1-2. (a) Kouma nou sitiasion li parey kouma sitiasion bann Zwif ki ti retourn Zerizalem? (b) Sit sertin difikilte ki bann Zwif ti gagne. (Get lankadre “ Lepok Aze, Zakari, ek Esdras.”)

 ESKI parfwa to trakase pou seki pou arive demin? Kitfwa to’nn perdi to travay, ek to trakase parski to pa kone kouma to pou fer pou donn to fami seki zot bizin. Kitfwa to trakase pou sekirite to fami akoz bann problem politik ki ena dan to pei, persekision, ouswa parski bann dimounn opoz ar zot dan predikasion. Eski to pe fer fas ar sa bann problem-la? Si wi, sa pou ankouraz twa kan to pou trouve kouma Zeova ti ed bann Izraelit ki ti bizin fer fas ar mem sitiasion.

² Bann Zwif ki ti ne dan Babilonn ti bizin ena enn lafwa for pou retourn Zerizalem. Zot ti bizin kit zoli lavi ki zot ti ena dan Babilonn, pou al dan enn pei ki zot pa ti konn ditou. Kan zot ti ariv Zerizalem, bien vit zot ti koumans gagn difikilte pou pran swin zot fami. Anplis, ti ena bann problem dan Lanpir Pers, ek zot ti osi gagn lopozision ar bann pep ki ti pe res otour zot. Akoz sa, sertin ti trouv sa difisil pou fer konstriksion tanp vinn zot priorite. Selman, an 520 A.N.L. b Zeova ti avoy de profet, Aze ek Zakari, pou ankouraz lepep pou fer zot maximum pou Zeova. (Aze 1:1; Zaka. 1:1) Ek kouma nou pou trouve sa lartik-la, bann lankourazman ki sa de profet-la ti donn lepep ti bien efikas. Me selman, apepre 50 an plitar, bann Zwif ti bizin regagn lankourazman. Akoz sa, Esdras, enn exper lalwa, ti sorti Babilonn ek ti al Zerizalem pou ankouraz  lepep pou zot met Zeova an premie dan zot lavi.—Esdr. 7:​1, 6.

3. Ki kestion nou pou examine dan sa lartik-la? (Proverb 22:19)

³ Bann mesaz Aze ek Zakari ti ed pep Zeova dan lepase pou zot kontign fer Li konfians malgre bann difikilte ki zot ti gagne. Sa bann mesaz-la kapav ed nou osi pou kontign fer Zeova konfians dan nou bann difikilte. (Lir Proverb 22:19.) Amezir ki nou examinn mesaz Aze ek Zakari, ek osi lexanp Esdras, nou pou reponn sa bann kestion-la: Ki difikilte bann Zwif ki ti retourn Zerizalem ti gagne? Kan nou gagn bann difikilte, kifer nou bizin kontign fer Zeova pas an premie dan nou lavi? Ek kouma nou kapav ena plis konfians an Zeova kan nou gagn bann difikilte?

4-5. Kifer bann Zwif ti dekouraze?

⁴ Kan bann Zwif ti retourn Zerizalem, zot ti ena boukou travay pou fer. Deswit kouma zot ti arive, zot ti rekonstrir lotel Zeova, ek zot ti poz fondasion tanp. (Esdr. 3:​1-3, 10) Selman, zot ti ena telman boukou problem ki zot ti dekouraze. Kifer? Parski anplis rekonstriksion tanp, zot ti bizin aranz zot lakaz, plante, ek nouri zot fami. (Esdr. 2:​68, 70) Zot ti bizin osi fer fas ar lopozision zot bann lennmi, ki ti pe maniganse pou aret konstriksion tanp.—Esdr. 4:​1-5.

⁵ Zerizalem ti form parti dan Lanpir Pers. Akoz sa, zot ti bizin osi fer fas ar bann problem ekonomik ek politik. Apre lamor Lerwa Siris an 530 A.N.L., lerwa ki ti dirize apre li, Kanbiz, ti koumans enn kanpagn militer kont Lezip. Kan zot ti pe al Lezip, bann solda ti rod manze, delo, ek enn plas pou reste ar bann Izraelit, ek sa ti rann lavi bann Izraelit pli dir. Kan Darius I^e, prosin lerwa apre Kanbiz, ti koumans dirize, ti ena boukou lager ek divizion dan Lanpir Pers. Tousala ti fer bann Zwif trakase parski zot pa ti kone kouma zot pou fer pou donn zot fami seki zot bizin. Akoz sa, sertin Zwif ti panse ki sa pa ti bon moman pou rekonstrir tanp Zeova.—Aze 1:2.

