1. Laḡanida e bada e laomu neganai dahaka baita kara diba?

LAḠANIDA e bada e laomu neganai, reana baita garimu badina baita laloamu Iehova ese ita na da basine ḡaukaralaidamu, dia guna heḡereḡerena. Momokani, ena be eda goada na dia guna heḡereḡerena, to eda aonega bona diba baita ḡaukaralai diba eregabe baita durudia bona maduna matamatadia bae hua. Laḡani momo elda ḡaukara e karaia tauna ta na e gwa: “Na mamiava laḡanigu e bada e laova dainai guna na karava ḡaudia na basina kara diba neganai, na moale badina eregabe tadikakadia ese unu ḡaukara bae kara diba.”

2. Ina atikol ai be dahaka baita herevalaimu?

² Atikol 35 ai ta itaia, eregabe ese iahudia bae bamodia neganai namo bae davari diba. Ina atikol ai, baita itaiamu manau karana, ba kara diba ḡaudia ba lalodia karana, ta ena kara namo ilalo badana karana, bona hariharibada karana ese iahudia bae durudia diba, eregabe taudia ida bae ḡaukara hebou unu amo kongrigeisin ibounai ese hahenamo baine abia.

3. Filipi 2:3, 4 heḡereḡerena, manau anina be dahaka, bona Kristen tauna be ede baine durua diba toma?

³ Bema iahudia na e uramu eregabe taudia bae durudia, bae manau na namo. Manau tauna na be laloamu haida ese ia na e hereaia. (Filipi 2:3, 4 ba duahi.) Una kara e hahedinaraiamu  iahudia na e lalopararamu maduna ta bae huaia namonamo totona Baibul ena heduru herevadia bona dala na momo bae badina. Una dainai, basie laloa ḡau na idia guna e kara daladia heḡereḡerediai bae hekara. (Koh. 7:10) Ena be edia diba na bada eregabe taudia bae durulaidia, to e lalopararamu “tanobada oromana” na e idau e laomu bona dala matamatadia bae badina na namo.​—1 Kor. 7:31.

4. Seket taudia be edena dalai Levi taudia edia kara e tohotohomu?

⁴ E manaumu iahudia na e dibamu laḡanidia e badamu neganai, ḡau momo na da basie kara dibamu dia guna bamona. Heḡereḡere, mani eda seket taudia aita lalodia. Laḡanidia 70 e abimu neganai, e noidiamu asainmen idauna ta ma bae karaia. Nega haida una na auka. Idia ese tadikakadia idurudia karana na e moalelaiava. Una ḡaukara na e ura henia badava, bona doini e uramu una ḡaukara bae karaia. To e lalopararamu eregabe taudia ese una ḡaukara bae karaia diba. Una dainai edia ḡaukara na idaunegai Israel ai Levi taudia heḡereḡeredia, laḡanidia 50 e abiava neganai edia ḡaukara dubu helaḡa ai danu de oreva. Herevana edena ḡaukara e karaiava to idia na dounu e moaleva. Mai edia ura ida bae kara diba ḡaudia na e karadiava bona eregabe e durudiava. (Num. 8:25, 26) Hari ina negai, guna seket ḡaukaradia e karava tadikakadia na, ena be kongrigeisin momo se vadivadidiamu, to idia e siaidia kongrigeisin e duruamu bona e hagoadaiamu.

5. Dan bona Katie edia haheitalai amo dahaka o dibamu?

 ⁵ Mani Dan, laḡani 23 lalodiai seket ḡaukara e kara tadikakana, aita laloa. Dan laḡanina 70 e abia neganai, ia adavana Katie ida na e siaidia spesol painia ḡaukara bae karaia. Edena dalai edia asainmen matamatana na e moalelaia? Dan na e gwaumu hari ia na e bisi bada hereamu dia guna heḡereḡerena! Ena kongrigeisin madunadia e huamu, tadikaka e durudiamu hesiai taudia ai baela, bona haida e treinidiamu siti ena pablik gabudia bona dibura rumadia ai bae haroro. Iahu e, ena be fultaim hesiai ḡaukara o karamu eiava lasi, to ma haida ba durudia diba. Edena dalai? Emu mauri dalana matamatana ba moalelaia, ba kara diba ḡaudia bavato bona unu ba lal  bada, dia basio kara diba ḡaudia ba lalodia.

6. Dahaka dainai baita manau na aonega karana? Haheitalai a gwauraia.

⁶ Manau tauna na e lalopararamu ḡau haida na basine kara dibamu. (Her. 11:2) E manaumu dainai baine kara diba ḡaudia mo be karamu. Una dainai, dounu be moalemu bona ena ḡaukara anidia na be varamu. Manau tauna na ororo e daraiamu motukana e tariamu tauna ida baita haheḡereḡerea. Draiva ese gia na baine sensia gia maraḡinai baine atoa unu amo ororo na dounu baine daraia. Momokani, ena be motuka na metairametaira be heaumu to dounu ororo be daraiamu. Una heḡereḡerena, manau tauna na be dibamu edena negai sensi baine kara unu amo dounu Iehova baine hesiai henia bona ma haida baine durudia.​—Fili. 4:5.

