidia totona. Ia ese e laloatao ita na nega dokonai ta nohomu dainai, Dirava e noia baine durua haroro ḡaukara baine ura henia totona. Hari, ia na asi garina ida taunimanima idauidau e haroro henidiamu, bona nega haida heduru painia ḡaukara e karaiamu. Iehova ese pablisa matamatadia na goada baine henidia danu. Taihu Tomoyo ena ekspiriens mani a laloa. Nega ginigunana ai, ia ese ruma-ta-ruma-ta haroro ḡaukara e karaia neganai, ruma hahinena ta ese e lolo henia, eto: “Launa asina uramu Iehova ena Witnes baina hereva henidia!” bena iduara e koua lalodika. Tomoyo na asi garina ida ia e bamoa taihuna e hamaoroa: “Iena hereva ome kamonai, a? Lau baina hereva na asi anina, bona ia na mai dibana lau na Iehova ena Witnes hahinena. Lau na moale dikadikamu!” Hari, Tomoyo na regula painia ḡaukara e karaiamu.

15. Edena dalai haoda dikadika taudia ese boga auka karana e hahedinaraiamu? Dahaka dainai ita ese boga auka karana baita hahedinaraia na ḡau badana?

¹⁵ Haoda dikadika taudia na be hekwarahimu guna bema kara ḡaudia bae haḡuḡuru totona. Heḡereḡere, idia na be hekwarahimu daba vaburai bae noga, bena basie mahuta, to bae haoda ela bona edia ura ḡauna bae abia, herevana weather o nega na dika. Ita danu baita boga auka bema ta uramu baita haheauka bona iseda ḡaukara baita haḡuḡurua.​—Mat. 10:22.

16. Dahaka ese baine duruda ḡau ta baita karaia, ena be mai hekwarahina?

¹⁶ Nega momo ita na ta uramu ḡau momo na dala haraḡadia ai baita kara. To nega haida, ḡau badadia ikaradia na mai hekwarahina. Una dainai, boga auka karana baita dibaia na namo. To, namona na tau ta ese ita baine duruda o baine hadibada, unu amo ita siboda ese ḡau ta baita karaia diba, ena  be mai hekwarahina. Bona Iehova na lauma helaḡa amo una heduru be henimu.​—Gal. 5:22, 23.

17. 1 Korinto 9:25-27 ai, Paulo ese ena boga auka karana be ede herevalaia toma?

¹⁷ Aposetolo Paulo na mai boga auka dibana. To, kara maorona baine karaia totona, ia na eto: “Sibogu tau-anigu na tutuamu.” (1 Korinto 9:25-27 ba duahi.) Ia ese ma haida e hagoadadia boga auka karana bae dibaia, unu amo ḡau iboudiai bae ‘kara namonamo, bae kara ḡoevaḡoeva.’ (1 Kor. 14:40) Namona na ita ese boga auka karana baita dibaia, unu amo Iehova itomadiho henina karadia na basita hadoko, heḡereḡere hanaihanai sivarai namona baita harorolaia bona baita hahedibalaia.​—Apos. 2:46.

18. Iehova ese ita be kwalimu tauda baine gwauraida totona, dahaka baita kara be namo?

¹⁸ Gwarume momo herea e verimu haoda tauna be vaia baita gwauraiamu, kwalimu tauna. To haroro ḡaukara ai be idau, badina herevana taunimanima hida na Dirava ena orea lalonai baita veridia vareai, to basita gwaumu, ita na kwalimu tauda. (Luka 8:11-15) A bema nega iboudiai sivarai namona baita harorolaiamu bona baita hahedibalaiamu, Iehova ese ita be kwalimu tauda be gwauraidamu. Dahaka dainai? Badina ita ese ia bona Iesu ta kamonai henidiamu.​—Mar. 13:10; Apos. 5:28, 29.

19-20. Hari ina negai haroro ḡaukara ta karaiamu negadiai, dahaka danu baita laloatao?

¹⁹ Tano haida ai, kimai na mai taravatuna, taunimanima na hua haida lalodiai mo bae kimai. Unu tano ai, kimai negana dokonai, kimai taudia ese ḡaukara vada e haharaḡaiamu. Hari inai negai ita, taunimanima ihaoda-henidia taudia, ese haroro ḡaukara ta karaiamu negadiai, ina danu baita laloatao: Ina nega oromana dokona na e mai haraḡamu! Ina hahemauri ḡaukara baita karaia negana na kwadogi herea. Basio nari eiava ini na basio gwau toma: ‘Launa baina nari ela bona egu noho dalana baine namo guna, una murinai ina ḡaukara badana baina karaia.’​—Koh. 11:4.

²⁰ Harihari kara ta ba karaia, heḡereḡere emu ura ba habadaia, ba aonega, ba goada, bona ba boga auka. Taunimanima e haoda-henidiamu taudia 8-milion ba bamodia, unu amo Iehova ena moale ba mamia. (Neh. 8:10) Lalomu idoinai ida sivarai namona ba harorolaia goadagoada ela bona Dirava baineto, ‘Ḡaukara na vada ba hadokoa.’ Atikol gabena ai baita herevalaimu daladia toi ese ita, taunimanima ihaoda-henidia taudia, be durudamu Basileia baita harorolaia goada totona.