6. Dapre Zakari 4:​6, 7, ki lot difikilte bann Zwif ti gagne, ek kouma Zakari ti rasir zot?

⁶ Lir Zakari 4:​6, 7. Apart bann problem ekonomik ek politik, bann Zwif ti bizin osi fer fas ar persekision. An 522 A.N.L., zot bann lennmi ti reisi konvink gouvernman Pers pou aret travay rekonstriksion tanp. Me Zakari ti rasir bann Zwif ki Zeova ti pou ed zot pou kontign zot travay malgre zot bann difikilte. An 520 A.N.L., Lerwa Darius ti permet zot rekoumans konstriksion tanp, ek li ti mem donn zot kas pou fer sa. Li ti osi donn lord bann gouverner lokal pou ed zot.—Esdr. 6:​1, 6-10.

7. Kan bann Zwif ti fer travay Zeova pas an premie dan zot lavi, ki benediksion zot ti gagne?

 ⁷ Zeova ti servi Aze ek Zakari pou dir lepep ki Li ti pou soutenir zot si zot ti donn priorite rekonstriksion tanp. (Aze 1:​8, 13, 14; Zaka. 1:​3, 16) Lerla, lepep ti regagn lafors ek zot ti rekoumans konstriksion tanp an 520 A.N.L. ek zot ti terminn li dan mwins ki sink an. Parski bann Zwif ti fer travay Zeova pas an premie dan zot lavi malgre zot bann difikilte, Zeova ti soutenir zot ek Li ti donn zot seki zot ti bizin. Li ti osi ed zot pou zot res pros ar Li. Gras-a sa, lepep ti pe servi Zeova dan lazwa.—Esdr. 6:​14-16, 22.

8. Kouma Aze 2:4 kapav ed nou pou kontign fer volonte Zeova pas an premie dan nou lavi? (Get not.)

⁸ Gran soufrans bien pre! Alor, li bien inportan ki nou rapel ki nou bizin obeir lord pou pres bon nouvel. (Mark 13:10) Selman, akoz bann problem ekonomik, ouswa lopozision ki nou gagne kan nou prese, nou kapav trouv sa difisil pou kontign fer nou maximum dan predikasion. Ki kitsoz kapav ed nou pou met Rwayom Bondie an premie dan nou lavi? Nou pou reisi fer sa si nou sir ki “Zeova, Sef bann larme,” c Li avek nou. Li pou soutenir nou si nou kontign fer so Rwayom pas avan nou bann lobzektif personel. Ek si nou fer sa, nou pa bizin per nanye.—Lir Aze 2:4.

9-10. Kouma enn koup inn trouv Matie 6:33 realize?

⁹ Anou get lexanp Oleg ek Irina, d enn koup ki servi kouma pionie. Apre ki zot ti demenaze pou al ede dan enn lasanble kot ti bizin led, zot ti perdi zot travay akoz bann problem ekonomik ki ena dan pei. Mem si pandan enn an zot pa ti ena enn travay fix, zot ti touletan trouv lame Zeova dan zot lavi, ek parfwa bann frer ek ser ti ed zot. Kouma zot ti fer fas ar sa difikilte-la? Oleg, ki o-koumansman ti bien strese, dir: “Nou’nn res bien okipe dan predikasion ek sa inn ed nou pou res konsantre lor seki pli inportan dan nou lavi.” Mem si Oleg ek so madam ti kontign rod travay, zot ti res bien okipe dan predikasion.

¹⁰ Enn zour, kan zot ti retourn lakaz apre predikasion, zot ti aprann ki enn zot kamarad ti fer 160 kilomet pou amenn de sak komision pou zot. Oleg  dir: “Sa zour-la, ankor enn fwa nou’nn trouve ki kantite Zeova gagn nou traka, ek kouma bann frer ek ser osi gagn nou traka. Nou sir ki, dan ninport ki sitiasion nou ete, Zeova zame pa bliye so serviter.”—Mat. 6:33.

