1. Ki kitsoz boukou zenn Kretien inn fini fer?

 SAK lane, plizir milye zenn Kretien pran batem. Eski to’nn fini pran batem? Si wi, to kapav sir ki to bann frer ek ser dan lasanble bien kontan pou twa, ek Zeova osi bien kontan. (Prov. 27:11) Reflesi lor bann kitsoz ki to’nn fini fer. Par exanp, kitfwa to’nn etidie Labib pandan plizir lane, ek gras-a to letid, to’nn sir ki Labib li Parol Bondie. Me pli inportan, to’nn aprann konn sa Kikenn ki’nn fer ekrir Labib la, ek to lamour pou Li inn grandi. To lamour pou Zeova inn vinn telman for, ki sa finn pous twa pou vwe to lavi ar Li ek pou pran batem. Se meyer desizion ki to’nn kapav pran!

2. Ki nou pou examine dan sa lartik-la?

 ² Avan to batem, kitfwa to’nn gagn boukou leprev, ek sa pa ti fasil pou to res fidel anver Zeova. Ek plis letan pase, to kapav sir ki to pou gagn lezot difikilte ankor. Satan pou esey fer twa aret kontan ek servi Zeova. (Efe. 4:14) Me fode pa to les sa arive! Ki to bizin fer pou to res fidel anver Zeova ek ki to tini promes ki to’nn fer pou servi Li? To bizin kontign fer bann progre spiritiel. (Ebre 6:1) Kouma to kapav fer sa?

3. Ki kitsoz tou bann Kretien bizin fer apre zot batem?

³ Kan nou fini pran batem, nou tou nou bizin swiv konsey ki lapot Pol ti donn bann Kretien lavil Efez. Li ti ankouraz zot pou vinn bann Kretien ki “adilt.” (Efe. 4:13) Savedir ki zot ti bizin kontign fer bann progre. Pol ti konpar bann progre ki enn Kretien fer, ar fason ki enn zanfan grandi. Kan enn zanfan ne, so bann paran bien fier ek zot bien kontan li. Selman, li pa pou res enn zanfan touletan. Avek letan, li pou aret reflesi ek azir “kouma enn  zanfan.” (1 Kor. 13:11) Li parey pou bann Kretien. Apre so batem, enn Kretien bizin kontign fer bann progre spiritiel. Anou get sertin kitsoz ki kapav ed nou pou progrese.

4. Ki kalite kapav ed nou pou fer bann progre spiritiel? Explike. (Filipien 1:9)

⁴ Fer to lamour pou Zeova vinn pli for. To deza kontan Zeova, me to kapav fer to lamour pou Li vinn pli for ankor. Kouma? Dan Filipien 1:9 (Lir.) lapot Pol explik nou enn fason pou fer sa. Pol ti priye Zeova pou ki lamour bann Filipien “kontigne grandi boukou.” Alor, nou lamour pou Zeova kapav vinn pli for. Pou nou fer sa, nou bizin ena “vre konesans ek konpreansion” laverite. Plis nou aprann konn Zeova, plis nou pou kontan Li, ek plis nou pou kontan so personalite ek fason ki Li azir. Lerla, nou pou anvi fer nou maximum pou fer Li plezir, ek nou pa pou fer nanye ki pou desevwar Li. Nou pou fer nou best pou konpran seki Li anvi nou fer, ek nou pou fer sa bann kitsoz-la.

5-6. Kouma nou kapav fer nou lamour pou Zeova vinn pli for? Explike.

⁵ Zezi inn imit so Papa Zeova dan enn fason parfe. Alor, kan nou aprann konn Zezi pli bien, nou lamour pou Zeova pou vinn pli for. (Ebre 1:3) Meyer fason pou nou aprann konn Zezi se kan nou etidie bann Levanzil. Si to pankor pran labitid pou lir Labib toulezour, kitfwa to kapav koumanse asterla ek lir bann Levanzil. Kan to pe lir lor lavi Zezi, remark bann zoli kalite ki li ena. Par exanp, li ti bien abordab ek li ti kontan pran bann ti zanfan dan so lebra. (Mark 10:13-16) Zezi ti amikal ek zanti, ek so bann disip pa ti per pou dir li seki zot ti resanti. (Mat. 16:22) Zezi ti imit so Papa, alor nou kapav sir ki Zeova osi bien abordab. Kan nou priye Zeova, nou kapav dir Li seki nou resanti. Nou kapav sir ki Li pa pou ziz nou, parski Li kontan nou ek Li gagn nou traka.​—1 Pier 5:7.

