1-2. (a) Ki ete enn zibile? (Get lankadre “ Ki Ti Ete enn Lane Zibile?”) (b) Dapre Lik 4:16-18, lor ki kitsoz Zezi ti koze?

 DAN sertin pei, ena bann gran seremoni pou fet 50 an regn enn lerwa ouswa enn larenn. Souvan apel sa 50^em lane-la, lane Zibile sa lerwa ouswa sa larenn-la. Parfwa, bann dimounn kontign fer sa fet-la pandan enn zour, enn semenn, ouswa mem plis. Me kan sa bann fet-la fini, bann dimounn bliye bien vit sa lazwa ki sa ti amene la.

² Dan sa lartik-la, nou pou examinn enn lot zibile ki pli bon ki seki bann Izraelit ti fer. Sak 50 an, dan ansien Izrael, ti selebre enn zibile ki ti dire toutlong lane. Gras-a sa Zibile-la, bann Izraelit ti gagn zot liberte. Kifer li inportan ki nou interes nou ar sa Zibile-la? Parski sa rapel nou enn zoli dispozision ki Zeova inn pran pou nou. Sa dispozision-la pou fer nou gagn nou liberte pou touletan ek li pe deza fer nou gagn bann benediksion depi asterla mem. Anou gete ki Zezi ti dir konsernan sa liberte-la.​—Lir Lik 4:16-18, NW. b

3. Dapre Levitik 25:8-12, ki benediksion bann Izraelit ti gagne gras-a lane Zibile?

³ Pou nou konpran pli bien lor ki liberte Zezi ti pe koze, li inportan ki nou konpran Zibile ki Bondie ti etabli pou so pep dan lepase. Zeova ti dir bann Izraelit: “Zot bizin sanktifie sa 50^em lane-la ek anons liberte ar tou dimounn ki viv dan sa pei-la.  Sa lane-la pou vinn enn Zibile pou zot, ek sakenn parmi zot pou retourn lor so terin ek sakenn parmi zot pou retourn kot so fami.” (Lir Levitik 25:8-12. c) Dan lartik avan, nou ti trouve kouma bann Izraelit ti gagn bann bienfe ar Saba ki ti fer sak semenn. Me kouma bann Izraelit ti gagn bann benediksion gras-a sa lane Zibile la? Par exanp, fer koumadir enn Izraelit ti ena telman boukou det ki li ti oblize vann so terin pou pey so bann det. Lane Zibile ti permet li regagn so terin. Lerla, sa misie-la ti kapav “retourn lor so terin,” ek plitar so bann zanfan ti pou erit sa later-la. Asterla, fer koumadir enn Izraelit ti telman ena det, ki li ti bizin vann limem ouswa vann enn so bann zanfan kouma enn esklav pou pey so bann det. Lane Zibile ti permet enn esklav “retourn kot so fami.” Alor, personn pa ti pou res esklav toutlong so lavi san ki li ena lespwar pou regagn so liberte. Sa dispozision-la montre ki kantite Zeova ti kontan so pep!

4-5. Kifer li inportan ki nou interes nou ar Zibile ki bann Izraelit ti selebre?

⁴ Ki bienfe ankor bann Izraelit ti gagne gras-a Zibile? Zeova ti dir: “Fode ki personn pa vinn pov kot twa, parski Zeova pou beni twa dan pei ki Zeova to Bondie pe donn twa kouma enn leritaz.” (Det. 15:4) Me azordi bann kitsoz bien diferan. Bien souvan, nou trouv bann ris pe vinn pli ris ek bann pov pli pov.

⁵ Antan ki Kretien, nou pa swiv Lalwa Mozaik. Alor, nou pa swiv lalwa Zibile kot ti bizin liber bann esklav, kennsel bann det, ek retourn bann dimounn zot terin. (Rom. 7:4; 10:4; Efe. 2:15, NW) Me kanmem sa, li inportan ki nou interes nou ar sa lane Zibile la. Kifer? Parski nou osi nou pe profit enn liberte ki rapel nou liberte ki bann Izraelit ti gagne gras-a Zibile.

6. Ar ki kitsoz nou tou nou bizin libere?

⁶ Nou tou nou bizin libere ar enn form lesklavaz bien kriel, setadir lesklavaz pese. Akoz pese, nou vinn vie, nou tom malad, ek nou mor. Boukou parmi nou trouv bann konsekans pese kan zot get zotmem dan laglas ouswa kan zot al kot dokter kan zot malad. Anplis, nou dekouraze kan nou fer pese. Lapot Pol ti rekonet ki li ti vinn “prizonie lalwa pese ki [ti] pe travay dan [so] lekor.” Apre sa li ti dir: “Mo vremem enn dimoun malere! Ki sannla pou sap mwa dan sa lekor ki pe antrenn mwa ver lamor la?”​—Rom. 7:23, 24.

