1, 2. Ki Zeova anvi pou bann fami?

 ZEOVA ti fer premie maryaz. Labib dir nou ki Li ti fer premie fam ek ki Li “ti amenn li ar zom-la.” Adan ti telman kontan ki li ti dir: “Anfin, sannla li lezo mo lezo ek laser mo laser.” (Zenez 2:22, 23) Sa montre nou ki Zeova anvi ki bann dimounn marye viv ere.

² Malerezman, boukou dimounn zame pa finn konn enn lavi fami ki ere. Selman, dan Labib ena boukou prinsip ki kapav ed tou bann manb lafami pou ki zot tou ansam kapav viv ere.​—Lik 11:28.

3, 4. (a) Kouma enn mari bizin azir anver so fam? (b) Kifer li inportan ki mari-fam toule-de pardonn zot kamarad?

³ Labib dir ki enn bon mari bizin kontan so fam ek respekte li. Silvouple lir Efezien 5:25-29, NW. Enn mari bizin touletan azir dan enn fason ki montre ki li kontan so fam. Li pou osi protez li, pran li swin, ek li pa pou fer nanye ki fer li ditor.

⁴ Me ki enn mari bizin fer kan so fam fer bann erer? Labib dir bann mari: “Kontign kontan zot fam ek pa vinn amer ar zot.” (Kolosien 3:19, NW.) Mari, rapel ki ou osi ou fer bann erer. Ek si ou anvi ki Bondie pardonn ou, ou bizin pardonn ou fam. (Matie 6:12, 14, 15) Kan mari-fam toule-de dispoze pou pardone, sa pou ed zot pou ena enn lavi maryaz ki ere.

5. Kifer enn mari bizin donn loner so fam?

 ⁵ Zeova demann enn mari pou donn loner so fam. Enn mari bizin pran an konsiderasion seki so fam bizin lor plan fizik ek afektif. Se enn kitsoz bien inportan. Si enn mari pa tret so fam bien, Zeova kapav refiz ekout so bann lapriyer. (1 Pier 3:7) Ki kitsoz fer enn dimounn ena valer pou Zeova? Se lamour ki sa dimounn-la ena pou Zeova. Zeova pa fer diskriminasion ant zom ek fam.

6. Kan Labib dir ki enn mari ek enn fam vinn “enn sel,” ki savedir?

⁶ Zezi ti explike ki enn mari ek enn fam “zot nepli . . . de, me enn sel.” (Matie 19:6) Ki savedir? Zot bizin res fidel anver sakenn zot kamarad. (Proverb 5:15-21; Ebre 13:4) Bann mari ek bann fam bizin satisfer bezwin sexiel sakenn zot kamarad. (1 Korintien 7:3-5) Enn mari bizin rapel ki “personn pa air so prop lekor, me li nouri li e donn li boukou latansion.” Alor, li bizin kontan so fam ek donn li boukou latansion. Seki pli inportan pou enn madam, se ki so mari tret li bien ek montre ki li kontan li.​—Efezien 5:29.

7. Kifer bizin ena enn kikenn ki pran latet dan enn fami?

⁷ Dan sak fami bizin ena enn kikenn ki pran latet, enn kikenn pou gid lafami pou ki ena enn bon korperasion. Dan 1 Korintien 11:3 Labib dir: “Lekris limem ki latet tou bann zom, e ki enn mari limem sef so fam, alor ki Bondie limem latet Lekris.”

8. Kouma enn fam kapav montre ki li ena enn gran respe pou so mari?

⁸ Tou mari fer erer. Me kan enn fam aksepte desizion  ki so mari pran ek kontan pou korper ar li, sa ena enn bon lefe lor lafami. (1 Pier 3:1-6) Labib dir: “Fam la bizin respekte so mari.” (Efezien 5:33) Ki enn fam pou fer si so mari pena mem krwayans ki li? Kanmem sa, li bizin ena enn gran respe pou so mari. Labib dir: “Parey, zot bann fam, soumet ar zot mari, pou ki si ena ki pa oule ekout laparol, kapav gagn zot san parol gras-a kondwit zot fam, parski zot finn trouve ar zot prop lizie kouma zot fam ena enn kondwit pir ek enn gran respe.” (1 Pier 3:1, 2, NW.) Kan enn fam donn enn bon lexanp, sa kapav ed so mari pou konpran ek respekte so lafwa.

9. (a) Ki enn fam bizin fer kan li pa dakor ar so mari? (b) Ki konsey Tit 2:4, 5 donn bann fam?

⁹ Ki enn fam kapav fer kan li pa dakor ar so mari? Li bizin dir seki li panse, me avek respe. Par exanp, enn zour Sara ti dir enn kitsoz ki Abraam pa ti kontan. Me Zeova ti dir Abraam: “Ekout li.” (Zenez 21:9-12) Kan enn mari pran enn desizion ki pa  kont seki Labib dir, so fam bizin soutenir li. (Zistwar Bann Apot 5:29; Efezien 5:24) Anplis, enn bon fam li pran swin so fami. (Lir Tit 2:4, 5.) Kan so mari ek so bann zanfan trouve ki kantite li donn depenn pou zot, zot pou plis kontan li ek respekte li.​—Proverb 31:10, 28.

