1-2. (a) Dapre Efezien 6:16, kifer nou bizin ena enn “gran boukliye lafwa”? (b) Ki bann kestion nou pou examine?

 ESKI to ena enn “gran boukliye lafwa”? (Lir Efezien 6:16, NW. b) Pena dout ki to ena enn. Parey kouma enn gran boukliye protez preske tou parti lekor enn solda, to lafwa osi protez twa kont bann move kitsoz ki ena dan sa lemond-la, kouma limoralite sexiel, laviolans, ek tou bann kitsoz ki pa an-akor avek bann prinsip Bondie.

² Selman, nou pe viv dan “bann dernie tan” ek nou lafwa pou kontign pas par bann test. (2 Tim. 3:1) Kouma to kapav examinn to boukliye lafwa pou ki li res dan enn bon leta? Ek ki to kapav fer pou gard to lafwa for? Dan sa lartik-la, nou pou gagn repons sa bann kestion-la.

3. Ki bann solda ti fer ar zot boukliye, ek kifer?

³ Dan lepok Biblik, souvan bann solda ti ena bann boukliye ki ti rekouver ar kwir. Zot ti pas delwil lor zot boukliye pou protez kwir-la ek pou anpes bann parti an metal rouye. Si enn solda ti trouve ki so boukliye inn abime, li ti fer repar so boukliye pou ki li touletan pre pou al lager. Kouma to kapav aplik sa lexanp-la ar to lafwa?

4. Kifer to bizin verifie to “boukliye lafwa,” ek kouma to kapav fer sa?

⁴ Parey kouma bann solda dan lepase, regilierman to bizin verifie ek antretenir to “boukliye lafwa” pou ki to touletan pre pou lager. Antan ki Kretien, nou pe fer enn lager spiritiel ek nou bizin lager kont bann move lespri. (Efe.  6:10-12) Personn pa kapav antretenir to “boukliye lafwa” dan to plas. Alor, kouma to kapav fer sir ki to lafwa li ase for pou ki to fer fas ar bann leprev? Premierman, demann Bondie so led dan lapriyer. Apre sa, servi Parol Bondie pou ed twa trouv tomem parey kouma Bondie trouv twa. (Ebre 4:12) Labib dir: “Fer Zeova konfians avek tou to leker ek pa fie lor to prop lintelizans.” (Prov. 3:5, 6) Reflesi lor sa prinsip-la ek mazinn enn sitiasion ki’nn fek ariv twa ek seki to’nn fer dan sa sitiasion-la. Par exanp, si to’nn bizin fer fas ar bann gro problem larzan, eski to’nn rapel promes Zeova ki trouv dan Ebre 13:5? Sa verse-la dir: “Zame mo pa pou kit twa, ni abandonn twa.” Eski sa promes-la ti donn twa lasirans ki Zeova pou ed twa? Si wi, sa montre ki to pe gard to “boukliye lafwa” dan enn bon leta.

5. Ki kitsoz kitfwa to pou trouve kan to examinn to lafwa?

⁵ Kitfwa to pou etone ar seki to pou trouve kan to pou examinn bien to lafwa. Kitfwa to pou dekouver bann febles ki tomem to pa ti kone to ena. Par exanp, kitfwa to pou rann twa kont ki bann traka ki pa neseser, bann foste, ek dekourazman inn afekte to lafwa. Si to dan sa sitiasion-la, kouma to kapav protez to lafwa pou ki li pa plis afekte?

6. Sit sertin kitsoz ki li bon nou gagn traka.

⁶ Li bon ki nou trakase pou sertin kitsoz. Par exanp, nou anvi fer Zeova ek Zezi plezir ek li normal ki nou trakase akoz sa. (1 Kor. 7:32) Si nou fer enn pese grav, nou trakase parski nou anvi regagn lamitie Zeova. (Ps. 38:18) Nou trakase osi parski nou anvi fer nou konzwin plezir ek nou trakase pou bien-et nou fami ek nou bann frer ek ser.​—1 Kor. 7:33; 2 Kor. 11:28, NW.

7. Dapre Proverb 29:25, kifer fode pa nou per bann dimounn?

⁷ Parkont, bann traka ki pa neseser kapav afekte nou lafwa. Par exanp, kitfwa souvan nou trakase akoz manze ouswa linz. (Mat. 6:31, 32) Lerla, pou ki nou aret trakase, kitfwa nou pou fer bann gran zefor pou gagn pli boukou larzan. Nou riske mem devlop lamour pou larzan. Si nou les sa arive, nou lafwa an Zeova pou afebli ek sa pou gat nou lamitie avek Li. (Mark 4:19; 1 Tim. 6:10) Ouswa kitfwa nou trakase plis ki bizin lor seki lezot panse lor nou. Lerla, kitfwa nou kapav koumans per ki lezot boufonn nou ouswa persekit nou ek sa laper-la kapav vinn pli gran ki nou lakrint pou Zeova. Pou protez nou kont sa danze-la, nou bizin sipliy Zeova pou donn nou lafwa ek kouraz ki nou bizin pou fer fas ar sa difikilte-la.​—Lir Proverb 29:25; c Lik 17:5.

