1, 2. (a) Ki kitsoz bann dimounn pe fer pou gagn zot liberte? (b) Ki rezilta sa finn ena?

 AZORDI, bann dimounn dan plizir parti lemond koz lor bann drwa legal ek liberte. Sertin anvi libere ar bann tretman inzis ki zot sibir, bann prezize, ek povrete. Lezot anvi lib pou dir seki zot anvi, swazir seki zot anvi ek viv kouma zot anvi. Partou, bann dimounn pe rod zot liberte.

² Pou gagn zot liberte, bann dimounn fer bann manifestasion ek zot mem revolte. Me eski zot vremem gagn seki zot pe rode? Non. Bien souvan, sa fini par pli boukou soufrans ek mem lamor. Seki Lerwa Salomon ti dir dan Ekleziast 8:9 bien vre: “Dimounn finn dominn dimounn pou zot prop maler.”

3. Ki nou bizin fer pou nou gagn vre lazwa ek satisfaksion?

³ Labib dir nou seki nou bizin fer pou nou gagn vre lazwa ek satisfaksion. Disip Zak ti dir: “Enn kikenn ki examinn an profonder lalwa parfe, lalwa ki donn la liberte,  ek ki persevere ladan . . . li pou ere dan seki li fer.” (Zak 1:25, NW.) Se Zeova ki donn nou sa lalwa ki parfe la, ek Li konn pli bien ki noumem seki nou bizin pou nou vremem ere ek gagn satisfaksion. Zeova ti donn Adan ek Ev vre liberte ek tou seki zot ti bizin pou zot ere.

4. Ki kalite liberte Adan ek Ev ti ena? (Get zimaz dan koumansman lartik.)

⁴ Kan nou lir Zenez sapit 1 ek 2, nou aprann ki Adan ek Ev ti ena enn liberte ki paret inposib pou ena azordi. Zot ti ena tou seki zot ti bizin, zot pa ti per nanye, ek personn pa ti tret zot dan enn fason inzis. Zot pa ti trakase akoz manze, travay, maladi, ouswa lamor. (Zenez 1:27-29; 2:8, 9, 15) Me eski zot ti ena enn liberte san limit? Anou gete.

5. Malgre seki boukou panse, ki bann dimounn bizin pou zot gagn liberte?

⁵ Boukou dimounn panse ki vre liberte vedir ki zot kapav fer seki zot anvi san gagn traka bann konsekans. The World Book Encyclopedia dir ki liberte se “kapasite pou fer bann swa ek pou azir dapre seki nou’nn deside.” Me selman, li osi dir ki bann dimounn zot lib si enn gouvernman pa inpoz lor zot bann limit ki initil, ki inzis, ouswa ki pa rezonab. Savedir ki li inportan ki ena sertin limit pou ki tou dimounn gagn liberte. Me kisannla ena drwa deside si enn limit li itil, zis, ek rezonab?

6. (a) Kifer se Zeova tousel ki ena enn liberte total? (b) Ki kalite liberte bann dimounn kapav ena, ek kifer?

⁶ Li inportan ki nou rapel ki se Zeova tousel ki ena enn liberte total ek san limit. Kifer? Parski Li finn kree tou kitsoz ek se Limem ki Sef tou-pwisan dan liniver. (1 Timote 1:17; Revelasion 4:11) Lerwa David ti dekrir Zeova So pozision dan enn zoli fason. (Lir 1 Kronik 29:11, 12. a) Parkont, liberte bann kreatir ki dan lesiel ek lor later ena sertin limit. Zeova anvi ki nou konpran ki se zis Li tousel ki ena drwa pou deside ki bann limit ki itil, zis ek rezonab. Se akoz sa ki depi koumansman, Zeova finn etabli bann limit pou Adan ek Ev.

7. Sit sertin kitsoz ki nou fer ki rann nou ere.

⁷ Mem si Adan ek Ev ti ena boukou liberte, zot liberte ti ena bann limit. Sertin sa bann limit-la ti natirel pou zot. Par exanp, pou kontign viv, zot ti bizin respire, manze, ek dormi. Eski savedir ki zot pa ti lib? Non. An realite, Zeova ti fer sir ki kan zot pou fer sa bann kitsoz-la, zot ti pou ere ek gagn satisfaksion. (Psom 104:14, 15; Ekleziast 3:12, 13) Nou tou nou kontan respir ler fre, manz nou manze prefere, ek dormi bien aswar. Nou pa santi okenn restriksion lor nou kan nou fer sa bann kitsoz-la. Sirman ki Adan ek Ev ti ena mem santiman.

