Zot reprezant bann larme dan lesiel ki ti partisip dan destriksion Zerizalem ek ki pou partisip dan destriksion sa move lemond Satan la kan pou ena Armagedonn. Se enn nouvo lexplikasion vizion Ezekiel. Kifer nou bizin sa nouvo lexplikasion-la?

Avan 607 Avan Nou Lepok, Zeova ti fer Ezekiel gagn enn vizion pou montre li seki ti pou arive dan Zerizalem avan ki sa lavil-la detrir. Dan sa vizion-la, Ezekiel ti trouv boukou move kitsoz ki ti pe arive laba. Apre sa li ti trouv sis misie ek sakenn ti ena enn “zarm pou detrir dan so lame.” Ti ena osi enn misie ansam avek zot ki ti “met enn linz an lin” ek li ti ena “enn resipian kot met lank ek ki bann sekreter servi.” (Ezekiel 8:6-12; 9:2, 3) Ti demann sa misie-la pou al partou dan lavil ek pou “met enn mark lor fron bann zom ki pe pous enn soupir ek ki pe plengne akoz tou bann kitsoz detestab ki pe fer dan sa lavil-la.” Apre sa, ti demann sa sis zom avek bann zarm la pou al dan lavil ek pou touy tou bann ki pa ti ena sa mark-la lor zot fron. (Ezekiel 9:4-7) Ki nou kapav aprann dan sa vizion-la, ek kisannla sa zom avek enn resipian kot met lank la?

Ezekiel ti gagn sa vizion-la an 612 Avan Nou Lepok. Sink-an plitar, sa profesi-la ti realize pou premie fwa, kan Zeova ti permet larme Babilonien detrir Zerizalem. Dan sa fason-la, Zeova ti servi bann Babilonien pou pini so pep ki ti dezobeir Li. (Zeremi 25:9, 15-18) Me ki ti ariv bann Zwif ki ti drwat ek  ki pa ti aksepte tou bann move kitsoz ki ti pe pase dan lavil Zerizalem? Zeova ti fer sir ki zot gagn lavi sov.

Dan sa vizion-la, Ezekiel pa ti vremem met enn mark lor fron personn, ni ti partisip dan destriksion Zerizalem. Okontrer, se bann anz ki ti diriz destriksion Zerizalem. Alor sa profesi-la permet nou trouv seki pe pase dan lesiel. Zeova ti demann so bann anz pou prepar destriksion bann move dimounn ek pou fer sir ki bann dimounn drwat gagn lavi sov. a

Sa profesi-la pou realize osi dan lavenir. Lontan, nou ti dir ki sa misie avek enn resipian kot met lank la reprezant bann Kretien ki ena lesperans pou al dan lesiel me ki ankor lor later. Nou ti osi dir ki se kan bann dimounn ti ekout ek aksepte bonn nouvel ki nou prese ki zot ti gagn sa mark ki ti pou fer zot gagn lavi la. Me pa tro lontan, nou’nn trouve ki li inportan pou sanz fason ki nou explik sa profesi-la. Dan Matie 25:31-33, nou finn aprann ki se Zezi ki ziz bann dimounn. Li pou fer sa dan lavenir pandan gran detres. Lerla, bann ki Zezi pou zize kouma bann mouton pou gagn lavi sov, ek bann ki li pou zize kouma bann kabri pou detrir.

Alor, ki nou aprann ar vizion Ezekiel? Ena sink leson:

1.  Avan ki Zerizalem ti detrir, Ezekiel, ek osi Zeremi ek Izai, ti averti bann dimounn seki ti pou ariv sa lavil-la. Sa bann zom-la ti azir kouma bann ki ena responsabilite pou veye. Azordi, Zeova pe servi enn ti group Kretien ki ena lesperans pou al dan lesiel, pou ansegn so pep ek pou averti lezot avan ki gran detres koumanse. Ofet, tou bann serviter Bondie, setadir, bann domestik Zezi, pe partisip dan sa travay pou averti lezot la.​—Matie 24:45-47.

2.  Ezekiel pa ti met enn mark lor fron bann ki ti pou gagn lavi sov. Azordi osi bann serviter Zeova pa fer sa. Zot zis prese ek averti lezot konsernan bann kitsoz ki pou arive dan lavenir. Se avek led bann anz ki zot pe reisi fer sa travay predikasion la dan lemond antie.​—Revelasion 14:6.

3.  Bann ki ti gagn lavi sov dan lepok Ezekiel pa ti ena enn vre mark lor zot fron. Azordi, bann ki pou gagn lavi sov osi pa pou ena enn vre mark lor zot fron. Ki bann dimounn pou bizin fer pou gagn lavi sov kan pou ena gran detres? Kan zot tann bann lavertisman, zot bizin aprann pou imit Zezi, vwe zot lavi ar Bondie, ek soutenir bann frer Zezi Kris kan zot pres bonn nouvel. (Matie 25:35-40) Pandan gran detres, zot pou gagn sa mark-la lor zot fron, setadir, pou swazir zot pou gagn lavi sov.

4.  Sa misie avek enn resipian kot met lank la reprezant Zezi. Pandan gran detres, Zezi pou met enn mark lor fron gran lafoul kan li pou ziz zot kouma bann mouton. Lerla, zot pou kapav viv pou touletan lor later.​—Matie 25:34, 46. b

5.  Azordi, sa sis zom avek bann zarm pou detrir la reprezant bann larme dan lesiel ki dirize par Zezi. Biento zot pou detrir bann nasion ek pou eliminn tou lemal ki existe.​—Ezekiel 10:2, 6, 7; Revelasion 19:11-21.

Bann leson ki nou finn aprann dan sa vizion-la ed nou pou ena konfians ki Zeova pa pou detrir bann dimounn drwat ansam avek bann move dimounn. (2 Pier 2:9; 3:9) Zot osi rapel nou ki travay predikasion, se enn kitsoz bien inportan dan lepok ki nou pe viv. Tou dimounn bizin tann bann lavertisman avan ki lafin vini!​—Matie 24:14.