Dan bann lartik avan, nou’nn aprann boukou kitsoz ki’nn ed nou trouv repons pou kestion: Kisannla Bondie ete? Gras-a Labib, nou’nn aprann ki nom Bondie se Zeova ek ki so kalite prinsipal se lamour. Nou’nn trouv osi seki Li’nn fer ek seki Li pou fer biento pou bann dimounn. Ena ankor boukou kitsoz ki ou kapav aprann lor Bondie. Alor, kitfwa ou demann oumem ki bienfe ou gagne kan ou aprann konn Bondie?

Zeova promet ki “si to rod Li, Li pou les twa trouv Li.” (1 Kronik 28:9) Amezir ki ou rod Bondie ek aprann konn Li, ou pou gagn enn kitsoz ki ena boukou valer: Zeova pou vinn ou “kamarad bien pros”! (Psom 25:14) Ki bienfe sa lamitie-la kapav fer ou gagne?

Ou pou konn vre boner. Labib dekrir Zeova kouma “Bondie ere.” (1 Timote 1:11, NW) Kan ou vinn pros ar Li ek ou imit so fason azir, ou pou konn vre boner, ek sa pou ed ou lor plan emosionel, fizik, ek mantal. (Psom 33:12) Ou pou kapav osi ena enn lavi ere, kan ou rezet bann kitsoz ki kapav fer ou ditor ek ou kiltiv bann bon labitid, ek gard enn bon relasion avek lezot. Lerla, ou pou ena mem santiman ki sa ekrivin Psom ki ti dir: “Li bon kan nou pre ar Bondie.”​—Psom 73:28.

Enn latansion ek enn led personel. Zeova ti promet so bann serviter: “Mo pou gid twa e konsey twa.” (Psom 32:8) Savedir ki Zeova donn so bann serviter enn latansion personel ek Li donn sakenn exakteman seki li bizin. (Psom 139:1, 2) Kan ou devlop enn bon relasion avek Zeova, ou pou trouve ki Li touletan la pou ou.

Enn lavenir extraordiner. Zeova pa zis ed ou pou ena enn lavi ere ek agreab depi asterla, Li osi donn ou posibilite pou ena enn zoli lavenir. (Izai 48:17, 18) Labib dir: “Samem ki vedir lavi eternel, ki zot aprann konn twa, sel vre Bondie, ek sa kikenn ki to finn avoye la, Zezi Kris.” (Zan 17:3, NW) Dan sa lepok difisil ki nou pe viv la, lespwar ki Bondie done li kouma enn lank ki “solid ek stab.”​—Ebre 6:19.

Sa se zis de-trwa bon rezon kifer nou bizin aprann konn Bondie pli bien ek devlop enn relasion personel avek Li. Me ena ankor boukou lezot rezon! Pou gagn plis ransegnman, ou kapav koz avek enn Temwin Zeova ouswa vizit nou sit Internet jw.org.