1-2. Ki lien ena ant Ekleziast 11:6 ek travay predikasion?

 DAN sertin pei, kan bann dimounn tann koz lor bonn nouvel, zot anvi konn plis. Se koumadir samem ki zot ti pe atann! Parkont, dan lezot pei, boukou dimounn pa tro interese ni ar Bondie, ni ar Labib. Kouma bann dimounn konsider bonn nouvel dan to landrwa? Ninport kouma zot konsider bonn nouvel, Zeova anvi ki nou kontign prese ziska ki Li dir nou arete.

² Zeova inn fini deside kan nou pou aret prese. Lerla, “lafin pou vini.” (Mat. 24:14, 36) Me an-atandan, kouma nou kapav “pa les [nou] lame repoze,” b parey kouma nou trouve dan Ekleziast 11:6 (Lir. c)?

3. Ki nou pou examine dan sa lartik-la?

³ Dan lartik avan, nou ti trouv kat kitsoz ki nou bizin fer pou nou kapav pres bonn nouvel dan enn fason efikas. (Mat. 4:19) Dan sa lartik-la, nou pou trouv trwa fason kouma nou kapav kontign res bien motive pou prese, malgre ninport ki difikilte nou pe fer fas. Nou pou trouve kifer li inportan ki nou (1) res bien konsantre, (2) nou ena pasians, ek (3) nou gard enn lafwa for.

4. Kifer nou bizin res bien konsantre lor travay ki Zeova inn donn nou?

⁴ Zezi ti predir kouma bann dimounn ti pou ete ek bann levennman ki ti pou arive pandan bann dernie zour. Li ti kone ki sa bann kitsoz-la ti kapav anpes so bann disip pou res konsantre lor travay predikasion. Akoz sa, Li ti ankouraz zot pou “kontign veye.” (Mat. 24:42, NW) Dan lepok Noe, ti ena boukou kitsoz ki ti distrer bann dimounn ek anpes zot pran kont bann lavertisman Noe. Azordi osi parey, ena boukou kitsoz ki kapav distrer nou. (Mat. 24:37-39; 2 Pier 2:5) Se pou sa rezon-la ki nou bizin res bien konsantre lor travay ki Zeova inn donn nou.

5. Dapre Zistwar Bann Apot 1:6-8, ziska kotsa predikasion bonn nouvel pou prese?

⁵ Azordi, nou bien bizin res konsantre lor predikasion bon nouvel Rwayom Bondie. Zezi ti predir ki so bann disip ti pou kontign prese apre so lamor ek ki zot ti pou fer enn pli gran travay ki li. (Zan 14:12) Apre lamor Zezi, sertin parmi so bann disip ti retourn dan zot biznes lapes. Me apre so rezireksion, Zezi ti fer enn mirak ek ti ed sertin parmi so bann disip pou trap enn kantite pwason. Apre sa mirak-la, Zezi ti explik so bann disip ki predikasion ti pli inportan ki ninport ki travay. (Zan 21:15-17, NW) Avan ki li mont dan lesiel, Zezi ti dir so bann disip ki travay predikasion ki li ti koumanse dan Izrael ti pou fer dan lezot pei osi. (Lir Zistwar Bann Apot 1:6-8.) Plizir lane apre, dan enn vizion, Zezi ti montre lapot Zan seki ti pou arive pandan “zour Lesegner.” d Enn parmi bann kitsoz ki Zan ti trouve se enn vizion extraordiner kot enn anz ti pe diriz travay predikasion “Bonn Nouvel eternel . . . ar tou bann ki vivan lor later ek tou bann nasion, tribi, langaz, ek pep.”  (Rev. 1:10; 14:6) Azordi, li kler ki Zeova anvi ki nou partisip dan travay predikasion ki pe fer partou lor later, ziska ki Li dir nou ki nou nepli bizin prese.

