1. Ki Zeova panse lor bann dimounn ki ena limilite? Explike.

 ZEOVA kontan bann dimounn ki ena limilite. Zis bann dimounn ki vremem ena limilite ki kapav vinn bann kamarad bien pros ar Zeova. Parkont, “dimounn ki ena lorgey, Li konn [zot] zis de lwin.” (Ps. 138:6, NW) Nou tou nou anvi fer Zeova plezir ek nou anvi ki Li vinn pros ar nou. Alor, nou ena bann bon rezon pou kiltiv limilite.

2. Ki nou pou examine dan sa lartik-la?

² Dan sa lartik-la, nou pou reponn sa trwa kestion-la: (1) Ki ete limilite? (2) Kifer nou bizin kiltiv sa kalite-la? (3) Kan eski nou kapav trouv sa difisil pou manifeste limilite? Nou pou trouve ki, kan nou kiltiv limilite sa fer leker Zeova kontan ek sa fer nou gagn bann bienfe.​—Prov. 27:11; Iza. 48:17.

3. Ki ete limilite?

³ Enn dimounn ki ena limilite pa panse ki li pli inportan ki lezot. Li pa fier ek li pena lorgey. Labib montre ki enn kikenn ki ena limilite li rekonet ki Zeova boukou pli gran ki li ek li ena enn bon fason panse lor lezot. Li rekonet ki lezot pli bon ki li dan sertin domenn.​—Fil. 2:3, 4.

4-5. Kifer nou kapav dir ki vre limilite pa depann lor nou laparans?

⁴ Sertin dimounn donn linpresion zot ena limilite. Kitfwa zot trankil-trankil. Ouswa kitfwa zot ena bann bon manier ek montre respe anver lezot akoz zot kiltir ek fason ki zot inn grandi. Me dan fon zotmem, kitfwa zot bann dimounn bien  fier. Selman, pa zordi pa dime, zot pou montre seki zot ete vremem.​—Lik 6:45.

⁵ Parkont, ena bann dimounn ki paret ena konfians an zotmem ek ki dir seki zot panse. Me, sa pa vedir ki zot ena lorgey. (Zan 1:46, 47) Selman, bann dimounn ki ena konfians an zotmem bizin fer atansion ki zot pa kont lor zotmem. Me ki nou ena konfians an noumem ouswa non, nou tou nou bizin fer tou seki nou kapav pou vremem ena limilite.

6. Dapre 1 Korintien 15:10, ki nou kapav aprann ar lexanp lapot Pol?

⁶ Anou get lexanp lapot Pol. Zeova ti servi li pou form bann nouvo lasanble dan plizir lavil. Kitfwa li ti mem akonpli pli boukou kitsoz dan predikasion ki bann lezot zapot Zezi. Pourtan, Pol pa ti panse ki li pli inportan ki so bann frer. Avek limilite li ti dir: “Mo pli tipti parmi bann zapot, ek mo pa dign ki apel mwa zapot, akoz mo finn persekit lasanble Bondie.” (1 Kor. 15:9, NW) Pol ti kone ki si li ti ena enn bon relasion avek Zeova, se pa parski li ti spesial ouswa parski li ti fer bann gran kitsoz, me se gras-a Bondie so faver ki personn pa merite. (Lir 1 Korintien 15:10, NW. b) Pol ti enn bon lexanp limilite. Kan li ti ekrir bann Kretien ki dan Korint, li pa ti fer vantar pou dir ki li pli bon ki lezot mem si sertin dan sa lasanble-la ti kritik li.​—2 Kor. 10:10, NW.

7. Kouma enn frer ki boukou dimounn kone inn montre ki li ena limilite?

⁷ Boukou serviter Zeova inn santi zot ankouraze par biografi Frer Karl Klein, ki ti enn manb Komite Santral. Dan so biografi, avek limilite ek dan enn fason onet, Frer Klein ti koz lor so bann febles ek lor bann problem ki  li ti gagne dan so lavi. Par exanp, an 1922 li ti esey pres lakaz-lakaz pou premie fwa. Sa ti telman difisil pou li ki pandan de-z-an, li pa ti refer sa ankor. Plitar kan li ti pe servi dan Betel, li ti res ankoler avek enn frer pandan enn bon bout letan parski sa frer-la ti donn li enn konsey. Li ti osi fer enn depresion bien grav me apre li ti regagn so lasante. Malgre sa, Frer Klein ti ena osi bann gran privilez. Li ti enn kikenn ki boukou dimounn ti kone. Alor esey mazine ki kantite limilite li ti bizin ena pou ki li’nn reisi koz lor so bann febles! Boukou frer ek ser ena bann bon souvenir lor Frer Klein ek kan zot pans lor bann parol fran ki li’nn ekrir dan so biografi sa tous zot boukou. c