⁶ Zezi ti ena konpasion pou bann dimounn. Lapot Matie ti dir: “Ler Zezi get lafoul, li ti ranpli ar konpasion pou zot, parski zot ti pe plegne e zot ti abat kouma bann mouton ki pena berze.” (Mat. 9:36) Ki Zeova resanti pou bann dimounn? Zezi ti dir: “Zot Papa ki dan lesiel, li pa anvi ki okenn sa bann ti dimoun la perdi.” (Mat. 18:14) Sa bann parol-la bien rekonfort nou, parski zot montre nou ki Zeova bien kontan nou. Alor, plis nou aprann konn Zezi, plis nou lamour pou Zeova pou vinn pli for.

7. Ki bienfe to kapav gagne kan to pas letan avek bann Kretien ki spiritiel?

⁷ To kapav osi aprann pou montre lamour anver lezot ek pou vinn enn Kretien ki pli spiritiel, kan to pas letan avek to bann frer ek ser dan lasanble ek kan to aprann konn zot. Kan to avek zot, remarke ki kantite zot zwaye. Zot inn desid pou servi Zeova ek zot pa regret zot desizion. To kapav demann zot pou partaz avek twa bann zoli lexperyans ki zot inn fer dan zot servis pou Zeova. Kan to ena enn desizion inportan pou pran, to kapav rod konsey avek zot. Labib dir: “Kan ena boukou konseye, ena sikse.”​—Prov. 11:14.

8. Ki to kapav fer si to ena bann dout konsernan bann lansegnman ki ena dan Labib?

⁸ Sirmont to bann dout. Kouma nou’nn trouve dan  paragraf 2, Satan pou esey  anpes twa fer bann progre spiritiel. Enn fason ki li kapav fer sa, se kan li fer twa ena bann dout konsernan sertin lansegnman ki ena dan Labib. Par exanp, kitfwa sertin dimounn pou esey konvink twa ki Bondie pa’nn kree nou, me ki nou’nn existe gras-a levolision. Kitfwa to pa ti pans lor la kan to ti enn zanfan, me azordi kitfwa to bann profeser pe ansegn sa dan lekol. Anplis, seki zot dir lor levolision kapav paret lozik ek ena sans. Me kitfwa zame zot pa finn esey kone si vremem ena enn Kreater. Alor, pa bliye prinsip ki trouv dan Proverb 18:17, ki dir: “Devan lakour, premie dimounn ki rakont so zistwar paret ena rezon, ziska ki lot dimounn-la vini ek poz li bann kestion.” Olie ki to krwar tou seki to aprann dan lekol, to bizin pran letan pou etidie seki Labib dir lor la. To kapav osi fer bann resers dan nou bann piblikasion. Koz ar bann frer ek ser ki ti krwar dan levolision avan ki zot vinn dan laverite, ek demann zot ki kitsoz finn konvink zot ki ena enn Kreater. Bann konversasion koumsa kapav ed twa pou gagn bann prev ki ena enn Kreater ki kontan nou.

9. Ki nou kapav aprann ar lexanp Melissa?

⁹ Enn ser, ki apel Melissa, inn fer bann resers lor kreasion dan nou bann piblikasion, ek sa finn ed li pou sirmont so bann dout. b Li dir: “Dan lekol, fason ki bann profeser koz lor levolision kapav fer bann dimounn krwar ki sa li vre. O-koumansman, mo pa ti anvi fer bann resers lor levolision parski mo ti per tansion teori levolision vre. Me mo ti kone ki Zeova anvi ki so bann serviter fer bann resers pou sirmont tou zot bann dout. Alor, mo ti lir liv Y a-t-il un Créateur qui se soucie de vous ? ek bann brosir La vie a-t-elle été créée ? ek Cinq questions à se poser sur l’origine de la vie. Se samem ki mo ti bizin! Mo sagrin ki mo pa’nn fer sa pli boner.”

