Zistwar 116

Kouma Nou Kapav Viv Pou Touletan

ESKI to kapav dir ki sa tifi-la ek so bann kamarad pe lir? Wi, se sa mem liv ki twa osi to pe lir—Mo Liv Zistwar Labib. Ek zot pe lir sa mem zistwar ki twa osi to pe lir la—“Kouma Nou Kapav Viv pou Touletan.”

Eski to kone ki zot pe aprann? Dabor, si nou anvi viv pou touletan nou bizin konn Jéhovah ek so Garson Jésus. Labib dir: ‘Ala kouma to kapav viv pou touletan: Aprann konn sel vre Bondie, ek so Garson ki Li ti avoy lor later, Jésus Christ.’

Kouma nou kapav aprann konn Jéhovah ek so Garson Jésus? Enn fason ki nou kapav fer sa se kan nou lir Mo Liv Zistwar Labib depi koumansman ziska lafin. Li rakont boukou kitsoz lor Jéhovah ek Jésus, pa vre? Li koz boukou lor bann kitsoz ki zot inn fer ek lor bann kitsoz ki zot pou fer. Me nou bizin fer plis ki zis lir sa liv-la.

Eski to trouv sa lot liv ki anba la? Se Labib. Demann enn kikenn pou lir pou twa bann verse Labib kot bann zistwar sa liv-la sorti. Labib donn nou tou ransegnman ki nou bizin pou ki nou tou nou servi Jéhovah kouma bizin ek gagn lavi pou touletan. Alor, nou bizin pran labitid pou etidie Labib souvan.

Me zis aprann lor Jéhovah ek Jésus Christ pa ase. Nou kapav konn boukou-boukou kitsoz lor zot ek lor zot bann lansegnman, me pourtan, nou pa gagn lavi pou touletan. Kifer? Eski to kone ki lot kitsoz nou bizin fer ankor?

Nou bizin viv an-akor avek bann kitsoz ki nou aprann. Eski to rapel Judas Iscariote? Li ti enn parmi bann 12 zapot ki Jésus ti swazir. Judas ti ena boukou konesans lor Jéhovah ek Jésus. Me ki ti ariv li? Apre enn tigit letan, li ti vinn egois ek li ti fer tret ar Jésus pou 30 pies larzan. Alor, Judas pa pou gagn lavi pou touletan.

Eski to rapel Guéhazi, sa misie lor ki nou ti aprann dan Zistwar 69 la? Li ti anvi gagn bann linz ek kas ki pa ti pou li. Alor, li ti koz manti pou gagn sa bann kitsoz-la. Me Jéhovah ti pini li, ek li pou pini nou osi si nou pa obeir so bann lalwa.

Me ena boukou bon dimounn ki finn touletan servi Jéhovah avek fidelite. Nou osi nou anvi vinn parey kouma zot, pa vre? Ti Samuel enn bon lexanp pou swiv. To rapel, kouma nou ti gete dan Zistwar 55, li ti ena zis kat ouswa sink an kan li ti koumans servi Jéhovah dan so tabernak. Alor, ninport ki laz to ena, to pa tro tipti pou servi Jéhovah.

Biensir, sa kikenn ki nou tou nou anvi swiv la se Jésus Christ. Parey kouma nou ti trouve dan Zistwar 87, mem si li ti ankor enn ti garson li ti dan tanp ek li ti pe koz avek lezot lor so Papa ki dan lesiel. Anou swiv so lexanp. Anou koz lor Jéhovah, nou Bondie extraordiner, ek so Garson, Jésus Christ, ar otan dimounn ki posib. Si nou fer sa bann kitsoz-la, lerla nou kapav viv pou touletan dan nouvo paradi ki Bondie pou fer lor later.

Jean 17:3; Psaume 145:1-21.