1-2. Ki difikilte boukou Temwin gagne?

 LAPOT Pol ti ankouraz Timote pou fer so best pou servi Zeova. (2 Tim. 4:5) Nou osi nou swiv konsey lapot Pol ek nou fer nou best pou servi Zeova. Me parfwa, sa kapav bien difisil. Pou boukou frer ek ser, zot vremem bizin ena kouraz pou zot prese. (2 Tim. 4:2) Par exanp, nou kapav pans nou bann frer ek ser ki res dan bann pei kot nou laktivite lor restriksion ouswa interdi. Zot kontign prese mem si zot kapav al dan prizon akoz sa.

² Bann serviter Zeova bizin fer fas ar boukou difikilte ki kapav dekouraz zot. Par exanp, boukou parmi zot bizin travay bien dir pou donn zot fami seki zot bizin pou viv. Zot ti pou kontan fer plis dan predikasion, me lafin lasemenn zot nepli ena lenerzi. Ena lezot ki pa kapav fer plis dan predikasion parski zot vie ouswa zot ena enn maladi bien grav. Sertin parmi zot kitfwa pa mem kapav sorti kot zot. Ena bann frer ek ser osi ki panse ki zot pena valer devan lizie Zeova. Enn ser ki apel Mary, b dir: “Mo bizin fer telman boukou zefor pou kontrol mo bann santiman negatif, ki sa pran tou mo lenerzi. Lerla, mo santi mwa koupab parski mo nepli ena letan ek lenerzi pou al prese.”

3. Ki nou pou examine dan sa lartik-la?

³ Dan ninport ki sitiasion nou ete, Zeova kapav donn nou lafors pou fer fas ar nou bann difikilte ek pou fer nou maximum pou servi Li. Anou gete kouma Zeova ti donn  Pol ek Timote lafors pou akonpli zot minister malgre zot bann difikilte. Ek apre sa, anou gete kouma Zeova kapav ed nou.

4. Ki bann difikilte Pol ti bizin fer fas?

⁴ Pol ti bizin fer fas ar boukou difikilte. Li ti sirtou bizin led Zeova kan so bann lennmi ti bat li, ti met li dan prizon, ek ti esey touy li. (2 Kor. 11:23-25) Pol ti dir osi ki parfwa li ti bizin lit kont bann santiman negatif. (Rom. 7:18, 19, 24) Pol ti ena osi enn problem lasante ki ti koumadir “enn pikan dan laser,” ek li ti bien anvi ki Zeova geri li.​—2 Kor. 12:7, 8, NW.

5. Malgre so bann difikilte, ki kitsoz Pol ti reisi fer?

⁵ Zeova ti donn Pol lafors pou kontign prese malgre bann difikilte ki li ti ena. Anou gete seki Pol ti reisi fer. Par exanp, kan li ti anprizone dan enn lakaz dan Rom, li ti kontign pres ar bann sef relizie Zwif ek kitfwa ar bann dimounn ki ti dan gouvernman osi. (Zist. 28:17; Fil. 4:21, 22) Li ti osi pres ar boukou solda Romin, ek li ti pres ar tou dimounn ki ti vinn vizit li. (Zist. 28:30, 31; Fil. 1:13) Dan sa lepok-la, Bondie ti servi Pol pou ekrir bann let ki ti ed bann Kretien dan lepase, ek ki kapav ed nou osi azordi. Anplis, lexanp lapot Pol ti ankouraz bann frer ek ser dan lasanble Rom, ek zot ti vinn “pli solid . . . pou anons Parol Bondie san okenn laper.” (Fil. 1:14) Mem si Pol pa ti kapav fer otan ki li ti anvi, li ti fer so maximum, ek sa ti “vremem kontribie pou fer avans Bonn Nouvel.”​—Fil. 1:12.

6. Dapre 2 Korintien 12:9, 10, ki kitsoz ti ed Pol pou akonpli so minister?

⁶ Pol ti kone ki se gras-a lafors ki Zeova ti donn li ki li ti pe kapav fer tousala. Li ti kone ki pwisans Bondie ti “manifeste dan [so] febles.” (Lir 2 Korintien 12:9, 10.) Mem si li ti gagn persekision, li ti al dan prizon, ek li ti ena lezot problem ankor, Pol ti kapav akonpli so minister gras-a lespri sin Zeova.

7. Ki bann difikilte Timote ti bizin sirmonte pou li akonpli so minister?

⁷ Timote, kamarad lapot Pol, ti bizin li osi kont lor Zeova pou li akonpli so minister. Timote ti akonpagn Pol pou fer  bann long vwayaz misioner. Anplis, Pol ti fer li fer lezot vwayaz pou vizit ek ankouraz bann lasanble. (1 Kor. 4:17) Timote kitfwa pa ti santi li alez pou fer sa. Kitfwa akoz samem ki Pol ti donn li sa konsey-la: “Mo napa oule ki personn souzestim twa akoz to enn zenes.” (1 Tim. 4:12) Anplis, sa lepok-la, Timote ti ena so prop pikan dan laser, ‘parski souvan li ti malad.’ (1 Tim. 5:23, NW) Me Timote ti kone ki Zeova ti pou donn li So lespri sin, pou ki li kapav kontign pres bonn nouvel ek ed so bann frer ek ser.​—2 Tim. 1:7.

