Nou baz nou lor bann lansegnman Labib dan fason ki nou konsider bann lanterman ek so bann pratik. Anou get sa bann pwin-la.

•   Li normal pou plore kan nou perdi enn kikenn ki nou kontan dan lamor. Bann disip Zezi ti plore kan zot fami ti mor. (Zan 11:33-35, 38; Zistwar Bann Apot 8:2; 9:39) Alor, nou pa konsider enn lanterman kouma enn lokazion pou amize. (Ekleziast 3:1, 4; 7:1-4) Okontrer, nou konsider sa kouma enn lokazion pou montre konsiderasion ouswa pou met nou dan plas sa dimounn ki’nn perdi enn kikenn dan lamor la.​—Romin 12:15.

•   Bann mor pa konn nanye. Dan ninport ki kiltir nou ete, nou rezet bann koutim ouswa bann pratik ki pa an-akor avek seki Labib dir, par exanp ki bann mor ankor konsian ek zot kapav inflians nou lavi. (Ekleziast 9:5, 6, 10) Ena bann koutim kouma pas lanwit, fer bann gran seremoni ek bann laniverser, bann sakrifis pou bann mor, koze ek fer bann reket avek bann mor, ek bann seremoni pou bann vev. Nou rezet tou sa bann koutim-la ek so bann pratik. Nou obeir komannman ki Labib dir: “Separe ar zot, ek aret tous bann kitsoz inpir.”​—2 Korintien 6:17.

•   Ena enn lespwar pou bann mor. Labib ansegn nou ki pou ena enn rezireksion ek ler pou vini kot lamor pou nepli existe. (Zistwar Bann Apot 24:15; Revelasion 21:4) Parey kouma sa lespwar-la ti ed bann premie Kretien, sa lespwar-la ed nou osi pou rezet bann pratik exazere.​—1 Tesalonisien 4:13.

•   Labib ankouraz nou pou ena modesti. (Proverb 11:2) Nou pa profit enn lanterman pou “fer letalaz” nou stati sosial ouswa nou stati ekonomik. (1 Zan 2:16) Nou pa organiz bann gran lanterman pou diverti lezot ouswa servi bann serkey extra ser ek met bann linz extravagan zis pou inpresionn lezot.

•   Nou pa esey inpoz nou bann krwayans konsernan bann lanterman lor lezot. Nou swiv enn prinsip dan sa domenn-la: “Sakenn parmi nou pou rann kont pou limem devan Bondie.” (Romin 14:12) Me selman, si nou gagn lokazion, nou kapav explik nou bann krwayans “avek douser ek enn gran respe.”​—1 Pier 3:15.

 Landrwa: Si enn fami desid pou fer enn lanterman, li kapav fer li kot li anvi, kouma dan enn Lasal kot nou fer renion, dan enn funérarium, dan enn lakaz, dan enn krematwar, ouswa dan enn simitier.

 Seremoni: Fer enn diskour pou rekonfort bann ki an-dey ek explik seki Labib dir lor lamor ek lespwar rezireksion. (Zan 11:25; Romin 5:12; 2 Pier 3:13) Dan diskour-la kapav koz lor bann bon kalite ki sa dimounn ki’nn mor la ti ena ek kitfwa koz lor so bon lexanp fidelite pou ankouraz nou.​—2 Samiel 1:17-27.

 Kapav sant enn kantik baze lor bann Lekritir. (Kolosien 3:16) Seremoni-la termine par enn lapriyer rekonfortan.​—Filipien 4:6, 7.

 Peyman ouswa laket: Tou nou bann servis relizie gratis mem bann lanterman. Pena okenn laket kan nou fer nou bann renion.​—Matie 10:8.

 Lasistans: Nou kontan pou akeyir bann ki pa Temwin pou asiste enn lanterman dan Lasal kot nou fer renion. Parey kouma nou bann lezot renion, bann dimounn kapav asiste bann lanterman.

 Sak Temwin bizin deside par limem dapre so prop konsians ki forme par Labib. (1 Timote 1:19) Me selman, nou pa partisip dan bann seremoni relizie ki nou panse pa an-akor avek Labib.​—2 Korintien 6:14-17.