1-2. (a) Kisannla Enis ti ete, ek ki difikilte li ti gagne pou ansegn Timote lor Zeova ek Zezi? (b) Explik zimaz lor kouvertir.

 MEM si Labib pa koz lor batem Timote, nou kapav sey mazinn lazwa Enis sa zour-la. (Prov. 23:25) Esey mazine ki kantite li fier, kan li trouv Timote pe debout dan delo. Enis ena enn sourir lor so figir, ek Lois, Timote so granmer, pe may li. Enis tini so respirasion kan plonz Timote dan delo. Kan Timote sorti anba delo avek enn gran sourir, Enis plore telman li kontan. Mem si sa ti difisil, Enis inn ansegn so garson pou kontan Zeova ek Zezi. Ki difikilte li’nn gagne pou fer sa?

² Bann paran Timote pa ti dan mem relizion. So papa ti enn Grek, ek so mama ek so granmer ti bann Zwif. (Zist. 16:1) Kitfwa Timote ti ankor enn adolesan kan Enis ek Lois ti vinn Kretien. Me so papa pa ti vinn Kretien. Ki relizion Timote ti pou swazir? Li ti ase gran pou pran so prop desizion. Eski li ti pou swiv relizion so papa? Eski li ti pou swiv bann tradision Zwif ki li ti aprann depi ki li tipti? Ouswa eski li ti pou vinn enn Kretien?

3. Dapre Proverb 1:8, 9, kouma Zeova konsider bann zefor ki bann mama fer pou ed zot zanfan pou vinn pros avek Li?

³ Azordi osi, bann mama Kretien kontan zot fami. Plis ki ninport ki kitsoz, zot anvi ed zot zanfan pou vinn pros ar Zeova. Ek Zeova bien apresie bann zefor ki zot fer dan sa domenn-la. (Lir Proverb 1:8, 9. b) Zeova inn ed boukou mama pou ed zot zanfan pou aksepte laverite.

4. Ki difikilte bann mama gagne azordi?

 ⁴ Li normal ki enn mama demann limem si so zanfan pou servi Zeova, parey kouma Timote ti fer. Bann paran kone ki kantite presion zot zanfan gagne dan lemond Satan. (1 Pier 5:8) Anplis, sertin mama bizin elve zot zanfan tousel parski zot pena mari, ouswa zot mari pa dan laverite. Par exanp, enn ser ki apel Christine c dir: “Mo mari enn bon papa ek li okip bien so fami. Me li pa ti anvi ki mo ansegn nou bann zanfan laverite. Souvan mo ti plore parski mo ti pe demann momem si mo bann zanfan ti pou vinn dan laverite enn zour.”

5. Ki nou pou examine dan sa lartik-la?

⁵ Si to enn mama Kretien, to kapav ed to zanfan pou kontan Zeova ek pou servi Li, parey kouma Enis ti fer ar Timote. Sa lartik-la pou montre twa kouma to kapav imit lexanp Enis ek ansegn to bann zanfan par to bann parol ek to bann aksion. Nou pou trouve osi kouma Zeova pou ed twa pou fer sa.

6. Dapre 2 Timote 3:14, 15, kouma Timote ti vinn Kretien?

⁶ Kan Timote ti ankor tipti, so mama ti fer so best pou ansegn li “lekritir sakre” bann Zwif. Biensir, ena sertin kitsoz ki Enis pa ti konpran, parski li pa ti konn nanye lor Zezi. Kanmem sa, avek seki Timote ti aprann dan bann Lekritir, sa ti kapav ed li pou aksepte Zezi ek vinn enn Kretien. Me eski Timote ti pou vinn enn Kretien? Timote ti enn zenn zom, alor li ti kapav deside si li ti pou vinn enn Kretien. Sirman Timote ti aksepte laverite lor Zezi gras-a bann zefor ki so mama ti fer pou ansegn li. (Lir 2 Timote 3:14, 15, NW. d) Enis ti bien kontan ki li’nn reisi ansegn so garson lor Zeova, mem si sa ti difisil. Enis so nom sorti dan enn mo ki vedir “sirmonte” ek vremem Enis ti reisi sirmont bann difikilte ki li ti gagne pou ed Timote pou kontan Zeova ek pou servi Li.