11. Ki nou pou gagne si nou fer volonte Zeova pas an premie dan nou lavi?

¹¹ Zeova anvi ki predikasion vinn enn priorite pou nou. Kouma nou ti trouve dan  paragraf 7, Aze ti ankouraz lepep pou rekoumans konstriksion tanp. Ek si zot ti fer sa, Zeova ti promet ki Li ti “pou beni zot.” (Aze 2:​18, 19) Nou osi, nou kapav sir ki Zeova pou beni nou bann zefor si nou fer so volonte pas an premie dan nou lavi.

12. Kifer Esdras ek bann lezot Zwif ti bizin ena enn lafwa for?

¹² An 468 A.N.L., Esdras ek enn deziem group Zwif ki ti kit Babilonn, ti ariv Zerizalem. Zot ti bizin ena enn lafwa bien for pou fer sa vwayaz-la. Kifer? Parski zot ti bizin pas par bann semin bien danzere. Anplis, lerwa ti donn zot enn kantite larzan ek lor pou tanp Zeova ek bann voler ti kapav atak zot. (Esdr. 7:​12-16; 8:31) Kan zot ti rant Zerizalem osi zot pa ti an sekirite, parski miray ek laport Zerizalem pa ti ankor aranze, ek bien tigit dimounn ti pe res dan lavil-la. Kouma lexanp Esdras kapav ed nou pou ena plis konfians an Zeova?

13. Ki kitsoz ti ed Esdras pou ena plis konfians an Zeova? (Get not.)

¹³ Esdras ti trouve kouma Zeova ti soutenir so pep dan bann difikilte. Plizir lane avan, an 484 A.N.L., Esdras kitfwa ti dan Babilonn kan Lerwa Asieris ti donn lord pou touy bann Zwif ki ti dan Lanpir Pers. (Est. 3:​7, 13-15) Esdras ek tou bann Zwif ti an danze! Kan zot ti aprann sa, zot ti telman trakase ki zot ti aret manze, zot ti plore, ek zot ti priye Zeova pou ki Li ed zot. (Est. 4:3) Sey mazine seki Esdras ek bann lezot Zwif ti resanti kan zot bann lennmi ti mor dan zot plas! (Est. 9:​1, 2) Sa sitiasion-la ti prepar Esdras pou bann lezot difikilte ki li ti pou gagne plitar. Sa ti fer li ena plis konfians an Zeova. Li ti sir ki Zeova ena kapasite pou protez So pep. e

14. Ki leson enn ser inn aprann?

¹⁴ Kan nou trouve kouma Zeova pran nou swin kan nou dan difikilte, sa fer nou ena plis konfians ki Li pou pran nou swin dan lavenir. Anou get lexanp Anastasia, enn ser ki res dan les Lerop. Li ti kit so travay pou li kapav gard so netralite. Li dir: “Premie fwa dan mo lavi mo pa ti ena kas.” Me apre sa, li dir: “Mo ti priye Zeova ek mo ti trouve kouma Li ti pran mwa swin. Si enn zour mo bizin kit mo travay ankor, mo pa pou per, parski si mo Papa Zeova pran mwa swin azordi, Li pou pran mwa swin demin osi.”

15. Ki kitsoz ti ed Esdras pou kontign ena konfians an Zeova? (Esdras 7:​27, 28)

¹⁵ Esdras ti trouve kouma Zeova ti ed li personelman. Kan Esdras ti reflesi komie fwa Zeova ti pran li swin dan lepase, sa ti ed li pou kontign ena konfians an Zeova. Esdras ti servi lexpresion “Zeova mo Bondie ti avek  mwa.” (Lir Esdras 7:​27, 28.) Dan liv ki li’nn ekrir, sis fwa Esdras servi sa lexpresion-la.—Esdr. 7:​6, 9; 8:​18, 22, 31.

16. Kouma nou kapav trouve ki Zeova avek nou? (Get zimaz osi.)

¹⁶ Zeova kapav ed nou kan nou dan enn sitiasion difisil. Par exanp, kan nou bizin demann nou patron konze pou ki nou kapav asiste lasanble, ouswa kan nou bizin demann li pou sanz nou program travay pou ki nou kapav asiste tou nou bann renion, nou donn Zeova lokazion pou montre ki Li avek nou. Kitfwa nou pou etone ar repons ki nou patron pou donn nou, ek sa pou fer nou ena plis konfians an Zeova.