8. Kouma Zeova donn so bann serviter lafors azordi?

⁸ Azordi, Zeova donn so bann serviter So “pwisans extraordiner” pou ki zot kapav kontign servi Li avek fidelite. (2 Kor. 4:7) Anou get kat kitsoz ki Zeova servi pou fortifie nou ek ed nou pou res fidel anver Li: lapriyer, Labib, nou bann frer ek ser, ek nou minister.

9. Kouma lapriyer kapav ed twa?

⁹ Zeova donn nou lafors gras-a lapriyer. Dan Efezien 6:18, Pol ankouraz nou pou priye Bondie “dan tou sirkonstans.” Lerla, Zeova pou reponn nou lapriyer kan Li donn nou lafors. Jonnie, ki res Bolivi, ti resanti lafors Zeova kan li ti gagn bann difikilte enn deryer lot. So madam, so papa, ek so mama, zot tou ti tom bien malad anmemtan. Li ti bizin okip toule trwa ek sa pa ti fasil pou li. Malerezman, so mama ti mor. Ek sa ti pran boukou letan avan ki so madam ek so papa geri. Kan li mazinn sa moman difisil la, Jonnie dir: “Kan mo ti lor presion, seki ti ed mwa se bann lapriyer bien presi.” Zeova ti donn Jonnie lafors pou li reisi andir sa sitiasion-la. Ronald, enn ansien dan Bolivi, ti aprann ki so mama ti ena enn kanser. Malerezman, so mama ti mor enn mwa apre. Ki kitsoz ti ed Ronald pou andir sa sitiasion difisil la? Ronald dir: “Kan mo priye Zeova, mo dir Li tou seki mo ena lor mo leker. Mo kone ki Li konpran mwa pli bien ki ninport kisannla. Li konpran mwa pli bien ki mo konpran momem.” Parfwa, nou telman lor presion ki nou nepli kone pou ki kitsoz nou bizin priye. Me Zeova invit nou pou priye Li, mem kan nou trouv sa difisil pou dir Li seki nou panse ek resanti.​—Rom. 8:26, 27.

10. Dapre Ebre 4:12, kifer li inportan ki nou lir Labib ek nou medit lor seki nou lir?

¹⁰ Zeova donn nou lafors gras-a Labib. Lapot Pol ti lir bann Lekritir pou gagn lafors ek lankourazman, ek nou osi nou bizin fer parey. (Rom. 15:4) Kan nou lir Labib ek nou medit lor seki nou lir, Zeova kapav servi so lespri sin pou ed nou konpran kouma Labib kapav ed nou. (Lir Ebre 4:12.) Ronald, ki nou’nn mansione avan, dir: “Mo kontan ki mo’nn fer zefor pou lir Labib toule swar. Mo medit boukou lor bann kalite ki Zeova ena ek kouma Li pran swin so bann serviter avek boukou lamour. Sa ed mwa pou regagn lafors.”

11. Kouma Labib inn ed enn ser ki ti an-dey?

¹¹ Kan nou medit lor seki nou lir dan Labib, sa kapav ed nou pou ena enn latitid pozitif lor nou bann problem. Anou gete kouma Labib inn ed enn vev ki ti perdi so mari. Enn ansien ti konsey li pou reflesi lor bann leson ki li kapav  aprann dan liv Zob. Kan li ti fer sa, deswit ser-la ti kritik Zob so move latitid. Dan so leker, li ti dir: “Zob! Aret pans zis to tousel!” Me apre sa, ser-la ti realize ki li ti ena mem latitid ki Zob. Sa ti ed li pou koriz so fason panse ek ti donn li lafors pou sirmont so lapenn.

12. Kouma Zeova donn nou lafors gras-a nou bann frer ek ser?

¹² Zeova donn nou lafors gras-a nou bann frer ek ser. Enn lot fason ki Zeova donn nou lafors se gras-a nou bann konpagnon Kretien. Pol ti ekrir ki li ti bien anvi trouv so bann frer ek ser pou ki zot kapav “ankouraz [zot] kamarad.” (Rom. 1:11, 12) Mary, ki nou’nn mansione avan, bien kontan pas letan avek so bann frer ek ser. Li dir: “Zeova ti servi bann frer ek ser ki pa ti mem kone ki mo dan lapenn. Zot ti dir mwa bann parol ankourazan ek zot ti avoy mwa bann ti kart. Samem ki mo ti bizin. Li bon osi ki nou ouver nou leker ar bann ser ki finn pas par bann mem sitiasion ki nou. Lerla, nou kapav profit zot lexperyans. Anplis, bann ansien touletan fer mwa konpran ki mo ena valer ek ki mo form parti dan lasanble.”