6. Kouma nou kapav res bien konsantre lor travay predikasion bonn nouvel?

⁶ Nou pou kapav res konsantre lor travay predikasion si nou reflesi lor tou seki Zeova pe fer pou ed nou. Par exanp, Li pe donn nou enn gran kantite manze lor plan spiritiel atraver bann piblikasion inprime ek elektronik, bann lanrezistreman odio ek video, ek Program Televizion JW. Reflesi lor la: Lor nou sit Internet, ena bann piblikasion ki disponib dan plis ki 1,000 lang! (Mat. 24:45-47) Dan lemond, bann dimounn zot divize parski zot soutenir diferan parti politik, zot dan diferan relizion, ek osi parski sertin ris ek lezot pov. Me dan lorganizasion Zeova, ena plis ki wit milyon serviter Bondie ki form enn fami bann frer ek ser ki viv dan linite. Par exanp, Vandredi le 19 Avril 2019, tou bann Temwin Zeova dan lemond antie ti get enn video baze lor brosir “Anou Examinn Labib Toulezour.” Sa swar-la, enn lafoul 20,919,041 dimounn ti rasanble pou selebre Memoryal lamor Zezi. Kan nou reflesi lor loner ki nou ena pou trouv bann kitsoz extraordiner koumsa ek pou partisip ladan, sa motiv nou pou res bien konsantre lor travay predikasion bonn nouvel.

7. Kouma lexanp Zezi ed nou pou res bien konsantre?

⁷ Enn lot fason pou res bien konsantre lor travay predikasion se kan nou swiv lexanp Zezi. Zezi pa ti les nanye distrer li ek anpes li prese. (Zan 18:37) Kan Satan ti propoz pou donn li “tou bann rwayom lor later” ek zot laglwar, ek kan bann dimounn ti anvi fer li vinn lerwa, Zezi pa ti les li tante. (Mat. 4:8, 9; Zan 6:15) Li pa ti les bann kitsoz materyel inflians li, ek li pa ti per lopozision. (Lik 9:58; Zan 8:59) Kan nou lafwa pas par bann leprev, nou kapav res bien konsantre si nou mazinn konsey ki lapot Pol ti done. Li ti ankouraz bann Kretien pou swiv lexanp Zezi “pouki zot pa bes lebra ek dekouraze”!​—Ebre 12:3.

8. Ki ete pasians, ek kifer li inportan ki nou ena pasians azordi?

⁸ Pasians se kapasite pou res kalm ziska ki enn sitiasion sanze. Nou bizin ena pasians si nou pe atann ki enn sitiasion difisil arete, ouswa si depi lontan nou pe anvi ki enn bon kitsoz arive. Profet Abakuk ti anvi ki bann dimounn dan Zida aret azir dan enn fason violan. (Abak. 1:2) Bann disip Zezi ti anvi ki Rwayom Bondie “manifeste” ek liber zot ar bann Romin ki ti pe fer dominer ar zot. (Lik 19:11) Nou anvi ki Rwayom Bondie tir tou bann move dimounn ek etabli enn nouvo lemond kot ena zis bann dimounn ki obeir Bondie. (2 Pier 3:13) Selman, nou bizin ena pasians ek atann ki Zeova azir dan ler ki Li Li’nn deside. Anou gete kouma Zeova ansegn nou pou ena pasians.

9. Ki bann lexanp montre ki Zeova ena pasians?

⁹ Zeova Limem pli bon lexanp konsernan pasians. Li ti donn Noe ase letan pou aranz enn lars ek pou vinn “enn predikater lazistis.” (2 Pier 2:5; 1 Pier 3:20) Kan Zeova ti desid pou detrir bann move dimounn dan lavil Sodom ek Gomor, Abraam ki poz li plizir kestion konsernan sa desizion-la, ek Zeova ti ekout li. (Zen. 18:20-33) Pandan plizir siek, Zeova inn montre enn extra gran pasians anver nasion Izrael ki ti infidel. (Ne. 9:30, 31) Nou trouv pasians Zeova azordi osi parski Li pe donn tou bann ki anvi vinn so kamarad,  letan pou “repanti.” (2 Pier 3:9; Zan 6:44; 1 Tim. 2:3, 4) Lexanp ki Zeova inn donn nou ankouraz nou pou ena pasians pandan ki nou pe kontign prese ek ansegn bann dimounn. Zeova ansegn nou pasians osi atraver enn lexanp ki trouv dan so Parol, Labib.