8. Kouma nou bizin reazir kan nou tann bann foste?

⁸ Satan, “papa bann manter,” servi bann dimounn ki anba so pouvwar pou fann bann foste lor Zeova ek lor nou bann frer ek ser. (Zan 8:44) Par exanp, bann aposta pibliye bann foste ek deform bann linformasion konsernan lorganizasion Zeova lor bann sit Internet, televizion, ouswa atraver bann lezot media. Sa bann foste-la form parti bann “fles anflame” Satan. (Efe. 6:16, NW) Ki nou bizin fer si enn kikenn koz lor sa bann foste-la ar nou? Fode pa nou ekout li! Kifer? Parski nou  ena lafwa an Zeova ek nou fer nou bann frer ek ser konfians. Avredir, nou bizin pa gagn okenn kontak ar bann aposta. Fode pa nou les nanye ni personn, mem nou kiryozite, tant nou pou diskit avek zot.

9. Kouma eski dekourazman kapav afekte nou?

⁹ Dekourazman kapav afebli nou lafwa. Parfwa, nou kapav santi nou dekouraze akoz nou bann problem. Biensir, nou pa kapav fer koumadir nou pena okenn problem. Me fode pa nou kontign pans lor nou bann problem touletan. Si nou fer sa, nou riske bliye tou bann bon kitsoz ki Zeova inn promet nou. (Rev. 21:3, 4) Lerla, nou kapav telman dekouraze ki nou santi nou abat ek nou aret servi Zeova. (Prov. 24:10) Me nou kapav anpes sa arive.

10. Ki nou aprann ar let ki enn ser ti ekrir?

¹⁰ Anou get lexanp enn ser ki res l’États-Unis. Sa ser-la pe fer zefor pou gard so lafwa for mem si li bizin okip so misie ki bien malad. Dan enn let ki li ti avoy biro mondial, li ti ekrir: “Nou sitiasion bien stresan ek parfwa nou santi nou bien dekouraze, me nou lesperans bien solid. Mo bien rekonesan pou tou bann kitsoz ki Zeova donn nou pou fer nou lafwa vinn pli for ek pou ankouraz nou. Nou vremem bizin sa bann konsey ek sa bann lankourazman-la. Sa ed nou pou kontign servi Zeova ek pou kontign andir bann sitiasion difisil ki Satan servi pou afebli nou.” Lexanp sa ser-la montre ki nou kapav sirmont dekourazman. Kouma? Fode pa to bliye ki Satan servi to bann difikilte pou teste to lafwa. Rapel ki Zeova pou rekonfort twa. Ek apresie manze spiritiel ki Li donn twa.

11. Pou kone dan ki leta nou lafwa ete, ki bann kestion nou bizin poz noumem?

¹¹ Eski to panse ki to lafwa bizin vinn pli for dan sertin domenn? Pandan bann dernie mwa ki’nn pase, eski to finn reisi pa trakase plis ki bizin? Eski to finn refiz ekout ouswa diskit avek bann aposta lor bann foste ki zot fane? Ek eski to finn reisi sirmont dekourazman? Si wi, alor to “boukliye lafwa” dan enn bon leta. Me nou bizin res lor nou gard parski Satan  ena osi bann lezot zarm ki li esey servi kont nou. Anou examinn enn parmi sa bann zarm-la.

12. Ki lefe materyalis kapav ena lor nou?

¹² Si nou kontan bann kitsoz materyel, nou lafwa riske afebli ek nou pou fer mwins pou Zeova. Lapot Pol ti dir: “Okenn zom ki pe servi kouma solda pa inplik li dan bann zafer komersial ki ena dan lavi, pou li kapav gagn faver sa dimounn ki’nn angaz li kouma solda la.” (2 Tim. 2:4, NW) Avredir, bann solda Romin pa ti gagn drwa fer enn lot travay. Ki ti kapav arive si enn solda pa ti pran kont sa linstriksion-la?

