LARTIK LETID 11
Kouma Labib Kapav Ed Twa pou Andir To Bann Difikilte?
“Bondie . . . donn landirans.”—ROM. 15:5.
KANTIK 94 Rekonesans pou Parol Bondie
REZIME a
1. Ki difikilte bann serviter Zeova kapav gagne?
ESKI to pe pas par bann moman difisil? Par exanp, eski enn kikenn dan lasanble inn fer twa ditor? (Zak 3:2) Eski to bann koleg travay ouswa to bann kamarad lekol pe boufonn twa parski to servi Zeova? (1 Pier 4:3, 4) Eski to fami pe met presion lor twa pou to aret al renion ek sorti predikasion? (Mat. 10:35, 36) Kan to pas par bann moman difisil, kitfwa to kapav panse ki li pli bon ki to aret servi Zeova. Selman, to kapav sir ki ninport ki difikilte to pe fer fas, Zeova pou donn twa sazes ek lafors ki to bizin pou andir sa difikilte-la.
2. Dapre Romin 15:4, kouma nou kapav gagn bann bienfe kan nou lir Labib?
2 Dan Labib, Zeova montre nou kouma bann dimounn inparfe inn reisi sirmont zot bann difikilte. Kifer Zeova inn fer ekrir sa? Pou ki nou tir bann leson. Nou konpran sa gras-a seki Zeova ti fer lapot Pol ekrir dan Romin 15:4. (Lir.) Kan nou lir sa bann zistwar-la, sa kapav ankouraz nou ek donn nou lespwar. Selman, pou ki nou tir bann leson, li pa ase ki nou zis lir Labib. Nou bizin les Labib sanz nou fason panse ek tous nou leker. Ki nou kapav fer kan nou bizin enn konsey konsernan enn difikilte ki nou pe gagne? Nou kapav servi sa metod letid la: (1) Priye, (2) Servi to limazinasion, (3) Medite, ek (4) Met an pratik. Dan sa lartik-la, nou pou examinn sa kat letap-la. b Apre sa, nou pou servi sa metod-la pou examinn bann sitiasion ki ti ariv Lerwa David ek lapot Pol.
1. PRIYE
Avan ki to lir Labib, demann Zeova pou ed twa tir bann leson ar seki to pou lir (Get paragraf 3)
3. Avan ki to lir Labib, ki to bizin fer, ek kifer?
3 (1) Priye. Avan ki to lir Labib, demann Zeova pou ed twa tir bann leson ar seki to pou lir. Par exanp, si to pe rod enn konsey konsernan enn difikilte ki to pe gagne, demann Zeova pou ed twa pou trouv bann prinsip Biblik ki kapav ed twa.—Fil. 4:6, 7; Zak 1:5.
2. SERVI TO LIMAZINASION
Esey mazinn senn-la ek met twa dan plas personaz prinsipal sa zistwar-la (Get paragraf 4)
4. Kouma to kapav fer enn zistwar Biblik vinn pli reel pou twa?
4 (2) Servi to limazinasion. Zeova inn donn nou enn kapasite extraordiner: Nou limazinasion. Pou ki to kapav fer enn zistwar Biblik vinn pli reel, esey mazinn senn-la ek met twa dan plas personaz prinsipal sa zistwar-la. Esey trouv seki li ti pe trouve ek esey resanti seki li ti pe resanti.
3. MEDITE
Reflesi an profonder lor seki to pe lir ek examine kouma to kapav met an pratik seki to pe aprann (Get paragraf 5)
5. Ki savedir medite, ek kouma to kapav fer sa?
5 (3) Medite. Medite vedir reflesi an profonder lor seki to pe lir ek examine kouma to kapav met an pratik seki to pe aprann. Kan to medite, sa ed twa pou konpran pli bien seki to pe lir. Kan to lir Labib ek to pa medite, se koumadir to pe get bann pies enn puzzle, san ki to aranz puzzle-la. Kan to medite, se koumadir to pe aranz puzzle-la pou ki to kapav trouv zimaz-la. Kan to medite, to kapav poz tomem sa bann kestion-la: ‘Ki kitsoz personaz prinsipal sa zistwar la inn fer pou rezoud so problem? Kouma Zeova inn ed li? Kouma mo kapav servi bann leson ki mo’nn aprann pou andir mo bann difikilte?’
