Mo’nn ne an 1927 dan enn ti lavil pre ar Chicago, Illinois, dan Letazini. Papa ek Mama ti ena sink zanfan—Jetha, Don, mwa, Karl, ek Joy. Nou tou ti bien deside pou servi Zeova avek tou nou leker. Jetha ti fer deziem klas Lekol Galaad an 1943. Don ti al Betel Brooklyn dan New York, an 1944, Karl ti ale an 1947, ek Joy ti ale an 1951. Zot bon lexanp, ek lexanp mo bann paran osi, ti vremem ankouraz mwa pou fer plis pou Zeova.

Papa ek Mama ti bann dimounn ki lir Labib ek ki ti kontan Bondie, ek zot ti aprann nou osi pou kontan Li. Selman, Papa ti nepli ena respe pou Legliz apre ki li ti al servi kouma solda dan Premie Lager Mondial. Mama ti bien rekonesan ar Bondie, parski Papa ti retourn lakaz vivan apre lager. Alor, li ti dir Papa: “Karl, anou al Legliz, parey kouma nou ti abitie fer.” Papa ti reponn li: “Mo pou al kit twa laba, me mo pa pou rantre.” Lerla, Mama ti demann li: “Kifer to pa pou rantre?” Li ti dir: “Pandan lager, bann sef relizie mem relizion me ki dan diferan kan, ti beni zot bann solda ek zot bann zarm. Eski Bondie ti soutenir toule-de kan?”

Plitar, kan Mama ti al Legliz, de Temwin Zeova ti tap nou laport. Zot ti ofer Papa de liv ki ti apel Light, ki koz lor liv Revelasion. Papa ti interese ek li ti pran zot. Lerla, kan Mama ti trouv sa de liv-la, li ti koumans lir zot. Enn zour, li ti trouv enn lanons dan zournal, ki ti invit bann dimounn ki ti interese, pou etidie Labib avek led sa de liv-la. Li ti desid pou ale. Kan li ti ariv laba, enn vie madam ti ouver laport, ek lerla mo mama ti montre enn parmi sa de liv-la ek li ti demann li: “Eski zot etidie sa liv-la isi?” Madam-la ti reponn: “Wi mo tifi, rantre.” So semenn apre, mo mama ti amenn nou avek li, ek apre sa, toule semenn nou ti akonpagn li.

Dan enn renion, frer ki ti pe diriz letid-la ti demann mwa pou lir Psom 144:15, ki dir ki bann ki ador Zeova zot ere. Mo ti kontan sa verse-la ek osi de lezot verse—1 Timote 1:11, ki dir ki Zeova Li enn “Bondie ere,” ek Efezien 5:1, ki ankouraz nou pou “imit Bondie.” Mo ti  konpran ki mo ti bizin servi mo Kreater ar lazwa, ek ki mo ti bizin remersie Li pou privilez ki Li’nn donn mwa pou servi Li. Se de kitsoz ki mo’nn esey fer toutlong mo lavi.

Lasal Renion ki ti pli pre ar nou, ti trouv 32 kilomet pli lwin, dan Chicago. Kanmem sa, nou ti asiste bann renion, ek mo konesans lor Labib ti pe kontign ogmante. Mo rapel enn fwa, frer ki ti pe diriz letid-la ti demann Jetha pou fer enn komanter. Kan mo ti ekout li, mo ti dir ar momem: ‘Mo ti kone sa. Mo ti kapav lev mo lame ek reponn.’ Depi sa, mo ti koumans prepar ek donn mo prop komanter. Me pli inportan, parey kouma mo de frer ek mo de ser, mo ti vinn pli pros ar Zeova. Lerla, mo ti batize an 1941.

Mo rapel bien lasanble ki nou ti asiste dan Cleveland, Ohio, an 1942. Mo fami, ansam avek bann lezot fami, ti res dan bann latant pre ar lasanble. Ti ena osi bann frer ek ser dan plis ki 50 landrwa dan Letazini ki ti pe ekout sa program-la par telefonn. Deziem Lager Mondial pa ti ankor fini, ek persekision kont bann Temwin Zeova ti pe kontign ogmante. Enn aswar, mo ti trouv enn group frer bord zot loto pre ar nou latant. Zot far ti dan direksion opoze ar nou latant. Bann frer ti tom dakor pou ki enn frer dan sak loto veye toutlong lanwit. Koumsa, si ena kit problem, zot ti bizin alim zot far pou ki bann dimounn ki ti pe vinn atak zot pa trouv nanye, ek zot ti bizin osi klaxone pou ki lezot kapav vinn ede. Mo ti dir ar momem: ‘Pou tou kitsoz, pep Zeova bien prepare!’ Nanye pa ti arive sa swar-la, ek sa ti rasir mwa. Gras-a sa, mo ti santi mwa an sekirite ek mo ti kapav dormi bien.

