LARTIK LETID 23
“Ki To Nom Sanktifie”
“O Zeova, to nom res pou touletan.”—PS. 135:13, NW.
KANTIK 10 Loue Nou Bondie Zeova!
REZIME a
1-2. Ki size bien inportan pou bann Temwin Zeova?
NOU tou nou konserne par de kitsoz inportan: zistifie souverennte Zeova ek sanktifie so nom. Nou, bann Temwin Zeova, nou kontan koz lor sa bann size interesan la. Me eski se de size diferan? Non.
2 Nou tou nou konpran ki bizin tir dezoner ki’nn sali nom Zeova. Nou konpran osi ki fason ki Zeova dirize (so souverennte) bizin zistifie, setadir ki tou kreasion rekonet ki Limem meyer dirizan ki ena. Sa de size-la bien inportan ek zot merit nou latansion.
3. Ki nom “Zeova” inplike?
3 An realite, nom “Zeova” inplik tou seki konsern nou Bondie, ek sa inplik osi fason ki Li dirize. Alor, si nou dir ki tir dezoner lor nom Zeova se samem kitsoz ki pli inportan, savedir osi ki tou kreasion bizin rekonet ki Limem meyer dirizan ki ena. Kifer? Parski nom “Zeova” ena enn lien ar fason ki Li dirize antan ki Souverin Tou-Pwisan.—Get lankadre “ Sanktifie Nom Zeova: Ki Sa Inplike?”
4. Kouma Psom 135:13 dekrir nom Bondie, ek ki kestion nou pou examine dan sa lartik-la?
4 Nom “Zeova” li vremem spesial. (Lir Psom 135:13, NW. b) Kifer nom Bondie telman inportan? Kan eski repitasion nom Bondie finn gate pou premie fwa? Kouma Zeova sanktifie so nom? Ek kouma nou kapav ede pou defann so nom? Anou examinn sa bann kestion-la.
KIFER ENN NOM LI BIEN INPORTAN?
5. Kan nou koz lor “sanktifie” nom Bondie, ki kestion nou kapav poz noumem?
5 “Ki to nom sanktifie.” (Mat. 6:9) Dapre Zezi, samem kitsoz pli inportan lor ki nou bizin priye. Ki Zezi ti pe rod dir? Sanktifie enn kitsoz se fer li vinn sin, prop, ouswa pir. Me sertin dimounn kapav demann zotmem, ‘Eski nom Zeova li pa deza sin, prop, ek pir?’ Pou reponn sa kestion-la, nou bizin reflesi lor seki enn nom inplike.
6. Kifer enn nom li bien inportan?
6 Enn nom se pa zis enn mo ki kapav prononse ouswa ki kapav ekrir lor enn papie. Labib dir: “Enn bon nom pli bon ki boukou rises.” (Prov. 22:1, not; Ekle. 7:1) Kifer enn nom li bien inportan? Parski enn nom inplik repitasion enn dimounn, setadir seki lezot panse lor sa dimounn-la. Alor, seki pli inportan, se pa fason ki ekrir ouswa pronons enn nom, me seki lezot panse kan zot trouv ouswa tann sa nom-la.
7. Kouma bann dimounn gat repitasion Zeova ek sali so nom?
7 Kan bann dimounn koz manti lor Zeova, zot gat so repitasion ek zot sali so nom. Premie fwa ki enn kikenn ti koz manti lor Bondie ti dan zardin Edenn. Anou gete ki nou kapav aprann ar seki ti arive dan zardin Edenn.
KOUMA NOM BONDIE FINN SALI POU PREMIE FWA?
8. Ki kitsoz Adan ek Ev ti kone, ek ki kestion nou kapav poz noumem?
8 Adan ek Ev ti kone ki Bondie apel Zeova. Zot ti konn osi boukou kitsoz inportan lor Zeova. Par exanp, zot ti kone ki Limem Kreater, ki Li ti donn zot lavi, Li ti met zot dan enn zoli Paradi, ek Li ti donn zot enn konzwin parfe. (Zen. 1:26-28; 2:18) Me eski zot ti pou kontign medit lor tou seki Zeova ti donn zot? Eski zot ti pou kontign ogmant zot lamour ek zot rekonesans pou Zeova? Kan lennmi Bondie ti teste zot, ti gagn repons pou sa bann kestion-la.
