1-2. Ki nou pou examine dan sa lartik-la?

 FER koumadir to pe atann enn parsel bien inportan arive, me li pa ariv dan ler ki bizin. Ki to pou resanti? Sirman to pou trakase, pa vre? Kitfwa to pou dakor avek seki Proverb 13:12 dir: “Kan [nou] lespwar pe tarde pou realize, sa rann [nou] leker malad.” Me ki to pou resanti si to aprann ki ena bann bon rezon kifer parsel-la pa’nn ariv dan ler ki bizin? Dan sa ka-la, sirman to pou ena pasians ek to pou dispoze pou atann.

² Dan sa lartik-la, nou pou get plizir prinsip Labib ki pou ed nou pou “kontign atann avek pasians.” (Mish. 7:7) Apre sa, nou pou koz lor de domenn kot nou bizin atann avek pasians ki Zeova azir. Ek an dernie, nou pou gete kouma bann dimounn ki atann Zeova azir, zot gagn bann benediksion.

3. Ki prinsip nou kapav aprann dan Proverb 13:11?

³ Proverb 13:11 montre nou kifer nou bizin ena pasians. Sa verse-la dir: “Larises ki enn dimounn gagne vit-vit pou disparet bien vit. Me larises ki enn dimounn ramase tigit par tigit pou ogmante.” Ki prinsip nou kapav aprann dan sa verse-la? Enn kikenn ki ena sazes pou fer bann kitsoz avek pasians ek li pou gagn bann pli bon rezilta.

4. Ki prinsip nou kapav aprann dan Proverb 4:18?

⁴ Proverb 4:18 dir: “Me semin bann dimounn drwat li parey kouma lalimier ki eklere ek ki briye pli for, ziska ki’nn fer gran lizour.” Sa verse-la montre nou ki Zeova ed so bann serviter pou konpran so volonte, me li osi ed nou pou konpran kouma enn Kretien fer bann sanzman dan  so lavi pou vinn pros ar Zeova. Sa pran letan pou ki enn kikenn vinn pros ar Zeova. Si nou etidie Labib an profonder, ek nou aplik bann konsey ki nou gagne dan Labib ek ar lorganizasion Zeova, tigit par tigit nou pou kapav devlop bann kalite ki Zezi ena, ek nou pou osi konn Bondie pli bien. Anou gete ki lexanp Zezi ti servi pou explik sa.

5. Ki lexanp Zezi ti servi pou montre ki sa pran letan pou ki enn kikenn fer bann sanzman?

⁵ Zezi ti servi enn lexanp pou montre ki mesaz Rwayom Bondie li parey kouma enn ti lagrin ki grandi tigit par tigit dan leker bann dimounn ki sinser. Li ti dir: “Lagrin la pou zerme, pou grandi san mem ki [planter-la] kone kouma. Par limem, later fer so travay; premie dabor nou gagn lerb, apre li vinn enn zepi, anfin dible plin-plin dan zepi.” (Mark 4:27, 28) Ki Zezi ti pe rod dir? Li ti pe explike ki, parey kouma enn plant pouse tigit par tigit, enn dimounn ki aksepte mesaz Rwayom Bondie, li pou pran letan pou li fer bann sanzman. Par exanp, amezir ki nou etidian Labib vinn pli pros ar Zeova, nou pou koumans trouv bann sanzman ki li pe fer. (Efe. 4:22-24, NW) Me fode pa nou bliye osi ki se Zeova ki fer sa ti lagrin-la pouse.​—1 Kor. 3:7.

6-7. Ki nou kapav aprann ar fason ki Zeova inn kree later?

⁶ Dan tou seki Li fer, Zeova ena pasians ek Li pran letan ki bizin pou Li fer so travay. Li azir koumsa pou ki so nom gagn laglwar ek ki lezot gagn bann bienfe. Par exanp, anou gete kouma Zeova, tigit par tigit, ti prepar later pou bann imin.

⁷ Kan Labib explike kouma Zeova inn kree later, li dir ki Zeova ti “fixe so bann mezir,” ti plant so bann poto, ek ti poz “ros prinsipal so fondasion.” (Zob 38:5, 6) Zeova ti mem pran letan pou apresie so travay. (Zen. 1:10, 12) Esey mazine seki bann anz ti resanti kan zot ti trouv bann nouvo kitsoz ki Zeova ti  kree! Sirman zot ti extra kontan! Labib dir nou ki enn moman, zot ti mem “kriye ansam dan lazwa.” (Zob 38:7) Ki sa aprann nou? Sa finn pran plizir milye lane pou ki Zeova kree later, bann zetwal, ek tou bann kreatir ki ena lor later, me kan Zeova ti get tou bann kitsoz ki Li ti kree, Li ti dir ki “tou ti bien bon.”​—Zen. 1:31.

8. Ki nou pou examine asterla?

⁸ Bann lexanp ki nou’nn trouve dan bann paragraf avan, montre nou ki ena boukou prinsip dan Labib ki ansegn nou ki nou bizin ena pasians. Asterla, anou get de domenn kot nou bizin atann avek pasians ki Zeova azir.