7. Ki Enis ti fer pou ed Timote pou vinn enn pli bon Kretien apre so batem?

⁷ Kan Timote ti pran batem, li ti realiz enn lobzektif bien inportan dan so lavi. Me apre ki Timote ti pran batem, Enis ti ankor trakase pou so garson. Ki Timote ti pou fer ar so lavi? Eski li ti pou ena bann kamarad ki ti pou ena enn move linflians lor li? Eski li ti pou al lekol dan Atenn, ek aksepte bann lansegnman bann filozof ki ti ena laba? Eski li ti pou perdi so letan, so lenerzi, ek so zenes pou li travay dir pou li gagn kas? Enis pa ti kapav desid pou Timote, me li ti kapav ed li. Kouma li ti fer sa? Li ti kontign fer zefor pou ansegn so garson pou kontan Zeova ek pou ena rekonesans pou tou seki Zeova ek Zezi ti fer pou zot fami. Me pa zis bann konzwin ki zot mari pa dan laverite ki gagn bann difikilte pou ed zot zanfan pou kontan Zeova. Mem kan toulede paran dan laverite, zot kapav gagn difikilte pou ed zot zanfan pou servi Zeova. Ki kitsoz bann paran kapav aprann ar lexanp Enis?

8. Kouma enn mama kapav ed so mari ki Temwin pou ansegn zot zanfan lor Zeova?

 ⁸ Etidie Labib avek to zanfan. Ser, si to mari dan laverite, Zeova anvi ki to ed li pou ansegn zot bann zanfan. Enn fason ki to kapav fer sa, se kan to ede pou ki zot fer zot ladorasion an fami regilierman. Dir bann kitsoz pozitif lor zot ladorasion an fami, ek reflesi kouma to kapav ede pou ki ena enn bon latmosfer. Kitfwa to kapav ed to misie pou zot prepar enn proze spesial pou zot ladorasion an fami. Anplis, si to bann zanfan ase gran pou etidie liv Viv Ere pou Touletan!, kitfwa to kapav ed to mari pou letid bann zanfan.

9. Kan enn mama so konzwin pa dan laverite, kotsa li kapav gagn led pou ansegn so zanfan?

⁹ Sertin mama bizin etidie Labib avek zot zanfan par zotmem, parski zot pena mari ouswa zot mari pa dan laverite. Si to dan sa sitiasion-la, fode pa to trakase. Zeova pou ed twa. Servi bann zouti efikas ki Li donn twa atraver so lorganizasion pou to etidie avek to bann zanfan. To kapav osi demann bann paran ki ena lexperyans kouma zot servi sa bann zouti-la? e (Prov. 11:14) Zeova kapav ed twa osi pou ena enn bon kominikasion avek to bann zanfan. Priye Li ek demann Li pou ed twa pou kone seki ena dan leker ek dan lespri to zanfan. (Prov. 20:5) Par exanp, enn kestion bien sinp kouma, ‘Ki pli gran difikilte to pe gagne dan lekol?’ kapav ed twa pou aprann boukou lor to zanfan.

10. Ki kitsoz ankor to kapav fer pou to ansegn to zanfan lor Zeova?

¹⁰ Rod diferan fason pou to ansegn to zanfan lor Zeova. Koz lor Zeova ek lor tou bann bon kitsoz ki Li’nn fer pou twa. (Det. 6:6, 7; Iza. 63:7) Sa li bien inportan, sirtou si to pa kapav etidie Labib avek to bann zanfan kot twa. Christine, ki nou ti mansione avan, dir: “Mo pa ti gagn boukou lokazion pou koz lor Zeova, alor mo ti sezi tou lokazion ki mo ti gagne. Kan mo ti al marse avek mo bann zanfan, ouswa kan nou ti fer kayak, mo ti koz lor kreasion Zeova ek lor bann kitsoz spiritiel. Ek kan mo bann zanfan ti ase gran, mo ti ankouraz zot pou etidie Labib par zotmem.” To kapav osi dir bann bon kitsoz lor lorganizasion Zeova ek lor to bann frer ek ser. Anplis, fode pa ki to kritik bann ansien, parski si to fer sa, to bann zanfan pa pou al rod led bann ansien kan zot gagn bann difikilte.