Plizir lane apre, kan mo ti repans sa lasanble-la, mo ti realize ki mo mama zame ti gagn per ek gagn traka. Li ti fer Zeova ek so lorganizasion foul konfians. Zame mo pa pou bliye so zoli lexanp.

Inpe letan avan sa lasanble-la, mo mama ti vinn pionie permanan. Alor, li ti ekout pli bien bann diskour ki ti pe koz lor servis aplintan. Kan nou ti retourn lakaz, li ti dir nou: “Mo ti pou kontan kontign fer pionie, me mo pa pou kapav kontign fer sa ek anmemtan okip lakaz bien.” Lerla, li ti demann nou si nou ti kapav ed li. Nou ti dir wi, ek li ti donn sakenn parmi nou enn ouswa de lasam pou netwaye avan ki nou pran nou ti-dezene. Apre ki nou ti al lekol, li ti chek lakaz pou gete si tou ti prop, ek apre sa, li ti al prese. Mem si li ti bien okipe, touletan li ti pran nou swin. Li ti touletan la kan nou ti retourn lakaz pou dezene ek osi apre lekol. Sertin zour apre lekol, nou ti al prese avek li, ek sa ti ed nou pou konpran pli bien ki ete servis pionie.

Mo ti koumans fer pionie kan mo ti ena 16 an. Mem si mo papa pa ti ankor vinn enn Temwin, li ti anvi kone si mo servis ti pe pas bien. Enn aswar, mo ti dir li ki mem si mo ti fer mo maximum, mo pa ti reisi trouv enn kikenn ki ti anvi etidie Labib. Apre enn ti moman, mo ti demann li: “Eski to ti pou kontan  etidie Labib ar mwa?” Li ti reflesi, ek li ti dir: “Mo pena okenn rezon pou dir non.” Wi, mo papa ti mo premie letid Labib. Sa ti enn gran privilez pou mwa!

Nou ti etidie liv « La vérité vous affranchira ». Apre inpe letan, mo ti realize ki mo papa ti pe ed mwa pou amelior fason ki mo ti pe etidie Labib, pou mo vinn enn pli bon ansegnan. Par exanp, enn aswar kan nou ti fini lir enn paragraf, li ti dir mwa: “Mo konpran seki sa liv-la pe dir, me kouma to kone ki sa li vre?” Mo pa ti prepar mwa pou sa kestion-la, alor mo ti dir li: “Mo pa kapav donn twa okenn prev aster-la, me prosenn fwa ki nou fer letid mo pou donn twa repons-la.” Ek mo ti fer li. Mo ti trouv bann verse Labib ki ti reponn sa kestion-la. Apre sa, mo ti aprann kouma pou fer bann resers pou ki mo kapav prepar mwa pli bien pou nou letid Labib. Sa ti ed mwa ek mo papa pou progrese. Li ti met an pratik seki li ti pe aprann ek li ti pran batem an 1952.

Mo ti kit lakaz kan mo ti ena 17 an. Jetha a ti vinn enn misioner, ek Don, ti vinn enn Betelit. Toule-de ti kontan zot lafektasion, ek sa ti bien ankouraz mwa. Alor, mo ti ranpli form pou Betel ek Lekol Galaad, ek apre mo ti les sa dan lame Zeova. Finalman, mo ti invite pou al servi dan Betel an 1946.

Pandan bann lane ki’nn pase, mo ti gagn bann diferan responsabilite dan Betel, ek gras-a sa, mo ti kontign aprann bann nouvo kitsoz. Mo’nn servi dan Betel pandan 75 an. Mo’nn aprann kouma pou fer bann liv ek bann kont. Mo’nn aprann osi kouma pou aste bann kitsoz ki nou bizin dan Betel, ek kouma pou fer bann kitsoz al par bato. Me dan tousala, mo’nn plis kontan seki mo ti pe aprann dan bann ladorasion dan gramatin ek dan bann diskour ki nou ti pe gagne.

