LARTIK LETID 8
KANTIK 130 Pardonn Lezot
Kouma Nou Kapav Pardone Parey Kouma Zeova?
“Parey kouma Zeova inn pardonn zot avek tou so leker, fer parey zot osi.”—KOL. 3:13.
PWIN PRINSIPAL
Dan sa lartik-la, nou pou trouve seki nou kapav fer pou nou pardonn enn kikenn.
1-2. (a) Kan eski nou kapav trouv sa difisil pou pardonn enn kikenn? (b) Kouma Denise inn montre enn extra gran pardon?
ESKI to trouv sa difisil pou pardonn lezot? Boukou parmi nou kapav trouv sa difisil pou pardonn enn kikenn, sirtou si sa dimounn-la inn fer nou enn kitsoz ki’nn bien bles nou. Selman, ena bann kitsoz ki kapav ed nou pou nou pardonn lezot ek pou nou sirmont nou bann santiman negatif. Anou get lexanp Denise, a enn ser ki’nn montre enn extra gran pardon. An 2017, Denise ek so fami ti al vizit nouvo Biro Mondial Bann Temwin Zeova. Kan zot ti pe retourn lakaz, enn loto ti tap ar zot loto, ek Denise ti perdi konesans. Kan li ti regagn konesans, li ti aprann ki so bann zanfan ti bien blese ek ki so mari, Brian, inn mor. Kan li mazinn seki’nn arive, Denise dir: “Dan sa ler-la, mo ti abat net.” Me apre sa, li ti aprann ki sa sofer ki ti tap ar zot la, pa ti lor lefe ladrog ek lalkol, ek ki li ti perdi kontrol so loto. Kan li ti aprann sa, li ti priye Zeova pou ki li kapav santi li anpe.
2 Lapolis ti aret sofer-la, ek li ti bizin pas lakour parski li’nn touy enn kikenn. Si lakour ti trouve ki li koupab, li ti pou bizin al dan prizon. Lakour ti fer Denise kone ki santans sa dimounn-la ti pou depann lor so temwaniaz. Denise dir: “Mo ti bizin al koz lor pli gran leprev ki mo’nn viv dan mo lavi. Sa ti koumadir zot pe reouver mo bann blesir ek vid gro disel ladan.” De-trwa semenn apre, Denise ti dan lakour, ek li ti pe prepar li pou koz ar sa zom ki ti fer so fami tou sa ditor-la. Ki Denise ti dir? Li ti demann ziz-la pou montre mizerikord anver sa zom-la. b Kan Denise ti fini koze, ziz-la ti plore. Li ti dir: “Sa fer 25 an ki mo ziz, ek se premie fwa ki mo tann enn kitsoz koumsa. Zame mo’nn tann fami enn viktim demann mizerikord pou dimounn ki’nn fer zot ditor la. Se premie fwa ki mo trouv enn kikenn montre otan lamour ek mizerikord.”
3. Ki kitsoz ti ed Denise pou pardonn sa dimounn-la?
3 Ki kitsoz ti ed Denise pou pardonn sa dimounn-la? Li ti reflesi lor Zeova so pardon. (Mish. 7:18) Kan nou ena rekonesans pou Zeova parski Li’nn pardonn nou, sa motiv nou pou pardonn lezot.
4. Ki Zeova anvi nou fer? (Efezien 4:32)
4 Zeova anvi ki nou pardonn lezot ar tou nou leker, parey kouma Li Li’nn pardonn nou. (Lir Efezien 4:32.) Li anvi ki nou fer zefor pou pardonn bann ki bles nou. (Ps. 86:5; Lik 17:4) Dan sa lartik-la, nou pou examinn trwa kitsoz ki kapav ed nou pou pardonn lezot.
