LARTIK LETID 7
KANTIK 51 Nou’nn Vwe Nou Lavi ar Bondie!
Ki Nou Kapav Aprann ar Bann Nazireen?
“Li pou sin devan Zeova pandan tou sa letan ki li pou viv kouma enn Nazireen la.”—NONB 6:8.
PWIN PRINSIPAL
Nou pou trouve kouma lexanp bann Nazireen kapav ed nou pou servi Zeova avek kouraz ek pou fer bann sakrifis pou Li.
1. Toutlong listwar, kouma bann serviter Zeova inn montre ki zot kontan Li?
ESKI to kontan Zeova ar tou to leker? Biensir to kontan Li! Ek to pa tousel, parski toutlong listwar finn ena bann dimounn ki finn ena mem santiman ki twa! (Ps. 104:33, 34) Anplis, boukou inn montre ki zot kontan Zeova kan zot inn fer bann sakrifis pou servi Li. Parmi sa bann dimounn-la, ti ena bann Nazireen. Kisann-la zot ti ete, ek ki nou kapav aprann ar zot lexanp?
2. (a) Kisann-la bann Nazireen ti ete? (Nonb 6:1, 2) (b) Kifer sertin Izraelit ti swazir pou vinn bann Nazireen?
2 Mo “Nazireen” sorti dan enn lexpresion Ebre ki vedir ‘enn kikenn ki’nn swazir,’ ouswa ‘enn kikenn ki fer promes pou fer enn kitsoz ki spesial.’ Bann Nazireen ti bann Izraelit bien devwe ki ti fer sertin sakrifis pou servi Zeova. Dapre Lalwa Moiz, enn zom ouswa enn fam ti kapav fer Zeova enn promes pou vinn enn Nazireen pandan enn sertenn letan. a (Lir Nonb 6:1, 2.) Kan enn Izraelit ti vinn enn Nazireen, li ti bizin swiv sertin lalwa ki bann lezot Izraelit pa ti oblize swiv. Me kifer sertin ti swazir pou vinn Nazireen? Zot ti fer sa parski zot ti kontan Zeova ar tou zot leker ek zot ti bien rekonesan anver Li pou tou seki Li ti fer pou zot.—Det. 6:5; 16:17.
3. Kifer bann serviter Zeova azordi zot parey kouma bann Nazireen?
3 Kan “lalwa Lekris” ti ranplas Lalwa Moiz, bann serviter Zeova ti nepli kapav vinn bann Nazireen. (Gal. 6:2; Rom. 10:4) Selman, parey kouma bann Nazireen, bann serviter Zeova azordi ena enn gran dezir pou servi Li ‘avek tou zot leker, zot lavi, zot lespri, ek zot lafors.’ (Mark 12:30) Nou fer sa kan nou promet Zeova ki nou pou servi Li ek nou pran batem. Ek pou nou tini nou promes, nou bizin fer volonte Zeova ek fer bann sakrifis pou servi Li. Anou gete kouma bann Nazireen ti tini zot promes ar Zeova. Zot lexanp pou montre nou kouma nou kapav tini promes ki nou’nn fer Zeova. b—Mat. 16:24.
FER BANN SAKRIFIS
4. Dapre Nonb 6:3, 4, ki sakrifis bann Nazireen ti fer?
4 Lir Nonb 6:3, 4. Bann Nazireen ti bizin pa bwar bann labwason ki ena lalkol ek zot ti bizin pa manz rezin. Bann lezot Izraelit ti kapav bwar lalkol ek manz rezin parski pa ti ena nanye demal ladan. Anplis, Labib dir ki divin li enn kado Bondie ki “fer leker kontan.” (Ps. 104:14, 15) Mem si sa bann kitsoz-la ti fer leker bann dimounn kontan, bann Nazireen ti aksepte pou pa profit sa bann kitsoz-la. c
Eski to pre pou fer bann sakrifis, parey kouma bann Nazireen? (Get paragraf 4-6)
5. Ki sakrifis Madián ek Marcela ti fer, ek kifer?
5 Parey kouma bann Nazireen, nou osi nou fer bann sakrifis pou fer plis pou Zeova. Anou get lexanp Madián ek Marcela. d Sa koup-la ti ena enn zoli lavi ek zot ti pe res dan enn zoli apartman. Madián ti osi ena enn bon travay ki ti pe pey bien. Selman, zot ti anvi fer plis pou servi Zeova. Alor, zot ti desid pou fer sertin sanzman dan zot lavi. Zot ti diminie zot bann depans, zot ti al res dan enn pli tipti apartman, ek zot ti vann zot loto. Madián ek Marcela pa ti oblize fer sa bann sakrifis-la. Selman, zot ti swazir pou fer sa pou ki zot kapav fer plis pou Zeova, ek sa ti vremem rann zot ere.