10. Ki Labib dir lor separasion ek divors?

¹⁰ Parfwa bann koup prese pou separe ouswa pou divorse. Selman, Labib dir ki “enn fam bizin pa kit so mari” ek ki “enn mari bizin pa kit so fam.” (1 Korintien 7:10, 11) Setadir ki fode pa ki enn mari ek enn fam separe. Me dan sertin ka bien grav bann koup kapav desid pou separe, selman se enn desizion bien serye. a Ki nou kapav dir konsernan divors? Labib montre ki sel rezon valab pou divorse se kan enn mari ouswa enn fam inn gagn relasion sexiel ar enn lot dimounn ki pa so konzwin.​—Matie 19:9.

11. Ki kitsoz pli inportan bann zanfan bizin?

¹¹ Paran, pas plis letan posib ar ou bann zanfan. Ou bann zanfan bizin ou, ek pli inportan, zot bizin ki ou ansegn zot lor Zeova.​—Deteronom 6:4-9.

12. Ki bann paran bizin fer pou protez zot zanfan?

¹² Lemond Satan pe vinn deplizanpli move. Kitfwa ena sertin dimounn ki anvi fer nou bann zanfan ditor, ouswa mem viol zot. Sertin paran trouv sa difisil pou koz lor la. Me bann paran bizin met  zot bann zanfan an-gard kont sa bann kalite dimounn-la, ek explik zot ki zot bizin res lwin ar sa bann dimounn-la. Paran, ou bizin protez ou zanfan. b​—1 Pier 5:8.

13. Kouma bann paran bizin ansegn zot zanfan?

¹³ Bann paran ena responsabilite pou ansegn zot zanfan kouma pou konport zot. Kouma ou kapav ansegn ou zanfan? Ou bizin form ou zanfan, me kan ou pe koriz li, fode zame ou brit ek san  pitie. (Zeremi 30:11) Alor, zame pa disiplinn ou zanfan kan ou ankoler. Fode pa ki ou bann parol kouma “bann kout lepe” ek bles zot. (Proverb 12:18) Ansegn ou zanfan ek fer li konpran kifer li bizin obeir.​—Efezien 6:4; Ebre 12:9-11; get Not 30.

14, 15. Kifer bann zanfan bizin obeir zot paran?

¹⁴ Zezi ti touletan obeir so Papa, mem kan sa ti difisil. (Lik 22:42; Zan 8:28, 29, NW.) Zeova demann bann zanfan osi pou obeir zot paran.​—Efezien 6:1-3.

¹⁵ Si to enn zanfan, kitfwa to trouv sa difisil pou obeir to bann paran. Me rapel ki si to obeir, to pou fer Zeova ek to bann paran kontan. c​—Proverb 1:8; 6:20; 23:22-25.

16. (a) Kouma Satan esey tant bann zenn pou fer seki pa bon? (b) Kifer li inportan ki to fer kamarad ar bann dimounn ki kontan Zeova?

¹⁶ Satan Lediab kapav servi to bann kamarad ouswa lezot zenn pou tant twa pou fer seki pa bon. Li kone ki parfwa li difisil pou to reziste sa presion-la. Par exanp, Dina, tifi Zakob, ti ena bann kamarad ki pa ti kontan Zeova. Sa ti fer li ek so fami gagn boukou problem. (Zenez 34:1, 2) Si to bann kamarad pa kontan Zeova, zot kapav pous twa pou fer enn kitsoz ki Zeova deteste. Sa kapav fer twa, to fami, ek Bondie bien soufer. (Proverb 17:21, 25) Akoz sa, li  bien inportan ki to fer kamarad ar bann dimounn ki kontan Zeova.​—1 Korintien 15:33.

17. Ki responsabilite sak manb lafami ena?

¹⁷ Kan bann manb lafami fer seki Bondie demann zot, zot evit boukou traka ek problem. Alor, si ou enn mari, kontan ou fam ek montre li ki ou kontan li. Si ou enn fam, respekte ek soumet ar ou mari ek imit lexanp sa bon madam ki dekrir dan Proverb 31:10-31. Si ou enn paran, ansegn ou zanfan pou kontan Bondie. (Proverb 22:6) Si ou enn papa, diriz ou fami “dan enn bon fason.” (1 Timote 3:4, 5, NW; 5:8) Ek bann zanfan bizin obeir zot paran. (Kolosien 3:20) Pa bliye ki sak manb lafami kapav fer bann erer, alor sakenn bizin ena limilite ek demann pardon. Vremem, dan Labib Zeova donn sak manb lafami bann bon konsey.