NOU pe viv dan enn lemond stresan, alor li kapav difisil pou trouv lape. Mem si nou resanti enn sertenn lape, li fasil pou nou perdi li. Kouma seki Labib dir kapav ed nou pou gagn enn vre lape ki dire? Ek kouma nou kapav ed lezot pou fer parey?

Pou ki nou gagn vre lape, nou bizin santi nou an sekirite ek proteze. Nou bizin ena bann bon kamarad, ek pli inportan, nou bizin vinn pros ar Bondie. Kouma nou kapav fer sa?

Bann komannman Zeova ek so bann prinsip touletan bon pou nou. Kan nou obeir bann komannman ek bann prinsip Zeova, nou montre ki nou fer Zeova konfians ek nou anvi anpe avek Li. (Zeremi 17:7, 8; Zak 2:22, 23) Lerla Zeova pou vinn pros ar nou ek Li pou donn nou lape lespri. Izai 32:17 dir: “Vre lazistis pou fer gagn lape, ek vre lazistis pou fer gagn enn trankilite ek sekirite ki dire.” Nou kapav trouv vre lape kan nou obeir Zeova avek tou nou leker.​—Izai 48:18, 19.

Zeova finn osi donn nou enn kado presie pou ed nou devlop enn lape ki dire. Sa kado-la se so lespri sin.​—Zistwar Bann Apot 9:31, NW.

Lapot Pol ti dir ki lape form parti dan “frwi lespri.” (Galat 5:22, 23, NW.) Alor, si nou anvi gagn lape, nou bizin les lespri sin gid nou parski lespri Bondie fer gagn lape. Kouma nou kapav fer sa?

Premierman, nou bizin lir Parol Bondie regilierman. (Psom 1:2, 3) Kan nou reflesi an profonder lor seki nou lir, lespri  sin ed nou pou konpran seki Zeova panse lor diferan size. Par exanp, nou aprann kouma Li res anpe avek lezot ek kifer lape bien inportan pou Li. Kan nou aplik seki nou aprann dan Labib, nou resanti enn pli gran lape dan nou lavi.​—Proverb 3:1, 2.

Deziemman, nou bizin priye pou gagn lespri sin Bondie. (Lik 11:13) Zeova promet bann ki demann Li so led: “Lape Bondie ki depas tou konesans, pou protez zot leker ek zot lespri, par mwayin Kris Zezi.” (Filipien 4:6, 7, NW.) Kan nou res pros ar Zeova ek nou kont lor so lespri, Li pou donn nou vre lape lespri.​—Romin 15:13.

Labib finn ed boukou dimounn pou fer bann sanzman dan zot lavi, ek asterla zot anpe avek Bondie, zot ena lape lespri ek zot anpe avek lezot. Kouma zot finn fer sa bann sanzman-la?

Avan ki zot vinn dan laverite, sertin parmi nou bann frer ek ser ti ankoler vit ek ti mem violan. Me zot finn fer boukou zefor pou sanze, ek asterla zot ena plis pasians, zantiyes, ek zot viv anpe avek lezot. a (Get not.) (Proverb 29:22) Get kouma enn frer ki apel David ek enn ser ki apel Rachel ti fer sa bann sanzman-la dan zot personalite.

Avan ki David vinn dan laverite, souvan li ti kritik lezot ek li ti koz brit avek so fami. Me, apre, li ti realize ki li ti bizin sanze. Kouma li finn trouv lape? David dir: “Mo ti koumans aplik bann prinsip Labib dan mo lavi, ek sa ti ogmant respe ki ti ena ant mwa ek mo fami.”

 Lanvironnman kot Rachel inn grandi ti ena enn gran lefe lor li. Li explike: “Mem asterla, mo pe bizin lite kont lakoler parski mo ti grandi dan enn lanvironnman kot ti ena koler.” Ki finn ed Rachel pou trouv lape? Li dir: “Mo ti priye Zeova pou soutenir mwa.”

