Pou María, Raúl, Arne, ek lezot dimounn, lapriyer se enn kado extraordiner. Zot santi ki gras-a lapriyer, zot kapav koz ar Bondie, remersie Li, ek demann Li so led. Avek tou zot leker zot krwar ki seki Labib dir konsernan lapriyer, li vre: “Ala lasirans ki nou ena dan li: tou seki nou demande, li pou akord nou dapre so volonte.”​—1 Zan 5:14.

Me ena osi boukou dimounn ki gagn difikilte pou aksepte seki Labib dir konsernan lapriyer. Steve dir seki li ti resanti konsernan lapriyer: “Kan mo ti ena 17 an, trwa parmi mo bann kamarad ti mor dan de diferan aksidan. Enn ti mor dan enn aksidan loto ek de lezot la ti nwaye dan lamer.” Ki Steve ti fer? “Mo ti priye Bondie pou ki Li dir mwa kifer  tousala ti arive, me mo pa ti gagn okenn repons. Alor, mo ti demann momem, ‘Kifer mo bizin priye?’” Parey kouma Steve, ena boukou dimounn ki pa pe gagn repons pou zot bann lapriyer, alor zot demann zotmem si li vo lapenn priye.

Sertin dimounn ena bann lezot rezon kifer zot panse ki lapriyer pa kapav ed zot. Ena dir ki Bondie deza kone seki nou bizin ek bann problem ar ki nou pe bizin fer fas, alor li pa neseser ki nou dir Li sa bann kitsoz-la.

Lezot panse ki Bondie pa ekout zot lapriyer akoz bann erer ki zot finn fer dan lepase. Jenny dir: “Mo pli gro problem se ki mo santi ki mo pa vo nanye. Mo finn fer bann kitsoz ki mo regrete, alor mo ti sir ki mo pa merite ki Bondie ekout mo lapriyer.”

Ek ou, ki ou resanti kan ou priye? Si ou finn deza ena bann mem dout ouswa kestion lor lapriyer, ou kapav gagn rekonfor gras-a bann repons ki Labib done. Nou kapav ena konfians lor seki Labib dir konsernan lapriyer, a li kapav ed ou pou gagn repons pou bann kestion kouma:

• Eski Bondie vremem ekout nou bann lapriyer?

• Kifer nou pa gagn repons pou sertin lapriyer?

• Kouma ou kapav priye pou ki Bondie ekout ou?

• Kouma lapriyer kapav ed ou?