1-2. (a) Kifer fode pa nou etone si gouvernman interdi nou laktivite? (b) Ki nou pou examine dan sa lartik-la?

 AN 2018, plis ki 223,000 proklamater ti viv dan bann teritwar kot nou laktivite ti interdi ouswa lor restriksion. Sa pa etonn nou. Kouma nou finn aprann dan lartik avan, bann vre Kretien kone ki zot pou gagn persekision. (2 Tim. 3:12, NW) Ninport kotsa nou reste, enn kout koumsa, san ki nou atann bann gouvernman kapav interdi nou ladorasion pou Zeova.

² Si dan to pei, gouvernman desid pou interdi nou ladorasion pou Zeova, kitfwa to kapav poz tomem bann kestion kouma: ‘Kan nou gagn persekision, eski savedir ki nou’nn perdi faver Bondie? Eski enn linterdiksion pou aret nou ladorasion pou Zeova pou touletan? Eski mo bizin al dan enn pei kot mo kapav ador Zeova an liberte?’ Dan sa lartik-la nou pou reponn sa bann kestion-la. Nou pou osi examine kouma nou kapav kontign ador Zeova mem si nou laktivite interdi, ek ki bann piez nou bizin evite.

3. Dapre 2 Korintien 11:23-27, ar ki persekision lapot Pol ti fer fas, ek ki nou aprann ar so lexanp?

³ Si enn gouvernman interdi nou ladorasion, kitfwa nou kapav panse ki Zeova pa pe beni nou. Me rapel bien ki, kan nou gagn persekision sa pa vedir ki nou’nn perdi faver Zeova.  Anou pran lexanp lapot Pol. Pena dout ki li ti ena faver Bondie. Li ti gagn privilez pou ekrir 14 let dan bann Lekritir Grek Kretien, ek li ti enn zapot pou bann nasion. Kanmem sa, li ti gagn bann gran persekision. (Lir 2 Korintien 11:23-27.) Lexanp lapot Pol montre nou ki Zeova permet ki so bann serviter fidel gagn persekision.

4. Kifer bann dimounn ena laenn pou nou?

⁴ Zezi ti explike kifer nou bizin atann ki nou pou gagn lopozision. Li ti dir ki bann dimounn pou ena laenn pou nou parski nou pa form parti dan lemond. (Zan 15:18, 19) Kan nou gagn persekision sa pa vedir ki nou pa pe gagn benediksion Zeova. Okontrer, sa montre ki nou pe fer seki drwat!

5. Eski bann sinp imin kapav fer nou aret servi Zeova? Explike.

⁵ Bann sinp imin pa kapav fer nou aret servi nou Bondie Tou-Pwisan, Zeova. Boukou finn eseye me zot pa finn reisi. Anou get seki ti arive pandan Deziem Lager Mondial. Sa lepok-la, dan boukou pei, bann gouvernman ti bien persekit pep Bondie. Laktivite bann Temwin Zeova pa ti interdi zis par bann Nazi dan l’Allemagne, me osi par bann gouvernman l’Australie, Canada, ek bann lezot pei. Me remarke seki ti arive. An 1939, kan lager ti koumanse, ti ena 72,475 proklamater dan lemond antie. Me bann rapor montre ki ver lafin lager an 1945, gras-a benediksion Zeova, ti ena 156,299 proklamater. Kantite proklamater ti’nn double!

6. Ki bann kitsoz pozitif kapav arive kan ena lopozision? Donn enn lexanp.

⁶ Olie ki bann lopozision fer nou per, sa kapav motiv nou pou servi Zeova ankor plis. Par exanp, enn koup ki ti ena enn zanfan ti viv dan enn pei kot gouvernman ti desid pou interdi nou ladorasion. Olie ki zot ti koumans per ek fer mwins pou Zeova, sa koup-la ti koumans fer pionie permanan. Ser-la ti mem kit so travay, ki ti pey bien. Frer-la ti dir ki sa linterdiksion-la ti fer bann dimounn poz boukou kestion lor bann Temwin Zeova. Gras-a sa, li ti trouv sa pli fasil pou koumans bann letid Labib. Sa linterdiksion-la ti ena enn bon lefe lor lezot osi. Enn ansien dan sa mem pei-la dir ki boukou parmi bann ki ti aret servi Zeova ti re-koumans asiste renion ek ti re-koumans prese.

