Tanki Salomon ti ador Zeova, ti ena lape dan Izrael. Me Salomon ti marye ar boukou madam ki ti sorti lezot pei, ek sa bann madam-la ti pe ador bann zidol. Tigit-tigit Salomon ti sanze, ek li ti koumans ador bann zidol li osi. Zeova ti bien ankoler. Li ti dir Salomon: ‘Mo pou ras rwayom Izrael ar to fami ek rwayom-la pou diviz an de. Mo pou donn pli gro par enn parmi to bann serviter, ek to fami pou regn lor pli tipti-la.’

Zeova ti bien deside pou fer seki Li ti dir ek Li ti montre sa dan enn lot fason osi. Enn parmi bann serviter Salomon, Zeroboam, ti lor sime kan li ti zwenn profet Aiya. Aiya ti desir so prop linz an 12 bout ek li ti dir Zeroboam: ‘Zeova pou pran rwayom Izrael ar fami Salomon ek pou diviz li an de. Pran dis bout ladan, parski to pou vinn lerwa lor dis tribi.’ Kan Lerwa Salomon ti aprann sa, li ti anvi touy Zeroboam! Alor, Zeroboam ti sove ek li ti al Lezip. Apre inpe letan, Salomon ti mor ek so garson, Roboam, ti vinn lerwa. Lerla, Zeroboam ti panse: ‘Mo kapav retourn Izrael asterla.’

 Bann ansien dan Izrael ti dir Roboam: ‘Si to bon avek lepep, zot pou fidel ar twa.’ Me bann kamarad Roboam, ki ti pli zenn ki bann ansien, ti dir li: ‘Montre twa dir avek lepep! Fer zot travay pli dir ankor!’ Roboam ti ekout konsey so bann kamarad. Li ti fer dominer ar lepep, ek lepep ti rebel kont li. Lerla, dis tribi ti swazir Zeroboam kouma lerwa. Ti apel sa dis tribi-la, rwayom Izrael. Me de lezot tribi ti res fidel ar Roboam. Ti apel zot rwayom Zida. Douz tribi Izrael ti divize.

Zeroboam pa ti anvi ki so pep al ador Bondie dan Zerizalem. Eski to kone kifer? Parski Zerizalem ti dan rwayom Roboam. Zeroboam ti per tansion so pep vir kont li ek soutenir Roboam. Alor, li ti fer de vo an-or ek li ti dir so pep: ‘Zerizalem tro lwin. Zot kapav fer zot ladorasion isi mem.’ Lerla, lepep ti koumans ador sa bann vo an-or la ek zot ti bliye Zeova ankor enn fwa.