10-11. Ki kitsoz kapav ed twa pou to pa tom dan piez limoralite sexiel? (1 Tesalonisien 4:3, 4)

¹⁰ Rezet limoralite. Pandan ladolesans, bann dezir sexiel kapav bien for, ek lezot kapav met presion lor twa pou ki to gagn bann relasion sexiel. Satan anvi ki to tom dan piez limoralite sexiel. Alor, ki  kitsoz kapav ed twa pou to pa tom dan sa piez-la? (Lir 1 Tesalonisien 4:3, 4.) Kan to priye Zeova, dir Li seki to resanti, ek demann Li pou donn twa lafors pou reziste kont tantasion. (Mat. 6:13) Pa bliye ki Zeova anvi ed twa ek ki Li pa pou ziz twa. (Ps. 103:13, 14) Labib osi kapav ed twa. Melissa, ki nou’nn mansione avan, ti fer boukou zefor pou rezet bann panse imoral. Li dir: “Mo ti lir Labib toulezour, ek sa ti donn mwa lafors pou mo kontign lit kont mo bann move dezir. Labib ti ed mwa pou rapel ki mo’nn donn Zeova mo lavi ek ki mo anvi servi Li.”​—Ps. 119:9.

¹¹ Fode pa to esey rezoud to bann problem par tomem. Koz avek to bann paran ek dir zot ki bann difikilte to pe gagne. Kitfwa to kapav trouv sa difisil pou koz lor sa bann size-la avek zot, me li inportan ki to fer li. Melissa dir: “Mo ti priye Zeova pou mo gagn kouraz ek apre mo ti koz ar mo papa. Lerla, mo ti santi mwa extra soulaze, ek mo ti kone ki mo ti fer leker Zeova kontan.”

12. Kouma to kapav pran bann bon desizion?

¹² Swiv bann prinsip Labib. Plis to grandi, plis to bann paran pou les twa pran to prop desizion. Selman, to ankor mank boukou lexperyans. Alor, kouma to kapav evit fer bann erer ki pou ena enn lefe lor to lamitie avek Zeova? (Prov. 22:3) Enn ser, ki apel Kari, explike seki li’nn fer pou li pran bann pli bon desizion. Li ti konpran ki bann Kretien ki spiritiel, pa bizin enn lalwa pou tou ti kitsoz. Li dir: “Mo ti bizin konpran bann prinsip Labib, pa zis swiv bann lalwa.” Kan to lir Labib, to kapav demann tomem: ‘Ki sa bann verse-la aprann mwa lor Zeova so fason panse? Dan sa bann verse-la, eski ena bann prinsip ki kapav ed mwa pou fer seki drwat? Si mo fer sa, ki bienfe mo pou gagne?’ (Ps. 19:7; Iza. 48:17, 18) Kan nou lir Labib ek nou reflesi lor seki nou lir, li pou pli fasil pou nou pran bann desizion ki fer Zeova plezir. Plis to fer bann progre, plis to pou konpran Zeova so fason panse. Lerla, to pa pou bizin enn lalwa dan sak sitiasion pou to kone seki to bizin fer.

13. Kouma bann bon kamarad kapav ena enn linflians lor twa? (Proverb 13:20)

¹³ Swazir bann kamarad ki kontan Zeova. Si to swazir bien to bann kamarad, zot kapav ed twa pou vinn enn Kretien ki spiritiel. (Lir Proverb 13:20. c) Enn ser, ki apel Sara, ti perdi so lazwa pou servi Zeova. Me enn kitsoz ti ed li pou regagn so lazwa. Sara dir: “Dan sa moman-la, mo ti koumans gagn bann bon kamarad. Sak semenn, mo ti zwenn avek enn zenn ser pou nou etidie Latour Degard ansam. Enn lot kamarad ti ed mwa pou reponn dan renion. Gras-a bon linflians mo bann kamarad, letid personel ek lapriyer ti vinn bien inportan pou mwa. Mo ti rekoumans ena enn bon lamitie avek Zeova, ek mo ti regagn mo lazwa.”

14. Kouma Julien ti fer bann bon kamarad?

¹⁴ Kouma to kapav fer kamarad ar bann dimounn ki pou ena enn bon linflians lor twa? Julien, ki pe servi kouma ansien azordi, dir: “Kan mo ti pli zenn, mo ti fer kamarad ar bann frer ek ser avek ki mo ti pe prese. Sa bann kamarad-la ti bien aktif dan predikasion, ek zot ti ed mwa  pou gagn lazwa dan mo minister. Gras-a zot, mo ti fixe lobzektif pou servi Zeova aplintan. Mo ti realize osi ki, rezon pou kifer mo pa ti ena boukou bon kamarad, se parski mo ti fer kamarad zis ar bann ki ena mem laz ki mwa. Plitar, mo ti fer bann bon kamarad dan Betel. Zot lexanp inn ed mwa pou swazir bien mo bann divertisman, ek sa finn ed mwa pou vinn pli pros ar Zeova.”

