1. Kouma to kapav devlop enn bon lamitie avek enn kikenn?

 BIEN souvan, premie kitsoz ki de dimounn fer pou devlop enn bon lamitie se pas letan ansam. Plis zot koze ansam, partaz zot bann lexperyans ek seki zot panse, plis zot vinn kamarad. Parkont, pou devlop enn bon lamitie avek Zezi, nou bizin sirmont plizir difikilte. Anou get sertin parmi zot.

2. Ki premie difikilte nou bizin fer fas?

² Premie difikilte ki nou bizin fer fas se ki nou pa’nn zwenn Zezi personelman. Dan premie siek, boukou Kretien ti gagn mem difikilte. Kanmem sa, lapot Pier ti dir: “Mem si zot pa finn trouv li, zot kontan li; e mem si zot pa trouv li asterla, zot krwar dan li.” (1 Pier 1:8) Alor, mem si nou pa’nn zwenn Zezi, nou kapav ena enn bon lamitie avek li.

3. Ki deziem difikilte nou bizin fer fas?

³ Deziem difikilte ki nou bizin fer fas se ki nou pa kapav koz avek Zezi. Kan nou priye, nou koz avek Zeova. Li vre ki nou priye o-nom Zezi, me nou pa koz avek li. An realite, Zezi pa anvi ki nou priye li. Kifer? Parski lapriyer se enn form ladorasion, ek nou bizin ador zis Zeova tousel. (Mat. 4:10) Kanmem sa, nou kapav montre Zezi ki nou kontan li.

4. Ki trwaziem difikilte nou bizin fer fas, ek ki nou pou examine dan sa lartik-la?

⁴ Trwaziem difikilte ki nou bizin fer fas se ki Zezi res dan lesiel, alor nou pa kapav pas letan avek li. Kanmem  sa, nou kapav aprann boukou kitsoz lor Zezi mem si nou pa avek li. Dan sa lartik-la, nou pou get kat kitsoz ki nou kapav fer pou ki nou lamitie avek Zezi vinn pli for. Me avan, anou gete kifer li bien inportan ki nou devlop enn bon lamitie avek Zezi.

5. Kifer nou bizin vinn kamarad Zezi. (Get osi lankadre “ Nou Lamitie Avek Zezi Fer Nou Vinn Kamarad Zeova” ek “ Enn Bon Fason Panse lor Rol ki Zezi Ena.”)

⁵ Nou bizin vinn kamarad Zezi pou nou kapav ena enn bon relasion avek Zeova. Kifer? Anou get zis de rezon. Premierman, Zezi ti dir so bann disip: “Mo Papa bien kontan zot parski zot finn kontan mwa.” (Zan 16:27) Li ti dir osi: “Personn pa kapav al kot mo Papa si li pa pas par mwa.” (Zan 14:6) Si nou esey vinn kamarad ar Zeova san ki nou ena enn bon lamitie avek Zezi, se koumadir nou pe rod rant dan enn batiman san ki nou pas par laport. Anplis, dan enn lexanp ki li ti servi, Zezi ti dekrir limem kouma “laport bann mouton.” (Zan 10:7) Enn deziem rezon se ki Zezi ti imit bann kalite so Papa dan enn fason parfe. Li ti dir so bann disip: “Seki finn trouv mwa finn trouv mo Papa.” (Zan 14:9) Alor, enn parmi bann meyer fason ki nou kapav aprann konn Zeova, se kan nou aprann konn Zezi. Amezir ki nou aprann konn Zezi, nou lamour pou li pou grandi. Ek plis nou pou kontan Zezi, plis nou pou kontan so Papa.

6. Sit enn lot rezon kifer nou bizin vinn kamarad Zezi. Explike.

⁶ Nou bizin vinn kamarad Zezi si nou  anvi ki Zeova reponn nou bann lapriyer. Savedir ki li pa ase ki nou zis dir “o-nom Zezi” alafin nou bann lapriyer. Nou bizin konpran osi kouma Zeova servi Zezi pou reponn nou bann lapriyer. Zezi ti dir so bann zapot: “Tou seki zot demande lor mo nom, mo pou fer li.” (Zan 14:13) Mem si se Zeova ki ekout ek reponn nou bann lapriyer, Li’nn donn Zezi lotorite pou akonpli So bann desizion. (Mat. 28:18) Savedir ki Zeova gete si nou finn met an pratik konsey ki Zezi inn done avan ki Li reponn nou bann lapriyer. Par exanp, Zezi ti dir: “Si zot pardonn lezot zot fot, zot Papa dan lesiel pou pardonn zot osi, me si zot pa pardonn lezot, zot Papa osi pa pou pardonn zot fot.” (Mat. 6:14, 15) Alor, li bien inportan ki nou bon anver lezot parey kouma Zeova ek Zezi bon anver nou!