8. Kouma 1 Pier 5:6 ed nou pou konpran ki kan nou ena limilite sa fer Zeova plezir?

⁸ Rezon pli inportan kifer nou kiltiv limilite se parski sa fer Zeova plezir. Lapot Pier ti dir sa dan enn fason bien kler. (Lir 1 Pier 5:6.) Konsernan seki Pier ti dir, liv « Viens, suis-moi » fer sa komanter-la: “Lorgey, li kouma enn pwazon. So bann lefe kapav bien danzere. Enn kikenn kapav ena bann gran-gran kapasite, me si li ena lorgey, Bondie pa pou servi li. Parkont, mem enn kikenn ki pena bann gran kapasite kapav vremem itil pou Zeova, si li ena limilite. Zeova pou bien kontan pou rekonpans twa si to ena limilite.” d Vremem, pli bon kitsoz ki nou kapav fer se fer Zeova kontan!​—Prov. 23:15.

9. Kifer lezot dimounn pou anvi fer kamarad ar nou si nou ena limilite?

⁹ Kan nou kiltiv limilite nou pa zis fer Zeova plezir, me nou osi nou gagn boukou bienfe. Si nou ena limilite, bann lezot dimounn pou anvi fer kamarad ar nou. Kifer nou dir sa? Esey reflesi ar ki kalite dimounn to kontan pas letan. (Mat. 7:12) An zeneral, nou pa kontan pas letan avek bann dimounn ki touletan fer kouma zot zot anvi ek ki refiz ekout lide lezot. Parkont, nou kontan kan nou avek nou bann frer ek ser ki fer zefor pou met zot dan plas lezot, ki ena lafeksion pou zot bann frer, ki ena enn gran konpasion, ek ki ena limilite. (1 Pier 3:8, NW) Nou anvi vinn pros ar bann dimounn koumsa. Ek si nou ena limilite, zot osi zot pou kontan pou vinn pros ar nou.

10. Kouma limilite rann nou lavi pli fasil?

¹⁰ Anplis, limilite rann nou lavi pli fasil. Selman, nou bizin realist. Parfwa nou pou fer bann lexperyans ouswa nou pou trouv bann  kitsoz ki pou paret inzis. Lerwa Salomon, ki ti ena boukou sazes, ti dir: “Mo finn trouv bann serviter pe mont seval me bann prins pe marse kouma bann serviter.” (Ekle. 10:7) Parfwa, bann dimounn ki ena bann gran kapasite pa gagn loner ki zot merite. Ek bann ki ena mwins kapasite parfwa gagn plis loner. Selman, Salomon ti rekonet ki li pli bon kan nou aksepte lavi kouma li ete olie ki nou dekouraze akoz bann kitsoz ki arive. (Ekle. 6:9) Si nou ena limilite, li pou pli fasil pou nou aksepte lavi kouma li ete, olie ki nou atann ki lavi deroul kouma nou nou anvi.

11. Kifer nou bizin ena limilite kan nou gagn konsey?

¹¹ Sak zour nou gagn boukou lokazion pou manifeste limilite. Anou get de trwa lexanp. Kan nou gagn bann konsey. Nou bizin rapel ki si enn kikenn pe fer zefor pou donn nou enn konsey, li posib ki nou erer pli grav ki seki nou ti pe panse. Kan nou gagn enn konsey, kitfwa nou premie reaksion se pou rezet sa konsey-la. Kitfwa nou pou kritik sa dimounn-la ouswa fason ki li’nn donn sa konsey-la. Me si nou ena limilite, nou pou fer zefor pou ena enn bon latitid kan nou gagn konsey.

12. Dapre Proverb 27:5, 6, kifer nou bizin ena rekonesans anver enn dimounn ki’nn donn nou enn konsey? Donn enn lexanp.

¹² Enn dimounn ki ena limilite kontan kan li gagn konsey. Anou pran enn lexanp. Fer koumadir to dan renion. Apre ki to’nn fini koz ar plizir frer ek ser, enn parmi zot amenn twa dan enn kwin pou dir twa ki ena manze dan to ledan. Pena dout ki to pou santi twa anbarase. Me eski to pa pou kontan ki sa frer-la ouswa sa ser-la inn dir twa sa? Avredir, kitfwa to ti pou kontan si enn dimounn ti dir twa sa depi bien avan! Li parey, kan enn frer ouswa enn ser vinn donn nou enn konsey, avek limilite nou bizin ena rekonesans anver li. Nou pou konsider sa dimounn-la kouma nou kamarad pa kouma nou lennmi.​—Lir Proverb 27:5, 6; e Gal. 4:16.