4. MET AN PRATIK
Met an pratik seki to pe aprann pou to pran bann pli bon desizion, pou to gagn lape, ek pou to fer to lafwa vinn pli for (Get paragraf 6)
6. Kifer nou bizin met an pratik seki nou aprann?
6 (4) Met an pratik. Zezi ti dir ki si nou pa met an pratik seki nou aprann, nou pou koumadir sa zom ki ti aranz so lakaz lor disab la. Li ti travay bien dir, me so bann zefor ti dan vid. Kifer? Parski kan ti ena lapli ek inondasion, so lakaz ti kraze. (Mat. 7:24-27) Dan mem fason, si nou priye, nou servi nou limazinasion, ek nou medite, me nou pa met an pratik seki nou’nn aprann, nou bann zefor pou dan vid. Kan nou pou gagn bann difikilte ouswa bann persekision, nou lafwa pa pou ase for. Parkont, kan nou etidie ek met an pratik seki nou aprann, nou pou pran bann pli bon desizion, nou pou ena lape, ek nou lafwa pou vinn pli for. (Iza. 48:17, 18) Asterla, anou servi sa kat letap-la pou examinn enn sitiasion ki ti ariv Lerwa David.
KI NOU KAPAV APRANN AR LEXANP LERWA DAVID?
7. Ki lexanp Biblik nou pou examine?
7 Eski enn kamarad ouswa enn manb to fami inn fer twa ditor? Si to dan sa sitiasion-la, alor to kapav tir bann leson ar seki ti ariv Lerwa David kan so garson Absalon ti trayir li ek ti esey vinn lerwa dan so plas.—2 Sam. 15:5-14, 31; 18:6-14.
8. Ki kitsoz to kapav fer pou ki Zeova ed twa?
8 (1) Priye. Avan ki to lir zistwar Biblik la, priye Zeova ek dir Li seki to resanti akoz fason ki sa dimounn-la inn tret twa. (Ps. 6:6-9) Dir Zeova exakteman seki to resanti. Apre sa, demann Li pou ed twa pou trouv bann prinsip Biblik ki pou kapav ed twa pou sirmont sa difikilte-la.
9. Rakonte seki ti ariv David ek Absalon.
9 (2) Servi to limazinasion. Reflesi lor sa zistwar-la, ek esey mazine kouma Lerwa David ti afekte par seki ti arive. Depi plizir lane, Absalon, garson David, ti fer boukou zefor pou ki bann dimounn kontan li. (2 Sam. 15:7) Kan bon moman ti arive, Absalon ti avoy bann espion partou dan Izrael pou ankouraz lepep pou aksepte li kouma lerwa. Li ti mem reisi konvink Aitofel, konseye ek bon kamarad David, pou rebel kont lerwa. Absalon ti fer limem vinn lerwa, ek li ti esey anprizonn ek touy David, ki ti bien malad sa lepok-la. (Ps. 41:1-9) Kan David ti aprann seki Absalon ti fer, li ti kit Zerizalem. Plitar, larme Absalon ti lager kont larme David. Lerla, larme Absalon ti perdi lager, ek Absalon ti mor.
10. Kouma Lerwa David ti kapav reazir?
10 Asterla, esey mazine seki Lerwa David ti resanti kan tousala ti arive. Li ti kontan Absalon ek li ti ena konfians an Aitofel. Pourtan, toulede ti trayir li. Zot ti fer David boukou ditor ek zot ti mem esey touy li. Dan sa ler-la, David ti kapav panse ki so bann lezot kamarad osi ti pe soutenir Absalon, ek li ti kapav aret fer zot konfians. Li ti kapav pans zis limem ek kit Zerizalem tousel. Ouswa li ti kapav bes lebra ek dekouraze net. Me David pa ti fer sa bann kitsoz-la. Okontrer, li ti reisi sirmont sa leprev-la. Kouma li ti fer sa?
11. Kouma David ti reazir?
11 (3) Medite. Ki leson nou kapav aprann dan sa zistwar-la? Poz tomem sa kestion-la: “Ki David ti fer pou sirmont so bann difikilte?” David pa ti panike ek li pa ti pran bann desizion brit. Li pa ti trakase plis ki bizin ek li pa ti les laper paraliz li. Okontrer, li ti priye Zeova pou gagn led. Li ti osi demann so bann kamarad pou ed li. Ek li pa ti tarde pou azir kan li ti pran bann desizion. Mem si li ti bien tris, David pa ti vinn amer ek li pa ti les laenn kontrol li. Li ti kontign fer Zeova ek so bann kamarad konfians.
12. Kouma Zeova ti ed David?
12 Kouma Zeova ti ed David? Si to fer bann resers, to pou trouve ki Zeova ti donn David lafors pou andir sa difikilte-la. (Dapre not ki ena lao Ps. 3:1-8) Zeova ti beni bann desizion ki David ti pran. Ek Zeova ti soutenir bann kamarad ki ti res fidel ar David ek ki ti lager pou protez zot lerwa.
