1. Avek ki latitid Zeova finn travay depi koumansman kreasion?

 ZEOVA ek Zezi bien ini ansam depi koumansman kreasion. Zeova finn kree Zezi avan tou lezot kitsoz. Lerla, Zezi finn travay avek Li ek “ti vinn kouma enn zouvriye kalifie akote Li.” (Proverb 8:30) Bann serviter Zeova osi ti korpere ansam dan bann travay ki zot ti bizin fer. Par exanp, Noe ek so fami ti konstrir lars ansam. Plitar, bann Izraelit ti travay ansam pou konstrir tabernak, pou demont li, ek pou deplas li kot ti bizin. Dan tanp, zot ti sante ek zot ti zwe bann linstriman ansam pou loue Zeova avek bann zoli lamizik. Pep Zeova finn kapav fer tousala parski zot tou ti korpere ar sakenn zot kamarad.​—Zenez 6:14-16, 22; Nonb 4:4-32; 1 Kronik 25:1-8.

2. (a) Ki kitsoz ti extraordiner dan bann kongregasion premie siek? (b) Ki bann kestion nou pou examine?

² Bann Kretien dan premie siek osi ti korpere ar zot kamarad.  Lapot Pol ti explike ki, mem si zot pa ti ena mem kapasite ek responsabilite, zot ti ini. Zot tou ti swiv zot Sef, Zezi Kris. Pol ti konpar zot ar enn lekor ki ena diferan parti. Tou bann parti sa lekor-la travay ansam. (Lir 1 Korintien 12:4-6, 12, NW.) Me, ki nou kapav dir lor nou azordi? Kouma nou tou nou kapav korpere ansam dan predikasion, dan kongregasion, ek dan lafami?

3. Ki vizion lapot Zan ti gagne?

³ Dan premie siek, lapot Zan ti gagn enn vizion kot ti ena set anz ki ti pe soufle bann tronpet. Kan sinkiem anz-la ti soufle so tronpet, Zan ti trouv “enn zetwal sorti dan lesiel tom lor later.” Sa “zetwal-la” ti servi enn lakle pou ouver enn pwi ki ti bien nwar ek bien fon. Premie kout, enn gro lafime ti sorti dan pwi-la, ek enn kantite sotrel ti sorti dan lafime-la. Olie ki zot atak bann pie, sa bann sotrel-la ti atak bann dimounn ki “pena sele Bondie lor zot fron.” (Revelasion 9:1-4) Zan ti kone ki sa kantite sotrel-la kapav fer boukou dega, parey kouma zot ti fer boukou dega dan Lezip, dan lepok Moiz. (Exod 10:12-15) Dan vizion Zan, sa bann sotrel-la reprezant bann Kretien ki ena lesperans pou al dan lesiel ek ki depi lontan pe pres enn mesaz pwisan kont bann fos relizion. Ansam avek zot, ena osi bann milyon lezot dimounn ki ena lesperans pou viv lor later. Zot tou ansam, zot ini dan sa travay predikasion la. Sa travay-la finn permet boukou dimounn pou kit fos relizion ek pou nepli les Satan kontrol zot.

4. Ki travay bann serviter Bondie ena pou fer, ek ki sel mwayin zot ena pou fer sa?

⁴ Nou ena responsabilite pou pres “bonn nouvel” ar bann dimounn dan lemond antie avan ki lafin vini. Nou ena vremem boukou travay pou fer! (Matie 24:14; 28:19, 20) Nou bizin invit tou bann ki “swaf” pou vinn bwar “delo lavi,” setadir, nou bizin ansegn bann verite ki ena dan Labib tou bann dimounn ki anvi konpran sa bann verite-la. (Revelasion 22:17) Me nou pou kapav fer sa zis si nou “ini ansam” ek nou korpere sakenn ar nou kamarad dan kongregasion.​—Efezien 4:16.

5, 6. Kouma nou ini kan nou pres bonn nouvel?

⁵ Pou ki nou zwenn maximum dimounn posib dan predikasion, nou bizin bien organize. Bann instriksion ki nou gagne dan nou kongregasion ed nou pou fer sa. Apre renion predikasion, nou tou nou sorti pou partaz bon nouvel lor Rwayom Bondie avek bann dimounn. Nou osi donn zot bann piblikasion ki baze lor Labib. Ofet, nou finn distribie plizir milyon kopi sa bann piblikasion-la dan lemond antie. Parfwa, dan nou travay predikasion, nou fer osi bann kanpagn spesial. Kan to partisip dan sa bann kanpagn-la, to ini ansam avek plizir milyon  proklamater atraver lemond ki pe pres mem mesaz! To pe osi travay ansam avek bann anz, ki pe ed pep Bondie pou pres bonn nouvel.​—Revelasion 14:6.