13. Kouma nou kapav manifeste limilite kan lezot gagn bann responsabilite?

¹³ Kan lezot gagn bann responsabilite. Enn ansien ki apel Jason dir: “Kan mo trouv lezot gagn bann responsabilite, parfwa mo demann momem kifer pa finn swazir mwa.” Eski to finn deza ena sa santiman-la? Se enn bon kitsoz si nou anvi fer plis pou Zeova. (1 Tim. 3:1, NW) Selman, nou bizin fer  atansion lor seki nou panse. Si nou pa fer atansion, nou kapav les lorgey grandi dan nou leker. Par exanp, enn frer kapav koumans panse ki se li ki plis kalifie pou asim enn sertenn responsabilite dan lasanble. Ouswa enn ser kapav dir: ‘Mo misie ti pou kapav asim sa responsabilite-la pli bien ki sa frer-la!’ Selman, si nou vremem ena limilite, nou pa pou pans koumsa.

14. Ki nou aprann ar fason ki Moiz ti reazir kan lezot ti gagn bann responsabilite?

¹⁴ Nou kapav aprann boukou ar fason ki Moiz ti reazir kan lezot ti gagn bann responsabilite. Moiz ti pe gid nasion Izrael ek li ti kontan sa responsabilite-la. Me kouma Moiz ti reazir kan Zeova ti donn lezot dimounn kapasite pou fer sertin travay ki Moiz ti pe fer? Li pa ti zalou. (Nonb 11:24-29) Li ti ena limilite ek li ti les lezot ed li pou ziz lepep. (Ex. 18:13-24) Gras-a sa, bann Izraelit pa ti pou bizin atann lontan pou pas devan bann ziz parski ti ena pli boukou dimounn ki ti pe fer sa travay-la. Sa montre nou ki Moiz ti plis anvi ed lezot ki gagn boukou responsabilite. Li vremem enn bon lexanp pou nou! Pa bliye ki si nou vremem anvi itil pou Zeova, seki pli inportan se ena limilite, pa bann gran kapasite. Mem si “Zeova, so pozision bien ot . . . Li trouv dimounn ki ena limilite.”​—Ps. 138:6, NW.

15. Ar ki nouvo sitiasion sertin inn bizin fer fas?

¹⁵ Kan nou sitiasion sanze. Sa bann dernie lane-la, boukou frer ek ser ki pe servi Zeova depi plizir lane inn gagn bann nouvo afektasion. Par exanp, an 2014, lorganizasion ti demann bann sirveyan distrik ek zot madam pou al servi dan lezot form servis aplintan. Sa mem lane-la, lorganizasion ti dir ki kan enn frer ariv 70 an li ti pou nepli servi antan ki responsab sirkonskripsion. Ek bann frer ki ena 80 an ouswa plis ti pou nepli servi antan ki kordinater komite bann ansien dan zot lasanble.  Pa tro lontan, lorganizasion ti osi demann boukou Betelit pou al servi kouma pionie. Lezot serviter aplintan inn bizin aret zot servis akoz bann problem lasante, bann responsabilite familial, ouswa akoz bann lezot rezon.

16. Kouma nou bann frer ek ser inn manifeste limilite kan zot inn adapte zot dan zot nouvo afektasion?

¹⁶ Sa bann sanzman-la pa ti fasil pou sa bann frer ek ser-la. Li kler ki zot ti bien kontan zot ansien afektasion ek boukou parmi zot ti dan sa servis-la depi bien-bien lontan. Sertin frer ek ser koumadir ti pas par enn peryod “dey” pandan ki zot ti pe adapte ar zot nouvo afektasion. Me avek letan, zot inn reisi adapte. Kouma? Seki ti plis ed zot, se zot lamour pou Zeova. Zot ti kone ki zot ti vwe zot lavi ar Bondie, pa ar enn tit ouswa enn afektasion. (Kol. 3:23) Avek limilite, zot kontan ki zot pe kontign servi Zeova dan ninport ki afektasion. Zot “met tou zot traka lor li,” parski zot kone ki Zeova pran zot swin.​—1 Pier 5:6, 7.

17. Kifer nou rekonesan ki Parol Bondie ankouraz nou pou kiltiv limilite?

¹⁷ Nou vremem rekonesan ki Parol Bondie ankouraz nou pou kiltiv limilite! Kan nou kiltiv sa zoli kalite-la, pa zis nou me lezot osi gagn bann bienfe. Gras-a limilite, li pli fasil pou nou andir bann problem ki nou gagne dan lavi. Ek seki pli inportan, nou vinn pli pros ar nou Papa ki dan lesiel. Nou vremem kontan kan nou kone ki mem si Zeova “Gran ek dan enn pozision bien ot,” Li kontan so bann serviter ki ena limilite ek zot ena valer pou Li!​—Iza. 57:15.