Kan to lir to Labib, to prepar to bann renion, ek to fer to letid personel, sirman to deza ena enn lide bann kitsoz ki to pou examine. Selman, mem si to deza ena enn lide bann kitsoz ki to pou examine, sa pa vedir ki to pa kapav aprann bann nouvo kitsoz. Kouma to kapav fer zefor pou aprann bann nouvo kitsoz?

Priye pou gagn sazes. Demann Zeova so led pou to trouv ek to konpran seki Li pe ansegn twa aster-la. (Zak 1:5) Pa kontant twa ar seki to deza kone.—Prov. 3:5, 6.

Rekonet ek aksepte pouvwar ki Labib ena. “Parol Bondie, li vivan.” (Ebre 4:12) Alor, sak fwa ki to lir Labib, li kapav ansegn twa bann nouvo kitsoz ek ed twa dan diferan fason. Me pou ki sa arive, to bizin ena dezir pou aprann ek pou konpran seki Bondie pe ansegn twa.

Apresie tou seki Zeova pe ansegn twa. Bann manze spiritiel ki Zeova donn twa, zot kouma“enn gran repa.” (Iza. 25:6) Alor, apresie tou bann manze ki Li donn twa, mem bann manze ki to panse to pa pou kontan. Si to fer sa, to pou gagn bann bienfe, to pou les Zeova ed twa pou vinn enn pli bon dimounn, ek to pou kontan etidie.