13. Kouma to kapav imit lexanp Lerwa David kan enn kikenn fer twa ditor? (Matie 18:15-17)
13 (4) Met an pratik. Demann tomem: “Kouma mo kapav imit lexanp David?” Pa tarde pou regle problem-la. Dapre to sitiasion, to kapav met an pratik konsey ki Zezi inn done dan Matie sapit 18. To kapav swiv konsey-la dan enn fason direk ouswa swiv prinsip ki ena deryer sa konsey-la. (Lir Matie 18:15-17, NW. c) Fode pa to pran bann desizion brit, sirtou kan to ankoler. To bizin priye Zeova pou ki Li ed twa pou res kalm ek pou Li donn twa sazes pou to pran enn bon desizion. Pa perdi konfians an to bann kamarad. Okontrer, aksepte ki zot ed twa. (Prov. 17:17) Me pli inportan, swiv bann konsey ki Zeova donn twa atraver Labib.—Prov. 3:5, 6.
KI NOU KAPAV APRANN AR LEXANP LAPOT POL?
14. Dan ki sitiasion 2 Timote 1:12-16; 4:6-11, 17-22 kapav ankouraz twa?
14 Eski to pe gagn lopozision ar to fami parski to pe servi Zeova? Eski to res dan enn pei kot nou laktivite lor restriksion ouswa interdi? Si to dan sa sitiasion-la, 2 Timote 1:12-16 ek 4:6-11, 17-22 d kapav ankouraz twa. Lapot Pol ti ekrir sa bann verse-la kan li ti dan prizon.
15. Pou ki kitsoz to kapav priye Zeova?
15 (1) Priye. Avan ki to lir sa bann verse-la, koz lor to problem ar Zeova ek dir Li seki to resanti. Dir Zeova exakteman seki to resanti. Apre sa, demann Zeova pou ed twa pou tir bann leson ar seki ti ariv lapot Pol. Lerla, to pou kone ki to bizin fer dan to sitiasion.
16. Rakonte seki ti ariv Pol.
16 (2) Servi to limazinasion. Esey met twa dan plas lapot Pol. Li ti dan prizon dan Rom. Li ti deza fer prizon avan, me sann fwa la, li ti kone ki bannla ti pou touy li. Sertin parmi so bann konpagnon ti abandonn li, ek li ti extra fatige.—2 Tim. 1:15.
17. Kouma Pol ti kapav reazir?
17 Pol ti kapav konsantre li lor lepase, ek panse ki si li ti pran bann lezot desizion, li pa ti pou dan prizon. Li ti kapav ankoler ar bann konpagnon ki ti abandonn li, ek li ti kapav aret fer so bann lezot kamarad konfians. Me Pol pa ti fer sa bann kitsoz-la. Kifer Pol ti kapav sir ki so bann kamarad ti pou res fidel anver li ek ki Zeova ti pou rekonpans li?
18. Kouma Pol ti fer fas ar sa sitiasion difisil la?
18 (3) Medite. Demann tomem: “Kouma Pol ti fer fas ar sa sitiasion difisil la?” Mem si Pol ti kone ki li ti pou mor biento, li pa ti bliye seki ti pli inportan, setadir donn laglwar Zeova. Li ti kontign reflesi kouma li kapav ankouraz lezot. Li ti kont lor Zeova, ek li ti priye souvan. (2 Tim. 1:3) Pol pa ti kontign pans bann frer ki ti abandonn li. Okontrer, li ti dir ki li ti bien rekonesan anver bann kamarad ki ti ed li ek soutenir li. Anplis, Pol ti kontign etidie Parol Bondie. (2 Tim. 3:16, 17; 4:13) Me pli inportan, li ti sir ki Zeova ek Zezi ti kontan li. Zot pa ti abandonn li, ek zot ti pou rekonpans li pou so fidelite.
19. Kouma Zeova ti ed Pol?
19 Zeova ti fini fer Pol kone ki li ti pou gagn persekision parski li ti enn Kretien. (Zist. 21:11-13) Kouma Zeova ti ed Pol? Li ti reponn so bann lapriyer ek Li ti donn li lafors. (2 Tim. 4:17) Pol ti fer boukou zefor pou gagn so rekonpans ek li ti sir ki li ti pou gagn li. Zeova ti osi servi bann kamarad Pol pou donn li led ki li ti bizin.