6. Sit sertin sakrifis ki bann Kretien fer azordi. (Get zimaz osi.)
6 Azordi, bann serviter Zeova kontan fer bann sakrifis pou zot kapav fer plis pou servi Li. (1 Kor. 9:3-6) Zeova pa obliz nou fer sa bann sakrifis-la, ek bann kitsoz ki nou desid pou sakrifie, zot pa move. Par exanp, sertin desid pou pena zot prop lakaz, pou pa fer enn travay ki zot kontan, ouswa pou pena enn zanimo. Ena ki res selibater, ek ena bann koup ki desid pou pa gagn zanfan. Ena lezot ki al servi dan bann landrwa kot bizin plis proklamater. Ek pou zot fer sa, parfwa zot bizin al res lwin ar zot bann kamarad ek zot fami. Boukou parmi nou fer sa bann sakrifis-la parski nou anvi fer plis pou Zeova. Nou kapav sir ki Zeova bien apresie ninport ki sakrifis ki nou fer pou servi Li!—Ebre 6:10.
MONTRE KI TO DIFERAN
7. Ki difikilte bann Nazireen kitfwa ti gagne pou zot tini zot promes? (Nonb 6:5) (Get zimaz osi.)
7 Lir Nonb 6:5. Bann Nazireen ti bizin pa koup zot seve. Se enn fason ki zot ti montre ki zot ti obeir Zeova. Si sa ti fer lontan ki enn Izraelit ti enn Nazireen, so seve ti pou bien long ek lezot ti pou fini remark sa. Si bann-la ti respekte li ek ti ankouraz li pou li kontign tini so promes, so lavi kouma enn Nazireen ti pou pli fasil. Malerezman, ti ena enn lepok kot bann Izraelit pa ti respekte bann Nazireen. Dan lepok profet Amos, bann Izraelit ki pa ti ador Zeova ti “kontign donn bann Nazireen divin pou bwar.” (Amos 2:12) Kitfwa zot ti fer sa pou ki bann-la pa reisi tini promes ki zot ti fer Zeova. Alor, bann Nazireen ti bizin vremem ena kouraz pou zot tini zot promes ek pou montre ki zot vremem diferan ar lezot.
Enn Nazireen ti bizin ena kouraz pou tini so promes ek pou montre ki li vremem diferan ar lezot (Get paragraf 7)
8. Kouma lexanp Benjamin inn ankouraz twa?
8 Avek led Zeova, nou osi nou kapav ena kouraz ek montre ki nou diferan, mem si nou timid. Anou get lexanp Benjamin, ki ena di-z-an ek ki res Norvez. Akoz lager dan Ikrenn, so lekol ti organiz enn program pou montre ki zot soutenir bann dimounn ki res Ikrenn. Bann zanfan ti bizin abiy dan kouler drapo Ikrenn ek sant enn sante. Pou li pa partisip ladan, Benjamin ti al lwin ar bann lezot zelev. Selman, so profeser ti trouv li, ek li ti kriye bien for: “Vini, vinn zwenn nou! Nou pe atann twa la!” Avek kouraz, Benjamin ti al get so profeser, ek li ti dir: “Mo pa pou partisip ladan, parski mo pa partisip dan bann zafer politik. Avredir, boukou Temwin Zeova dan prizon parski zot refiz al lager.” Lerla, profeser-la ti dir Benjamin ki li pa ti bizin partisipe. Selman, bann zelev dan so klas ti koumans demann li kifer li pa ti partisipe. Benjamin ti telman strese ki li ti pre pou plore. Selman, avek kouraz, li ti dir tou so bann kamarad seki li ti dir so profeser. Plitar, Benjamin ti dir so bann paran ki li ti santi ki Zeova ti ed li pou res fidel.