7. Barasilai be edena dalai manau karana e hahedinaraia?

⁷ Barasilai ena haheitalai a laloa. Ia laḡanina 80 neganai King David ese e boiria ena ruma ai baine noho. Barasilai na e manau dainai king ena noinoi na se abia dae. Barasilai na e laloparara ia laḡanina e bada e laomu dainai ia na dia heḡereḡere, una dainai e noinoi eregabe tauna Kimuhamu ese gabuna baine abia. (2 Sam. 19:35-37) Barasilai heḡereḡerena, iahu tadikakadia na mai moaledia ida dala e karamu eregabe tadikakadia ese hesiai ḡaukara madunadia bae hua.

8. King David be edena dalai manau karana e hahedinaraia dubu helaḡa e ura baine haginia neganai?

⁸ King David ese danu manau karana e hahedinaraia. Mai kudouna ibounai ida e urava Iehova ena ruma baine haginia. To Iehova ese e hadibaia una hahenamo na natuna Solomon e henia neganai, David ese Iehova ena abi hidi na e abia dae bona mai kudouna ibounai ida una ḡaukara e durua. (1 Sis. 17:4; 22:5) David na se lalo ia hari heḡereḡere una ḡaukara baine karaia diba badina Solomon na “eregabe, bona ḡaukara ai do asine manada.” (1 Sis. 29:1) David na mai dibana Iehova ena hahenamo dainai una ḡaukara na baine ḡuḡuru diba, dia una ḡaukara e karaia taudia laḡanidia o edia diba dainai. David heḡereḡerena, hari ina negai iahudia na dounu Iehova e hesiai heniamu, ena be edia maduna na e idaumu. Bona mai dibadia Iehova ese guna idia e karava ḡaukaradia e karamu eregabe taudia na be hanamodiamu.

9. Edena dalai Brens Komiti ta ese manau karana e hahedinaraia?

⁹ Hari ina negai manau karana e hahedinaraia tadikakana ta na Shigeo. Laḡani 1976 ai, ia laḡanina 30 neganai, e abia hidi Brens Komiti ta ai ela. Laḡani 2004 ai, Brens Komiti kodineita ai ela. Gabeai e laloparara ena goada na dia heḡereḡere dainai ena ḡaukara na  basine kara namonamo diba. Una na e ḡuriḡurilaia bona e lalo eregabe tadikakana ta ese unu maduna baine hua na namo. Ena be Shigeo na dia kodineita to dounu Brens Komiti ma haida ida e ḡaukara heboumu. Barasilai, King David, bona Shigeo edia haheitalai amo tame diba, manau tauna na eregabe taudia edia goada e laloamu, dia edia diba. Bona idia ida basine kara helulumu, to be ḡaukara heboumu.​—Her. 20:29.

10. Kongrigeisin ai iahudia ese eregabe be ede bae lalodia toma?

¹⁰ Iahudia na e dibamu eregabe taudia na Iehova ena harihari ḡaudia dainai e moalelaidiamu. Iahudia na edia goada e ore e laomu neganai, e moalemu badina eregabe taudia na edia goada e ḡaukaralaimu mai edia ura ida kongrigeisin e duruamu.

11. Ruta 4:13-16 ai, edena dalai e hahedinaraiamu iahudia ese eregabe edia heduru bae abi dae na mai ena namo?

¹¹ Baibul ese e gwauraia hahinena Naomi na haheitalai namona badina mai ena ura ida eregabe ta ena heduru e abia dae. Matamanai, Naomi ese ravana vabuna Ruta e hamaoroa ena ruma bese baine lou henidia. To, Ruta na dounu e ura Naomi baine bamoa Betelehem baela neganai, Naomi ese ena heduru na e abia dae. (Ruta 1:7, 8, 18) Bona idia raruosi na hahenamo badana e abia! (Ruta 4:13-16 ba duahi.) Manau karana ese iahudia baine durudia Naomi ena haheitalai bae tohotohoa.

12. Edena dalai aposetolo Paulo ese haida edia kara namo e laloa bada?

¹² Aposetolo Paulo na haida ese e durua karana e laloa bada. Heḡereḡere, Filipi Kristen taudia e tenkiu henidia badina tauanina  dalanai harihari ḡaudia e siai henia. (Fili. 4:16) Ena kara amo e hahedinaraia Timoteo ese e durua karana na e laloa bada. (Fili. 2:19-22) Bona Paulo na Roma dibura ruma e laohaiava neganai ia ihagoadana ela taudia daidiai Dirava e hanamoa. (Apos. 28:15) Paulo ena goada na bada dainai gabu daudau e laova e ha harorova bona kongrigeisin e hagoadadiava. To, ia na se hekokoroku to tadikaka taihu edia heduru e abi dae.

