Labib montre ki Zeova ena kapasite pou predir lavenir. (Iza. 45:21) Selman, li pa dir ki kantite kitsoz Zeova swazir pou kone konsernan lavenir, ek li pa explik an detay dan ki moman ek dan ki fason Zeova predir lavenir. Alor, ena boukou kitsoz ki nou pa kone lor Zeova so kapasite pou predir lavenir. Me anou get de-trwa kitsoz ki nou kone lor Zeova.

Zeova pena okenn limit, selman parfwa Li fixe Limem bann limit. Zeova so sazes pena limit, alor Li kapav konn tou seki pou arive dan lavenir. (Rom. 11:33) Me parski Li ena kontrol lor Limem, Li swazir pou pa konn sertin kitsoz ki pou arive dan lavenir.—Konpar ar Izai 42:14.

Zeova fer an-sort ki so volonte realize. Ki lien sa ena avek so kapasite pou predir lavenir? Izai 46:10 dir: “Depi koumansman mo fer konn lafin, ek depi bien lontan, mo fer konn bann kitsoz ki pankor arive. Mo dir: ‘Mo desizion pa pou sanze, ek mo pou fer tou seki fer mwa plezir.’”

Enn rezon kifer Zeova ena kapasite pou predir lavenir, se ki Li osi ena kapasite pou fer bann kitsoz ki pankor arive, arive. Anou pran enn lexanp. Parfwa, si nou anvi kone ki pou arive dan enn liv, nou nek bizin lir so lafin. Me Zeova Li, Li pa bizin kone seki pou arive dan lavenir. Kifer? Parski kan Li deside ki enn kitsoz bizin arive dan enn moman presi, Li fer an-sort ki sa kitsoz-la arive dan sa moman-la.—Ex. 9:​5, 6; Mat. 24:36; Zist. 17:31.

Se pou sa rezon-la ki Labib servi bann lexpresion kouma “prepar” ouswa “proze” kan li koz lor sertin kitsoz ki Zeova desid pou fer ek ki pou realize dan lavenir. (2 Ler. 19:25; Iza. 46:11) Sa bann lexpresion-la sorti dan enn mo ki ena enn lien ar mo “potie.” (Zer. 18:4) Parey kouma enn bon potie servi enn bout larzil pou fer enn zoli vaz, Zeova kapav diriz bann levennman pou ki so volonte realize.—Efe. 1:11.

Zeova les bann dimounn pran zot prop desizion. Zeova pa’nn ekrir destin sak dimounn, ek Li pa fer bann bon dimounn fer bann kitsoz ki pou amenn maler lor zot. Li les tou dimounn deside seki zot anvi fer, me Li ansegn nou kouma nou kapav viv dan enn bon fason.

Anou pran de lexanp. Premie lexanp-la konsern bann abitan Niniv. Zeova ti predir ki lavil Niniv ti pou detrir parski bann dimounn ki ti viv laba ti bien move. Me kan bann abitan Niniv ti repanti, Zeova “ti sanz so desizion ek Li pa ti amenn maler ki Li ti dir Li pou amenn lor zot, ek Li pa ti fer sa arive.” (Zonas 3:​1-10) Zeova ti fer sa parski bann abitan Niniv ti desid pou sanze apre ki zot ti ekout bann lavertisman Zeova.

Deziem lexanp-la se profesi ki koz lor Siris, enn kikenn ki ti pou liber bann Zwif depi Babilonn ek ki ti pou donn zot lord pou rekonstrir tanp Zeova. (Iza. 44:26–45:4) Enn lerwa Pers, ki apel Siris, ti realiz sa profesi-la. (Esdr. 1:​1-4) Mem si Siris pa ti ador Zeova, Zeova ti servi li pou realiz sa profesi-la. Selman, Li ti les Siris deside ki bondie li anvi adore.—Prov. 21:1.

Sa se zis de-trwa kitsoz ki Zeova pran an konsiderasion kan Li predir lavenir. Ek okenn imin pa kapav vremem konpran fason panse Zeova. (Iza. 55:​8, 9) Selman, seki nou kone lor Zeova, li ase pou fer nou lafwa vinn for parski nou kone ki Li touletan fer seki bon, mem kan Li predir lavenir.