10. Dan Zak 5:7, 8, ki leson sa fermie-la ansegn nou?

¹⁰ Lir Zak 5:7, 8. Lexanp sa fermie-la ouswa sa planter-la ansegn nou kouma pou ena pasians. Li vre ki ena sertin plant ki pous vit. Selman, laplipar plant pran plis letan pou grandi ek pou raport bann frwi. Dan Izrael, bann plant ti pran apepre sis mwa pou zot pare pou rekolt. Kan bann premie lapli lotonn ti koumans tonbe, bann planter ti sem bann lagrin, ek zot ti rekolte apre bann dernie lapli pandan printan. (Mark 4:28) Nou pou montre ki nou ena sazes si nou imit pasians ki bann planter ena. Selman, kitfwa sa pa pou fasil.

11. Kifer nou bizin ena pasians kan nou prese?

¹¹ Akoz linperfeksion, an zeneral, bann dimounn anvi trouv rezilta zot travay deswit. Selman, si nou anvi ki bann plant grandi ek donn bann frwi, nou bizin okip zot touletan. Nou bizin fouye, plante, tir bann move zerb, ek aroze. Dan mem fason, si nou anvi ki enn kikenn vinn enn disip Zezi, nou bizin fer boukou zefor. Sa pran letan pou ed bann etidian Labib pou zot aprann pou pa ziz lezot ek pou ena lamour. Si nou ena pasians, nou pa pou dekouraze kan bann dimounn pa anvi ekout nou. Ek mem kan sertin dimounn ekout nou, nou bizin kontign ena pasians. Nou pa kapav fors enn etidian Labib pou ena lafwa. Parfwa, mem bann disip Zezi ti pran letan pou konpran seki Zezi ti pe ansegn zot. (Zan 14:9) Ek pa bliye osi ki mem si se nou ki plante ek aroze, se Bondie ki fer pouse.​—1 Kor. 3:6.

12. Kouma nou kapav montre ki nou ena pasians kan nou pres ar bann manb nou fami ki pa Temwin?

 ¹² Nou kapav trouv sa difisil pou ena pasians kan nou bizin pres ar bann manb nou fami ki pa Temwin. Prinsip ki trouv dan Ekleziast 3:1, 7 kapav ed nou. Sa prinsip-la dir: “Ena . . . enn ler pou res trankil ek enn ler pou koze.” Nou bon kondwit kapav fer sertin manb nou fami anvi ekout nou mesaz. Kanmem sa, nou bizin touletan pre pou koz lor Zeova avek zot. (1 Pier 3:1, 2) Nou bizin prese ek ansegne avek zel, me nou bizin touletan ena pasians anver tou dimounn, mem anver bann manb nou fami.

13-14. Sit lexanp sertin serviter Zeova ki finn ena pasians ek ki nou kapav imite.

¹³ Nou kapav aprann kouma pou ena pasians gras-a lexanp bann fidel serviter Zeova dan lepase ek dan nou lepok. Abakuk ti anvi ki bann dimounn aret azir dan enn fason violan, me li ti montre ki li ti ena pasians kan li ti dir: “Mo pou kontign res dan plas kot mo bizin veye.” (Abak. 2:1) Lapot Pol ti dir ki li ti anvi “akonpli” so minister. Selman, avek pasians, li ti kontign “rann temwagnaz Bonn Nouvel.”​—Zist. 20:24.

¹⁴ Anou pran lexanp enn koup ki ti fer lekol Galaad ek ki ti al servi dan enn pei kot pena boukou Temwin Zeova ek kot laplipar dimounn pa Kretien. Laba, bien tigit dimounn ti anvi etidie Labib. Anplis, bann kamarad ki ti fer lekol Galaad ansam avek zot ek ki ti al servi dan lezot pei, ti rakont zot kouma zot ti ena boukou letid ki ti pe bien progrese. Mem si laplipar dimounn dan zot teritwar pa ti ekout zot, avek pasians, sa koup-la ti kontign prese. Apre ki zot ti pres wit-an dan sa teritwar-la, enn parmi zot bann letid ti pran batem ek sa ti rann zot bien zwaye. Ki leson nou aprann ar lexanp bann fidel serviter Zeova dan lepase ek dan nou lepok? Sa bann fidel serviter Zeova la ti kontign prese. Zot pa finn les zot lame repoze, ek Zeova finn rekonpans zot pou zot pasians. Anou “imit bann dimounn ki erit bann promes, gras-a lafwa ek pasians”!​—Ebre 6:10-12, NW.

