Pli boukou frer ek ser ti pe prese, alor zot ti bizin plis piblikasion. Bann frer dan Betel Brooklyn ti pe inprim bann magazinn, me zot ti ankor pe depann lor bann linprimri pou inprim bann liv. Selman, pandan plizir mwa, konpagni-la pa ti pe reisi inprim ase liv pou ki bann frer ek ser servi dan predikasion. Lerla, Frer Rutherford ti demann Robert Martin, frer ki ti an sarz linprimri dan Betel, si nou ti kapav inprim nou bann liv noumem.

Frer Martin ti dir: “Se enn bon lide sa, savedir ki nou pou bizin ouver enn linprimri ki inprim bann liv.” Bann frer ti lwe enn lanplasman dan Brooklyn, nimero 18 Concord Street, ek zot ti gagn bann lekipman ki zot ti bizin.

Me pa tou dimounn ti kontan ki bann frer inprim zot prop liv. Prezidan enn konpagni ki ti pe inprim bann liv pou nou, ti vizit nou nouvo linprimri. Li ti dir: “Zot ena bann bon lekipman pou inprim zot bann liv, me personn parmi zot pa kone kouma pou servi sa. Dan sis mwa, zot pou fini kas tou sa bann lekipman-la.”

Frer Martin dir: “Sa ti kapav vre. Me nou ti kone ki Zeova ti pou ed nou, ek se seki Li ti fer.” Bien vit, nouvo linprimri-la ti pe inprim 2,000 liv par zour.

Bann serviter Zeova pa ti zis koumans inprim zot bann liv, zot ti osi koumans servi enn nouvo metod pou partaz bon nouvel: Zot ti fer bann diskour lor radio. Enn Dimans tanto, le 26 Fevriye 1922, Frer Rutherford ti koz lor radio pou premie fwa. Li ti fer diskour “Bann Milyon Dimounn Ki Pe Viv Asterla Zame Pa Pou Mor” lor radio  KOG dan Los Angeles, Californie, dan Letazini.

Anviron 25,000 dimounn ti ekout sa diskour-la. Sertin parmi zot ti avoy bann let pou remersie Frer Rutherford. Willard Ashford, ki res Santa Ana, dan Californie, ti avoy enn parmi sa bann let-la. Li ti felisit Frer Rutherford pou sa diskour “bien interesan-la.” Li ti dir osi: “Ena trwa dimounn ki malad kot mwa ek zot pa ti pou kapav sorti dan lakaz pou ekout sa diskour-la, mem si ou ti vinn fer li dan landrwa.”

Dan bann semenn apre, finn ena pli boukou diskour lor radio. Lafin lane, Latour Degard ti dir ki ti ena “omwin 300,000 dimounn ki ti tann bon nouvel par radio.”

Bann Etidian Labib ti gagn boukou let pou remersie zot, ek sa ti ankouraz zot pou konstrir zot prop stasion radio. Zot ti fer sa lor enn terin dan Staten Island, ki pa tro lwin ar Betel Brooklyn. Pandan plizir lane apre, bann Etidian Labib ti servi stasion radio WBBR pou fer bann dimounn dan plizir landrwa konn laverite.

Latour Degard 15 Zin 1922 ti dir ki ti pou ena enn lasanble depi le 5 ziska le 13 Septam, dan Cedar Point, Ohio. Bann Etidian Labib ti bien kontan kan zot ti ariv Cedar Point.

Dan diskour ki li ti fer pou akeyir bann ki ti vinn lasanble, Frer Rutherford ti dir: “Mo sir ki Lesegner pou . . . beni sa lasanble-la ek ki Li pou ed nou pou fer pli gran travay predikasion ki finn ena lor later.” Dan sa lasanble-la, plizir fwa bann frer ki ti fer diskour, ti ankouraz bann frer ek ser pou al prese.

Vandredi le 8 Septam, ti ena apepre 8,000 dimounn dan lasal lasanble, ek zot tou ti pe atann diskour ki Frer Rutherford ti pou fer. Zot ti pe atann ki Frer Rutherford explik zot seki vedir “ADV,” parski ti ena sa lor zot linvitasion. Kan zot ti pe asize, sertin ti remark enn gran bandrol lao lestrad. Arthur Claus, ti sorti depi Tulsa, Oklahoma, dan Letazini, pou asiste sa lasanble-la. Li ti gagn enn bon plas kot li ti kapav tann bien  bann diskour. Sa lepok-la, pa ti ankor ena bann anpli pou ogmant son.

