EREGABE TAUDIA
11: Ḡaukara Dikadika
ANINA BE DAHAKA?
Ḡaukara dikadika taudia na be uramu bae ḡaukara. Edia dabu ḡaudia bona ma haida bae durudia totona edia ḡaukara na be moalelaiamu—ena be una ḡaukara amo moni bada na basie abimu.
DAHAKA DAINAI MAI ANINA BADA?
Baita uramu eiava lasi, to eda mauri ai maduna na momo herea. Ina tanobada ai taunimanima momo na asie uramu bae ḡaukara goada, to bema basio lahedomu, emu mauri na bo moalelaiamu.—Kohelete 3:13.
“Na ḡaukara goadamu neganai, na moalemu bona egu hemami na e namomu. Una hemami namona dainai ḡaukara na, na ura henidia badamu. Emu ḡaukara bo laloa badamu dainai, lada namona bo abiamu.”—Reyon.
BAIBUL ENA SISIBA: “Hekwarahi iboudiai na mai ahudia.”—Hereva Lada-isidia 14:23.
DAHAKA BA KARAIA DIBA?
Ḡaukara ba ura henia totona, henu ai e hetore daladia ba badina.
Ḡau ikaradia namonamo karana ba laloa bada. Ena be ruma ḡaukara, skul homework, eiava moni ḡaukara o karamu, to mai lalomu idoinai ida ba karaia. Bema ḡaukara ta ikarana dalana o dibaiamu, namona na ikara namonamona daladia ba tahu danu—heḡereḡere una ḡaukara ikara haraḡana dalana eiava ihanamona dalana. Bema emu ḡaukara bo dibaia namonamomu, bo moalelaiamu.
BAIBUL ENA SISIBA: “Ena ḡaukara ikarana mai dibana tauna o itaiamu a? Ia na pavapava vairadiai baine gini; asi haridia taudia vairadiai basine gini.”—Hereva Lada-isidia 22:29.
Ḡau iboudiai ba lalodia. Nega momo, bema emu ḡaukara bo karaia namonamomu, ma haida danu bo durudiamu. Heḡereḡere, bema emu ruma ḡaukaradia bo kara namonamomu, emu ruma bese taudia ma haida edia maduna bo haharaḡaiamu.
BAIBUL ENA SISIBA: “Ḡau ihenina be namo bada, ḡau iabina be namo maraḡi.”—Aposetolo Edia Kara 20:35.
Se henimu ḡaukaradia danu ba kara. Dia e henimu ḡaukaradia mo ba kara, to se henimu ḡaukaradia ma haida danu ba kara. Unu amo ta ese basine biagumumu—unu ḡaukara bo karamu badina na, dia ta ese e dorimu dainai, to o ura ba karaia dainai.—Mataio 5:41.
BAIBUL ENA SISIBA: “Emu kara namo na dia lauegu hahedua dainai a oiemu ura dainai bema vara.”—Filemona 14.
Ḡaukara bona laḡa-ani na edia gabu korikori ai bavato. Ḡaukara dikadika taudia na asie lahedomu, bona idia na dia ḡaukara mo e kara noho kara nohomu. Idia ese ḡaukara negana bona laḡa-ani negana na e lalodia badamu bona e moalelaidiamu.
BAIBUL ENA SISIBA: “Ima tamona na laḡa-ani amo baine honu be namo; ima ruaosi na hekwarahi bona lai ianina amo bae honu na dika.”—Kohelete 4:6.