7. Ki profet Izai ti predir?

⁷ Erezman, Bondie finn pran enn dispozision pou sap nou ouswa pou liber nou ar pese. Se gras-a Zezi ki nou gagn sa liberte-la. Dan witiem siek avan Nou Lepok, profet Izai ti predir ki pou ena enn gran liberasion dan lavenir. Sa liberasion-la ti pou amenn pli boukou benediksion ki seki bann Izraelit ti gagne pandan lane Zibile. Li ti ekrir: “Lespri Souverin Segner Zeova, li lor mwa, parski Zeova finn swazir mwa pou anons bann bon nouvel ar bann dimounn ki ena limilite. Li finn avoy mwa pou met enn bandaz lor bann leker ki’nn kase, pou anons bann prizonie ki zot pou libere.” (Iza. 61:1) Ar kisannla sa profesi-la aplike?

8. Ar kisannla profesi Izai aplike?

⁸ Sa profesi inportan konsernan sa liberasion-la ti koumans realize apre ki Zezi ti koumans so minister. Kan li ti al dan sinagog dan Nazaret, landrwa kot li ti grandi, Zezi ti lir sa bann parol profet Izai la ar bann Zwif ki ti la. Zezi ti aplik sa bann parol-la ar limem kan li ti dir: “Lespri Zeova lor mwa, parski Li’nn swazir mwa pou anons bann bon nouvel ar bann pov, Li’nn avoy mwa pou anons bann prizonie ki zot pou libere ek bann aveg ki zot pou retrouv kler, bann ki pe soufer ki zot pou libere, pou pres lane kot Zeova pou akord so faver.” (Lik 4:16-19) Kouma Zezi ti akonpli sa profesi-la?

9. Dan lepok Zezi, ki liberasion bann dimounn ti pe atann?

⁹ Dan lepok Zezi, bann dimounn ti koumans gagn sa liberte ki Izai ti predir ek lor ki Zezi ti koze dan sinagog la. Zezi ti fer konpran sa kan li ti dir: “Azordi, sa parol ki zot finn tande la, li finn akonpli.” (Lik 4:21) Boukou dimounn ki ti ekout Zezi sirman ti pe atann ki zot libere ar bann dirizan Romin. Sirman zot ti pans parey kouma sa de misie ki ti dir: “Nou ti panse ki limem ki ti pou kapav  delivre Izrael.” (Lik 24:13, 21) Me nou kone ki Zezi pa ti ankouraz so bann disip pou revolte kont gouvernman Romin ki ti bien dominer. Okontrer, li ti dir zot “rann lanperer seki pou lanperer.” (Mat. 22:21) Alor, kouma Zezi ti liber bann dimounn dan sa lepok-la?

10. Ar ki kitsoz Zezi ti liber bann dimounn?

¹⁰ Garson Bondie ti vinn lor later pou liber bann dimounn ar de kitsoz. Premierman, li ti ed bann dimounn pou liber zot ar bann fos lansegnman ki bann sef relizie ti pe ansegne. Sa lepok-la, boukou Zwif ti esklav bann tradision ek bann fos lansegnman. (Mat. 5:31-37, NW; 15:1-11) Bann ki ti pretann zot pe ed lezot pou servi Bondie, zotmem zot pa ti fer sa kouma bizin. Zot ti koumadir bann aveg. Kan zot ti rezet Lemesi ek laverite ki li ti ansegne, zot pa ti reisi aprann konn Bondie. Zot ti res kouma bann aveg ek zot pa ti gagn pardon zot pese. (Zan 9:1, 14-16, 35-41) Gras-a laverite ki li ti ansegne ek atraver so bon lexanp, Zezi ti montre bann dimounn ki ena limilite kouma zot kapav liber zot ar bann fos lansegnman.​—Mark 1:22; 2:23–3:5.

11. Dan ki fason ankor Zezi ti liber bann dimounn?

¹¹ Deziemman, Zezi inn donn bann dimounn posibilite pou libere ar lesklavaz pese. Gras-a sakrifis Zezi, Bondie kapav pardonn pese bann dimounn ki ena lafwa dan sa sakrifis-la ek ki montre zot lafwa par zot bann aksion. (Ebre 10:12-18) Zezi ti dir: “Si Garson la liber zot, alors vremem zot pou lib.” (Zan 8:36) Sa liberte-la li pli bon ki liberte ki enn Izraelit ti gagne pandan lane Zibile! Par exanp, enn esklav ki ti libere pandan lane Zibile, ti kapav revinn enn esklav enn zour, ek alafin li ti pou mor. Me gras-a a sakrifis Zezi, bann dimounn kapav libere pou touletan.

