Izai 52:1-15
52 Leve! Leve! Abiy twa avek lafors, A Sion!
Met to bann zoli linz, A Zerizalem, lavil sin!
Parski sa kikenn ki pa’nn fer sirkonsizion la ek sa kikenn ki inpir la pou nepli rant kot twa.
2 Sakouy lapousier ki lor twa, leve ek asize, A Zerizalem.
Liber twa ar lasenn ki otour to likou, A tifi Sion ki enn prizonie.
3 Parski ala seki Zeova dir:
“Kan ti vann zot pa ti gagn nanye,Ek personn pa pou pey nanye kan pou reaste zot.”
4 Parski ala seki Segner Siprem,* Zeova, dir:
“O-koumansman mo pep ti desann Lezip pou viv laba kouma bann etranze;Lerla, Lasiri ti fer dominer ar zot san okenn rezon.”
5 Zeova dir: “Alor, ki mo bizin fer isi?”
“Parski inn pran mo pep inn ale san pey nanye.
Bann ki diriz lor zot pe kontign kriye ar lazwa,” ala seki Zeova dir,“Ek touletan, toutlong lazourne, zot pa pe respekte mo nom.
6 Akoz sa, mo pep pou konn mo nom;Akoz sa, sa zour-la zot pou kone ki momem sa Kikenn ki pe koze la.
Gete, mwa ki pe dir sa!”
7 Ala zot zoli lor montagn, lipie sa kikenn ki amenn bann bon nouvel la,Sa kikenn ki anons lape la,Sa kikenn ki amenn bann bon nouvel lor enn kitsoz ki pli bon la,Sa kikenn ki anons delivrans la,Sa kikenn ki dir Sion: “To Bondie inn vinn Lerwa!”
8 Ekoute! To bann gardien pe kriye for.
Ansam zot pe kriye dan lazwa,Parski zot pou trouv sa bien* kan Zeova pou re-amenn bann ki res dan Sion.
9 Ki tou seki’nn kraze dan Zerizalem dan lazwa!
Ki zot kriye ansam dan lazwa!
Parski Zeova inn rekonfort so pep; li’nn reaste Zerizalem.
10 Zeova inn fer tou bann nasion trouv so lebra ki sin;Bann dimounn partou lor later pou trouv seki nou Bondie fer pou amenn delivrans.*
11 Al lwin, al lwin, sorti ladan, pa tous nanye ki inpir!
Sorti omilie li, res prop,Zot ki pe sarye bann istansil Zeova.
12 Parski zot pa pou panike kan zot ale,Ni zot pou bizin sove,Parski Zeova pou al devan zot,Ek Bondie Izrael pou protez zot depi par deryer.
13 Gete! Mo serviter pou azir avek bon zizman.
Pou lev li bien lao,Ek pou met li bien lao ek li pou gagn enn gran laglwar.
14 Parey kouma boukou ti dan enn gran letonnman kan zot ti pe get li—Parski li ti defigire plis ki tou lezot zomEk so bote ti defigire plis ki tou dimounn—
15 Koumsa mem li pou fer boukou nasion gagn sok.
Bann lerwa pou ferm zot labous* devan li,Parski zot pou trouv seki pa’nn dir zot,Ek zot pou pran kont seki zot pa’nn tande.
Not
^ Ouswa “Souverin Segner.”
^ Lit., “lizie dan lizie.”
^ Ouswa “pou trouv nou Bondie gagn laviktwar.”
^ Ouswa “Bann lerwa pou res kwak.”