13. Kifer enn solda pa ti inplik li dan bann zafer komersial?

¹³ Mazinn sa senn-la: Enn group solda pe antrenn zot depi gramatin pou lager, me mank enn solda dan sa group-la. Sa solda-la dan lavil ek li pe vann manze dan bazar. Aswar, sa group solda la pe pran letan pou verifie bien zot larmir ek pou fit zot lepe. Me sa solda ki ti pe vann manze la pe servi so letan pou prepar manze ki li pou vande landemin. Selman, landemin gramatin, bann lennmi atak zot san ki zot atann. Dapre twa, kisannla parmi sa bann solda-la inn pare pou lager ek kisannla pou fer so sef kontan? Ek si twa osi to ti dan sa lager-la, akote kisannla to ti pou anvi deboute? Akote bann solda ki’nn bien antrenn zot ouswa akote sa solda ki’nn les li distrer la?

14. Antan ki bann solda Zezi Kris, ki kitsoz ena plis valer pou nou?

¹⁴ Nou parey kouma sa bann bon solda-la. Seki pli inportan pou nou se fer nou bann Sef, setadir Zeova ek Zezi, kontan. Sa ena plis valer ki ninport ki kitsoz ki nou kapav gagne dan lemond Satan. Nou fer sir ki nou ena letan ek lenerzi ki bizin pou servi Zeova ek pou gard nou “boukliye lafwa” ek leres nou larmir spiritiel dan enn bon leta.

15. Ki lavertisman Pol ti donn bann Kretien, ek kifer?

¹⁵ Nou bizin touletan res lor nou gard.  Kifer? Lapot Pol ti averti bann Kretien ki “bann ki anvi vinn ris” pou “separe ar lafwa.” (1 Tim. 6:9, 10) Sa mo ‘separe-la’ montre ki nou riske les nou distrer kan nou rod gagn boukou kitsoz materyel ki nou pa vremem bizin. Ek lerla, kitfwa nou kapav devlop “bann move dezir.” Me fode pa nou bliye ki Satan pe servi sa bann dezir-la kouma bann zarm pou afebli nou lafwa.

16. Lexanp ki trouv dan Mark 10:17-22 fer nou reflesi lor ki kestion?

¹⁶ Imazinn enn lot sitiasion: Fer koumadir nou ena ase larzan pou aste boukou kitsoz materyel. Eski nou pe fer enn kitsoz demal si nou aste bann kitsoz ki nou anvi me ki nou pa vremem bizin? Pa neseserman. Me reflesi lor sa bann kestion-la: Mem si nou kapav aste enn kitsoz, eski nou vremem ena letan ek lenerzi pou servi ek pou antretenir sa kitsoz-la? Eski nou pe koumans kontan nou bann kitsoz materyel plis ki bizin? Eski nou lamour pou bann kitsoz materyel kapav fer nou azir kouma sa zenom ki ti refiz linvitasion ki Zezi ti donn li pou fer plis pou Bondie? (Lir Mark 10:17-22.) Li vremem pli bon pou nou ki nou amenn enn lavi sinp ek ki nou servi nou letan ek nou lafors pou fer volonte Bondie!

17. Ki kitsoz fode zame nou bliye?

¹⁷ Fode zame nou bliye ki nou dan enn lager ek ki sak zour nou bizin pre pou sa lager-la. (Rev. 12:17) Nou bann frer ek ser pa kapav sarye nou “boukliye lafwa” dan nou plas. Se noumem ki bizin trap nou boukliye lafwa bien for.

18. Dan lepase, kifer bann solda ti trap zot boukliye bien for?

¹⁸ Dan lepase, kan enn solda ti montre kouraz pandan enn lager, bann dimounn ti donn li loner. Parkont, sa ti pou enn laont si li ti retourn kot li san so boukliye. Enn istorien Romin ki apel Tacite ti ekrir: “Si enn solda abandonn so boukliye, samem pli gran dezoner ki kapav ena.” Se enn bann rezon kifer bann solda ti fer sir ki zot trap zot boukliye bien for.

19. Kouma eski nou kapav trap nou “boukliye lafwa” bien for?

¹⁹ Kouma nou kapav trap nou “boukliye lafwa” bien for? Se kan nou asiste nou bann renion regilierman ek kan nou koz lor Zeova ek lor so Rwayom ar lezot. (Ebre 10:23-25) Nou fer sa osi kan nou lir Parol Bondie toulezour ek kan nou priye Zeova pou ki Li ed nou aplik so bann konsey dan tou domenn nou lavi. (2 Tim. 3:16, 17) Lerla, ninport ki zarm ki Satan servi kont nou pa pou reisi fer nou bann ditor ki pou dire pou touletan. (Iza. 54:17) Nou “gran boukliye lafwa” pou protez nou. Avek kouraz, nou pou tini ferm ansam avek nou bann frer ek ser. Lerla, nou pa pou zis gagn viktwar dan bann lager ki nou fer toulezour, nou pou osi dan kote Zezi kan li pou gagn viktwar lor Satan ek lor bann ki swiv li. Sa pou vremem enn gran loner!​—Rev. 17:14; 20:10.