7. (a) Ki nou aprann dan Levitik 26:36, 37? (b) Ki to pou fer pandan linterdiksion?

 ⁷ Kan nou bann lennmi interdi nou ladorasion, zot rod fer nou per pou nou aret servi Zeova. Kitfwa zot osi fann bann fos rimer, avoy bann ofisie pou fer lafouy dan nou lakaz, fors nou pou al devan lakour, ouswa mem met sertin parmi nou dan prizon. Zot atann ki nou pou gagn per parski zot inn reisi met sertin parmi nou dan prizon. Si nou koumans per zot ek per seki zot kapav fer nou, nou kapav arive ralanti ouswa mem aret nou servis pou Zeova. Nou pa ti pou kontan resanble bann dimounn ki’nn dekrir dan Levitik 26:36, 37. (Lir. b) Nou pa pou les laper fer nou ralanti ouswa aret nou servis pou Zeova. Nou ena foul konfians an Zeova ek nou pa pou panike. (Iza. 28:16) Nou priye Zeova pou ki Li gid nou. Nou Bondie pe soutenir nou, akoz sa nou kone ki mem bann gouvernman imin bien pwisan pa pou kapav fer nou aret servi nou Bondie.​—Ebre 13:6.

8-9. (a) Ki desizion sak Kretien bizin pran pou li ek so fami? (b) Ki pou ed enn kikenn pou pran enn bon desizion?

⁸ Si dan to pei gouvernman interdi nou ladorasion, kitfwa to kapav demann tomem si to bizin al dan enn lot pei kot to kapav servi Zeova an liberte. Se enn desizion personel ki personn pa kapav pran dan to plas. Avan ki enn kikenn pran enn desizion, li kapav etidie seki bann Kretien dan premie siek ti fer kan zot ti gagn persekision. Apre ki bann lennmi ti lapid Etienn, bann disip ti kit Zerizalem pou al dan Zide, Samari ek mem dan Fenisi, Sip ek Antios. (Mat. 10:23; Zist. 8:1, NW; 11:19) Enn kikenn kapav osi etidie seki Pol ti fer kan plitar ti ena enn lot persekision. Li ti desid pou res dan bann plas kot bann dimounn ti opoze ar predikasion mem si sa ti kapav danzere pou li. Li ti fer sa parski li ti anvi prese ek fortifie bann frer ki ti pe soufer akoz persekision dan sa bann landrwa-la.​—Zist. 14:19-23, NW.

⁹ Ki nou aprann ar sa bann lexanp-la? Sak sef fami bizin deside si li ek so fami pou al dan enn lot pei ouswa non. Me avan, li bizin priye ek reflesi bien lor sitiasion so fami ek bann lefe pozitif ouswa negatif ki sa kapav ena lor zot. Dan sa domenn-la, sak Kretien bizin “sarye so prop fardo.” (Gal. 6:5) Fode pa nou ziz lezot pou desizion ki zot pran.

10. Ki bann instriksion biro nasional ek bann ansien pou done?

¹⁰ Kouma to kapav kontign ador Zeova pandan linterdiksion? Biro nasional pou donn bann ansien ki dan to lasanble bann instriksion ek bann sigzesion pratik lor kouma pou gagn nouritir spiritiel, kouma pou fer renion, ek kouma pou prese. Si biro nasional pa kapav kontakte bann ansien, lerla bann ansien pou ed zot tou dan lasanble pou kontign ador Zeova. Zot pou servi bann instriksion ki ena dan Labib ek nou bann piblikasion pou gid nou.​—Mat. 28:19, 20; Zist. 5:29; Ebre 10:24, 25.