20. Dan Romin 8:38, 39, nou trouve ki lapot Pol ti ena enn gran lafwa. Kouma nou kapav imit so lafwa?
20 (4) Met an pratik. Demann tomem: “Kouma mo kapav imit lexanp Pol?” Parey kouma Pol, nou bizin atann ki nou pou gagn bann persekision akoz nou lafwa. (Mark 10:29, 30) Pou nou res fidel malgre bann difikilte, nou bizin kont lor Zeova, priye Li, ek kontign etidie Labib regilierman. Nou bizin touletan rapel ki, seki pli inportan, se donn laglwar Zeova. Nou kapav sir ki Zeova zame pa pou abandonn nou ek ki nanye pa kapav anpes Li kontan nou.—Lir Romin 8:38, 39; Ebre 13:5, 6.
APRANN AR BANN LEZOT LEXANP BIBLIK
21. Ki kitsoz ti ed Aya ek Hector pou sirmont zot bann difikilte?
21 Ninport ki difikilte nou ena, nou kapav gagn lafors gras-a bann lexanp Biblik. Par exanp, Aya, enn pionie dan Zapon, dir ki zistwar Zonas ti ed li pou sirmont so laper pou prese. Hector, se enn zenn ki res Lindonezi ek so bann paran pa servi Zeova. Hector dir ki lexanp Rut inn bien motiv li pou aprann konn Zeova ek pou servi Li.
22. Kouma to kapav gagn bann bienfe kan to get bann video Biblik ouswa kan to lir seri lartik “Imit Zot Lafwa”?
22 Kotsa to kapav trouv bann lexanp Biblik ki kapav ed twa? Nou bann video, bann dram odio, ek seri lartik “Imit Zot Lafwa” kapav ed twa pou fer enn zistwar Biblik vinn pli reel. e Avan ki to get, ekout, ouswa lir sa bann zistwar-la, priye Zeova ek demann Li pou ed twa pou tir bann leson. Esey mazine ki to dan plas sa personaz prinsipal la. Medit lor seki bann fidel serviter Zeova ti fer ek lor kouma Zeova ti ed zot sirmont zot bann difikilte. Apre sa, met an pratik seki to’nn aprann. Remersie Zeova pou led ki Li pe donn twa. Ek montre to rekonesans pou led ki to pe gagne kan to rod bann lokazion pou ankouraz ek soutenir lezot.
23. Dapre Izai 41:10, 13, ki kitsoz Zeova promet Li pou fer pou nou?
23 Satan pe kontrol sa lemond-la. Akoz sa, nou lavi kapav bien difisil, ek parfwa nou pa kone ki nou bizin fer. (2 Tim. 3:1) Me fode pa nou trakase ouswa per. Zeova konn nou bann difikilte. Kan nou bizin led, Zeova promet ki Li pou soutenir nou avek so lame drwat. (Lir Izai 41:10, 13. f) Alor, nou kapav sir ki Zeova pou ed nou, ek ki Labib kapav donn nou lafors ki nou bizin pou andir nou bann difikilte.
KANTIK 96 Liv Bondie—Enn Trezor
a Dan Labib, ena boukou lexanp ki montre ki Zeova kontan so bann serviter ek ki Li ed zot pou andir zot bann difikilte. Dan sa lartik-la, nou pou gete kouma nou kapav fer nou letid personel dan enn fason ki pou fer nou gagn pli boukou bienfe.
b Metod ki mansione dan sa lartik-la, se zis enn fason pou etidie Labib. To kapav trouv lezot metod pou etidie Labib dan Liv Resers pou Bann Temwin Zeova. Dan “Size,” al dan seksion “Labib” ek rod soutit “Lir ek Konpran Labib.”
c Matie 18:15-17: “15 Anplis, si to frer fer enn pese, al get li ek devwal so fot ant zis twa ek li tousel. Si li ekout twa, to finn gagn to frer. 16 Me si li pa ekoute, pran enn ouswa de dimounn avek twa, pou ki par temwaniaz de ouswa trwa temwin, kapav regle sa sitiasion-la. 17 Me si li pa ekout bannla, fer lasanble kone. Ek si li pa ekout lasanble osi, alor to bizin konsider li kouma enn non-Zwif ek kouma enn kikenn ki ramas tax.”
d Pa lir sa bann verse-la pandan letid Latour Degard.
e Get “Imit Zot Lafwa—Bann Zom ek Fam dan Labib” lor jw.org. (Al dan seksion LABIB EK OU > LAFWA DAN BONDIE.)
f Izai 41:10, 13: “10 Pa per, parski mo avek twa. Pa trakase, parski mo to Bondie. Mo pou fortifie twa, wi, mo pou ed twa, mo pou vremem trap twa for avek mo lame drwat lazistis. 13 Parski mwa, Zeova to Bondie, mo pe trap to lame drwat bien for, sa Kikenn ki pe dir twa: ‘Pa per. Mo pou ed twa.’”