Pou ki personn pa deranz lezot pandan diskour Frer Rutherford, prezidan lasanble ti anonse ki personn pa ti pou kapav rant dan lasal apre ki diskour inn koumanse. Ver 9:30 gramatin, Frer Rutherford ti koumans so diskour ek li ti dir bann parol Zezi ki trouv dan Matie 4:17: “Rwayom Bondie pe aprose.” Kan li ti explike kouma bann dimounn ti pou tann koz lor sa Rwayom-la, li ti dir: “Zezi limem ti dir ki, dan lepok so prezans, li ti pou fer enn rekolt, kot li ti pou rasanble bann dimounn ki fidel ek vre.”

Frer Claus ti pe asiz dan lasal prinsipal, ek li ti dir: ‘Tou dimounn ti pe ekout sak mo ki Frer Rutherford ti pe dir.’ Me enn sel kout, Arthur pa ti santi li bien ek li ti bizin kit lasal. Li ti bien tris kan li ti kit lasal, parski li ti kone ki li pa ti pou kapav re-rantre apre.

De-trwa minit apre, Arthur ti koumans santi li bien. Li dir ki, kan li ti pe marse pou retourn ver lasal, li ti tann tou dimounn tap lame. Sa ti rann li bien zwaye! Li ti dir ar limem ki, si li ti bizin mont lor twa pou ekout lafin sa zoli diskour-la, li pa ti pou ezite pou fer li! Frer Claus ti ena 23 an sa lepok-la, ek li ti reisi trouv enn sime pou mont lao lor twa. Bann linpos ti ouver, ek Arthur dir ki, plis li ti pe koste ar bann linpos-la, plis li ti pe tann bien diskour-la.

Me Arthur pa ti tousel. Sertin parmi so bann kamarad ti deza lor twa batiman-la. Enn parmi zot, Frank Johnson, ti galoupe pou vinn get li, ek ti demann li, “Eski to ena enn ti kanif?”

Arthur ti reponn: “Wi, mo ena.”

Frank ti dir li: “Nou ti pe priye pou ki nou trouv enn kikenn ki ena enn kanif. Eski to trouv sa gro roulo-la? Se enn bandrol ki’nn  atase. Ekout bien Ziz-la. a Kan li pou dir, ‘ek zot bizin proklam, proklam,’ koup sa kat lakord-la.”

Arthur ti ena so kanif dan so lame, ek li ek bann lezot frer ti pe atann ki Frer Rutherford dir sa bann parol-la pou ki zot larg bandrol-la. Bien vit, Frer Rutherford ti ariv parti pli inportan dan so diskour. Avek boukou lazwa, li ti kriye: “Zot bizin fidel ek vinn bann vre Temwin nou Segner. Kontign andire ziska ki fos relizion detrir net. Anons mesaz-la partou. Lemond bizin kone ki Zeova Limem Bondie ek ki Zezi Kris limem Lerwa bann lerwa ek Segner bann segner. Samem zour pli inportan dan listwar. Gete, Lerwa pe regne! Zot ena responsabilite pou anons sa tou dimounn. Alor, proklam, proklam, proklam Lerwa ek so Rwayom!”

Arthur ti rakonte ki li ek bann lezot frer ti koup bann lakord ek bandrol-la ti ouver fasilman. An-akor avek bann let “ADV,” lor bandrol-la ti ekrir: “Proklam Lerwa ek Rwayom.” “ADV” se enn abreviasion mo angle ‘advertise’ ki vedir ‘prese’ ouswa ‘proklame.’

Lasanble dan Cedar Point ti ed bann frer pou konsantre lor travay pli inportan setadir pres lor Rwayom Bondie. Bann dimounn ki ti ena lespri volonter ti bien kontan pou partisip dan sa travay-la. Enn kolporter (ki aster-la nou apel enn pionie) ki res Oklahoma, dan Letazini, ti ekrir: “Nou ti pres dan enn landrwa kot boukou dimounn ti travay dan bann minn sarbon ek zot ti bien pov.” Li ti dir ki, souvan kan bann dimounn ti tann mesaz ki ena dan magazinn L’Âge d’Or, “zot ti plore.” Li ti dir osi: “Se vremem enn benediksion pou rekonfort zot.”

Sa bann Etidian Labib-la ti konpran linportans bann parol Zezi ki trouv dan Lik 10:2: “Rannman boukou dan karo me zouvrie tigit.” Lafin lane, zot ti ankor plis motive pou pres bon nouvel lor Rwayom Bondie partou lor later.