9. Dan ki domenn nou bizin atann ki Zeova azir?

⁹ Kan nou bizin atann ki Zeova reponn nou bann lapriyer. Kan nou demann Zeova lafors pou andir enn problem ouswa kan nou rod so led pou sirmont enn febles, nou kapav panse ki Zeova pran boukou letan pou reponn nou lapriyer. Kifer Zeova pa reponn tou nou bann lapriyer deswit?

10. Kifer nou bizin atann avek pasians ki Zeova reponn nou lapriyer?

¹⁰ Zeova ekout nou bann lapriyer avek boukou latansion. (Ps. 65:2) Li konsider nou bann lapriyer sinser kouma enn prev ki nou ena lafwa dan Li. (Ebre 11:6) Zeova interese osi pou trouve si nou bien deside pou viv an-akor avek nou bann lapriyer ek pou fer so volonte. (1 Zan 3:22) Alor, kan nou demann Zeova so led pou aret fer enn kitsoz ki Li pa kontan, kitfwa nou pou bizin ena pasians ek fer boukou zefor pou fer bann sanzman. Zezi ti explike ki Zeova pa reponn tou bann lapriyer deswit. Akoz sa, li ti dir: “Kontign demande, ek pou donn zot; kontign rode, ek zot pou trouve; kontign tap laport, ek pou ouver pou zot. Parski ninport kisannla ki demande, gagne, ninport kisannla ki rode, trouve, ek ninport kisannla ki tape, pou ouver pou li.” (Mat. 7:7, 8, NW) Kan nou swiv sa konsey-la ek nou “pa aret priye,” nou kapav sir ki nou Papa ki dan lesiel pou tann ek reponn nou bann lapriyer.​—Kol. 4:2.

11. Kouma Ebre 4:16 kapav ed nou kan nou ena linpresion ki nou pa pe gagn repons pou nou lapriyer?

¹¹ Mem si nou ena linpresion ki nou pa pe gagn repons pou nou lapriyer, Zeova promet ki Li pou reponn nou lapriyer ‘kan bizin.’ (Lir Ebre 4:16.) Alor, fode zame nou met tor lor Zeova si Li pa reponn nou lapriyer dan ler ki nou nou anvi. Par exanp, depi plizir lane, boukou dimounn pe priye pou ki Rwayom Bondie detrir sa move lemond-la. Anplis, Zezi osi ti ankouraz nou pou priye pou sa. (Mat. 6:10) Nou pou bien bet si, tigit par tigit, nou perdi nou lafwa an Zeova parski lafin pa’nn vinn dan ler ki nou nou ti anvi! (Abak. 2:3; Mat. 24:44) Nou pou montre ki nou ena sazes kan nou kontign atann ki Zeova azir ek nou kontign priye Li avek lafwa. Lafin pou vinn exakteman dan ler ki bizin, parski Zeova inn fini swazir “ki zour, ki ler” lafin pou arive. Lafin pou vini dan moman ki pli bon pou tou dimounn.​—Mat. 24:36; 2 Pier 3:15.

12. Dan ki sitiasion difisil kitfwa nou pou bizin ena pasians?

¹² Kitfwa nou pou bizin ena pasians kan lezot tret nou dan enn move fason. Dan sa lemond-la, bann dimounn bien souvan  gagn maltrete ar lezot parski zot sorti dan enn lot pei, enn lot kominote, ouswa parski zot pena mem sex. Ena bann dimounn osi ki andikape ouswa ki ena bann problem mantal, ek akoz sa lezot tret zot dan enn move fason. Boukou serviter Zeova inn sibir bann linzistis akoz zot krwayans. Kan lezot tret nou dan enn move fason, rapel seki Zezi ti dir: “Me dimoun ki persevere [“andire,” NW] ziska lafin pou sove.” (Mat. 24:13) Me ki to pou fer si to aprann ki enn kikenn dan lasanble inn fer enn pese grav? Kan bann ansien pou o-kouran sa sitiasion-la, eski to pou ena pasians ek to pou fer zot konfians pou okip sa sitiasion-la dan fason ki Zeova anvi? Anou gete ki bann ansien fer kan enn kikenn fer enn pese grav.

13. Ki kitsoz Zeova anvi ki bann ansien fer kan enn kikenn fer enn pese grav?

¹³ Kan bann ansien aprann ki enn kikenn dan lasanble inn fer enn pese grav, zot priye pou gagn “lasazes ki sorti depi lao” pou ki zot konn fason panse Zeova lor sa sitiasion-la. (Zak 3:17) Zot lobzektif se pou ed sa dimounn ki pe fer pese la pou li aret fer pese. (Zak 5:19, 20) Zot anvi protez lasanble osi ek rekonfort bann dimounn ki pe soufer akoz sa sitiasion-la. (2 Kor. 1:3, 4) Kan bann ansien aprann ki enn dimounn inn fer enn pese grav, premierman zot bizin kone ki kitsoz inn vremem arive, ek sa kapav pran inpe letan. Apre sa, zot pou zwenn dimounn-la, zot pou fer enn lapriyer, zot pou donn li bann konsey Biblik, ek zot pou disiplinn li “zis kantite ki bizin.” (Zer. 30:11) Mem si bann ansien pa pou tarde pou okip sa sitiasion-la, kanmem sa zot pa pou pran bann desizion vit-vit. Kan bann ansien swiv direksion Zeova, bann frer ek ser dan lasanble gagn bann bienfe. Me mem si bann ansien inn swiv direksion Zeova ek zot inn fer tou seki bizin, bann dimounn inosan ki afekte par sa sitiasion-la kitfwa pou ankor pe soufer. Si to dan sa sitiasion-la, ki to kapav fer pou diminie to lapenn?