8. Ki lord bien presi Bondie ti donn Adan ek Ev, ek kifer?

⁸ Zeova ti donn Adan ek Ev enn lord  bien presi. Li ti dir zot gagn bann zanfan, ranpli later, ek pran li swin. (Zenez 1:28) Eski sa lord-la ti priv zot zot liberte? Non! Sa ti donn zot lokazion pou fer later antie vinn enn paradi, fer li vinn enn plas kot zot ti pou res pou touletan avek zot bann zanfan ki ti pou parfe. Se sa proze lamem ki Bondie ti ena pou later. (Izai 45:18) Azordi, si bann dimounn swazir pou pa marye ouswa pa gagn zanfan, sa pa vedir ki zot pe dezobeir Bondie. Selman, boukou dimounn desid pou marye ek gagn zanfan, mem si sa kapav fer zot gagn sertin difikilte. (1 Korintien 7:36-38, NW.) Kifer? Parski zot atann pou gagn lazwa ek satisfaksion. (Psom 127:3) Si Adan ek Ev ti obeir Zeova, zot ti pou ena enn maryaz ek enn lavi fami ere pou touletan.

9. Kifer lord ki Bondie ti done dan Zenez 2:17 li pa initil, inzis, ouswa pa rezonab?

⁹ Zeova ti donn Adan ek Ev enn lot lord, ek ti dir zot dan enn fason bien kler ki pou ariv zot si zot dezobeir sa lord-la. Li ti dir: “Me, konsernan pie konesans bon ek move, fode pa ki to manz so frwi, parski zour ki to manz sa, vremem to pou mor.” (Zenez 2:17) Eski sa lord-la ti initil, inzis, ouswa pa rezonab? Eski sa ti priv Adan ek Ev zot liberte? Non. Ofet, boukou Biblis panse ki sa lord ki Bondie ti done la ti bien saz ek ti lozik. Enn parmi zot dir ki sa aprann nou “ki se zis Bondie ki kone seki bon . . . pou bann dimounn ek zis Bondie kone seki pa bon . . . pou zot. Pou profit seki ‘bon,’ bann dimounn bizin fer konfians Bondie ek obeir Li. Si zot dezobeir, zot pou bizin deside par zotmem seki bon . . . ek seki pa bon.” Se enn kitsoz tro difisil pou ki bann dimounn fer sa par zotmem.

10. Kifer liberte pou swazir li pa parey kouma drwa pou deside seki bon ek seki pa bon?

¹⁰ Sertin dimounn kapav panse ki Zeova pa ti donn Adan liberte pou fer seki li ti anvi. Me selman, zot pa realize ki liberte pou swazir ouswa drwa pou swazir ki nou pou fer, li pa parey kouma drwa pou deside seki bon ek seki pa bon. Adan ek Ev ti ena liberte pou swazir si zot ti pou obeir Bondie ouswa non. Me se zis Zeova ki ena drwa pou deside seki bon ek seki pa bon. Ek “pie konesans bon ek move” dan zardin Edenn ti reprezant bien sa drwa-la. (Zenez 2:9) Nou pa touletan kone ki rezilta bann swa ki nou fer kapav ena, ek nou pa kapav kone si rezilta-la pou touletan bon. Akoz samem bien souvan, malgre ki zot ena bann bon lintansion, bann dimounn pran bann desizion ouswa fer bann swa ki amenn soufrans ek bann katastrof. (Proverb 14:12) Wi, bann dimounn ena bann limit. Kan Li ti donn Adan ek Ev lord pou pa manz sa frwi-la, Zeova ti  ansegn zot ki zot bizin obeir Li pou gagn vre liberte. Ki Adan ek Ev ti desid pou fer?

11, 12. Kifer swa ki Adan ek Ev ti fer finn amenn bann move konsekans? Donn enn lexanp.

¹¹ Malerezman, Adan ek Ev ti swazir pou dezobeir Zeova. Ev ti swazir pou ekout Satan kan li ti promet: “Zot lizie pou ouver, ek zot pou vinn kouma Bondie, zot pou konn seki bon ek seki pa bon.” (Zenez 3:5) Eski seki Adan ek Ev ti swazir finn permet zot gagn plis liberte, parey kouma Satan ti dir? Non, sa pa’nn arive. An realite, kan zot ti rezet direksion Bondie zot ti trouve ki sa amenn bann move konsekans. (Zenez 3:16-19) Kifer? Parski Zeova pa finn donn bann dimounn liberte pou deside par zotmem seki bon ek seki pa bon.​—Lir Proverb 20:24 ek not b; Zeremi 10:23 c.

