Eski sa Lemond-la Pe Al Fini?
Sirman ou kone ki Labib koz lor lafin sa lemond-la. (1 Zan 2:17) Eski sa vedir ki pou nepli ena dimounn lor later? Eski nou planet Later pou vinn enn plas kot nepli ena okenn lavi ouswa eski li pou detrir net?
DAPRE LABIB, REPONS POU SA DE KESTION-LA SE NON!
Ki Pa Pou Detrir?
BANN DIMOUNN
Seki Labib dir: Bondie “pa finn kree [later] pou nanye, me finn form li pou ki dimounn res lor la.”—IZAI 45:18.
PLANET LATER
Seki Labib dir: “Enn zenerasion ale, enn zenerasion vini, me later res pou touletan.”—EKLEZIAST 1:4.
KI SAVEDIR? Dapre Labib, later zame pa pou detrir ek pou touletan ena dimounn ki res lor la. Alor, ki savedir lafin sa lemond-la?
REFLESI LOR LA: Labib konpar lafin sa lemond-la ar seki ti arive dan lepok Noe. Sa lepok-la, later ti “ranpli ar violans.” (Zenez 6:13) Me selman, Noe ti enn dimounn drwat. Alor, Bondie ti sap Noe ek so fami, me Li ti avoy enn inondasion pou detrir bann move dimounn. Kan li koz lor seki ti arive sa lepok-la, Labib dir: “Par dilo linondasion, ki sa vie lemonn la finn detrir.” (2 Pier 3:6) Sa ti lafin enn lemond. Me, ki ti detrir? Se bann move dimounn ki ti detrir, pa later. Alor, kan Labib koz lor lafin sa lemond-la, li pa pe koz lor destriksion nou planet. Me plito, li pe koz lor destriksion bann move dimounn ek sistem ki zot inn met an plas.
Ki Pou Disparet?
BANN PROBLEM EK LEMAL
Seki Labib dir: “Ankor enn tigit letan bann ki fer lemal pou disparet; rode kouma rode, ou pa pou trouv zot. Bon dimoun pou erit later e zot pou viv enn lavi prosper ek pezib.”—PSOM 37:10, 11.
KI SAVEDIR? Inondasion ki ti ena dan lepok Noe pa ti detrir bann move kitsoz pou touletan. Mem apre sa, bann lezot dimounn ti soufer akoz bann move dimounn. Me selman, biento, Bondie pou tir tou move kitsoz ek parey kouma sa ekrivin Psom la ti dir: “Bann ki fer lemal pou disparet.” Bondie pou tir tou lemal ki ena dan lemond gras-a so Rwayom, setadir enn gouvernman dan lesiel ki pou diriz lor tou bann dimounn ki viv lor later ek ki obeir Bondie.
REFLESI LOR LA: Eski bann gouvernman ki pe dirize azordi pou aksepte pou soutenir Rwayom Bondie? Non, Labib montre plito ki zot pou opoz zot ar Rwayom Bondie parey kouma bann dimounn bet. (Psom 2:2) Ki pou arive lerla? Rwayom Bondie pou ranplas tou bann gouvernman imin, ek “limem ki pou regne pou touletan.” (Daniel 2:44) Me kifer li inportan ki bann dimounn aret dirize?
SEKI NOU BIZIN EK KIFER—Bann Dimounn Aret Dirize
Seki Labib dir: “Enn dimounn ki pe marse pa finn kree pou diriz so pa.”—ZEREMI 10:23.
KI SAVEDIR? Bann imin pa finn kree pou diriz zotmem. Zot pa reisi diriz lezot ek regle zot bann problem.
REFLESI LOR LA: Britannica Academic dir ki bann diferan gouvernman pa arive “rezoud bann problem kouma lamizer, lafaminn, maladi, katastrof natirel, ek lager ouswa bann lezot kalite violans.” Li dir osi: “Sertin . . . panse ki se zis enn gouvernman ki diriz later antie ki pou kapav rezoud sa bann problem-la pou touletan.” Me selman, mem si tou gouvernman imin vinn ansam, zot pou res touzour bann dimounn inparfe ki pa kapav rezoud sa bann problem-la. Rwayom Bondie se sel gouvernman ki ena pouvwar pou rezoud tou problem ki ena lor later pou touletan.
Alor, bann bon dimounn pa bizin per lafin sa lemond-la parski dapre Labib, se bann move dimounn ki pou detrir. Okontrer, se enn bon nouvel ki biento Bondie pou ranplas sa vie move lemond la par enn nouvo lemond ki extraordiner!
Kan eski sa pou arive? Prosin lartik pou koz lor repons ki Labib done.
Ena Osi
LATOUR DEGARD
“Lafin”—Ki li Ete?
Eski ou kone ki seki Labib dir konsernan “lafin” li enn bon nouvel?
REPONS POU BANN KESTION BIBLIK
Ki Ete Lager Armagedon?
Dan Labib, mo Armagedon paret enn sel fwa. Me bann lezot parti Labib koz lor sa lager-la osi.