PA INIOR SEKI TO RESANTI
5. Dapre Proverb 12:18, ki nou resanti kan enn kikenn ofans nou?
5 Kan enn kikenn ofans nou, sa kapav bien bles nou, sirtou si sa dimounn-la li enn bon kamarad ouswa enn fami. (Ps. 55:12-14) Ek parfwa, nou kapav telman ankoler ki se koumadir inn pik nou ar enn kouto. (Lir Proverb 12:18.) Selman, fode pa nou inior seki nou resanti; fode pa nou fer koumadir nanye pa’nn arive. Si nou fer sa, se koumadir nou pe les sa kouto-la dan sa dimal-la. Avredir, kan nou inior seki nou resanti, sa kapav fer nou plis ditor.
6. Bien souvan, kouma nou reazir kan enn kikenn ofans nou?
6 Kan enn kikenn ofans nou, kitfwa nou premie reaksion se nou pou ankoler. Labib dir ki nou kapav ankoler. Selman, li osi dir nou ki fode pa nou kontign res ankoler. (Ps. 4:4; Efe. 4:26) Kifer? Parski bien souvan nou bann santiman pous nou pou reazir, ek malerezman lakoler zame pous nou pou fer bann bon kitsoz. (Zak 1:20) Alor, fode pa nou bliye sa: Lakoler se enn reaksion. Parkont, kontign res ankoler ar enn kikenn, se enn swa ki nou nou fer.
Lakoler se enn reaksion. Parkont, kontign res ankoler ar enn kikenn, se enn swa ki nou nou fer
7. Ki lezot santiman nou kapav ena kan enn kikenn bles nou?
7 Kan nou’nn viv bann sitiasion difisil, sa kapav fer nou ena bann lezot santiman negatif. Par exanp, enn ser ki apel Ann dir: “Kan mo ti tipti, mo papa inn kit mo mama ek inn marye ar mo nounou. Akoz sa, mo ti ena linpresion ki mo papa ti abandonn mwa. Ek kan zot ti gagn bann zanfan, mo ti ena linpresion ki bann-la ti ranplas mwa. Akoz sa bann sitiasion-la, mo’nn touletan santi mwa rezete.” Enn ser ki apel Georgette explike seki li ti resanti kan so misie ti tronp li. Li dir: “Nou konn nou kamarad depi ki nou tipti, ek nou ti pe fer pionie ansam. Kan li ti tronp mwa, sa ti kas mo leker.” Enn ser ki apel Naomi dir: “Zame mo ti pou panse ki mo mari ti pou bles mwa enn zour. Me kan li ti dir mwa ki li ti pe get pornografi an sekre, sa ti bien bles mwa; se koumadir li ti trayir mwa.”
8. (a) Kifer nou bizin pardonn lezot? (b) Ki bienfe nou gagne kan nou pardonn lezot? (Get lankadre “ Kan enn Kikenn Inn Fer Nou Ditor”)
8 Nou pena kontrol lor seki lezot dir ek fer, me nou ena kontrol lor fason ki nou nou reazir. Ek bien souvan, pli bon fason ki nou kapav reazir se kan nou pardonn lezot. Kifer nou bizin pardone? Parski nou kontan Zeova, ek Li anvi ki nou pardonn lezot. Anplis, si nou kontign res ankoler ek ki nou pa pardone, sa kapav rann nou malad ek sa kapav fer nou azir san reflesi. (Prov. 14:17, 29, 30) Enn ser ki apel Christine dir: “Kan mo ankoler ouswa kan mo ofanse, mo figir vinn long ouswa mo boude. Lerla, mo gagn difikilte pou dormi, mo manz seki mo gagne, ek mo nepli ena kontrol lor mo bann lemosion. Kan sa arive, sa afekte mo maryaz ek mo lamitie ar lezot.”
9. Ki nou bizin fer pou nou rezet lakoler ek rankinn?
9 Si enn kikenn inn bles nou ek ki zame li pa’nn demann nou pardon, sa kapav fer nou bien soufer. Me eski nou kapav diminie sa soufrans-la? Wi. Georgette, ki nou ti mansione taler-la, dir: “Mo’nn pran boukou letan pou mo aret ankoler ek gard rankinn kont mo ex-mari. Me kan mo’nn reisi fer sa, mo’nn santi mwa anpe.” Kan nou rezet lakoler ek rankinn, nou protez nou leker kont bann santiman negatif. Avredir, se koumadir nou pe fer nou-mem enn kado—nou aret konsantre lor seki’nn arive dan lepase, ek nou al delavan. (Prov. 11:17) Me ki nou bizin fer si nou ankor trouv sa difisil pou pardone?