11. Dapre Zak 3:18, kifer li inportan ki nou ede pou ki ena lape dan lakaz?

¹¹ Ede pou ki ena lape dan lakaz. Regilierman, montre to mari ek to bann zanfan ki to kontan zot. Kan to koz lor to mari, fer li avek respe ek bonte, ek montre to bann zanfan pou fer parey. Kan to fer sa, to kree enn bon latmosfer dan lakaz, kot li pli fasil pou to bann zanfan pou aprann konn Zeova. (Lir Zak 3:18.) Anou get lexanp Jozsef, ki servi kouma pionie spesial dan Roumani. Kan li ti zenn, so papa ti pe persekit zot fami parski zot ti pe servi Zeova. Jozsef dir: “Mo mama ti fer boukou zefor pou ki ena lape dan lakaz. Plis mo papa ti pe fer move, plis mo mama ti bon anver li. Kan  nou mama ti trouve ki nou ti pe gagn difikilte pou respekte ek obeir nou papa, li ti servi Efezien 6:1-3 pou koz avek nou. Apre sa, li ti explik nou bann bon kalite ki nou papa ena, ek li ti ed nou pou konpran kifer nou ti bizin kontan li. Sa ti ede pou ki ena lape dan lakaz.”

12. Dapre 2 Timote 1:5, kouma lexanp Enis finn ena enn bon lefe lor Timote?

¹² Lir 2 Timote 1:5. Enis ti enn bon lexanp pou Timote. Sirman li ti ansegn Timote ki, kan enn kikenn ena vre lafwa, li montre sa par so bann aksion. (Zak 2:26) Enis ti bien kontan Zeova, ek sirman Timote ti trouv sa dan tou seki so mama ti fer. Sirman li ti trouve osi ki so mama ti ere parski li ti pe servi Zeova. Kouma lexanp Enis finn ena enn bon lefe lor Timote? Lapot Pol dir ki Timote ti ena enn lafwa for parey kouma so mama. Timote pa ti gagn enn lafwa for, enn kout koumsa. Li ti trouv lexanp so mama ek li ti desid pou imit li. Dan mem fason azordi, gras-a zot bon “konportman,” boukou mama inn reisi tous leker bann manb zot fami. (1 Pier 3:1, 2) Twa osi to kapav fer parey. Kouma?

13. Kifer enn mama bizin fer so lamitie avek Zeova vinn kitsoz pli inportan dan so lavi?

¹³ Fer to lamitie avek Zeova vinn kitsoz pli inportan dan to lavi. (Det. 6:5, 6) Parey kouma boukou mama, sirman to fer boukou sakrifis. Pou pran swin to zanfan, sirman to sakrifie to letan, to somey, to larzan, ek lezot kitsoz ankor. Me fode zame ki to telman okipe avek to bann zanfan, ki to nepli ena letan pou ranforsi to lamitie avek Zeova. Regilierman, rezerv letan pou to priye Zeova, pou to letid personel, ek pou bann renion. Kan to fer sa, to pou ranforsi to lamitie avek Zeova ek to pou enn bon lexanp pou to fami ek pou lezot osi.

14-15. Ki nou kapav aprann ar lexanp Leanne, Maria, ek João?

¹⁴ Anou get lexanp de-trwa zenn ki finn aprann pou kontan Zeova ek pou fer Li konfians gras-a lexanp zot mama. Leanne, tifi Christine, dir: “Nou pa ti kapav etidie Labib kan nou papa ti lakaz. Me mama ti touletan asiste so bann renion. Mem si nou pa ti konn boukou kitsoz lor Labib, so lexanp ti ed nou pou ena enn lafwa for. Avan mem ki nou ti koumans asiste bann renion, nou ti kone ki bann Temwin Zeova ti ansegn laverite.”

¹⁵ Maria so papa parfwa ti pini zot fami parski zot ti pe asiste bann renion. Maria dir: “Pou mwa, mo mama se enn parmi bann ser ki ena pli boukou kouraz. Kan mo ti zenn, parfwa mo ti refiz pou fer sertin kitsoz parski mo ti per seki lezot ti pou dir. Me kan mo ti trouve ki kantite kouraz mo mama ti ena, ek kouma li ti touletan met Zeova an premie dan so lavi, sa ti ed mwa pou sirmont mo laper.” João so papa ti anpes zot fami pou koz lor bann kitsoz spiritiel dan lakaz. João dir: “Seki ti plis ankouraz mwa, se ki mo mama ti pre pou fer tou pou fer mo papa plezir, me zame li pa ti pou abandonn Zeova pou fer mo papa plezir.”