7. Kisannla gagn bann benediksion gras-a sakrifis Zezi?

⁷ Zis bann dimounn ki ena enn bon lamitie avek Zezi ki pou gagn bann benediksion gras-a so sakrifis. Kouma nou konn sa? Zezi inn dir ki li pou “donn so lavi pou so bann kamarad.” (Zan 15:13) Bann serviter Zeova ki ti viv avan ki Zezi vinn lor later pou bizin aprann konn li ek kontan li. Bann zom ek bann fam fidel kouma Abraam, Sara, Moiz, ek Raab pou resisite, me mem sa bann fidel serviter Zeova la pou bizin devlop enn bon lamitie avek Zezi pou ki zot gagn lavi eternel.​—Zan 17:3; Zist. 24:15; Ebre 11:8-12, 24-26, 31, NW.

8-9. Dapre Zan 15:4, 5, ki nou pou kapav fer si nou kamarad ar Zezi, ek kifer sa li inportan?

⁸ Nou travay ansam avek Zezi kan nou prese ek ansegn bann dimounn bon nouvel lor Rwayom Bondie, ek sa rann nou bien zwaye. Kan Zezi ti lor later, li ti ansegn bann dimounn. Depi ki li’nn retourn dan lesiel, Zezi li sef lasanble Kretien ek li pe kontign diriz travay predikasion. Li bien kontan kan li trouv twa pe fer bann zefor pou ed maximum dimounn aprann konn li ek so Papa. An realite, sel fason ki nou kapav fer sa travay-la se avek led Zeova ek Zezi.​—Lir Zan 15:4, 5.

⁹ Dan enn fason bien kler, Labib ansegn nou ki nou bizin kontign ena lamour pou Zezi si nou anvi fer Zeova plezir. Alor, anou get kat kitsoz ki nou kapav fer pou vinn kamarad Zezi.

10. Ki premie kitsoz nou bizin fer pou vinn kamarad Zezi?

¹⁰ (1) Aprann konn Zezi. Nou aprann konn Zezi kan nou lir liv Matie, Mark, Lik, ek Zan. Amezir ki nou reflesi lor seki Labib dir lor Zezi ek ki nou trouv fason ki li konsider bann dimounn, nou pou aprann kontan li ek respekte li. Par exanp, Zezi pa ti konsider so bann disip kouma bann esklav, mem si li ti zot Met. Okontrer, li ti partaz seki li ti panse ek resanti avek zot. (Zan 15:15) Kan zot ti soufer, li ti soufer ek plore ansam ar zot. (Zan 11:32-36) Zezi ti vinn kamarad avek bann dimounn ki ti aksepte so mesaz. Mem so bann lennmi ti trouv sa. (Mat. 11:19) Kan nou imit fason ki Zezi ti azir anver so bann disip, nou pou ena enn pli bon relasion avek lezot, nou pou ere, ek nou lamour pou Zezi pou grandi.

11. Ki deziem kitsoz nou bizin fer pou vinn kamarad Zezi, ek kifer eski sa inportan?

 ¹¹ (2) Pans ek azir parey kouma Zezi. Plis nou konpran ek imit so fason panse, plis nou pou vinn pros ar li. (1 Kor. 2:16) Kouma nou kapav imit Zezi? Anou get zis enn lexanp. Zezi ti plis anvi ed lezot ki fer limem plezir. (Mat. 20:28; Rom. 15:1-3) Sa fason panse la ti pous li pou fer bann sakrifis pou lezot ek pou pardonn zot. Kan bann dimounn ti dir bann move kitsoz lor li, li pa ti ofanse vit. (Zan 1:46, 47) Li pa ti aret li lor bann erer ki bann dimounn ti fer dan lepase ek sa pa ti inflians seki li ti panse lor zot. (1 Tim. 1:12-14) Li inportan ki nou ena mem fason panse ki Zezi lor lezot, parski li ti dir: “Si zot ena lamour pou zot kamarad, tou dimoun pou kone ki zot mo disip.” (Zan 13:35) Alor, li bon ki to demann tomem, “Parey kouma Zezi, eski mo pe fer tou seki mo kapav pou favoriz lape avek mo bann frer ek ser?”