14. Ki lexanp Biblik kapav rekonfort twa si enn lot Kretien inn tret twa dan enn move fason?

¹⁴ Eski enn kikenn inn deza tret twa dan enn move fason? Dan Labib, ena boukou lexanp ki ansegn nou kouma nou  kapav atann avek pasians ki Zeova azir kan enn kikenn tret nou dan enn move fason. Par exanp, mem si Zozef so bann frer ti tret li dan enn fason inzis, li pa ti les sa sitiasion-la fer li vinn amer. Okontrer, li ti kontign fer so maximum pou servi Zeova, ek Zeova ti rekonpans so pasians ek so landirans. (Zen. 39:21) Avek letan, Zozef ti reisi pardonn so bann frer ek li ti trouve kouma Zeova ti pe beni li. (Zen. 45:5) Parey kouma Zozef, nou pou gagn rekonfor si nou vinn pros ar Zeova ek nou atann ki Li regle ninport ki problem nou ena.​—Ps. 7:17; 73:28.

15. Kouma enn ser ti reisi andir enn linzistis avek pasians?

¹⁵ Kitfwa nou pa pou konn bann mem linzistis ki Zozef, me nou tou nou soufer kan tret nou dan enn move fason. Kan nou gagn enn problem avek enn kikenn, mem avek enn kikenn ki pa servi Zeova, nou pou gagn bann bienfe si nou aplik bann prinsip Labib. (Fil. 2:3, 4) Anou get enn lexanp. Enn ser ti bien soufer kan li ti aprann ki so koleg ti pe dir bann move kitsoz lor li. Olie ki li ti al regle problem-la deswit, li ti pran letan pou reflesi lor lexanp Zezi. Kan bann dimounn ti insilte Zezi, li pa ti insilte zot. (1 Pier 2:21, 23) Lerla, nou ser ti desid pou pa dir nanye. Plitar, li ti aprann ki so koleg ti bien malad ek ki li ti bien strese. Alor, nou ser ti konpran ki so koleg pa ti vremem pans seki li ti dir. Nou ser ti bien kontan ki li ti andir sa sitiasion-la avek pasians, ek li ti santi li anpe.

16. Ki kitsoz kapav rekonfort twa si to pe sibir enn linzistis? (1 Pier 3:12)

¹⁶ Si to pe sibir enn linzistis ouswa to pe soufer akoz lezot kitsoz, rapel ki Zeova bien pre “ar bann dimounn ki zot leker inn kase.” (Ps. 34:18, NW) Li kontan twa parski to ena pasians ek to zet to fardo lor Li. (Ps. 55:22) Zeova Limem Ziz lor later antie, ek Li trouv tou kitsoz. (Lir 1 Pier 3:12, NW. b) Kan to gagn  bann difikilte ki to pa pe kapav regle, eski to dispoze pou atann ki Zeova azir?

17. Dapre Izai 30:18, ki promes Zeova fer nou?

¹⁷ Biento, gras-a so Rwayom, Zeova pou donn nou boukou benediksion. Izai 30:18 dir: “Zeova pe atann avek pasians pou montre twa so faver. Ek Li pou leve pou montre twa so mizerikord. Parski Zeova Li enn Bondie lazistis. Tou bann ki kontign atann Li zot dan lazwa.” Bann ki kontign atann Zeova pou gagn bann benediksion depi asterla mem ek dan lemond nouvo osi.

18. Ki bann benediksion nou pou gagne dan lavenir?

¹⁸ Kan bann serviter Bondie pou rant dan lemond nouvo, zot pou nepli bizin andir bann problem ki zot pe gagne asterla. Nepli pou ena linzistis, ek nou nepli pou soufer. (Rev. 21:4) Nou nepli pou bizin trakase pou bann kitsoz ki nou bizin parski pou ena tou kitsoz an-abondans. (Ps. 72:16, NW; Iza. 54:13) Sa pou vremem extraordiner!

19. Pou ki kitsoz Zeova pe prepar nou depi asterla-mem?

¹⁹ Depi asterla-mem, Zeova pe prepar nou pou viv anba so direksion. Li fer sa kan Li ed nou pou rezet nou bann move labitid ek pou devlop bann kalite ki fer Li plezir. Fode pa nou dekouraze ek aret servi Zeova. Ena enn zoli lavenir ki pe atann nou! Alor, an-atandan ki Li realiz tou so bann promes, anou kontign atann avek pasians ki Zeova azir!