1, 2. (a) Kouma Izai 60:22 pe realize dan lepok lafin? (b) Azordi ki bezwin ena parmi bann serviter Zeova ki lor later?

 “SEKI tipti pou vinn enn milye ek seki tigit pou vinn enn nasion for.” (Izai 60:22) Sa bann parol-la pe realize asterla dan lepok lafin. Ofet, an 2015, ti ena 8,220,105 serviter Zeova ki ti pres bon nouvel lor Rwayom Bondie partou lor later! Bondie ti koz lor lakrwasman so pep kan Li ti dir: “Mwa, Zeova, mo pou akseler sa dan so ler.” Alor, amezir ki letan pe pase, nou tou nou pou ena pli boukou travay pou fer. Eski depi asterla mem nou pe fer tou seki nou kapav pou prese ek ansegn lezot bonn nouvel? Boukou frer ek ser deza pionie permanan ouswa pionie tanporer. Sertin finn demenaze pou al prese dan enn lot landrwa, ek lezot pe travay dir pou konstrir bann Lasal.

² Sak lane, apepre 2,000 nouvo kongregasion pe forme. Dan sa bann kongregasion-la, bizin bann ansien ek bann asistan ministeryel. Sak lane, plizir santenn asistan ministeryel bizin travay pou vinn ansien ek plizir santenn lezot frer bizin travay pou vinn asistan ministeryel. Li kler  ki ena “boukou pou fer dan travay nou Segner,” ek pa zis pou bann frer, me pou bann ser osi.​—1 Korintien 15:58, NW.

3, 4. Pou twa, ki savedir progrese lor plan spiritiel?

³ Lir 1 Timote 3:1, NW. Lapot Pol ti felisit bann frer ki ti “ena dezir” pou vinn bann sirveyan. Pou ki enn kikenn reisi gagn enn kitsoz ki lwin, li pou bizin fer bann gran zefor ek kitfwa avoy so lame pli lwin posib pou ki li reisi gagn sa kitsoz-la. Asterla, mazinn enn frer ki pe anvi kalifie li pou vinn enn asistan ministeryel. Li konpran ki li bizin fer zefor pou amelior so bann kalite antan ki Kretien. Ek apre sa, kan li pe servi kouma asistan ministeryel, li kontign travay dir pou kalifie li pou vinn enn ansien.

⁴ Sertin frer ek ser pe fer bann sanzman dan zot lavi parski zot anvi fer plis dan zot servis pou Zeova. Par exanp, kitfwa zot anvi fer pionie, travay dan Béthel, ouswa ede dan konstriksion bann Lasal. Anou gete kouma Labib kapav ed nou tou pou kontign fer bann progre.

5. Kouma bann zenn kapav servi zot lafors dan zot servis pou Zeova?

⁵ Bann zenn kapav fer boukou dan zot servis pou Zeova parski zot ena lafors ek enn bon lasante. (Lir Proverb 20:29. a) Sertin parmi bann zenn frer dan Béthel ede pou inprim ek relie bann liv ek bann Labib. Boukou zenn frer ek ser pe konstrir ouswa ede pou repar bann Lasal. Sertin port zot volonter pou ede kan ena bann katastrof natirel. Ek boukou zenn pionie aprann enn lot lang ouswa vwayaze pou al pres bonn nouvel dan enn lot pei.

6-8. (a) Kouma enn zenn ti sanz so fason panse lor so servis pou Bondie, ek ki finn arive apre? (b) Kouma nou kapav “goute ek gete ki Zeova Li bon”?

⁶ Nou kontan Zeova ek nou anvi fer nou maximum pou Li. Me, kitfwa nou kapav ena mem santiman ki enn frer ki apel Aaron. Li ti anvi trouv lazwa dan servis Zeova, me li pa ti ere. Mem si depi tipti Aaron ti asiste bann renion ek ti al predikasion, li dir: “Mo ti trouv bann renion ek predikasion kouma enn routinn.” Alor, ki li ti fer?

⁷ Aaron ti fer zefor pou lir Labib regilierman, pou prepar so bann renion ek pou reponn pandan bann renion. Li ti osi koumans priye pli souvan. Tou sa bann zefor-la finn ed li pou progrese lor plan spiritiel. Li’nn aprann konn Zeova pli bien ek so lamour pou Zeova finn ogmante. Finalman, Aaron ti pli ere. Li ti fer pionie, li ti ed lezot kan ti ena bann katastrof natirel, ek li ti al prese dan enn lot pei. Asterla li enn ansien ek li pe servi dan Béthel. Ki li panse lor so lavi? Aaron dir: “Mo’nn ‘goute ek gete ki Zeova Li bon.’ Mo santi ki mo ena enn det anver Zeova  telman Li’nn beni mwa. Sa pous mwa pou fer plis dan mo servis pou Li, ek sa fer mwa gagn pli boukou benediksion ankor.”

⁸ Enn ekrivin Psom ti dir: “Goute ek gete ki Zeova Li bon.” Li ti dir osi: “bann ki rod Zeova pa pou mank nanye seki bon.” (Lir Psom 34:8-10, NW.) Wi, kan nou fer nou maximum pou Zeova, nou vremem resanti enn gran lazwa parski nou kone ki nou pe fer Li plezir. Ek parey kouma Zeova inn promet, Li pou pran nou swin.

