Zistwar 51

Ruth Ek Naomi

DAN Labib to pou trouv enn liv ki apel Ruth. Se zistwar enn fami ki ti viv pandan lepok kot ti ena bann ziz an Israël. Ruth se enn zenn fam ki sorti pei Moab; li pa form parti pep Bondie, Israël. Me kan Ruth aprann lor vre Bondie, Jéhovah, li bien kontan Li. Naomi se enn fam pli aze ki ti ed Ruth aprann konn Jéhovah.

Naomi enn fam Izraelit. Li, so misie ek so de garson ti al res dan pei Moab dan lepok kot ti ena tigit manze dan Israël. Enn zour Naomi so misie mor. Plitar, Naomi so de garson marye avek de tifi Moab, zot apel Ruth ek Orpa. Me apepre di-z-an plitar, Naomi so de garson mor. Pena dout ki Naomi ek sa de tifi-la ti bien tris! Ki Naomi pou fer asterla?

Enn zour, Naomi desid pou fer enn long vwayaz pou retourn dan so pei. Ruth ek Orpa anvi res avek li, alor zot al ansam avek li. Me apre ki zot inn fer enn bon bout semin, Naomi get bann tifi-la ek dir: ‘Retourn kot zot ek al res avek zot mama.’

Naomi anbras zot ek dir zot orevwar. Lerla zot koumans plore, parski zot bien kontan Naomi. Zot dir: ‘Non! Nou pou al avek twa kot to pep.’ Me Naomi reponn: ‘Mo bann tifi, zot bizin retourne. Li pou pli bon si zot res kot zot.’ Lerla Orpa koumans pran semin pou retourn kot li. Me Ruth pa ale.

Naomi get li ek dir: ‘Gete Orpa inn ale. Twa osi retourn lakaz avek li.’ Me Ruth reponn: ‘Pa esey fer mwa kit twa! Les mo vinn avek twa. Kot to ale mo pou ale, ek kot to reste mo pou reste. To pep pou vinn mo pep, ek to Bondie pou vinn mo Bondie. Kot to pou mor mo pou mor, ek laba mem ki pou anter mwa.’ Kan Ruth dir sa, Naomi nepli esey fer li retourn kot li.

Finalman, zot ariv Israël ek zot res lamem. Deswit Ruth koumans travay dan karo, parski ti lepok pou rekolte lorz. Enn zom ki apel Boaz les li ramas lorz dan so bann karo. Eski to kone kisannla mama Boaz? Se Rahab, sa madam ki ti res dan Jéricho la.

Enn zour Boaz dir Ruth: ‘Mo finn tann tou lor twa, ek kouma to finn montre twa bon anver Naomi. Mo kone ki to finn kit to papa, to mama ek to pei ek kouma to finn vinn res parmi enn pep ki zame to ti kone avan. Ki Jéhovah montre Li bon anver twa!’

Ruth reponn: ‘Ou finn montre ou bien bon anver mwa. Ou manier koze finn ankouraz mwa.’ Boaz bien kontan Ruth, ek pa finn bizin atann lontan pou ki zot marye. Sa fer Naomi bien kontan! Me Naomi pli kontan ankor kan Ruth ek Boaz gagn zot premie garson, li apel Obed. Plitar, Obed vinn granper David, ek nou pou aprann boukou kitsoz lor li apre.

Liv Labib Ruth.