Zezi ti explike kouma nou pou “kone ki Rwayom Bondie pe aprose.” (Lik 21:31) Li ti predir ki pou ena bann gran lager, bann gran tranbleman-de-ter, lafaminn, ek bann lepidemi. Se samem ki nou pe trouve azordi!​—Lik 21:10-17.

Labib dir nou ki move konportman bann dimounn se enn parmi bann kitsoz ki nou pou trouve pandan “bann dernie zour” kot bann zom pe domine. Ou kapav trouv seki li dir lor la dan 2 Timote 3:1-5. Pena dout ki, kan ou get mantalite ek konportman bann dimounn azordi, ou pou dakor ki sa profesi Labib la pe realize.

Ki savedir? Savedir ki biento Rwayom Bondie pou fer bann gran sanzman ki pou amelior lavi bann dimounn dan enn fason extraordiner. (Lik 21:36) Dan Labib, Bondie promet bann bon kitsoz pou later ek pou bann dimounn ki pou viv lor la. Anou get de-trwa lexanp.

“Ek ti donn li [Zezi] dominasion, loner, ek enn rwayom, pou ki bann pep, bann nasion ek bann lang, zot tou servi li. So dominasion li enn dominasion ki pou dire pou touletan ek ki pa pou fini, ek so rwayom zame pa pou detrir.”​—DANIEL 7:14.

Seki savedir: Ou pou kapav viv anba gouvernman ki Bondie inn etabli pou diriz lemond antie, ek ki pou dirize par so Garson.

“Okenn abitan pa pou dir: ‘Mo malad.’”​—IZAI 33:24.

Seki savedir: Zame ou pou malad ouswa gagn enn andikap; ou pou kapav viv san zame konn lamor.

“Li finn aret lager ki ena partou dan lemond.”​—PSOM 46:9.

Seki savedir: Pou nepli ena lager ek bann soufrans ki gagne akoz sa.

“Bann ki fer lemal pou disparet . . . Bon dimoun pou erit later.”​—PSOM 37:10, 11.

Seki savedir: Pou nepli ena okenn move dimounn, pou ena zis bann dimounn ki anvi obeir Bondie.

“Zot pou ranz bann lakaz ek zot pou res ladan, zot pou plant bann karo rezin ek zot pou manz zot bann frwi.”​—IZAI 65:21, 22.

Seki savedir: Nou priye ki volonte Bondie fer “lor later,” ek sa lapriyer-la pou realize kan later antie pou vinn zoli.​—Matie 6:10.