9, 10. Kifer li inportan ki nou “kontign atann”?

⁹ Kitfwa nou anvi fer plis dan nou servis pou Zeova. Me ki nou pou fer si depi lontan nou pe atann pou gagn enn sertin privilez dan kongregasion ouswa atann ki nou sitiasion sanze? Dan sa bann ka-la nou bizin ena pasians. (Mika 7:7) Ek mem si Zeova kapav permet ki sa sitiasion-la kontigne, nou kapav sir ki Li pou touletan soutenir nou. Nou kapav aprann ar lexanp Abraam. Zeova ti promet li ki li ti pou gagn enn garson, me li finn bizin atann boukou lane avan ki Izaak ne. Pandan tou sa bann lane-la, Abraam ti ena pasians ek zame li pa ti perdi lafwa an Zeova.​—Zenez 15:3, 4; 21:5; Ebre 6:12-15.

¹⁰ Biensir, li pa fasil pou atann. (Proverb 13:12) Me si nou kontign reflesi lor nou sitiasion ek lor nou bann santiman, nou pou bien dekouraze. Okontrer, nou kapav servi sa letan-la pou amelior bann kalite ki nou pou bizin pou kapav asim sertin responsabilite dan kongregasion.

11. Ki bann kalite spiritiel nou bizin fer zefor pou devlope, ek kifer zot inportan?

¹¹ Devlop bann kalite ek bann kapasite ki to bizin. Kan to lir Labib ek medit lor seki to lir, to kapav aprann pou ena sazes, pou reflesi ek rezonn bien, ek pou pran bann bon desizion. An realite, bann frer bizin sa bann kalite-la ek sa bann kapasite-la pou pran swin bann frer ek ser dan kongregasion. (Proverb 1:1-4; Tit 1:7-9) Kan nou etidie Labib, nou kapav trouve ki Zeova resanti dan diferan sitiasion. Lerla, sak zour, nou kapav servi seki nou aprann pou pran bann desizion ki fer Zeova plezir. Par exanp, nou pou kone kouma pou tret lezot, kouma pou bien servi larzan, ek kouma pou swazir bann divertisman ek linz.

12. Ki bann manb kongregasion bizin fer pou montre ki kapav fer zot konfians?

¹² Travay dir pou asim ninport ki responsabilite ki to gagne. Kan pep Bondie ti rekonstrir tanp, Neemia ti bizin bann zom pou asim diferan responsabilite. Li ti swazir bann zom ki ti ena  enn bon repitasion. Li ti kone ki sa bann zom-la ti kontan Bondie ek ki zot ti pou travay dir dan ninport ki responsabilite ki zot ti pou gagne. (Neemia 7:2; 13:12, 13) Dan mem fason azordi, bann ki fidel ek ki travay dir, zot pou ena enn bon repitasion ek zot pou kapav gagn plis responsabilite. (1 Korintien 4:2) Alor, ki nou enn frer ouswa enn ser, nou bizin touletan fer maximum zefor dan ninport ki travay ki nou gagne.​—Lir 1 Timote 5:25.

13. Kouma to kapav swiv lexanp Zozef si lezot mal azir anver twa?

¹³ Kont lor Zeova. Ki to kapav fer si lezot mal azir anver twa? Kitfwa to kapav explik zot seki to resanti. Me si to kontign defann tomem ek insiste ar zot pou dir ki to ena rezon, to riske agrav sitiasion-la. Nou kapav aprann boukou ar lexanp Zozef. So bann frer ti mal azir anver li. Bann dimounn ti koz manti lor li, ek li ti al dan prizon pou enn kitsoz ki li pa ti fer. Me Zozef ti kont lor Zeova. Li ti reflesi lor bann promes Zeova, ek li ti res fidel. (Psom 105:19) Dan sa bann moman difisil-la, li ti devlop boukou zoli kalite ki finn ed li pou asim bann responsabilite inportan ki li ti gagne plitar. (Zenez 41:37-44; 45:4-8) Si lezot finn mal azir anver twa, priye Zeova pou gagn sazes. Li pou ed twa pou gard to kalm ek pou montre twa bon anver lezot kan to koz bien ar zot.​—Lir 1 Pier 5:10, NW.

14, 15. (a) Kifer nou bizin “kontign vey bien” lor nou fason prese? (b) Kouma nou kapav adapte nou kan bann sitiasion sanze? (Get zimaz dan koumansman lartik ek lankadre “ Eski To Dispoze pou Esey Diferan Metod?”)

¹⁴ Pol ti demann Timote pou kontign amelior fason ki li ti explik bann Lekritir. Pol ti dir li: “Kontign vey bien lor tomem ek lor to lansegnman.” (1 Timote 4:13, 16, NW.) Timote ti deza pe prese depi boukou lane. Alor kifer li ti bizin amelior so fason ansegne? Timote ti kone ki bann dimounn ek bann sitiasion sanze. Li ti anvi ki bann dimounn kontign ekout li, alor li finn bizin kontign amelior ek sanz fason ki li ti ansegne. Nou osi kan nou prese azordi, nou bizin kontign amelior nou fason ansegne.