⁶ Li vremem bien ankourazan kan nou lir l’Annuaire, ek nou trouv bann bon rezilta ki ena konsernan predikasion ki pe fer dan lemond antie! Reflesi osi kouma nou ini dan lemond antie kan nou invit bann dimounn pou asiste nou bann lasanble. Dan bann lasanble, nou tou nou gagn mem lansegnman. Bann diskour, bann pies teat, ek bann demonstrasion ankouraz nou pou donn Zeova nou meyer. Nou osi ini avek nou bann frer ek ser dan lemond antie kan nou asiste Memoryal sak lane. (1 Korintien 11:23-26) Nou zwenn ansam mem dat apre kouse soley, le 14 Nizan, pou montre nou rekonesans pou seki Zeova inn fer pou nou ek pou obeir lord ki Zezi finn donn nou. Ek de-trwa semenn avan Memoryal, nou tou nou travay ansam pou invit maximum dimounn posib. Koumsa, zot pou kapav vinn komemor sa levennman inportan-la ansam avek nou.

7. Kan nou travay ansam, ki nou reisi akonpli?

⁷ Zis enn sel sotrel tousel pa kapav fer boukou dega. Parey, enn Kretien tousel pa kapav pres avek tou dimounn. Me parski nou tou nou travay ansam, nou pe kapav koz lor Zeova avek plizir milyon dimounn ek ed sertin pou loue Li ek donn Li loner.

8, 9. (a) Ki lexanp Pol ti servi pou ansegn bann Kretien pou res ini? (b) Kouma nou kapav korpere dan kongregasion?

⁸ Kan Paul ti explik bann Efezien kouma kongregasion ti bizin organize, li ti dir ki zot tou dan kongregasion ti bizin “grandi . . . dan tou kitsoz.” (Lir Efezien 4:15, 16, NW.) Pol ti servi lexanp enn lekor pou explike kouma sak Kretien kapav ede pou ki so kongregasion res ini ek kontign swiv Zezi, Sef kongregasion. Li ti dir ki tou bann parti dan lekor-la zot korpere “gras-a tou bann zwintir ki donn seki bizin.” Alor, ki nou zenn ouswa vie, ki nou ena enn bon lasante ouswa non, ki sakenn parmi nou bizin fer?

⁹ Zezi finn etabli bann ansien pou diriz kongregasion, ek li anvi ki nou respekte zot ek swiv bann instriksion ki zot donn nou. (Ebre 13:7, 17) Li pa touletan fasil pou fer sa. Me nou kapav demann Zeova so led. So lespri sin kapav ed nou pou obeir ninport ki linstriksion ki bann ansien donn nou. Reflesi osi ki kantite nou pou kapav ed nou kongregasion si nou ena limilite ek si nou korper avek bann ansien. Nou kongregasion pou ini, ek lamour ki sakenn ena pou so kamarad pou vinn pli for.

10. Kouma bann asistan ministeryel ede pou ki ena linite dan kongregasion? (Get zimaz dan koumansman lartik.)

¹⁰ Bann asistan ministeryel osi ede pou ki ena linite dan kongregasion. Zot travay dir pou ed bann ansien, ek nou bien rekonesan pou tou seki zot fer. Par  exanp, bann asistan ministeryel fer sir ki nou ena ase piblikasion pou servi dan nou minister, ek zot akeyir bann viziter ki vinn asiste renion. Zot travay dir osi pou fer bann reparasion dan Lasal ek pou gard Lasal prop. Kan nou korper avek sa bann frer-la, nou pou res ini ek nou pou servi Zeova dan enn fason organize.​—Konpar avek Zistwar Bann Apot 6:3-6.

11. Ki bann zenn kapav fer pou ki ena linite dan kongregasion?

¹¹ Sertin ansien finn travay bien dir dan kongregasion pandan boukou lane. Me kitfwa asterla, zot nepli kapav fer sa kantite kitsoz ki zot ti pe fer avan la parski zot pe vinn vie. Parkont, bann zenn frer kapav ede. Si zot gagn enn formasion, kapav donn zot plis responsabilite dan kongregasion. Ek kan bann asistan ministeryel travay dir, kitfwa zot kapav servi kouma bann ansien plitar. (1 Timote 3:1, 10) Sertin ansien ki ankor zenn finn mem fer plis progre. Asterla, zot pe servi kouma bann sirveyan sirkonskripsion ek pe ed bann frer ek ser dan boukou kongregasion. Nou bien rekonesan kan bann zenn dispoze pou servi zot bann frer ek ser.​—Lir Psom 110:3, NW a; Ekleziast 12:1. b

12, 13. Ki kitsoz kapav ed zot tou dan enn fami pou korpere sakenn ar zot kamarad?

¹² Kouma nou kapav ed bann manb nou fami pou korper ar sakenn zot kamarad? Ladorasion an fami sak semenn kapav ed nou. Kan bann paran ek zot zanfan pas letan ansam pou aprann konn Zeova, lamour ki sakenn ena pou zot kamarad grandi. Pandan ladorasion an fami, zot kapav fer bann ti repetision seki zot pou dir dan predikasion. Sa pou ed zot tou pou prepar zot pli bien pou al prese. Ek kan bann paran ek bann zanfan tann sakenn zot kamarad koz lor laverite ek kan zot trouve kouma zot tou kontan Zeova ek anvi fer Li plezir, zot vinn ankor pli pros.

