1-2. Ki zoli lesperans bann serviter Zeova ena?

 LESPWAR se enn kitsoz bien inportan. Sertin dimounn ena lespwar pou ena enn lavi maryaz ki ere, ek pou grandi bann zanfan ki an bonn sante. Bann dimounn ki malad ena lespwar pou geri. Antan ki Kretien, kitfwa nou osi nou ena mem lespwar ki sa bann dimounn-la. Me ena enn lespwar ki nou tou nou ena: Lespwar pou viv pou touletan ek pou retrouv bann dimounn ki nou kontan me ki’nn mor.

² Lapot Pol ti dir: “Mo ena . . . lesperans dan Bondie ki pou ena rezireksion bann move kouma bann bon.” (Zist. 24:15) Lapot Pol pa ti premie dimounn ki ti koz lor rezireksion. Zob osi ti koz lor la. Zob ti sir ki Bondie pa ti pou bliye li ek ti pou resisit li.​—Zob 14:7-10, 12-15.

3. Kouma 1 Korintien sapit 15 kapav ed nou?

³ “Rezireksion bann mor” form parti “fondasion,” ouswa “doktrinn debaz” bann lansegnman Kretien. (Ebre 6:1, 2, NW) Dan 1 Korintien sapit 15, lapot Pol ti koz lor rezireksion, ek seki li ti dir ti bien ankouraz bann Kretien so lepok. Sa sapit-la kapav ankouraz nou osi ek ogmant nou lafwa dan rezireksion.

4. Kifer nou kapav sir ki pou ena enn rezireksion?

⁴ Rezireksion Zezi Kris se enn garanti ki, si enn kikenn ki nou kontan mor, pou ena enn rezireksion. Rezireksion Zezi Kris form parti “Bonn Nouvel” ki Pol ti anonse ar bann Korintien. (1 Kor. 15:1, 2) Pol ti mem dir ki si enn Kretien pa krwar dan rezireksion, so lafwa dan vid. (1 Kor. 15:17) Alor, rezireksion Zezi se rezon pou kifer nou kapav sir ki pou ena enn rezireksion.

5-6. Ki lasirans nou gagne dan 1 Korintien 15:3, 4?

 ⁵ Kan Pol ti koumans ekrir lor rezireksion, li ti koz lor trwa kitsoz inportan: “Lekris finn mor pou nou pese,” “finn anter li,” ek “li finn resisite apre trwa zour, kouma bann Lekritir ti anonse.”​—Lir 1 Korintien 15:3, 4.

⁶ Ki lasirans nou gagne gras-a lamor, lanterman, ek rezireksion Zezi? Profet Izai ti predir ki ti pou tir Lemesi parmi “bann vivan” ek ki li ti pou gagn “enn tom parmi bann move.” Me enn lot kitsoz osi ti pou arive. Izai ti dir osi ki Lemesi ti pou pran “pese boukou dimounn.” Zezi ti fer sa kan li ti donn so lavi an ranson. (Iza. 53:8, 9, 12; Mat. 20:28; Rom. 5:8) Alor, gras-a lamor, lanterman, ek rezireksion Zezi, nou kapav sir ki nou pou libere ar pese ek lamor, ek ki nou pou kapav retrouv bann dimounn ki nou kontan me ki’nn mor.

7-8. Kifer nou kapav sir ki Zezi inn resisite?

⁷ Parey kouma nou’nn trouve, ena enn lien ant rezireksion Zezi ek nou lesperans dan rezireksion. Alor, kifer nou kapav sir ki Zeova finn resisit Zezi?