Mo ti osi aprann avek mo ti frer, Karl, ki ti vinn Betel an 1947. Li ti enn bon etidian ek ansegnan Labib. Enn fwa, kan mo ti ena enn diskour pou fer, mo ti demann li so led. Mo ti explik li ki mo ti gagn boukou linformasion, me ki mo ti pe gagn difikilte pou servi zot. Li ti ed mwa pou trouv enn solision kan li ti poz mwa sa kestion-la: “Joel, ki tem to diskour?” Vit-vit mo’nn konpran seki li ti pe rod dir, setadir ki mo ti bizin servi bann linformasion ki ti pou ed mwa explik tem mo diskour ek pa met bann linformasion ki pa neseser. Zame mo pa’nn bliye seki li’nn ansegn mwa!

 Pou ki nou zwaye dan Betel, nou bizin fer nou maximum dan predikasion. Gras-a sa, nou kapav gagn bann lexperyans ankourazan. Mo rapel enn fwa, nou ti pe prese enn tanto dan Bronx, dan lavil New York. Enn frer ek mwa, nou ti al vizit enn madam ki ti deza pran Latour Degard ek Leve! Nou ti prezant nou, ek nou ti dir: “Sa lapremidi-la nou pe ed bann dimounn pou aprann bann kitsoz ankourazan ki sorti dan Labib.” Madam-la ti dir: “Si zot pe koz lor Labib, rantre.” Nou ti lir ek explik li diferan verse ki koz lor Rwayom Bondie ek lemond nouvo. Sa ti telman inpresionn li ki so semenn apre, li ti invit so bann kamarad pou vinn ekoute. Plitar, li ek so misie ti vinn bann fidel serviter Zeova.

Mo ti anvi marye, me se apre 10 an ki mo ti zwenn mo madam. Ki kitsoz ti ed mwa pou trouv enn bon madam? Mo ti priye Zeova ek mo ti reflesi ki kitsoz mo anvi ki mwa ek mo madam nou fer apre nou maryaz.

Apre lasanble ki ti ena an 1953 dan Yankee Stadium, mo ti zwenn enn ser ki apel Mary Aniol. Li ti ansam avek Jetha dan deziem klas Galaad, ek zot ti pe servi kouma bann misioner dan mem landrwa. Mary ti bien zwaye kan li ti rakont mwa bann lexperyans ki li ti fer dan so lafektasion dan bann zil Karaib, ek bann letid Labib ki li ti fer laba pandan plizir lane. Amezir ki nou’nn konn nou kamarad pli bien, nou’nn realize ki nou toule-de anvi servi Zeova aplintan. Nou lamour pou nou kamarad ti grandi, ek nou ti marye an Avril 1955. Dan plizir fason, mo’nn trouve ki Mary ti enn kado ki mo’nn gagne ar Zeova ek ki li enn bon lexanp. Li ti touletan bien zwaye dan ninport ki lafektasion li ti gagne. Li ti travay dir, li ti gagn traka lezot, ek li ti touletan met Rwayom Bondie an premie dan so lavi. (Mat. 6:33) Pandan trwa-z-an nou ti dan servis sirkonskripsion, ek an 1958, nou ti invite pou al servi dan Betel.

Mo ti aprann boukou kitsoz ar Mary. Par exanp, kan nou ti fek marye, nou ti deside pou lir Labib ansam, ek sak fwa nou ti lir apepre 15 verse. Apre ki enn parmi nou ti lir enn porsion, nou ti koz lor la ek nou ti gete kouma nou kapav met li an pratik dan nou lavi. Souvan, Mary ti dir mwa bann kitsoz ki li ti aprann dan Lekol Galaad ek dan so servis misioner. Seki mo’nn aprann ar li finn ed mwa pou amelior mo bann diskour, ek sa finn osi aprann mwa kouma pou ankouraz lezot.—Prov. 25:11.

Mary, mo madam ki mo ti bien kontan, inn mor an 2013. Mo inpasian pou retrouv li dan lemond nouvo! Me an-atandan, mo bien deside pou kontign aprann ek pou fer Zeova konfians avek tou mo leker. (Prov. 3:5, 6) Kan mo mazinn seki pep Zeova pou fer dan lemond nouvo, sa rekonfort mwa ek sa donn mwa boukou lazwa. Nou kapav sir ki nou pou aprann bann nouvo kitsoz ar nou Gran Ansegnan ek osi bann nouvo kitsoz lor Li! Wi, mo vremem rekonesan pou tou seki Li’nn ansegn mwa ek pou bonte extraordiner ki Li’nn montre anver mwa.