¹³ Kouma enn misie ek so madam kapav korpere sakenn ar zot kamarad? (Matie 19:6) Kan zot toule-de kontan Zeova ek servi Li ansam, zot pou ere ek ini dan zot maryaz. Zot bizin osi montre lafeksion pou zot kamarad, parey kouma Abraam ek Sara, Izaak ek Rebeka, ek osi Elkana ek Ana. (Zenez 26:8; 1 Samiel 1:5, 8; 1 Pier 3:5, 6) Kan bann koup azir dan sa fason-la, zot pou ini ant zot ek zot pou vinn pli pros ar Zeova.​—Lir Ekleziast 4:12. c

14. Si to misie ouswa to madam pa servi Zeova, ki to kapav fer pou ki to maryaz res solid?

 ¹⁴ Labib bien kler lor la: Fode pa nou marye avek enn kikenn ki pa servi Zeova. (2 Korintien 6:14) Kanmem sa, ena sertin frer ek ser ki finn marye avek enn kikenn ki pa enn Temwin Zeova. Sertin finn konn laverite apre zot maryaz, ek zot konzwin pa’nn vinn enn Temwin. Lezot kitfwa finn marye avek enn kikenn ki ti enn serviter Zeova, me ki apre finn kit kongregasion. Dan sa bann sitiasion-la, bann Kretien fer tou seki zot kapav pou ki zot relasion avek zot konzwin res solid. Kouma? Se kan zot obeir bann konsey ki ena dan Labib. Se pa enn kitsoz ki touletan fasil. Par exanp, enn ser ki apel Mary ek so misie, David, ti pe servi Zeova ansam. Apre, David ti aret al renion. Me Mary touletan ti esey azir kouma enn bon madam ek ti kontign manifeste bann kalite Kretien. Li ti osi ansegn so sis zanfan pou aprann konn Zeova ek li ti kontign asiste bann renion ek bann lasanble. Plizir lane apre, kan zot bann zanfan finn grandi ek ti nepli res kot zot, Mary ti kontign servi Zeova, malgre ki sa ti pli difisil pou li. Me, apre sa, David ti koumans lir bann peryodik ki Mary ti kite pou li. Avek letan, li’nn rekoumans asiste sertin renion. So ti-zanfan ki ti ena si-z-an touletan ti rezerv enn plas pou li, ek si David pa ti vini, so ti-zanfan ti pou dir li: “Granper, mo’nn mank twa dan renion zordi.” David ti retourn ar Zeova apre 25 an, ek li avek so madam bien kontan parski asterla, zot toule-de ansam pe servi Zeova.

15. Kouma bann koup ki’nn marye depi bien lontan kapav ed bann zenn koup?

¹⁵ Azordi, Satan pe atak bann fami. Se akoz sa ki bann koup ki pe servi Zeova bizin korpere sakenn ar zot kamarad. Ninport komie tan to’nn marye, reflesi lor seki to kapav dir ek fer pou ki to maryaz vinn pli solid. Si ou enn kikenn ki’nn marye depi bien lontan, ou kapav vinn enn bon lexanp pou bann koup ki’nn fek marye. Kitfwa ou kapav invit enn zenn  koup pou ou ladorasion an fami. Zot pou trouve ki, ninport ki kantite letan enn koup inn marye, zot bizin montre zot lafeksion pou sakenn zot kamarad ek res ini.​—Tit 2:3-7.

16, 17. Pou bann serviter Zeova ki ini, ki zoli lavenir zot pe atann?

¹⁶ Kan bann Izraelit ti ena pou al bann fet dan Zerizalem, zot tou ti korpere sakenn ar zot kamarad. Zot ti prepar tou seki zot ti bizin pou sa vwayaz-la. Apre sa, zot ti vwayaze ansam ek ti ed sakenn zot kamarad. Dan tanp, zot tou ti loue ek ti ador Zeova ansam. (Lik 2:41-44) Azordi, amezir ki nou pe prepar nou pou viv dan lemond nouvo, nou bizin res ini ek fer tou seki nou kapav pou korpere sakenn ar nou kamarad. Eski to kapav reflesi kouma to kapav fer sa pli bien?

¹⁷ Bann dimounn dan lemond azordi zot pa ini ditou ek zot lager lor boukou kitsoz. Me nou remersie Zeova ki Li’nn ed nou pou ena lape ek pou konpran laverite! So bann serviter dan lemond antie pe ador Li dan fason ki Li demann zot. Ek sirtou dan sa bann dernie zour la, pep Zeova azordi ini plis ki avan. Parey kouma Izai ek Mika ti profetize, nou tou nou pe “mont lor montagn Zeova” ansam. (Izai 2:2-4; lir Mika 4:2-4. d) Dan lavenir, nou pou vremem dan lazwa kan tou dimounn lor later pou “ini ansam” ek pou korpere sakenn ar zot kamarad pou ador Zeova!