13. Edena dalai iahudia ese eregabe taudia edia kara namo bae lalo bada?

¹³ Iahu e, dala momo ai kongrigeisin ai eregabe taudia edia kara namo ba lalodia bada diba. Bema e uramu edia motuka amo bae laohaimui, umui totomui stoa baela eiava dala ma haida amo bae durumui, edia heduru bavabi dae na namo. Namona na una heduru karana na ba laloa Iehova ena lalokau karana oiemu ai. Unu amo idia ida tura namodia ai bo laomu. Hanaihanai ba durudia Iehova turanai baela, bona ba hamaorodia oi na o moalemu badina o itaiamu eregabe taudia na kongrigeisin ai ḡaukara namona e karaiamu. Bona nega bavato idia ediai emu ekspiriens ba herevalai. Unu bo kara tomamu neganai, Iehova ‘bo hanamoamu’ badina ia ese eregabe taudia e veridia mai kongrigeisin ai.​—Kol. 3:15; Ioa. 6:44; 1 Tes. 5:18.

14. King David ese hariharibada karana be ede e hahedinaraia toma?

¹⁴ King David ena haheitalai amo baita itaiamu mai anina bada karana ta na hariharibada karana, bona iahudia ese una kara bae hahedinaraia na namo. Ia ese ena moni bona dava bada kohudia na e heni dubu helaḡa ihaginina ḡaukarana iduruna totona. (1 Sis. 22:11-16; 29:3, 4) Unu e kara toma ena be una dubu ihaginina ḡaukarana dainai taunimanima ese ia natuna Solomon be hanamoamu. Bema eda goada na dia heḡereḡere dainai konstraksen ḡaukara na basita kara dibamu, eda noho daladia heḡereḡerediai unu ḡaukara na iseda kontribiusen amo baita durua diba. Bona eregabe baita durudia diba, laḡani momo lalodiai ta davari ekspiriens amo namo bae davari totona.

15. Aposetolo Paulo ese ededia dava bada harihari ḡaudia na Timoteo e henia?

¹⁵ Aposetolo Paulo ese e hahedinaraia hariharibada karana aita laloa. Ia ese eregabe tauna Timoteo e boiria misinari ḡaukara lalonai baine bamoa, bona iena haroro bona hahediba daladia na Timoteo e hadibalaia. (Apos. 16:1-3) Paulo ese Timoteo na e hadibaia namonamo dainai, Timoteo na sivarai namona iharorolaina bona ihahedibalaina tauna namona ai ela. (1 Kor. 4:17) Gabeai, Timoteo ese Paulo ena hahediba dalana e ḡaukaralaia ma haida e hadibadia.

16. Dahaka dainai Shigeo ese ma haida e treininidia?

¹⁶ Hari ina negai iahudia na asie lalohekwarahimu kongrigeisin lalonai ḡaukara momo na da basie karamu, badina e treinidia eregabedia ese idia e kara ḡaukaradia be karamu. Heḡereḡere, laḡani momo lalodiai, Shigeo, matamanai tame herevalaia tadikakana, ese Brens Komiti ai ela eregabe taudia na treinin e henidia. Unu e kara toma unu amo ia na e nohova tanonai Basileia ḡaukarana baine durua diba. Una dainai, ia da dia heḡereḡere neganai, e hadibaia namonamo tadikakana ta na noho heḡaeḡae kodineita madunana baine huaia. Shigeo na laḡani 45 mai kahana lalodiai Brens Komiti ḡaukarana amo e abi dibana  na eregabe tadikakadia e hadibalaidia. Dirava ena taunimanima ediai unu bamona taudia na hahenamo ta!

17. Luka 6:38 heḡereḡerena, iahudia ese ma haida be dahaka bae henidia diba?

¹⁷ Umui iahu tadikaka bona taihu ese o hahedinaraiamu ta na Iehova baine abidadama henia bona baine badinaia karana na mauri dala hereadaena. Emui kara amo o hahedinaraiamu, eda mauri lalonai Baibul ena hahekau herevadia baita dibadia bona baita badinadia na mai anina bada. Guna ḡau e hekarava daladiai emui diba na bada, to hari mauri e idaumu dainai dala matamatadia ba diba na namo. Vanegai mo o bapatiso iahumui danu ḡau momo ba heni diba, emui mauri ai Iehova idibana karana amo o abia moalena na haida ediai ba herevalaia diba. Eregabe taudia na emu ai e vara ḡaudia bona o diba ḡaudia bo herevalaimu neganai be moalemu. Bema emu mauri ai o diba ḡaudia bo ‘heni laomu’ neganai, Iehova ese be hanamomu badamu.​—Luka 6:38 ba duahia.

18. Iahu bona eregabe ese dahaka hahenamo bae moalelai diba?

¹⁸ A lalokau henimuimu iahudia e, bema eregabe taudia bo bamodiamu, bo heduru heheni dibamu. (Roma 1:12) Iahu bona eregabe ediai miadia ḡaudia na i’idau. Iahu ediai be laḡani momo lalodiai e abi aonegana bona dibana. Eregabe ediai be edia goada. Eregabe bona iahu na tura heḡereḡeredia be ḡaukara heboumu neganai, Tamada lalokauna gubai be hanamoamu bona kongrigeisin lalonai iboudiai na hahenamo be abimu.