Exod 15:1-27
15 Sa lepok-la Moiz ek bann Izraelit ti sant sa sante-la pou Zeova:
“Les mo sant pou Zeova parski li finn gagn enn gran laglwar.
Seval-la ek so kavalie, li finn zet zot dan lamer.
2 Mo lafors ek mo pwisans se Ya,* parski li’nn vinn mo delivrans.
Se limem mo Bondie ek mo pou loue li; se limem Bondie mo papa ek mo pou donn li laglwar.
3 Zeova li enn gerye pwisan. Zeova se so nom.
4 Bann kales Faraon ek so larme Li’nn zet dan lamer,Ek so bann pli bon gerye inn koule dan Lamer Rouz.
5 Bann gro vag ti kouver zot; zot inn koule dan bann profonder kouma enn ros.
6 To lame drwat, A Zeova, li ena enn gran pwisans;To lame drwat, A Zeova, kapav kraz enn lennmi.
7 Dan to grander to kapav zet bann ki dres kont twa anba;To avoy to koler ki kouma enn gran dife, li bril zot enn sel kout kouma lapay sek.
8 Bann delo finn rasanble ansam gras-a enn souf ki sorti dan to nene;Zot ti res anplas, ek zot ti tini leres delo;Bann gro vag ti vinn solid omilie lamer.
9 Lennmi ti dir: ‘Mo pou pourswiv zot! Mo pou gagn zot!
Mo pou partaz zot bann dibien ziska ki mo’nn gagn ase!
Mo pou tir mo lepe! Mo pou fer zot soumet gras-a mo lame!’
10 To’nn soufle divan, ek lamer inn tom lor zot;Zot ti koule kouma diplon dan gran delo.
11 Kisann-la ki kouma twa parmi bann Bondie, A Zeova?
Kisann-la ki kouma twa, twa ki vremem bien sin?
Twa pou ki nou bizin ena enn gran respe ek sant bann louanz, Twa ki fer bann kitsoz extraordiner.
12 To ti lev to lame drwat, ek later ti aval zot.
13 Dan to lamour fidel, to finn gid sa pep ki to’nn reaste la;Gras-a to lafors to pou amenn zot dan landrwa sin kot to reste.
14 Bann pep pou tande; ek zot pou tranble;Enn gran langwas* pou trap bann abitan Filisti.
15 Sa lepok-la, bann sef* Edom pou gagn bien per,Ek bann dirizan* Moab ki bien pwisan pou tranble.
Tou bann abitan Kanaan pou dekouraze.
16 Zot pou per ek zot pou tranble.
Akoz pwisans to lebra, zot pa pou kapav bouze parey kouma enn rosZiska ki to pep fini pase, A Zeova,Ziska ki pep ki to’nn gagne* fini pase.
17 To pou amenn zot ek to pou plant zot dan to montagn,*Sa plas fix ki to’nn prepare pou to reste la, A Zeova,Sa plas sakre la, A Zeova, ki to finn etabli avek to lame.
18 Zeova pou regne kouma lerwa pou touletan.
19 Kan bann seval Faraon, so bann kales lager ek so bann kavalie ti rant dan lamer,Lerla Zeova ti fer bann delo lamer revini ek ti kouver zot,Me pep Izrael ti mars lor later sek omilie lamer.”
20 Lerla Miryam, ki ti enn profet, ser Aaron, ti pran enn tanbourin dan so lame, ek tou bann madam ti swiv li avek zot tanbourin ek zot ti danse.
21 Miryam ti sant sa pou reponn bann zom-la:
“Sant pou Zeova parski li finn gagn enn gran laglwar.
Seval-la ek so kavalie, li finn zet zot dan lamer.”
22 Plitar Moiz ti fer bann Izraelit kit Lamer Rouz, ek zot ti al dan dezer Sour. Zot ti marse pandan trwa zour dan dezer, me zot pa ti trouv delo okenn par.
23 Zot ti ariv Mara,* me zot pa ti kapav bwar delo Mara parski li ti amer. Se akoz sa ki li ti apel sa plas-la Mara.
24 Alor lepep ti koumans plengne kont Moiz ek ti dir: “Ki nou pou bwar?”
25 Moiz ti sipliy Zeova ek Zeova ti montre li enn pie. Kan Moiz ti zet pie-la dan delo, delo-la ti vinn delo dou.
Laba Bondie ti donn zot enn lalwa ek ti montre zot lor ki baz li pou ziz zot, ek laba li ti teste zot.
26 Li ti dir: “Si to obeir lavwa Zeova to Bondie ek to fer seki drwat devan so lizie ek ki to ekout bien so bann komannman ek obeir tou so bann lalwa, mo pa pou amenn lor twa okenn maladi ki mo ti avoy lor bann Ezipsien, parski mwa, Zeova, mo pe geri twa.”
27 Apre sa zot ti ariv Elim, kot ti ena 12 lasours delo ek 70 pie palmis. Alor zot ti kanp dan sa landrwa-la pre ar delo.
Not
^ “Ya” se enn fason pli kourt pou dir nom Zeova.
^ Lit., “douler lakousman.”
^ Lit., “sheik.” Enn sheik ti enn sef tribi.
^ Ouswa “diktater.”
^ Ouswa “kree.”
^ Lit., “montagn ki to posede.”
^ Vedir “Amer.”