⁸ Apre so rezireksion, boukou dimounn finn trouv Zezi. Sa se bann prev ki Zezi inn resisite. (1 Kor. 15:5-7) Pol mansionn nom plizir dimounn ki ti trouv Zezi apre so rezireksion. Premie-la, ti lapot Pier (Sefas). Lezot disip osi ti dir ki Pier ti trouv Zezi. (Lik 24:33, 34) “Ledouz,” setadir bann zapot Zezi, zot osi zot ti trouv Zezi apre so rezireksion. Ek apre sa, Zezi ti “paret devan plis ki sink-san dimoun anmemtan.” Kitfwa sa ti arive pandan enn renion dan Galile, ki mansione dan Matie 28:16-20. Zezi ti osi “paret devan Zak,” ki ti kitfwa so demi-frer ek ki avan pa ti krwar ki Zezi ti Lemesi. (Zan 7:5) Me apre ki li ti trouv Zezi resisite, Zak ti sir ki Zezi ti Lemesi. Pa bliye osi ki Pol ti ekrir so let ver 55 Nou Lepok, ek ki boukou parmi bann dimounn ki ti trouv Zezi apre so rezireksion ti ankor vivan. Alor, si enn kikenn ti ena bann dout konsernan rezireksion Zezi, li ti kapav zwenn avek enn kikenn ki ti trouv Zezi apre so rezireksion.

9. Dapre Zistwar Bann Apot 9:3-5, ki prev ankor Pol ti ena konsernan rezireksion?

⁹ Plitar, Zezi ti aparet ar Pol osi. (1 Kor. 15:8) Kan Pol (Sol) ti pe al Damas, li ti gagn enn vizion Zezi dan so laglwar ek li ti tann so lavwa. (Lir Zistwar Bann Apot 9:3-5.) Seki ti ariv Pol ti enn lot prev ankor ki Zezi inn vremem resisite.​—Zist. 26:12-15.

10. Ki kitsoz Pol ti fer parski li ti sir ki Zezi ti resisite?

¹⁰ Sertin Kretien kitfwa ti bien interese ar seki Pol ti dir, parski avan ki Zezi ti aparet ar li, Pol ti persekit bann Kretien. Me depi ki Zezi ti aparet ar li, Pol ti fer so maximum pou konvink lezot ki Zezi ti resisite. Anplis, Pol ti mem aksepte gagn persekision, fer nofraz, ek al dan prizon parski li ti pe pres laverite konsernan rezireksion Zezi. (1 Kor. 15:9-11; 2 Kor. 11:23-27) Pol ti telman sir ki Zezi ti resisite ki li ti pre pou mor pou defann sa verite-la. Eski temwaniaz ki bann Kretien dan premie siek ti fer konsernan rezireksion, pa konvink twa ki Zezi inn resisite vremem? Eski sa pa fer twa ena plis lafwa konsernan rezireksion ki pou ena dan lavenir?

11. Kifer sertin Kretien dan Korint kitfwa ti ena bann fos rezonnman lor rezireksion?

¹¹ Sertin Kretien dan Korint ti ena bann fos rezonnman konsernan rezireksion.  Sertin ti mem dir ki “pena rezireksion bann mor.” Kifer zot ti dir sa? (1 Kor. 15:12) Dan Atenn, enn lot lavil Grek, bann filozof ti boufonn lansegnman lor rezireksion Zezi ek kitfwa sa ti inflians sertin Kretien dan Korint. (Zist. 17:18, 31, 32) Sertin Kretien ti panse osi ki rezireksion ti enn kitsoz sinbolik. Kitfwa zot ti konsider enn dimounn ki fer pese koumadir li’nn “mor,” me kan sa dimounn-la ti vinn Kretien li ti vinn “vivan” parski li ti gagn pardon pou so bann pese. Me ninport ki rezon zot ti ena pou pa krwar dan rezireksion, zot lafwa ti dan vid. Kifer? Parski si Bondie pa ti resisit Zezi, savedir ki pa ti ena laranson ek ki bann pese pa ti pardone. Alor, bann ki ti rezet lansegnman lor rezireksion, an realite zot pa ti ena okenn lesperans.​—1 Kor. 15:13-19; Ebre 9:12, 14.