¹⁵ Dan sertin landrwa, nou remarke ki boukou dimounn pa la kan nou prese lakaz-lakaz. Dan lezot landrwa, sertin dimounn kapav kot zot, me nou pa kapav al devan zot laport, kitfwa parski nou pa gagn drwa rant dan batiman kot zot reste. Si dan to teritwar osi li koumsa, eski to kapav esey lezot metod pou zwenn bann dimounn?

16. Kouma predikasion dan bann plas piblik kapav enn metod efikas?

¹⁶ Boukou frer ek ser kontan prese dan bann plas piblik. Par exanp, zot prese lagar trin, lagar bis, dan lafwar, ek dan bann zardin pou kapav zwenn bann dimounn. Enn Temwin kapav koumans enn konversasion avek enn dimounn lor enn nouvel ki tou dimounn pe koze. Ouswa Temwin-la kapav fer enn konpliman dimounn-la lor so zanfan ouswa poz li enn kestion konsernan so travay. Si dimounn-la paret pe bien kontan konversasion-la, proklamater-la kapav mansionn enn pwin ki ena dan Labib ek demann li ki li panse lor la. An zeneral, bann dimounn anvi konn plis lor Labib.

17, 18. (a) Kouma to kapav gagn plis lasirans pou pres dan bann plas piblik? (b) Kifer fason panse David kan li’nn loue Zeova, ena enn gran valer pou twa dan to minister?

¹⁷ Kitfwa to trouv sa difisil pou koumans enn konversasion lor semin avek enn dimounn ki to pa kone. Eddie, enn pionie dan lavil New York, ti ena sa santiman-la. Me li ti trouv enn kitsoz ki’nn ed li pou ena plis lasirans. Li dir: “Pandan nou ladorasion an fami, mo madam ek mwa, nou ti fer bann resers. Nou ti rod bann fason pou sirmont bann obzeksion ek kouma pou reponn bann dimounn apre ki nou’nn konn zot lopinion. Nou ti osi demann lezot Temwin bann sigzesion.” Asterla Eddie kontan pres dan bann plas piblik.

¹⁸ Kan nou pli zwaye dan nou minister ek nou amelior fason ki nou pres bonn nouvel avek bann dimounn, lezot pou trouv bann progre ki nou pe fer. (Lir 1 Timote 4:15.) Ek nou kapav mem ed enn dimounn pou vinn enn serviter Zeova. David ti dir: “Touletan mo pou loue Zeova; so louanz pou touletan res dan mo labous. Mo pou fier akoz Zeova; bann ki inb pou tande ek pou dan lazwa.”​—Psom 34:1, 2, NW.

19. Kifer enn fidel serviter Zeova bizin ere, mem si so sitiasion pa permet li fer boukou?

¹⁹ David ti dir osi: “O Zeova, tou to bann travay pou donn twa loner, ek  to bann fidel pou loue twa. Zot pou proklam laglwar to rwayote ek zot pou koz lor to pwisans, zot pou fer bann dimounn konn to bann aksion bien pwisan ek bote extraordiner to rwayote.” (Psom 145:10-12, NW.) Tou bann ki kontan Zeova ek ki fidel anver Li ena enn gran dezir pou koz lor Li ar lezot. Me ki to pou fer si akoz maladi ouswa lavieyes, to pa kapav pas kantite letan ki to ti pou anvi pou pres lakaz-lakaz? Touletan rapel ki to pe loue Zeova a-sak fwa ki to koz lor Li ar bann dimounn ki toutotour twa, par exanp ar bann ners ouswa bann dokter. Si to dan prizon akoz to lafwa, to ankor touzour kapav koz lor Zeova ar lezot, ek sa fer so leker kontan. (Proverb 27:11) Zeova bien kontan osi si to pe servi Li mem si lezot manb to fami pa pe servi Li. (1 Pier 3:1-4) Mem dan bann sitiasion bien difisil, to kapav loue Zeova, kontign vinn pli pros ar Li, ek fer bann progre lor plan spiritiel.

20, 21. Si to donn plis dan lorganizasion Zeova, kouma to kapav vinn enn benediksion pou lezot?

²⁰ Pena dout ki Zeova pou beni twa si to kontign vinn pli pros ar Li ek si to fer maximum zefor pou servi Li. Kitfwa kan to fer bann sanzman dan to program ouswa dan to fason viv, to pou gagn plis lokazion pou ed bann dimounn aprann konn bann zoli promes Bondie. To pou osi kapav ed to bann frer ankor plis. Ek mazine ki kantite to bann frer ek ser pou kontan twa kan zot pou trouv twa pe travay dir dan kongregasion!

²¹ Ninport komie letan nou pe servi Zeova, nou tou nou kapav kontign vinn pli pros ar Li ek kontign progrese lor plan spiritiel. Dan prosin lartik, nou pou gete kouma nou kapav ed lezot pou progrese dan sa domenn-la.