15. Sit enn fason kouma nou kapav res bien motive pou prese.

¹⁵ Nou ena lafwa dan mesaz ki nou prese, alor nou anvi partaz li ar maximum dimounn posib. Nou ena konfians dan bann promes ki trouv dan Parol Bondie. (Ps. 119:42; Iza. 40:8) Nou pe trouv bann profesi Biblik realize dan nou lepok. Nou trouv bann dimounn sanz zot lavi kan zot koumans met an pratik bann prinsip Labib. Tousala montre nou ki bann dimounn bien bizin tann bonn nouvel.

16. Dapre Psom 46:1-3, kan nou ena lafwa an Zeova ek Zezi, kouma sa kapav motiv nou pou prese?

¹⁶ Nou ena osi lafwa an Zeova ki’nn donn nou sa mesaz-la pou prese, ek nou ena lafwa an Zezi, Lerwa ki Zeova inn etabli dan So Rwayom. (Zan 14:1) Ninport ki difikilte ki nou fer fas, Zeova pou touletan protez nou ek donn nou lafors. (Lir Psom 46:1-3.) Anplis, nou sir ki Zezi pe servi lotorite ek pouvwar ki so Papa inn donn li pou diriz travay predikasion depi lesiel.​—Mat. 28:18-20.

17. Sit enn lexanp ki montre kifer nou bizin kontign prese.

¹⁷ Lafwa fer nou ena plis konfians ki Zeova pou beni nou bann zefor, parfwa dan bann fason ki nou pa atann. (Ekle. 11:6) Par exanp, sak zour bann milye dimounn pas devan bann prezantwar ek bann latab kot nou met bann piblikasion.  Eski sa metod predikasion la efikas? Biensir! Nou Minister Novam 2014 ti rakonte ki enn etidian liniversite ti anvi ekrir enn konpozision lor bann Temwin Zeova. Li pa ti reisi trouv enn Lasal Renion. Me dan liniversite, li ti reisi trouv enn latab kot nou met nou bann piblikasion ek li ti gagn bann linformasion ki li ti bizin pou fer so konpozision. Finalman li’nn pran batem, ek zordi li pe servi kouma pionie permanan. Bann lexperyans koumsa ankouraz nou pou kontign prese, parski zot montre nou ki ankor ena bann dimounn ki bizin tann koz lor Rwayom Bondie.

18. Kifer nou kapav sir ki travay predikasion pou arete dan moman ki Zeova anvi?

¹⁸ Nou kapav sir ki travay predikasion pou arete dan bon moman. Get seki ti arive dan lepok Noe. Zeova inn montre ki Li touletan azir dan pli bon moman. Anviron 120 an alavans, Zeova ti fini deside kan Deliz ti pou koumanse. Plizir lane apre, Zeova ti donn Noe lord pou fer enn lars. Pandan anviron 40 ouswa 50 an avan Deliz, Noe ti kontign travay bien dir. Bann dimounn pa ti ekout li kan li ti pres bann lavertisman Zeova. Kanmem sa, Noe ti kontign prese ziska ki Zeova deside ki’nn ariv ler pou fer bann zanimo rant dan lars. Lerla, dan bon moman, “Zeova ti ferm laport.”​—Zen. 6:3; 7:1, 2, 16.

19. Ki bann benediksion nou pou gagne si nou pa les nou lame repoze?

¹⁹ Biento, Zeova pou fer nou kone ki nou nepli bizin pres bon nouvel Rwayom Bondie. Lerla, Li pou detrir lemond Satan ek fer enn nouvo lemond ki pou ranpli ar bann dimounn ki obeir Zeova. Me ziska ki sa moman-la arive, anou kontign imit lexanp Noe, Abakuk, ek bann lezot ki pa finn les zot lame repoze. Anou kontign res bien konsantre, ena pasians, ek kontign gard enn lafwa for an Zeova ek so bann promes.