17. Kouma Esdras ti montre ki li ti ena limilite? (Get zimaz lor kouvertir.)

¹⁷ Avek limilite Esdras ti priye Zeova pou gagn So led. Sak fwa ki li ti trakase akoz so bann responsabilite, Esdras ti priye Zeova avek limilite. (Esdr. 8:​21-23; 9:​3-5) Parski Esdras ti kont lor Zeova, sa ti motiv lezot pou soutenir li ek pou imit so lafwa. (Esdr. 10:​1-4) Kan nou trakase akoz bann kitsoz ki nou bizin, ouswa akoz sekirite nou fami, nou bizin priye Zeova ek fer Li konfians.

18. Ki kitsoz kapav ed nou pou ena plis konfians an Zeova?

¹⁸ Nou pou ena plis konfians an Zeova, si avek limilite nou demann Li so led ek nou aksepte led nou bann frer ek ser. Erika, enn ser ki ena trwa zanfan, ti kontign ena konfians an Zeova mem kan li ti gagn bann gran leprev. Enn deryer lot, so zanfan ki pa ti ankor ne ek so mari ki li ti bien kontan ti mor. Kan li pans tou seki’nn ariv li, li dir: “To pa kone dan ki fason Zeova pou ed twa. Li kapav ed twa dan bann fason ki to pa atann. Mo’nn trouve ki Zeova inn servi mo bann kamarad pou reponn boukou mo bann lapriyer. Zot inn bien ankouraz mwa par seki zot inn dir ek seki zot inn fer. Mo’nn konpran ki si mo ouver mo leker ar mo bann kamarad, li pou pli fasil pou zot ed mwa.”

19-20. Ki nou kapav aprann ar bann Zwif ki pa ti kapav retourn Zerizalem?

¹⁹ Nou kapav aprann enn zoli leson osi ar bann Zwif ki pa ti kapav retourn Zerizalem. Sertin parmi zot pa ti kapav retourne akoz zot sitiasion familial, ouswa  parski zot ti vie ouswa malad. Kanmem sa, zot ti soutenir bann ki ti pe retourne, ek zot ti fer bann kontribision pou tanp. (Esdr. 1:​5, 6) Apepre 19 an apre ki premie group Zwif ti retourn Zerizalem, bann ki ti res Babilonn ti ankor pe avoy bann kontribision dan Zerizalem.—Zaka. 6:10.

²⁰ Kitfwa sertin parmi nou anvi fer plis pou servi Zeova. Malerezman, zot sitiasion pa permet zot. Selman, nou kapav sir ki Zeova trouv tou bann zefor ki nou fer, ek sa fer Li plezir. Kouma nou konn sa? Dan lepok Zakari, Zeova ti demann li pou fer enn kouronn ar lor ek larzan, ki bann Zwif dan Babilonn ti avoye. (Zaka. 6:11) Sa gran kouronn-la ti bizin fer bann Zwif dan Zerizalem rapel kontribision ki bann Zwif dan Babilonn ti avoye. (Zaka. 6:14) Nou kapav sir ki Zeova zame pa pou bliye bann zefor ki nou fer pou servi Li malgre nou bann difikilte!—Ebre 6:10.

21. Ninport ki arive dan lavenir, ki kitsoz pou ed nou pou ena plis konfians an Zeova?

²¹ Nou pe viv dan bann dernie zour, alor nou kapav sir ki nou pou gagn bann difikilte. Ek plis letan pase, sa pou vinn pli pir! (2 Tim. 3:​1, 13) Me selman, fode pa nou trakase plis ki bizin. Rapel bann parol ki Zeova ti dir so pep dan lepok Aze. Li ti dir: “Mo avek zot . . . Pa per.” (Aze 2:​4, 5) Nou osi nou kapav sir ki Zeova pou avek nou, tanki nou fer nou maximum pou fer so volonte. Alor, anou reflesi lor seki nou’nn aprann dan mesaz Aze ek Zakari ek lor lexanp Esdras. Lerla, nou pou ena plis konfians an Zeova, ninport ki arive dan lavenir.