12. Dapre 1 Pier 3:18, 22, kifer rezireksion Zezi ti diferan ar bann rezireksion ki ti ena avan?

¹² Parkont, Pol ti sir ki “Lekris finn resisite depi bann mor.” Anplis, rezireksion Zezi ti pli siperyer ki tou bann rezireksion ki ti ena avan, parski bann dimounn ki ti resisite avan, zot ti re-mor apre. Pol ti dir ki Zezi “limem premie resisite.” Dan ki sans Zezi ti premie? Li ti premie imin ki’nn resisite kouma enn lespri ek li ti premie imin ki’nn resisite pou al viv dan lesiel.​—1 Kor. 15:20; Zist. 26:23; lir 1 Pier 3:18, 22, NW. b

13. Ki konparezon Pol ti fer ant Adan ek Zezi?

¹³ Kouma lamor enn sel dimounn kapav fer bann milyon dimounn re-gagn lavi? Pol ti donn enn repons lozik pou sa kestion-la. Li ti fer enn konparezon ant konsekans pese Adan ek bann bienfe ki gagne gras-a sakrifis Zezi. Konsernan Adan, Pol ti dir: “Lamor finn arive par enn zom.” Konsekans pese Adan se lamor pou li ek pou tou so bann desandan. Ziska zordi, nou ankor soufer akoz dezobeisans Adan. Parkont, nou ena enn zoli lavenir devan nou parski Zeova inn resisit so Garson! Pol explike: “Rezireksion finn arive par enn zom,” Zezi. Pol azoute: “Tou bann dimoun mor parski zot lie ar Adam; dan Lekris tou pou gagn lavi.”​—1 Kor. 15:21, 22.

14. Eski Adan pou resisite? Explike.

¹⁴ Kan Pol ti dir “tou bann dimoun mor parski zot lie ar Adam,” ki li ti pe rod dir? Pol ti pe koz lor bann desandan Adan ki’nn erit pese ek linperfeksion, ek akoz sa, zot ti pou mor. (Rom. 5:12) Me Adan pa form parti bann ki pou “gagn lavi.” Laranson pa aplik ar Adan, parski li ti enn zom parfe ek li’nn swazir pou dezobeir Zeova. Adan pou gagn mem konsekans ki bann “kabri” ki “Garson limanite” pou zize, setadir li pou gagn “enn destriksion eternel.”​—Mat. 25:31-33, 46, NW; Ebre 5:9.

15. Kisannla form parti dan “tou” bann ki pou “gagn lavi”?

¹⁵ Pol ti dir osi ki “dan Lekris tou pou gagn lavi.” (1 Kor. 15:22) Pol ti ekrir sa let-la pou bann Kretien dan Korint ki ti ena lesperans pou al dan lesiel. Sa bann Kretien-la ti ‘apele pou vinn lepep Bondie, ki Li finn met apar pou Li dan linite avek Zezi Kris.’ Pol koz osi lor “bann ki finn mor dan Lekris.” (1 Kor. 1:2; 15:18; 2 Kor. 5:17) Dan enn lot let ki Pol ti ekrir, Pol dir  ki bann ki “finn ini avek [Zezi] dan enn lamor parey kouma so lamor” pou “ini avek li dan so rezireksion.” (Rom. 6:3-5) Zezi ti resisite kouma enn lespri ek li ti al dan lesiel. Alor, se seki pou ariv osi bann ki ‘dan linite avek Zezi Kris,’ setadir, bann Kretien ki ena lesperans pou al dan lesiel.

16. Kan Pol ti dir ki Zezi “premie” parmi bann ki’nn resisite, ki li ti pe rod dir?

¹⁶ Pol ti dir ki Zezi ti “premie” parmi bann ki’nn resisite. Pa bliye ki ti ena lezot osi ki ti resisite, kouma par exanp Lazar. Me Zezi ti premie ki ti resisite antan ki enn lespri ek li ti gagn lavi pou touletan. Anplis, kan Pol ti dir ki Zezi ti “premie” parmi bann ki ti resisite, li ti pe rod dir ki ti pou ena lezot osi ki ti pou resisite apre ek ki pou al dan lesiel. Bann zapot ek bann lezot Kretien ki ‘dan linite avek Zezi Kris,’ zot osi zot ti pou resisite pou al dan lesiel parey kouma Zezi.