15. Ki konsey Pol ti donn Timote? (2 Timote 2:20-22)

¹⁵ Me ki to bizin fer si to realize ki to ena enn kamarad dan lasanble ki kapav gat to lamitie avek Zeova? Lapot Pol ti kone ki sertin dimounn dan lasanble pa ti vremem spiritiel, ek li ti dir Timote res lwin ar zot. (Lir 2 Timote 2:20-22, NW. d) Nou lamitie avek Zeova ena boukou valer pou nou. Nou’nn fer boukou zefor pou ki nou ena enn bon lamitie avek Zeova. Alor, fode zame ki nou les nou bann kamarad kas sa lamitie-la.​—Ps. 26:4.

16. Ki kalite lobzektif to bizin swazir?

¹⁶ Fixe bann lobzektif ki itil. Swazir bann lobzektif ki pou fer to lafwa vinn pli for ek ki pou ed twa pou vinn enn Kretien ki spiritiel. (Efe. 3:16) Par exanp, to kapav lir ek etidie Labib pli regilierman. (Ps. 1:2, 3) Ouswa to kapav priye pli souvan, ek fer bann lapriyer ki pli profon. To kapav osi swazir pli bien to bann divertisman, ek servi bien to letan. (Efe. 5:15, 16) Kan Zeova trouve ki to pe fer boukou zefor pou fer bann progre spiritiel, sa pou fer Li plezir.

17. Ki bienfe to gagne kan to ed lezot?

¹⁷ To pou vinn enn pli bon Kretien kan to ed lezot. Zezi ti dir: “Ena plis benediksion kan done, ki kan resevwar.” (Zist. 20:35) To pou gagn boukou lazwa si to servi to letan ek to lenerzi pou ed lezot.  Par exanp, to kapav fixe lobzektif pou ed bann frer ek ser ki aze ek ki malad. To kapav ed zot pou fer zot shoping, ouswa ed zot pou servi zot bann laparey elektronik. Si to enn frer, to kapav fixe lobzektif pou servi kouma asistan ministeryel, pou ki to kapav ed to bann frer ek ser pli bien. (Fil. 2:4) To kapav osi montre lamour pou bann dimounn ki pa form parti dan lasanble kan to pres bon nouvel avek zot. (Mat. 9:36, 37) Ek si to kapav, fixe lobzektif pou servi Zeova aplintan.

18. Kouma servis aplintan ed nou pou vinn pli pros ar Zeova?

¹⁸ Kan to servi Zeova aplintan, sa kapav donn twa boukou posibilite, ek sa pou fer twa vinn pli pros ar Zeova. Si to enn pionie, to pou kapav fer Lekol pou Bann Evanzelizater Rwayom Bondie. To pou kapav servi dan Betel ouswa lor konstriksion. Enn zenn pionie, ki apel Kaitlyn, dir: “Apre mo batem, kan mo’nn pas letan dan predikasion avek bann frer ek ser ki spiritiel, sa finn ed mwa pou vinn pli pros ar Zeova. Zot lexanp inn motiv mwa pou etidie Labib an profonder ek pou amelior mo kapasite pou ansegne.”

19. Ki benediksion to pou gagne si to kontign fer bann progre spiritiel?

¹⁹ Plis to progrese, plis to pou gagn bann benediksion. To pa pou perdi to letan ek to zenes pou fer bann kitsoz ki pena valer. (1 Zan 2:17) To pa pou pran bann move desizion ki kapav fer twa soufer. Okontrer, to pou vremem ere ek to lavi pou ena enn sans. (Prov. 16:3) To bon lexanp pou ankouraz tou bann frer ek ser. (1 Tim. 4:12) Ek pli inportan, to pou anpe ek to pou ere, parski to pou ena enn bon lamitie avek Zeova, ek to kone ki to pe fer Li plezir.​—Prov. 23:15, 16.