Bann sef pret ti amenn Zezi dan pale gouverner. Pilat ti demann zot: ‘Pou ki kitsoz zot pe akiz sa zom-la?’ Zot ti reponn: ‘Li dir ki li enn lerwa!’ Pilat demann Zezi: “Eski tomem lerwa Zwif?” Zezi ti reponn: “Mo Rwayom pa lor later.”

Apre sa, Pilat ti avoy Zezi kot Erod, dirizan Galile. Pilat ti anvi gete si Erod ti pou trouv kitsoz pou kondann Zezi. Me Erod pa ti trouv nanye kont Zezi. Alor, Erod ti re-avoy Zezi kot Pilat. Lerla, Pilat ti dir lafoul: ‘Ni Erod, ni mwa, nou pa’nn trouv nanye kont sa zom-la. Mo pou liber li.’ Me lafoul ti kriye: ‘Touy li! Touy li!’ Bann solda ti fwet Zezi, zot ti kras lor li, ek zot ti bat li. Zot ti met enn kouronn pikan lor so latet, ek pou boufonn li, zot ti dir: ‘Bonzour, Lerwa bann Zwif.’ Ankor enn fwa, Pilat ti dir lafoul: ‘Pou mwa, sa zom-la pa’nn fer nanye demal.’ Me lafoul ti kriye: “Koulout li lor enn poto!” Lerla, Pilat ti permet zot touy Zezi.

Bann solda ti amenn Zezi dan enn landrwa ki apel Golgota. Zot ti koulout li lor enn poto, ek zot ti met poto-la debout. Zezi ti priye: ‘Papa, pardonn zot. Zot pa kone ki zot pe fer.’ Bann dimounn ti boufonn Zezi, ek zot ti dir: ‘Si to Garson Bondie, desann lor sa poto-la! Sap to lavi.’

Enn parmi bann bandi ki ti akote ar Zezi ti dir li: “Pa bliye mwa kan to rant dan to Rwayom.” Lerla, Zezi ti promet li: “To pou avek mwa dan Paradi.” Dan lapremidi, pandan trwa-z-er-tan, ti fer bien som dan pei. Sertin disip ti pe debout pre ar poto-la, ek Mari, mama Zezi, ti la osi. Zezi ti dir Zan pran swin Mari, koumadir li ti so prop mama.

Alafin, Zezi ti dir: “Sa finn akonpli!” Li ti bes so latet ek li ti mor. Dan sa moman-la, ti ena enn gran tranbleman-de-ter. Dan tanp, gran rido bien lour ki ti ena ant pies ki Sin ek pies ki Pli Sin ti dezir an de. Enn ofisie larme ti dir: ‘Vremem, sa zom-la ti Garson Bondie.’