13. Kouma nou kapav ankouraz nou kamarad dan renion?

¹³ Enn parmi bann meyer plas kot nou kapav ankouraz nou kamarad se dan renion. Kan to dan renion, to kapav ankouraz lezot kan to dir zot ki to kontan zot ek ki to bien apresie seki zot fer. Par exanp, avan renion, enn ansien ki apel Peter ti dir enn ser ki so mari pa dan laverite: “To kone ki kantite sa ankouraz nou kan nou trouv twa asiste renion! To reisi prepar to sis zanfan pou vinn renion ek zot donn bann zoli komanter.” Ser-la ti telman rekonesan ki li ti koumans plore. Ser-la ti dir: “Si to ti kone kouma seki to’nn dir mwa la inn fer mwa boukou dibien!”

14. Kouma predikasion kapav ed nou?

¹⁴ Zeova donn nou lafors gras-a nou minister. Kan nou prese, nou santi nou bien, mem si dimounn pa ekoute. (Prov. 11:25) Enn ser ki apel Stacy inn trouve kouma predikasion inn donn li kouraz. Kan enn manb so fami ti exkli, li ti bien sagrin ek li ti kontign demann limem: ‘Eski mo ti kapav fer plis pou ed li?’ Stacy pa ti pe kapav aret pans lor la. Ki kitsoz ti ed li pou sirmont sa sitiasion-la? Predikasion! Kan li ti al prese, li ti konsantre li lor bann dimounn ki ti bizin led dan so teritwar. Stacy dir: “Sa lepok-la, Zeova ti donn mwa enn letid ki ti pe fer bann bon progre. Sa ti bien ankouraz mwa. Kitsoz ki finn plis ed mwa se predikasion.”

15. Ki nou kapav aprann ar lexanp Mary?

¹⁵ Akoz zot sitiasion, sertin proklamater kitfwa panse ki zot pa pe fer ase dan predikasion. Si to ena sa santiman-la, pa bliye ki Zeova kontan kan to donn Li to best. Anou re-get lexanp Mary. Kan li ti al res dan enn landrwa kot bann dimounn koz enn lot lang, Mary ti koumans santi li initil. Li explike: “Pandan enn bon bout letan, mo ti kapav zis donn enn ti komanter dan renion, lir enn verse Labib, ouswa donn enn trak dan predikasion.” Mary ti bien dekouraze kan li ti konpar li ar bann dimounn ki koz bien sa lang-la. Me apre sa, Mary ti sanz so fason panse. Li ti konpran ki Zeova ti kapav servi li osi, mem si li pa ti koz bien sa lang-la. Li dir: “Seki Labib dir li bien sinp ek li kapav sanz lavi bann dimounn.”

16. Ki kitsoz kapav ed bann dimounn ki anvi prese me ki pa kapav kit zot lakaz?

 ¹⁶ Zeova kone ki sertin parmi nou anvi prese, selman zot pa kapav kit zot lakaz. Alor, Li kapav ed nou pou pres ar bann dimounn ki vinn okip nou, kouma bann dokter ek bann ners. Si nou konpar seki nou pe fer asterla ar seki nou ti pe fer dan lepase, sa kapav bien dekouraz nou. Me si nou trouve kouma Zeova pe ed nou asterla, sa pou donn nou lafors pou andir ninport ki leprev avek lazwa.

17. Dapre Ekleziast 11:6, kifer nou bizin kontign prese mem si nou pa gagn bann rezilta deswit?

¹⁷ Kan nou sem bann lagrin laverite, nou pa kone ki lagrin pou pouse. (Lir Ekleziast 11:6. c) Anou get lexanp enn ser ki apel Barbara ek ki ena plis ki 80 an. Souvan li ti pe prese par telefonn ek par let. Dan enn so bann let, li ti met Latour Degard 1^e Me 2014. Dan sa Latour Degard-la, ti ena enn lartik ki ti ena tem “Ki Bondie Inn Fer pou Ou?” San ki li kone, Barbara ti avoy enn let enn koup ki ti nepli Temwin Zeova. Zot ti lir magazinn-la plizir fwa. Misie-la ti ena linpresion ki Zeova ti pe koz ar li. Koup-la ti rekoumans asiste bann renion ek zot ti retourn dan laverite, apre plis ki 27 an! Sa ti bien ankouraz Barbara kan li ti trouv rezilta ki enn so bann let ti ena!

18. Ki nou bizin fer pou ki Zeova donn nou so lafors?

¹⁸ Zeova donn nou so lafors gras-a lapriyer, Labib, nou bann frer ek ser, ek nou minister. Kan nou profit sa bann dispozision ki Zeova donn nou la, nou montre ki nou ena konfians ki Li kapav ed nou ek ki Li anvi ed nou. Alor, anou touletan kont lor nou Papa ki “montre so lafors an faver bann dimounn ki ena enn leker konple anver Li.”​—2 Kro. 16:9.