12. Kisannla ti bann premie pou profit sa liberte ki Zezi ti mansione la?

¹² Pandan Lapantkot 33 Nou Lepok, Zeova ti donn bann zapot, ek lezot zom ek fam fidel so lespri sin. Li ti adopte zot kouma so bann zanfan pou ki dan lavenir Li resisit zot pou regn ansam avek Zezi dan lesiel. (Rom. 8:2, 15-17) Se zotmem ki ti profit an premie liberte ki Zezi ti mansione kan li ti dan sinagog dan Nazaret. Sa bann zom ek fam-la ti nepli esklav bann fos lansegnman ek bann tradision ki bann sef relizie Zwif ti ansegne ek ki pa ti an-akor avek Parol Bondie. Bondie ti osi konsider zot kouma bann dimounn ki’nn libere ar pese ki amenn lamor. Kan bann disip ti gagn lespri sin lane 33 Nou Lepok, enn Zibile sinbolik ti koumanse ek li pou fini lafin Regn Mil An Zezi Kris. Me ant asterla ek lafin Regn Mil An Zezi Kris, ki bann bon kitsoz pou arive?

13-14. Apart bann Kretien ki ena lesperans pou al dan lesiel, kisannla ankor kapav gagn sa liberte ki Zezi ti mansione la?

¹³ Dan nou lepok, bann milyon dimounn sinser ki sorti dan tou nasion form parti bann “lezot mouton.” (Zan 10:16) Zeova pa’nn swazir zot pou al regn ansam avek Zezi dan lesiel. Me dapre Labib, zot ena posibilite pou viv pou touletan lor later. Eski to ena sa lesperans-la?

¹⁴ Si to form parti bann lezot mouton, depi asterla mem twa osi to kapav profit sertin benediksion ki bann Kretien ki ena lesperans pou al dan lesiel pe gagne. Par exanp, parski to ena lafwa dan sakrifis Zezi, to kapav demann Zeova pardonn to bann pese. Lerla, to pou gagn faver Bondie ek to pou ena enn konsians kler devan Li. (Efe. 1:7; Rev. 7:14, 15) Mazinn osi bann benediksion ki to pe gagne parski to’nn libere ar bann fos lansegnman. Zezi ti dir: “Zot pou konn laverite e laverite pou rann zot lib.” (Zan 8:32) Nou extra kontan ki nou ena sa liberte-la, pa vre?

15. Dan lavenir, ar ki kitsoz nou pou libere ek ki bann benediksion nou pou gagne?

¹⁵ Dan lavenir to kapav atann pou gagn enn pli gran liberte. Biento, Zezi pou detrir tou bann fos relizion ek tou bann gouvernman imin parski zot inzis. Bondie pou protez “enn gran lafoul” dimounn ki servi Li. Lerla, zot pou gagn bann benediksion lor later ki pou vinn enn paradi. (Rev. 7:9, 14) Anplis,  boukou dimounn pou resisite ek zot pou kapav libere ar tou bann move konsekans pese Adan.​—Zist. 24:15.

16. Ki gran liberasion bann dimounn pou gagne biento?

¹⁶ Pandan Regn Mil An, Zezi ek bann ki pou regn ansam avek li pou ed bann dimounn pou gagn enn lasante parfe ek enn relasion parfe avek Bondie. Pandan lane Zibile, bann Izraelit ti gagn enn gran liberasion. Me pandan Regn Mil An, bann dimounn pou gagn enn pli gran liberasion ankor. Tou dimounn ki servi Zeova avek fidelite pou vinn parfe ek zot pou libere net ar pese.

17. Ki Izai 65:21-23 ti predir konsernan pep Bondie? (Get zimaz lor kouvertir.)

¹⁷ Izai 65:21-23 dekrir kouma lavi lor later pou ete dan lavenir. (Lir. d) Sertin dimounn panse ki dan Paradi, nou pa pou fer nanye ek ki touletan nou pou nek repoze. Me Labib montre dan enn fason bien kler ki pep Bondie pou fer bann travay ki itil ek ki pou donn zot satisfaksion. Alafin Regn Mil An, nou kapav sir ki “kreasion osi pou libere ar lesklavaz seki pe detrir li ek li pou gagn liberte extraordiner bann zanfan Bondie.”​—Rom. 8:21, NW.

18. Kifer nou kapav sir ki nou pou ena enn zoli lavenir?

¹⁸ Parey kouma Zeova ti pran bann dispozision pou ki bann Izraelit trouv enn lekilib ant zot travay ek repo, Li pou fer parey pandan Regn Mil An. Pena okenn dout ki pou ena osi bann moman kot nou pou ador Bondie. Pou ki nou ere azordi, li bien inportan ki nou ador Bondie. Li pou parey dan lemond nouvo. Wi, tou bann dimounn fidel pou ere pandan Regn Mil An parski nou tou nou pou ena enn travay ki pou donn nou satisfaksion ek nou tou nou pou servi Zeova!