9. Dapre Zenez 2:16, 17 ek 3:1-5, ki Zeova ti dir Adan ek Ev, ek kouma Satan ti deform laverite?
9 Lir Zenez 2:16, 17 c ek 3:1-5. d Satan ti servi enn serpan pou koz avek Ev. Li ti dir Ev: “Eski vremem Bondie finn dir ki fode pa zot manz frwi tou bann pie ki ena dan zardin?” Par sa kestion-la, Satan ti azir dan enn fason sournwa. Li ti koz manti lor Bondie, ek akoz sa Ev ti koumans ena bann dout lor Bondie. An realite, Bondie ti dir Adan ek Ev ki zot ti kapav manz frwi tou bann pie, apart frwi enn sel pie. Zot ti kapav manz plizir varyete frwi. (Zen. 2:9) Zeova bien zenere! Selman, Li ti defann Adan ek Ev manz frwi enn sel pie. Me kestion ki Satan ti poze ti deform laverite. Li ti rod fer zot krwar ki Bondie pa zenere. Alor, kitfwa Ev ti demann limem, ‘Eski Bondie pe priv mwa enn kitsoz ki bon?’
10. Kouma Satan ti sali nom Zeova, ek ki konsekans sa finn ena?
10 Kan Satan ti poz sa kestion-la, Ev ti ankor pe obeir Zeova. Ev ti dir Satan bann instriksion bien kler ki Zeova ti donn zot ek li ti mem dir Satan ki fode pa zot tous sa pie-la. Ev ti kone ki si zot ti dezobeir Zeova zot ti pou mor. Me Satan ti dir Ev: “Non, vremem zot pa pou mor.” (Zen. 3:2-4) Satan ti nepli azir dan enn fason sournwa. Dan enn fason bien direk, li ti sali nom Zeova kan li ti dir Ev ki Zeova enn manter. Lerla, Satan ti vinn enn diab ouswa kalomniater. Ev ti krwar Satan ek li ti tom dan so piez. (1 Tim. 2:14) Ev ti fer Satan plis konfians ki Zeova. Akoz sa, Ev ti pran pli move desizion ki ena. Li ti desid pou dezobeir Zeova. Li ti manz frwi ki Zeova ti defann zot manze. Ek apre sa, li ti donn Adan frwi-la.—Zen. 3:6.
11. Ki Adan ek Ev ti kapav fer, me ki zot pa ti fer?
11 Anou reflesi lor seki Ev ti kapav dir Satan. Li ti kapav dir: “Mo pa konn twa, me mo konn mo Papa, Zeova. Mo kontan Li ek mo fer Li konfians. Li’nn donn Adan ek mwa tou seki nou ena. Kouma to oze dir bann move kitsoz lor Li? Sorti devan mwa, ale!” Si Ev ti reponn koumsa, mazine ki kantite Zeova ti pou kontan! Ev ti pou montre so lamour ek so fidelite anver so Papa. (Prov. 27:11) Me Ev pa ti ena lamour fidel pou Zeova ek Adan osi pa ti ena sa kalite-la. Parski zot pa ti ena lamour pou zot Papa, Adan ek Ev pa ti reisi defann nom Zeova kan Satan ti sali sa nom-la.
12. Kouma Satan ti met bann dout dan lespri Ev, ek ki kitsoz Adan ek Ev pa ti fer?
12 Kouma nou’nn trouve, Satan ti met bann dout dan lespri Ev. Ev ti koumans ena bann dout lor Zeova ek kitfwa li ti pe demann limem si Zeova ti enn bon Papa. Adan ek Ev pa ti defann nom Zeova kont bann mansonz Satan. Zot ti ekout Satan ek zot ti rebel kont zot Papa. Satan servi mem metod azordi. Li atak nom Zeova kan li koz manti lor Zeova pou gat So repitasion. Kan enn kikenn ekout bann foste ki Satan fane, bien vit li kapav les li inflianse ek rezet fason ki Zeova dirize.
ZEOVA SANKTIFIE SO NOM
13. Kouma Ezekiel 36:23 dekrir mesaz prinsipal ki ena dan Labib?
13 Eski Zeova aksepte ki gat so repitasion san ki Li defann Limem? Non! Labib koz lor seki Zeova inn fer pou tir dezoner ki’nn sali So nom kan Satan ti atak So repitasion dan zardin Edenn. (Zen. 3:15) An realite, nou kapav dekrir mesaz prinsipal ki ena dan Labib koumsa: Zeova sanktifie so nom gras-a Rwayom ki dirize par so Garson ek Li pou amenn lape ek lazistis lor later. Labib ed nou pou konpran seki Zeova pe fer pou sanktifie so nom.—Lir Ezekiel 36:23. e