SIRMONT TO BANN SANTIMAN NEGATIF
10. Kifer nou bizin letan pou nou geri? (Get zimaz osi.)
10 Kan enn kikenn bles twa, kouma to kapav sirmont to bann santiman negatif? Premierman, to bizin letan pou to geri. Mem si bann dokter okip bien enn kikenn ki’nn blese, li bizin letan pou li geri. Dan mem fason, kan enn kikenn inn bles to santiman, to bizin letan pou to geri, pou ki to kapav pardonn li ar tou to leker.—Ekle. 3:3; 1 Pier 1:22.
Enn kikenn ki’nn blese bizin led ek letan pou geri. Dan mem fason, nou bizin led ek letan pou geri nou bann blesir emosionel (Get paragraf 10)
11. Kouma lapriyer kapav ed twa pou pardone?
11 Deziemman, priye Zeova ek demann Li pou ed twa pou pardone. c Ann, ki nou ti mansione taler-la, explike kouma lapriyer inn ed li. Li dir: “Mo’nn demann Zeova pou pardonn mwa, ek pou pardonn sak manb mo fami pou bann kitsoz ki nou’nn mal dir ek mal fer. Apre sa, mo’nn ekrir enn let mo papa ek so madam, pou dir zot ki mo’nn pardonn zot.” Ekrir sa let-la ti bien difisil pou Ann. Me li dir: “Mo’nn fer zefor pou imit Zeova so pardon, ek mo espere ki sa pou motiv mo papa ek so madam pou aprann plis lor Zeova.”
12. Kifer nou bizin ekout Zeova olie ki nou ekout nou leker? (Proverb 3:5, 6)
12 Trwaziemman, nou bizin ekout Zeova olie ki nou ekout nou leker, setadir nou bann santiman. (Lir Proverb 3:5, 6.) Zeova kone seki pli bon pou nou. (Iza. 55:8, 9) Ek zame Li pa pou dir nou fer enn kitsoz ki pou bles nou. Alor, kan Li ankouraz nou pou pardonn lezot, nou kapav sir ki nou pou gagn bann bienfe si nou fer sa. (Ps. 40:4; Iza. 48:17, 18) Parkont, si nou ekout nou leker, kitfwa zame nou pa pou pardonn lezot. (Prov. 14:12; Zer. 17:9) Naomi, ki nou ti mansione taler-la, dir: “Kan mo mari ti dir mwa ki li get pornografi, o-koumansman mo pa ti pardonn li. Mo ti panse ki mo ena rezon pou fer sa. Avredir, mo ti per tansion li refer mwa soufer, ouswa ki li bliye ki kantite li’nn bles mwa. Anplis, mo ti kone ki Zeova konpran mo santiman. Me avek letan, mo’nn rann mwa kont ki mem si Zeova konpran mo santiman, sa pa vedir ki Li dakor ar mo santiman. Li kone seki mo resanti ek Li kone ki sa pran letan pou geri, me Li anvi osi ki mo pardonn mo mari.” d
DEVLOP BANN SANTIMAN POZITIF
13. Dapre Romin 12:18-21, ki nou bizin fer?
13 Kan nou pardonn enn kikenn ki’nn bles nou, sa pa vedir ki nou zis aret koz lor seki’nn arive. Si sa dimounn-la li enn frer ouswa enn ser dan lasanble, nou lobzektif se pou fer lape avek li. (Mat. 5:23, 24) Alor, olie ki nou ankoler ar li, nou bizin montre mizerikord anver li ek pardonn li. (Lir Romin 12:18-21; 1 Pier 3:9) Kouma nou kapav fer sa?