9. Kouma nou kapav fer leker Zeova kontan?
9 Parski nou obeir Zeova, lezot trouve ki nou diferan ar zot. Akoz sa, dan lekol ouswa dan travay, nou bizin ena kouraz pou dir ki nou bann Temwin Zeova. Plis letan pase, plis sa lemond-la pe anpire, ek plis nou pou gagn difikilte pou swiv bann prinsip Labib ek pou prese. (2 Tim. 1:8; 3:13) Akoz sa, fode zame nou bliye ki nou ‘fer leker Zeova kontan’ kan nou ena kouraz ek kan nou montre ki nou diferan ar bann ki pa servi Li.—Prov. 27:11; Mal. 3:18.
KONTIGN MET ZEOVA AN PREMIE DAN TO LAVI
10. Ki difikilte bann Nazireen kitfwa ti gagne pou respekte lalwa ki ena dan Nonb 6:6, 7?
10 Lir Nonb 6:6, 7. Bann Nazireen ti bizin pa koste ar enn kadav. Kitfwa nou panse ki sa pa ti enn gran sakrifis! Selman, enn Nazireen ti kapav gagn difikilte pou respekte sa lalwa-la kan enn manb so fami ti mor. Anplis, dapre bann tradision sa lepok-la, bann dimounn ti bizin pre ar lekor enn kikenn ki’nn mor. (Zan 19:39, 40; Zist. 9:36-40) Enn Nazireen pa ti pou kapav swiv sa bann tradision-la. Mem dan sa moman dey la, ek mem si kitfwa sertin manb so fami pa ti konpran so desizion, enn Nazireen ti pou kontign tini so promes pou li kapav res fidel ar Zeova. Nou kapav sir ki Zeova ti donn so bann fidel serviter lafors pou zot andir sa bann difikilte-la!
11. Ki kitsoz bann Kretien bizin rapel kan zot pran bann desizion ki konsern nou fami? (Get zimaz osi.)
11 Kan nou vinn enn Kretien, nou promet Zeova ki nou pou donn Li nou lavi. Sa promes-la bien inportan pou nou, ek li inflians nou bann desizion ek fason ki nou azir ar nou fami. Li vre ki nou pou fer tou seki nou kapav pou donn nou fami seki li bizin. Selman, nou pa pou fer seki nou fami demann nou, pas avan seki Zeova demann nou. (Mat. 10:35-37; 1 Tim. 5:8) Parfwa, pou nou fer Zeova plezir, kitfwa nou pou bizin pran bann desizion ki pa pou fer nou fami plezir!
Eski to pre pou fer Zeova pas an premie dan to lavi, mem kan to pas par bann sitiasion bien difisil? (Get paragraf 11) e
12. Malgre so sitiasion difisil, ki kitsoz Alexandru ti fer, ek ki kitsoz li pa ti fer?
12 Anou get lexanp Alexandru ek so madam, Dorina. Apre ki zot ti etidie Labib pandan enn an, Dorina ti aret etidie, ek li ti anvi ki Alexandru osi aret etidie. Selman, avek respe Alexandru ti dir li ki li ti pou kontign etidie. Dorina pa ti kontan ditou, ek li ti esey fors so mari pou aret etidie. Mem si sa pa ti fasil pou li, Alexandru dir ki li ti esey konpran kifer so madam ti azir koumsa. Kan Dorina ti kritik li ek ti koz brit ar li, parfwa sa ti fer Alexandru anvi aret etidie. Selman, li ti persevere, li ti kontign met Zeova an premie dan so lavi, ek li ti kontign montre lamour ek respe anver so madam. Gras-a so bon lexanp, Dorina ti rekoumans etidie Labib, ek avek letan, li ti pran batem.—Lor jw.org, get video Alexandru ek Dorina Văcar: Lamour Ena Pasians ek Li Bon, dan seri video “Laverite Sanz Bann Dimounn.”
13. Kouma nou kapav montre ki nou kontan Zeova ek ki nou kontan nou fami osi?
13 Se Zeova ki’nn kree lafami, ek Li anvi ki bann fami zot ere. (Efe. 3:14, 15) Alor, si nou vremem anvi ere, nou bizin fer seki Zeova demann nou. To kapav sir ki Zeova trouv bann zefor ek bann sakrifis ki to fer pou servi Li, pou pran swin bann manb to fami, ek pou montre lamour ek respe anver zot.—Rom. 12:10.