14. Apre rebelion dan zardin Edenn, kouma Zeova sanktifie so nom par fason ki Li azir?
14 Satan inn fer tou seki li kapav pou anpes Zeova realiz So proze. Me sa ti dan vid. Labib explik nou kouma Zeova inn okip sa sitiasion-la, ek fason ki Li’nn azir montre nou ki Li vremem enn Papa ki ena lamour, ek Limem meyer Dirizan ki ena. Li vre ki Zeova inn soufer kan Satan ek lezot ankor inn rebel kont Li. (Ps. 78:40) Me Li’nn okip sa sitiasion-la avek sazes, pasians, ek lazistis. Li’nn montre osi so gran pwisans dan plizir fason. Me pli inportan, Li’nn montre so lamour dan tou so bann aksion. (1 Zan 4:8) Zeova fer tou pou sanktifie so nom.
Kan Satan ti koz ar Ev, li ti koz manti lor Zeova, ek pandan plizir santenn lane li’nn kontign koz manti lor Bondie pou gat So repitasion (Get paragraf 9-10, 15) h
15. Kouma Satan pe koz manti lor Bondie azordi, ek ki konsekans sa ena?
15 Azordi, Satan ankor pe koz manti lor Bondie pou gat So repitasion. Li anbet bann dimounn ek li rod fer zot krwar ki Bondie pena lamour, sazes, pwisans, ek ki Li inzis. Par exanp, Satan esey fer bann dimounn krwar ki Zeova Li pa nou Kreater. Ek si bann dimounn krwar ki Bondie existe, Satan esey fer zot krwar ki bann lalwa Bondie strik ek inzis. Anplis, Satan ansegn bann dimounn ki Zeova pena leker ek ki Li bril bann dimounn dan lanfer. Kan bann dimounn krwar sa bann foste-la, zot rezet bann lalwa Zeova pli fasilman. Tanki Zeova pa detrir Satan, li pou kontign koz manti lor Zeova. Li pou mem esey fer twa rezet Zeova. Eski li pou reisi?
KOUMA NOU KAPAV EDE POU DEFANN NOM ZEOVA?
16. Ki Adan ek Ev pa’nn reisi fer, me ki twa to kapav fer?
16 Zeova les bann dimounn inparfe donn Li enn koudme pou sanktifie so nom. An realite, to kapav fer seki Adan ek Ev pa’nn reisi fer. Nou pe viv dan enn lemond ki ranpli ar dimounn ki koz manti lor Bondie ek ki sali so nom. Kanmem sa, to ena lokazion pou defann So nom ek pou dir bann dimounn ki Zeova Li sin, zis, bon, ek ki Li ena lamour. (Iza. 29:23) To kapav montre ki to aksepte Li kouma to Dirizan. To kapav ed bann dimounn pou konpran ki Zeova Li sel Dirizan ki vremem zis ek ki Li tousel pou kapav fer bann dimounn ere ek amenn lape lor later.—Ps. 37:9, 37; 146:5, 6, 10.
17. Kouma Zezi ti fer konn nom so Papa?
17 Kan nou defann nom Zeova, nou swiv lexanp Zezi. (Zan 17:26) Zezi ti fer bann dimounn konn nom so Papa, pa zis kan li ti servi sa nom-la, me osi kan li ti ansegn bann dimounn lor Zeova. Par exanp, li ti opoz li ar bann Farizien, ki ti fer Zeova pas pou enn Bondie ki dir, exizan, san pitie, ek ki pa interese ar bann imin. Zezi ti ed bann dimounn pou trouv so Papa kouma enn Bondie ki rezonab, ki ena pasians, ki ena lamour, ek ki pardone. Li ti osi ed zot pou konn Zeova par fason ki li ti imit bann kalite so Papa.—Zan 14:9.
18. Kouma nou kapav defann nom Zeova ek tir dezoner ki’nn sali So nom?
18 Parey kouma Zezi, nou kapav ed bann dimounn pou konn Zeova kan nou ansegn zot ki Li enn Bondie ki bon ek ki ena lamour. Kan nou fer sa, nou ede pou defann nom Zeova ek pou tir dezoner ki’nn sali so nom. Nou sanktifie nom Zeova, setadir nou fer li vinn sin dan leker ek lespri bann dimounn. Mem si nou inparfe, nou kapav imit Zeova. (Efe. 5:1, 2) Kan nou montre bann dimounn, par nou parol ek nou aksion, kisannla Zeova ete, nou ede pou ki So nom sanktifie. Nou sanktifie nom Zeova kan nou ed bann dimounn pou konn laverite lor Li. f Kan nou fer sa, nou montre ki bann dimounn inparfe kapav res fidel ar Bondie.—Zob 27:5.