14. Ki zefor nou bizin fer, ek kifer?
14 Nou bizin fer zefor pou trouv sa dimounn ki’nn bles nou la, parey kouma Zeova trouv li. Zeova rod bann zoli kalite ki bann dimounn ena. (2 Kro. 16:9; Ps. 130:3) Si nou anvi tir lay ar enn kikenn, nou pou reisi trouv enn kitsoz pou nou tir lay ar li. Parkont, si nou rod bann zoli kalite ki lezot ena, sa osi nou pou reisi trouve, ek lerla li pou pli fasil pou nou pardonn zot. Enn frer ki apel Jarrod dir: “Kan enn kikenn bles mwa, mo konpar seki li’nn fer mwa ar tou bann zoli kitsoz ki mo kontan ar li. Lerla, sa ed mwa pou pardonn li pli fasilman.”
15. Kan enn kikenn inn bles nou, kifer li inportan ki nou dir li ki nou’nn pardonn li?
15 Enn lot kitsoz bien inportan ki nou kapav fer, se dir dimounn ki’nn bles nou la ki nou’nn pardonn li. Kifer sa bien inportan? Naomi, ki nou ti mansione taler-la, dir: “Mo mari ti demann mwa, ‘Eski to’nn pardonn mwa?’ Me kan mo’nn ouver mo labous pou dir li ki mo’nn pardonn li, mo’nn trangle. Mo ti rann mwa kont ki dan fon mo leker, mo pa ti pardonn li. Avek letan, mo’nn reisi dir li sa trwa mo bien inportan la, ‘Mo pardonn twa.’ Kan mo ti dir li sa, mo mari ti plore, ek mwa mo ti soulaze. Apre sa, mo’nn kapav refer li konfians ek nou’nn revinn bann bon kamarad.”
16. Ki to’nn aprann lor pardon?
16 Zeova anvi ki nou pardonn lezot. (Kol. 3:13) Ek mem si nou trouv sa difisil, nou pou reisi fer li si nou pa inior seki nou resanti ek ki nou fer zefor pou sirmont nou bann santiman negatif. Apre sa, nou bizin ranplas sa bann santiman negatif la par bann santiman pozitif.—Get lankadre “ Trwa Kitsoz ki Kapav Ed Nou pou Pardone.”
NOU GAGN BANN BIENFE KAN NOU PARDONE
17. Sit bann bienfe ki nou gagne kan nou pardonn lezot.
17 Nou ena boukou rezon pou pardonn lezot. Anou get trwa rezon. Premierman, nou imit nou Papa Zeova, ki ena boukou mizerikord, ek nou fer Li plezir. (Lik 6:36) Deziemman, nou montre ki nou rekonesan anver Zeova, parski Limem Li’nn pardonn nou. (Mat. 6:12) Ek trwaziemman, nou ena enn pli bon lasante ek enn pli bon lamitie ar lezot.
18-19. Ki kapav arive kan nou pardonn lezot?
18 Kan nou pardonn lezot, nou kapav osi gagn bann bienfe ki nou pa atann. Anou gete seki ti ariv Denise, ki nou’nn mansione dan koumansman sa lartik-la. Sa zom ki ti tap ar zot loto la ti desid pou swisid li apre ki so case pas lakour. Selman, kan Denise ti pardonn li, sa ti telman tous li ki li ti desid pou etidie Labib ar bann Temwin Zeova.
19 Eski ena enn kikenn ki to bizin pardone? Kitfwa to panse ki se kitsoz pli difisil ki to pou bizin fer. Me kan to pardone, to kapav gagn bann bienfe ki to pa atann. (Mat. 5:7) Alor, anou fer tou seki nou kapav pou swiv lexanp Zeova ek pou pardonn lezot.
KANTIK 125 Ere Bann Ki Ena Mizerikord!
a Finn sanz sertin nom dan sa lartik-la.
b Dan bann sitiasion koumsa, sak Kretien bizin pran so prop desizion.
c Lor jw.org, get bann video sante « Pardonnons-nous les uns aux autres », “Ed Mwa pou Pardone,” ek “Nou Regagn Nou Lamitie.”
d Pornografi se enn pese ek kan enn kikenn get bann zimaz porno, sa kapav bien bles so konzwin. Selman, pornografi se pa enn rezon Biblik pou ki konzwin inosan la divorse.
