Zistwar 6

Caïn ek Abel

GET Caïn ek Abel asterla. Zot inn grandi. Caïn inn vinn enn planter. Li kiltiv bann sereal, bann frwi ek bann legim.

Abel li, li’nn vinn gardien mouton. Li kontan okip bann ti mouton, ek kan zot grandi, Abel gagn enn gran troupo pou okipe.

Enn zour Caïn ek Abel amenn enn ofrand pou Bondie. Caïn amenn bann prodwi ki li’nn plante. Abel li, li amenn so bann pli bon mouton. Jéhovah aksepte Abel ek so ofrand, me Li pa aksepte seki pou Caïn. Eski to kone kifer?

Se pa zis parski ofrand Abel pli bon ki pou Caïn. Me, parski Abel enn bon dimounn. Li kontan Jéhovah ek li kontan so frer. Me Caïn li, li move, li pa kontan so frer.

Akoz sa, Bondie dir Caïn ki li bizin sanze. Me Caïn pa ekoute. Li bien ankoler parski Bondie pli kontan Abel. Alor Caïn dir Abel: ‘Anou al dan karo.’ Kan zot tousel, Caïn donn so frer Abel enn bon kout. Li tap li telman for ki li touy li. Enn move kitsoz, pa vre?

Mem si Abel finn mor, Bondie ankor touzour rapel li. Abel ti enn bon dimounn, ek Jéhovah zame bliye bann dimounn kouma li. Enn zour, Bondie pou redonn Abel lavi. Lerla, Abel zame pa pou mor. Li pou kapav viv lor later pou touletan. Kouma nou pou kontan pou konn bann dimounn kouma Abel, pa vre?

Me Bondie pa kontan bann dimounn kouma Caïn. Akoz sa, apre ki Caïn ti touy so frer, Bondie ti pini li; Li ti fer li al res bien lwin ar so fami. Kan Caïn inn al res dan enn lot landrwa, li ti pran kitfwa enn parmi so bann ser avek li, ki’nn vinn so madam.

Plitar Caïn ek so madam ti’nn gagn bann zanfan. Bann lezot garson et tifi Adam ek Ève zot osi zot ti’nn gagn bann zanfan. Bien vit popilasion later finn ogmante. Anou examinn zistwar sertin bann zom ki ti viv sa lepok-la.

Genèse 4:2-26; 1 Jean 3:11, 12; Jean 11:25.