17. Kan eski bann ki ‘dan linite avek Zezi Kris’ pou resisite pou al dan lesiel?

¹⁷ Kan Pol ti ekrir bann Kretien dan Korint, rezireksion bann ki ‘dan linite avek Zezi Kris’ pa ti ankor koumanse. Pol ti explike ki sa ti pou arive dan lavenir. Li ti dir: “Me sakenn dan so prop lord: Zezi Kris an premie, apre sa, bann ki pou Zezi Kris pandan so prezans.” (1 Kor. 15:23, NW; 1 Tes. 4:15, 16, NW) Azordi, nou pe viv dan lepok “prezans” Zezi Kris. Alor, bann zapot ek lezot Kretien ki ena lesperans pou al dan lesiel me ki’nn mor, ti pou bizin atann “prezans” Zezi Kris pou ki zot resisite dan lesiel ek ki zot “ini avek [Zezi] dan so rezireksion.”

18. (a) Kifer nou kapav dir ki pou ena enn lot rezireksion apre rezireksion dan lesiel? (b) Dapre 1 Korintien 15:24-26, ki pou arive dan lesiel?

¹⁸ Me ki pou ariv tou bann Kretien fidel ki pena lesperans pou al dan lesiel? Zot osi zot ena lesperans pou resisite. Labib dir ki bann ki pou al dan lesiel zot gagn “premie rezireksion.” (Rev. 20:6) Sa montre ki pou ena enn lot rezireksion apre sa. Sa lide-la an-akor avek seki Zob ti dir konsernan so lesperans. (Zob 14:15) “Bann ki pou Zezi Kris pandan so prezans” pou dan lesiel avek Zezi kan li pou detrir tou bann gouvernman, bann lotorite, ek bann pwisans. Mem “nou dernie lennmi, lamor,” pou disparet. Bann ki’nn resisite pou al dan lesiel, zame pa pou  mor. Alor, ki nou kapav dir konsernan bann ki pena lesperans pou al dan lesiel?​—Lir 1 Korintien 15:24-26, NW. c

19. Bann ki pena lesperans pou al dan lesiel, ki zot kapav atann?

¹⁹ Bann ki pena lesperans pou al dan lesiel, ki zot kapav atann? Bann parol lapot Pol donn zot enn zoli lespwar. Li ti dir: “Mo ena . . . lesperans dan Bondie ki pou ena rezireksion bann move kouma bann bon.” (Zist. 24:15) Li kler ki okenn move dimounn pa kapav al dan lesiel. Alor, bann parol lapot Pol montre nou ki pou ena enn rezireksion lor later.

20. Kouma sa lartik-la finn ogmant to lafwa dan rezireksion?

²⁰ Alor, nou sir ki “pou ena rezireksion”! Bann dimounn ki pou resisite lor later pou ena posibilite pou viv lor later pou touletan. To kapav ena konfians dan sa promes-la. Sa lesperans-la kapav bien rekonfort twa si bann dimounn ki to kontan mor. Zot pou kapav resisite kan Zezi ek bann 144,000 pou regne “pandan mil an.” (Rev. 20:6) Twa osi, to kapav sir ki, si arive ki to mor avan Regn Mil An Zezi Kris, to pou resisite. “Sa lesperans la li pa desevwar nou.” (Rom. 5:5) Li kapav donn twa lafors ek li kapav fer twa gagn lazwa dan to servis pou Zeova. Dan prosin lartik, nou pou gete ki nou kapav aprann ankor dan 1 Korintien sapit 15.