11. Kifer to kapav sir ki to pou touletan gagn tou seki to bizin pou gard to lafwa for, ek ki to kapav fer pou protez to Labib ek to bann lezot piblikasion?

¹¹ Zeova inn promet ki so bann serviter pou  gagn tou seki zot bizin pou gard zot lafwa for. (Iza. 65:13, 14; Lik 12:42-44) Alor, to kapav sir ki so lorganizasion pou fer tou seki li kapav pou donn twa seki to bizin pou res fidel. Me eski ena enn kitsoz ki twa osi to kapav fer? Kan ena enn linterdiksion, rod enn bon plas pou kasiet to Labib ek lezot piblikasion ki to ena. Fer atansion pou pa les sa bann piblikasion-la, ki li inprime ouswa elektronik, dan bann plas kot fasil pou trouve. Nou tou nou bizin fer seki nou kapav pou gard nou lafwa for.

12. Kouma bann ansien kapav organiz bann renion dan enn fason ki pa pou atir latansion?

¹² Ki pou ariv nou bann renion? Bann ansien pou organiz bann renion dan enn fason ki pa pou atir latansion. Kitfwa bann ansien pou fer nou zwenn dan bann ti group, ek kitfwa souvan zot pou sanz ler ek plas kot fer renion. To kapav ede pou protez to bann frer ek ser kan to pa fer tapaz kan to pe rant ek sorti dan sa bann renion-la. Kitfwa osi to pou bizin abiy dan enn fason ki pa pou atir latansion.

13. Ki nou aprann ar lexanp nou bann frer dan l’ex-Union soviétique?

¹³ Konsernan predikasion, li pa pou parey partou. Me nou kontan Zeova ek nou kontan koz ar lezot lor so Rwayom, alor nou pou trouv enn fason pou prese. (Lik 8:1; Zist. 4:29) Kan li ti pe koz lor predikasion bann Temwin Zeova dan l’ex-Union soviétique, enn istorien ki apel Emily B. Baran ti dir: “Kan gouvernman ti dir bann Temwin Zeova ki zot pa kapav prese, zot ti koumans bann konversasion avek zot bann vwazin, zot bann koleg ek zot bann kamarad. Kan ti met zot dan prizon akoz sa, bann Temwin ti pres avek lezot prizonie.” Malgre linterdiksion, nou bann frer dan l’ex-Union soviétique pa ti aret prese. Si enn zour predikasion interdi kot to reste, to bizin determine pou imit zot lexanp!

14. Psom 39:1 averti nou kont ki kitsoz?

¹⁴ Fer atansion lor seki to dir lezot. Pandan enn linterdiksion, nou bizin kone kan “pou res trankil.” (Ekle. 3:7) Nou bizin gard sertin linformasion sekre, kouma nom nou bann frer ek ser, plas kot nou zwenn, kouma nou prese, ek kouma nou gagn nou bann piblikasion. Nou pa pou donn sa bann linformasion-la ni bann dimounn ki travay pou gouvernman ni nou bann kamarad ek fami ki res dan pei ouswa dan lezot pei. Si nou fer sa, nou pou met nou bann frer ek ser an danze.​—Lir Psom 39:1.

15. Ki Satan pou esey fer, ek ki nou bizin fer pou evit rant dan so piez?

¹⁵ Pa les bann ti problem kree divizion ant nou. Satan kone ki enn fami ki divize pa  kapav tini dibout. (Mark 3:24, 25) Li pou touletan esey kree divizion ant nou. Li atann ki nou lager ant nou olie ki nou lager kont li.