ANKOURAZ SAKENN NOU KAMARAD POU VINN KOUMA BANN NAZIREEN
14. Kisann-la nou bizin fer zefor pou ankouraze?
14 Azordi, tou bann serviter Zeova bizin pre pou fer bann sakrifis pou Li, parski zot kontan Li. Selman, parfwa li pa pou fasil pou fer sa. Kouma nou kapav ankouraz sakenn nou kamarad pou vinn kouma bann Nazireen? Nou kapav fer sa par nou bann parol. (Zob 16:5) Dan to lasanble, eski ena sertin ki pe fer zefor pou sinplifie zot lavi pou ki zot kapav fer plis pou Zeova? Eski to konn bann zenn ki pe res fidel ar Zeova dan lekol ek ki pe montre ki zot diferan, mem si sa difisil pou zot? Eski to konn bann etidian Labib ouswa bann frer ek ser ki pe gagn persekision ar zot fami, me ki pe res fidel ar Zeova? Fer tou seki to kapav pou ankouraz sa bann konpagnon-la, ek dir zot ki nou vremem apresie zot kouraz ek tou seki zot pe fer pou servi Zeova.—File. 4, 5, 7.
15. Kouma sertin inn soutenir bann ki pe servi Zeova aplintan?
15 Nou kapav osi soutenir nou bann frer ek ser ki pe servi Zeova aplintan. (Prov. 19:17; Ebre 13:16) Se seki enn ser aze dan Sri Lanka ti fer. Kan so kas pansion ti ogmante, li ti anvi ed de zenn pionie pou zot kontign zot servis, malgre bann difikilte ekonomik. Alor, toule mwa li ti donn zot enn ti kas pou ki zot pey zot bil telefonn. Sa ser-la bien zenere, pa vre!
16. Ki leson nou kapav aprann ar lexanp bann Nazireen?
16 Nou kapav aprann boukou zoli leson ar lexanp bann Nazireen! Selman, nou aprann osi enn kitsoz lor Zeova: Li kone ki nou anvi fer Li plezir ek ki nou pre pou fer bann sakrifis pou Li. Se pou sa rezon-la ki Li donn nou lokazion pou montre ki kantite nou kontan Li. Se enn gran loner, pa vre! (Prov. 23:15, 16; Mark 10:28-30; 1 Zan 4:19) Lexanp bann Nazireen montre nou ki Zeova trouv bann sakrifis ki nou fer ek ki sa ena boukou valer pou Li. Alor, anou bien deside pou kontign servi Zeova, ek anou fer tou seki nou kapav pou fer Li plezir!
KOUMA TO POU REPONN?
-
Kouma bann Nazireen ti montre ki zot fer bann sakrifis ek ki zot ena kouraz?
-
Azordi, kouma nou kapav ankouraz sakenn nou kamarad pou vinn kouma bann Nazireen?
-
Kouma lexanp bann Nazireen montre nou ki Zeova fer konfians so bann serviter?
KANTIK 124 Touzour Fidel
a Mem si Zeova ti swazir sertin Izraelit pou vinn bann Nazireen, laplipar bann Nazireen ti bann Izraelit ki volonterman ti fer promes pou viv kouma bann Nazireen.—Get lankadre “ Bann Nazireen Ki Zeova Inn Swazir.”
b Parfwa, dan nou bann piblikasion, nou’nn konpar bann Nazireen ar bann frer ek ser ki dan servis aplintan. Selman, dan sa lartik-la, nou pou trouve kouma tou bann serviter Zeova kapav vinn kouma bann Nazireen.
c An prinsip, kan enn Izraelit ti vinn enn Nazireen, li pa ti gagn bann lezot responsabilite ouswa bann travay anplis pou fer.
d Lor jw.org, dan seri lartik « Témoignages et anecdotes de Témoins de Jéhovah », get lartik « Nous avons décidé de simplifier notre vie ».
e DESKRIPSION ZIMAZ: Enn Nazireen lor twa enn lakaz ek li pe get bann dimounn ki pe al anter enn manb so fami ki li bien kontan. Akoz promes ki li’nn fer Zeova, li pa kapav partisip dan sa seremoni-la.