16. Ki lefe lexanp enn mama kapav ena lor lezot?

¹⁶ Mama, pa bliye ki to lexanp kapav ena enn lefe lor lezot. Kouma? Anou  gete kouma lexanp Enis finn ena enn lefe lor lapot Pol. Pol ti dir ki Timote ti ena enn lafwa sinser, ki li ti ‘resevwar ar so mama Enis.’ (2 Tim. 1:5) Kan eski Pol ti trouv lafwa Enis pou premie fwa? Kitfwa li ti zwenn Lois ek Enis dan List, pandan so premie vwayaz misioner. Ek kitfwa li ti ed zot pou vinn bann Kretien. (Zist. 14:4-18) Kan Pol ti ekrir Timote 15 an apre, Pol ti ankor rapel lafwa Enis ek li ti mansionn so nom kouma enn lexanp ki kapav imite. Li kler ki lexanp Enis ti bien ankouraz lapot Pol, ek kitfwa ti ankouraz osi boukou lezot Kretien sa lepok-la. Si to bizin elve to zanfan tousel parski to pena mari ouswa parski to mari pa dan laverite, to kapav sir ki to lafwa ek to bon lexanp pe ankouraz ek motiv lezot.

17. Ki to bizin fer si to zanfan pa anvi servi Zeova, mem si to’nn fer boukou zefor pou ansegn li?

¹⁷ Ki to pou fer si to zanfan pa anvi servi Zeova, mem si to’nn fer boukou zefor pou ed li? Pa bliye ki sa pran letan pou ed enn zanfan pou kontan Zeova. Kouma zimaz pou sa paragraf-la montre, kan to plant enn lagrin, kitfwa to kapav demann tomem si li pou pouse pou vinn enn pie ki donn bann frwi. Mem si to pa kone si pie-la pou donn bann frwi, to pou kontign aroz li pou ki li kontign grandi. (Mark 4:26-29) Dan mem fason, enn mama kapav demann limem si so bann zefor pe vremem ed so zanfan pou  kontan Zeova. To pa kapav desid dan plas to zanfan. Selman, si to fer tou seki to kapav pou ed li pou kontan Zeova, ena enn pli gran posibilite ki li vinn kamarad Zeova.​—Prov. 22:6.

18. Kouma Zeova kapav ed to zanfan pou vinn so kamarad?

¹⁸ Depi kreasion bann imin, Zeova inn ed boukou zenn pou vinn so kamarad. (Ps. 22:9, 10) Si to zanfan anvi vinn kamarad Zeova, to kapav sir ki Zeova pou ed li. (1 Kor. 3:6, 7) Mem si to zanfan pa servi Zeova avek tou so leker, Zeova pou kontign kontan li. (Ps. 11:4) Ek ninport kan li montre enn sign ki li anvi fer Zeova plezir, Zeova pou ed li pou vinn so kamarad. (Zist. 13:48, NW; 2 Kro. 16:9) Li kapav osi ed twa pou dir enn parol ki bizin dan moman kot to zanfan vremem bizin tann sa. (Prov. 15:23) Ouswa Li kapav servi enn frer ouswa enn ser dan lasanble pou donn to zanfan enn latansion spesial. Mem si to zanfan inn vinn enn adilt, Zeova kapav ed li pou rapel enn kitsoz ki to ti ansegn li dan lepase. (Zan 14:26) Alor, kan to kontign ansegn to zanfan par to bann parol ek to bann aksion, to kapav sir ki Zeova pou beni to bann zefor.

19. Kifer to kapav sir ki to ena faver Zeova?

¹⁹ Ninport ki desizion ki to zanfan pran, Zeova pou kontign kontan twa. Li kontan twa parski to kontan Li. Si to pe elve to zanfan tousel dan laverite, Zeova promet twa ki Li pou enn Papa pou to zanfan ek ki Li pou protez twa. (Ps. 68:5) To pa kapav desid dan plas to zanfan, si li pou servi Zeova ouswa non. Me si to kontign kont lor Zeova pou ed twa ek ki to fer to best, to kapav sir ki to pou gagn so faver.