David ek Rachel se zis lexanp de dimounn ki asterla ena lape parski zot finn aplik bann prinsip Labib ek zot finn kont lor lespri sin. Mem si nou pe viv dan enn lemond kot ena koler, nou kapav ena lape lespri. Li pou pli fasil pou nou ena enn bon relasion avek bann manb nou fami ek avek bann frer ek ser dan kongregasion. Me Zeova dir nou ki nou bizin “viv dan lape ar tou dimoun.” (Romin 12:18) Eski vremem sa li posib? Ek kifer nou bizin esey viv dan lape avek lezot dimounn?

Dan predikasion, nou pres enn mesaz lape konsernan Rwayom Bondie. (Izai 9:6, 7; Matie 24:14) Boukou dimounn kontan sa mesaz-la ek zot aksepte li. Rezilta: zot nepli santi zot dezespere ouswa ankoler akoz seki pe arive dan lemond. Asterla zot ena enn vre lespwar pou lavenir, ek sa fer zot anvi “rod lape.”​—Psom 34:14, NW.

Me pa tou dimounn ki kontan nou mesaz, antouka pa o-koumansman. (Zan 3:19) Ninport kouma bann dimounn reazir, Bondie donn nou so lespri. Sa ed nou pou gard lape ek pou ena respe kan nou prese. Dan sa fason-la, nou swiv konsey Zezi: “Letan zot rant dan enn lakaz, souet lape tou dimoun, si sa bann dimoun la tret zot bien, zot lape res lor zot, me si pa bien resevwar zot, repran zot lape.” (Matie 10:11-13) Kan nou ena sa latitid-la, sa permet nou res anpe malgre seki bann dimounn dir ouswa fer. Ek nou rapel ki dan lavenir nou pou ankor kapav ed sa bann dimounn-la.

Nou osi favoriz lape kan nou koz avek bann ofisie gouvernman avek respe, mem si zot opoze ar nou laktivite. Par exanp, dan enn pei l’Afrique, gouvernman pa ti pe les bann Temwin Zeova konstrir bann Lasal kot fer renion. Nou bann frer ti kone ki zot bizin esey rezoud sa problem-la dan lape. Zot ti avoy enn frer ki avan ti misioner dan sa pei-la pou al get lanbasader sa pei-la dan Londres, dan l’Angleterre, ek pou fer li kone ki bann travay ki bann Temwin Zeova fer favoriz lape.

Frer-la ti dir: “Kan mo ti ariv kot resepsion, mo ti trouv resepsionis-la so linz ek mo ti realize ki li sorti dan enn tribi ki mo kone, ek mo ti aprann lang sa tribi-la. Alor mo ti dir li bonzour dan so prop lang. Li ti gagn enn sok ek li ti demann mwa: ‘Pou ki rezon ou isi?’ Avek polites mo ti dir li ki mo anvi zwenn lanbasader. Li ti telefonn anbasader-la ek misie-la ti vinn zwenn mwa ek li ti dir mwa bonzour dan lang ki koze dan sa pei-la. Apre sa, li ti bien ekout mwa kan mo ti explik li laktivite ki bann Temwin fer.”

Apre ki lanbasader-la ti ekout seki frer-la ti dir, li ti konpran nou travay pli bien ek li ti ena mwins prezize. Enn tipe apre, sa gouvernman-la ti sanz so desizion ek ti donn bann Temwin Zeova permision pou ranz bann Lasal Renion. Bann frer ti extra kontan! Li kler ki nou favoriz lape kan nou tret lezot avek respe.

Azordi, pep Zeova dan enn paradi spiritiel kot zot pe ador Li dan lape. Sakenn parmi nou kapav ede pou ki ena lape kan nou fer zefor pou ena lape dan nou prop lavi. Lerla nou kapav sir ki Zeova pou kontan kan Li get nou. Ek dan so nouvo lemond, Li pou donn nou lape ki pou dire pou touletan.​—2 Pier 3:13, 14.