Zistwar 53

Promes Yiphtah

ESKI inn deza arive ki to’nn fer enn promes ek plitar to trouv sa difisil pou to gard li? Se seki ti ariv sa misie lor sa zimaz la, ek se akoz sa ki li bien tris. Sa misie-la se enn ziz dan Israël ki ena boukou kouraz ek li apel Yiphtah.

Yiphtah viv enn lepok kot bann Izraelit nepli ador Jéhovah. Zot pe fer seki move ankor enn fwa. Alor, Jéhovah les lepep Ammôn fer zot ditor. Lerla, bann Izraelit kriye ver Jéhovah: ‘Nou finn fer pese kont twa. Silteple, sov nou!’

Lepep ena regre pou bann move kitsoz ki zot inn fer. Zot montre ki zot regrete kan zot rekoumans ador Jéhovah. Alor Jéhovah ed zot ankor enn fwa.

Lepep swazir Yiphtah pou al lager kont bann move Amonit. Yiphtah bien anvi ki Jéhovah ed li dan sa lager-la. Alor li fer sa promes-la Jéhovah: ‘Si to fer mwa gagn laviktwar lor bann Amonit, premie dimounn ki pou sorti dan mo lakaz pou vinn zwenn mwa kan mo sorti lager mo pou donn twa li.’

Jéhovah ekout promes ki Yiphtah fer ek Li ed li pou gagn laviktwar. Kan Yiphtah retourn lakaz, eski to kone ki premie dimounn sorti pou vinn zwenn li? Se so tifi, so sel zanfan. Yiphtah plore: ‘Ayo, mo tifi! Ki tristes to pe donn mwa. Me mo’nn fer enn promes ar Jéhovah ek mo pa kapav kas li.’

Kan tifi Yiphtah kone ki promes so papa inn fer, o-koumansman li osi li tris. Parski savedir ki li pou bizin kit so papa ek so bann kamarad. Me li pou bizin pas leres so lavi pou servi Jéhovah dan tabernak dan Shilo. Alor, li dir so papa: ‘Si to’nn fer enn promes Jéhovah, to bizin gard to promes.’

Akoz sa, tifi Yiphtah al Shilo ek li pas leres so lavi dan servis Jéhovah dan tabernak. Toule-lane bann madam dan Israël al vizit li pandan kat zour, ek zot pas bann bon moman ansam. Lepep bien kontan tifi Yiphtah parski li enn bon serviter Jéhovah.

Juges 10:6-18; 11:1-40.