¹² Nou kapav konpar sa sitiasion-la ar enn pilot. Pou li ariv so destinasion san okenn problem, normalman li bizin swiv enn larout ki finn aprouve, servi bann ekipman ki pou ed li diriz so avion ek kominik avek latour kontrol. Me si pilot-la pa swiv bien sa bann linstriksion-la ek al dan direksion ki li anvi, sa kapav mal fini. Parey kouma sa pilot-la, Adan ek Ev ti anvi fer bann kitsoz dan zot fason. Zot ti rezet direksion  Bondie. Ki rezilta sa finn ena? Sa finn amenn bann move konsekans! Zot desizion finn amenn pese ek lamor pou zotmem ek pou tou zot bann desandan. (Romin 5:12) Adan ek Ev pa finn gagn plis liberte kan zot finn esey deside par zotmem seki bon ek seki pa bon. Okontrer, zot ti perdi sa vre liberte ki Zeova ti donn zot la.

13, 14. Kouma nou kapav gagn vre liberte?

¹³ Sertin dimounn panse ki si nou ti ena enn liberte san limit sa ti pou meyer. Me eski sa li vre? Pena dout ki kan nou ena liberte sa ena so bann lavantaz, me esey mazine kouma lemond ti pou ete si pa ti ena okenn limit! The World Book Encyclopedia dir ki bann lalwa ki ena dan ninport ki sosiete ki organize, zot bien konplike parski zot bizin met bann limit ek anmemtan protez liberte bann dimounn. Sa pa touletan fasil. Se akoz sa ki ena boukou lalwa ek boukou avoka ek ziz ki esey explik ek aplik sa bann lalwa-la.

¹⁴ Zezi Kris ti explike kouma nou kapav gagn vre liberte. Li ti dir: “Si zot gard mo parol, zot mo bann vre disip, zot pou konn laverite e laverite pou rann zot lib.” (Zan 8:31, 32) Alor pou gagn vre liberte, nou bizin fer de kitsoz. Premierman, nou bizin aksepte laverite ki Zezi finn ansegne. Deziemman, nou bizin vinn so bann disip. Kan nou fer sa bann kitsoz-la, sa pou fer nou gagn vre liberte. Me libere ar ki  kitsoz? Zezi ti dir: “Tou seki fer pese, li esklav pese.” Li ti azoute: “Si Garson la liber zot, alors vremem zot pou lib.”​—Zan 8:34, 36.

15. Kifer liberte ki Zezi ti promet kapav fer nou vremem “lib”?

¹⁵ Sa liberte ki Zezi ti promet so bann disip la, li boukou pli bon ki sa kalite liberte ki laplipar dimounn pe rode azordi la. Kan Zezi ti dir: “Si Garson la liber zot, alors vremem zot pou lib,” li ti pe rod dir ki nou pou libere ar pese, lesklavaz pli pir ki bann dimounn finn kone. Dan ki sans nou esklav pese? Pese fer nou fer bann move kitsoz. Ek li osi anpes nou fer seki nou kone bon ouswa fer nou maximum. Ek sa amenn desepsion, tristes, soufrans ek finalman lamor. (Romin 6:23) Lapot Pol ti kone kouma sa fer soufer kan nou esklav pese. (Lir Romin 7:21-25.) Se zis kan pou tir pese net ki nou pou kapav ena vre liberte ki Adan ek Ev ti ena enn lepok.

16. Kouma nou pou vremem lib?

¹⁶ Kan Zezi ti dir “si zot gard mo parol,” li ti pe montre ki si nou anvi ki li liber nou, nou bizin fer sertin kitsoz. Ki bann kitsoz? Kan nou’nn vwe nou lavi ar Zeova, nou’nn renie noumem ek nou’nn swazir pou aksepte bann limit ki Zezi finn fixe pou so bann disip. (Matie 16:24, NW.) Parey kouma Zezi ti promet, nou pou vremem lib dan lavenir kan nou pou gagn bann benediksion gras-a laranson.

17. (a) Kouma nou pou vremem ere ek gagn satisfaksion? (b) Ki nou pou aprann dan prosin lartik?

¹⁷ Pou ki nou vremem ere ek gagn satisfaksion, antan ki bann disip Zezi, nou bizin obeir so bann lansegnman. Si nou fer sa, lerla nou pou kapav vremem libere ar lesklavaz pese ek lamor. (Lir Romin 8:1, 2, 20, 21.) Dan prosin lartik, nou pou aprann kouma nou kapav bien servi sa liberte ki nou ena la. Lerla nou pou kapav onor Zeova, Bondie ki donn vre liberte, pou touletan.