Nou anvi ed nou bann etidian Labib pou konpran ki Zeova Li bon ek ki Li ena lamour (Get paragraf 18-19) i
19. Kouma Izai 63:7 ed nou pou konpran nou lobzektif prinsipal kan nou ansegn bann dimounn?
19 Anou get enn lot kitsoz ki nou kapav fer pou sanktifie nom Zeova. Kan nou ansegn bann dimounn bann verite ki ena dan Labib, souvan nou met laksan lor souverennte Bondie, setadir drwa ki Zeova ena pou diriz liniver, ek nou ena rezon pou fer sa. Selman, mem si li inportan ki nou ansegn bann dimounn bann lalwa Zeova, nou lobzektif prinsipal se pou ed zot pou kontan nou Papa, Zeova, ek pou res fidel ar Li. Alor, li inportan ki nou met laksan lor bann zoli kalite ki Zeova ena ek ki nou ansegn zot lor so personalite, setadir lor seki nom Zeova reprezante. (Lir Izai 63:7. g) Kan nou ansegn bann dimounn dan sa fason-la, nou ed zot pou kontan Zeova. Lerla, zot pou obeir Li parski zot anvi res fidel anver Li.
20. Ki nou pou examine dan prosin lartik?
20 Dan prosin lartik, nou pou gete kouma nou konportman ek fason ki nou ansegne kapav glorifie nom Zeova ek atir bann dimounn ver Li.
KANTIK 2 Zeova Se To Nom
a Ena enn size bien inportan ki konsern tou bann dimounn ek tou bann anz. Ki sa size-la sa, kifer li bien inportan, ek kifer sa konsern nou? Repons pou sa bann kestion-la pou ed nou ranforsi nou relasion avek Zeova.
b Psom 135:13: “O Zeova, to nom res pou touletan. O Zeova, zenerasion apre zenerasion bann dimounn pou tann koz lor twa.”
c Zenez 2:16, 17: “16 Ek Zeova ti osi donn lord sa zom-la: ‘To kapav manz frwi tou bann pie ki ena dan zardin, kantite ki to anvi. 17 Me, konsernan pie konesans bon ek move, fode pa ki to manz so frwi, parski zour ki to manz sa, vremem to pou mor.’”
d Zenez 3:1-5: “1 Serpan ti zanimo pli pridan parmi tou bann zanimo sovaz ki Bondie Zeova ti kree. Li ti dir fam-la: ‘Eski vremem Bondie finn dir ki fode pa zot manz frwi tou bann pie ki ena dan zardin?’ 2 Lerla, fam-la ti reponn serpan-la: ‘Nou kapav manz frwi bann pie ki ena dan zardin. 3 Me konsernan frwi sa pie ki omilie zardin la, Bondie finn dir: “Fode pa zot manz so frwi, non fode pa zot tous li; sinon zot pou mor.”’ 4 Lerla, serpan-la ti dir fam-la: ‘Non, vremem zot pa pou mor. 5 Parski Bondie kone ki zour zot manz sa frwi-la, zot lizie pou ouver, ek zot pou vinn kouma Bondie, zot pou konn seki bon ek seki pa bon.’”
e Ezekiel 36:23: “‘Vremem, mo pou sanktifie mo gran nom ki finn sali parmi bann nasion, ki zot finn sali parmi bann nasion; ek bann nasion pou bizin kone ki momem Zeova kan mo pou sanktifie momem parmi zot devan zot lizie,’ ala seki Souverin Segner Zeova dir.”
f Parfwa, dan sertin piblikasion ti ekrir ki fode pa nou dir ki “nom Zeova bizin zistifie.” Kifer? Parski zame personn pa’nn dir ki Bondie pena drwa pou apel Limem Zeova. Selman, dan renion aniel 2017, ti gagn enn nouvo explikasion. Prezidan sa renion-la ti dir: “An realite, nou kapav priye pou ki nom Zeova zistifie parski so repitasion bizin retabli.”—Get emision Zanvie 2018 an Franse lor jw.org®. Al dan seksion BIBLIOTHÈQUE > JW TÉLÉDIFFUSION.
h DESKRIPSION ZIMAZ: Satan ti koz manti lor Bondie pou gat so repitasion. Li ti dir Ev ki Bondie enn manter. Pandan plizir santenn lane, Satan inn fann bann foste konsernan Bondie. Par exanp, li’nn fer bann dimounn krwar ki Bondie kriel ek ki Li pa nou Kreater.
i DESKRIPSION ZIMAZ: Pandan ki li pe fer letid enn misie, enn frer pe met laksan lor personalite Bondie.