12. Ki trwaziem kitsoz nou bizin fer pou vinn kamarad Zezi, ek kouma nou kapav fer sa?

¹² (3) Soutenir bann frer Zezi. Pou Zezi, ninport ki kitsoz nou fer pou so bann frer ki ena lesperans pou al dan lesiel, se koumadir nou pe fer sa pou limem. (Mat. 25:34-40) Meyer fason ki nou soutenir bann Kretien ki ena lesperans pou al dan lesiel se kan nou fer nou maximum pou prese ek ansegn lezot, parey kouma Zezi ti demann so bann disip pou fer. (Mat. 28:19, 20; Zist. 10:42) Azordi, gras-a led bann “lezot mouton,” bann frer Zezi pe reisi fer travay predikasion dan lemond antie. (Zan 10:16) Si to form parti bann lezot mouton, sak fwa ki to prese, to montre ki to kontan bann frer Zezi ek Zezi osi.

13. Kouma nou kapav met an pratik konsey ki Zezi inn done dan Lik 16:9?

¹³ Nou kapav osi vinn kamarad Zeova ek Zezi kan nou fer bann kontribision pou soutenir bann travay ki zot dirize. (Lir Lik 16:9.) Par exanp, nou kapav fer bann kontribision pou soutenir bann laktivite ki pe fer dan lemond antie. Servi sa bann kontribision-la pou prese dan bann landrwa izole, pou konstrir ouswa fer mintenans bann batiman ki servi pou vre ladorasion, ek pou ed bann frer ek ser ki pas par bann difikilte, kouma bann katastrof natirel. Nou fer osi bann kontribision pou pey bann depans ki ena dan nou lasanble ek nou osi ed bann dimounn ki nou kone bizin led. (Prov. 19:17) Se dan sa bann fason-la ki nou kapav soutenir bann frer Zezi.

14. Dapre Efezien 4:15, 16, ki katriem kitsoz nou bizin fer pou vinn kamarad Zezi?

¹⁴ (4) Soutenir bann dispozision ki lorganizasion Zeova pran. Nou vinn pli pros ar Zezi, sef lasanble Kretien, kan nou korper ar bann frer ki gid nou avek boukou lamour. (Lir Efezien 4:15, 16.) Par exanp, azordi nou pe esey servi pli bien nou bann Lasal Renion. Akoz sa, dan plizir landrwa, de ouswa plizir lasanble lokal finn vinn enn sel ek finn osi ena bann sanzman konsernan teritwar bann lasanble. Gras-a sa bann sanzman-la, lorganizasion finn fer boukou lekonomi. Biensir, sertin proklamater finn bizin adapte zot ar sa bann sanzman-la. Sa bann proklamater fidel la kitfwa ti pe servi depi plizir lane dan sa bann lasanble-la ek kitfwa zot ti bien pros ar bann frer ek ser ki ti laba. Me asterla, lorganizasion pe demann zot pou al servi dan  enn lot lasanble. Mazine ki kantite Zezi kontan kan li trouv sa bann Kretien fidel la soutenir bann dispozision ki lorganizasion pran!

15. Kouma nou lamitie avek Zezi pou vinn pli for dan lavenir?

¹⁵ Bann Kretien ki ena lesperans pou al dan lesiel, zot pou viv avek Zezi pou touletan ek zot pou regne ansam avek li dan Rwayom Bondie. Zot pou avek Zezi, setadir zot pou trouv li, zot pou koz avek li, ek zot pou pas letan avek li. (Zan 14:2, 3) Bann dimounn ki ena lesperans pou viv lor later, zot osi zot pou gagn lamour ek latansion Zezi. Mem si zot pa pou trouv Zezi, zot lamitie avek li pou kontign grandi amezir ki zot profit lavi ki zot pou ena dan Paradi gras-a Zeova ek Zezi.​—Iza. 9:6, 7.

16. Ki benediksion nou kapav gagne gras-a nou lamitie avek Zezi?

¹⁶ Zezi invit nou pou vinn so kamarad ek kan nou aksepte sa linvitasion-la, nou gagn boukou benediksion. Par exanp, depi asterla mem nou ena so lamour ek so soutien. Nou ena osi posibilite pou viv pou touletan. Me pli inportan, nou lamitie avek Zezi pou fer nou gagn pli zoli kado ki ena: enn bon lamitie avek Zezi so Papa, Zeova. Se vremem enn gran privilez pou vinn kamarad Zezi, pa vre!