16. Ki bon lexanp Ser Gertrud Poetzinger finn lese?

¹⁶ Mem bann Kretien ki ena lexperyans bizin fer atansion pou pa tom dan sa piez-la. Anou get lexanp de ser, Gertrud Poetzinger ek Elfriede Löhr. Zot ti anprizone avek lezot ser dan enn kan konsantrasion Nazi. Gertrud ti koumans zalou kan Elfriede ti fer bann size ankourazan devan bann lezot ser ki ti dan kan konsantrasion. Plitar, Gertrud ti onte ek ti sipliy Zeova pou ed li. Li ti ekrir: “Nou bizin aksepte kan lezot ena plis kapasite ouswa gagn plis responsabilite ki nou.” Kouma li ti sirmont so zalouzi? Gertrud ti konsantre li lor Elfriede so bann bon kalite ek so zoli personalite. Dan sa fason-la, li ti re-gagn enn bon relasion avek Elfriede. Toulede ti reisi sirviv dan kan konsantrasion ek zot ti servi Zeova avek fidelite ziska zot lamor lor later. Si nou fer zefor pou sirmont nou bann problem avek nou bann frer ek ser, nou pa pou les nanye kree divizion ant nou.​—Kol. 3:13, 14.

17. Kifer nou bizin touletan swiv bann instriksion ki nou gagne ar lorganizasion Zeova?

¹⁷ Touletan swiv bann instriksion. Si nou swiv bann instriksion ki nou gagne ar bann frer responsab, nou pou evit bann problem. (1 Pier 5:5) Par exanp, dan enn pei kot nou laktivite interdi, bann frer responsab ti donn bann proklamater instriksion pou pa les bann piblikasion inprime kan zot prese. Selman, enn frer ki pionie ti panse ki li pli kone ki bann frer responsab ek li ti donn bann piblikasion. Ki rezilta sa finn ena? Apre ki sa frer-la ek lezot ti fini rann temwaniaz informel, lapolis ti vinn interoz zot. Aparaman, sa bann lapolis-la ti swiv zot ek ti reisi repran bann piblikasion ki zot ti distribie. Ki nou aprann ar sa lexanp-la? Nou bizin swiv bann instriksion mem si nou panse ki nou pli kone. Zeova touletan beni nou kan nou korper avek bann frer ki Li’nn etabli pou diriz nou.​—Ebre 13:7, 17, NW.

18. Kifer nou bizin evit etabli bann reg initil?

¹⁸ Pa etabli bann reg initil. Si bann ansien etabli bann reg initil, zot pou rann lavi zot bann frer ek ser difisil. Frer Juraj Kaminský rapel seki ti arive pandan linterdiksion dan l’ex-Tchécoslovaquie. Li dir: “Apre ki bann frer responsab ek boukou ansien ti al dan prizon, sertin frer ki ti pe pran latet dan lasanble ek dan sirkonskripsion ti koumans etabli bann reg pou bann proklamater. Zot ti dir bannla seki zot bizin fer ek pa fer.” Zeova pa finn donn nou drwa pou etabli  bann reg pou nou bann frer. Enn kikenn ki etabli bann reg initil pa pe protez so frer, okontrer li pe rod dominn lor lafwa so frer.​—2 Kor. 1:24.

19. Dapre 2 Kronik 32:7, 8, kifer nou kapav ena kouraz malgre tou seki Satan fer?

¹⁹ Nou lennmi, Satan Lediab, pa pou aret persekit bann fidel serviter Zeova. (1 Pier 5:8; Rev. 2:10) Satan ek bann ki soutenir li pou esey interdi nou ladorasion pou Zeova. Me mem si nou per, zame nou pa pou aret servi Zeova! (Det. 7:21) Zeova avek nou, ek Li pou kontign soutenir nou mem si interdi nou laktivite.​—Lir 2 Kronik 32:7, 8. c

20. Ki to bien determine pou fer?

²⁰ Anou ena mem determinasion ki nou bann frer dan premie siek, ki ti dir bann dirizan zot lepok: “Si devan Bondie li bon ki nou ekout zot plito ki nou ekout Bondie, zize zotmem. Me nou, nou pa kapav aret koz lor bann kitsoz ki nou finn trouve ek tande.”​—Zist. 4:19, 20, NW.