1. Ki to’nn aprann konsernan to Kreater?

 SI TO’NN grandi dan laverite, sirman to’nn aprann konn Zeova depi ki to tipti. To’nn aprann ki Limem nou Kreater, ki Li ena bann kalite extraordiner, ek ki Li anvi fer later vinn enn paradi.​—Zen. 1:1; Zist. 17:24-27.

2. Ki kitsoz sertin panse lor bann dimounn ki krwar dan enn Kreater?

² Selman, boukou dimounn pa krwar ki Bondie existe ouswa ki Li’nn kree tou kitsoz. Okontrer, zot krwar ki lavi inn aparet par limem, ek ki bann form lavi ki bien sinp inn evolie pou vinn pli konplex. Parmi sa bann dimounn-la, ena mem sertin ki’nn fer bann gran letid. Zot dir osi ki lasians inn prouve ki seki Labib dir li fos, ek ki se bann dimounn ki pena ledikasion, ki pa intelizan, ouswa ki les zot anbete par lezot, ki krwar dan enn Kreater.

3. Kifer li inportan nou ranforsi nou lafwa?

³ Bann dimounn ki ena enn gran ledikasion kapav dir boukou kitsoz, me eski zot kapav fer nou ena bann dout ki Zeova, Limem nou Kreater? Sa pou depann boukou lor kifer nou krwar ki Zeova, Limem nou Kreater. Eski nou krwar ki Zeova Li nou Kreater parski bann dimounn inn dir nou krwar ladan, ouswa parski nou’nn pran letan pou etidie bann prev par noumem? (1 Kor. 3:12-15) Ninport ki kantite letan nou dan laverite, nou tou nou bizin kontign ranforsi nou lafwa. Si nou fer sa, nou pa pou les nou inflianse par “bann bel lide, . . . bann tronpri ki imin finn invante” ek ki pa an-akor avek Parol Bondie. (Kol. 2:8;  Ebre 11:6) Dan sa lartik-la, nou pou gete (1) kifer boukou dimounn pa krwar dan enn Kreater, (2) kouma nou kapav ranforsi nou lafwa dan Zeova, nou Kreater, ek (3) kouma nou kapav kontign gard nou lafwa for.

4. Dapre Ebre 11:1, ki Labib dir lor lafwa?

⁴ Sertin dimounn panse ki lafwa se krwar dan bann kitsoz mem si nou pena okenn prev. Me Labib pa ansegn sa. (Lir Ebre 11:1, NW. b) Labib explike ki lafwa li baze lor bann prev. Alor, mem si nou pa kapav trouv Zeova, Zezi, ek Rwayom Bondie, nou ena bann prev sir ki zot vremem existe. (Ebre 11:3, NW) Enn siantis ki’nn vinn enn Temwin Zeova dir: “Nou krwayans baze lor bann prev ek nou pran kont seki lasians dir.”

5. Kifer boukou dimounn krwar ki lavi inn aparet par limem?

⁵ Mem si ena bann prev ki ena enn Kreater, kifer boukou dimounn pa krwar ki Bondie inn kree tou kitsoz? Boukou dimounn pans koumsa parski zot pa’nn etidie sa bann prev-la par zotmem. Robert, ki asterla enn Temwin Zeova, dir: “Dan lekol, zame pa ti koz lor kreasion, alor mo ti panse ki sa lansegnman-la fos. Mo’nn pans koumsa ziska ki mo ti ena apepre 20 an. Kan mo’nn koz avek bann Temwin Zeova, mo’nn aprann ki Labib donn bann prev sir ek lozik ki Bondie inn kree tou kitsoz.” c​— Get lankadre “ Enn Mesaz Inportan pou Bann Paran.”

6. Kifer sertin dimounn pa krwar ki ena enn Kreater?

⁶ Sertin dimounn dir ki zot pa krwar dan enn Kreater parski zot krwar zis dan seki zot trouve. Me selman, zot krwar dan sertin kitsoz ki zot pa trouve, kouma par exanp, lafors gravite, enn lafors ki zot ena bann prev ki li existe. Lafwa ki mansione dan Labib, li osi li baze lor bann “prev sir ki bann kitsoz ki pourtan nou pa trouve, zot enn realite.” (Ebre 11:1, NW) Sa demann letan ek zefor pou etidie sa bann prev-la par noumem, ek boukou dimounn pa anvi fer sa bann zefor-la. Alor, enn dimounn ki pa etidie sa bann prev-la par limem kitfwa pou panse ki Bondie pa existe.

7. Eski tou dimounn ki’nn fer bann gran letid pa krwar ki Bondie inn kree tou kitsoz? Explike.

⁷ Apre ki zot inn etidie bann prev, sertin siantis inn konpran ki bizin ena enn  Bondie ki’nn kree tou kitsoz. d Parey kouma Robert, ki nou’nn mansione avan, kitfwa sertin siantis ti panse ki pena enn Kreater, parski pa ti ansegn zot sa dan liniversite. Me selman, ena boukou siantis ki’nn aprann konn Zeova ek kontan Li. Parey kouma sa bann siantis-la, nou tou nou bizin ranforsi nou lafwa dan Bondie, ninport ki nivo ledikasion nou ena. Personn pa kapav fer sa dan nou plas.

8-9. (a) Ki kestion nou pou examine asterla? (b) Ki bienfe to pou gagne kan to etidie lor kreasion?

⁸ Kouma nou kapav ranforsi nou lafwa dan nou Kreater? Anou get kat fason kouma nou kapav fer sa.

⁹ Etidie lor kreasion. To kapav ranforsi to lafwa dan to Kreater, kan to obzerv bann zanimo, bann plant, ek bann zetwal. (Ps. 19:1; Iza. 40:26) Plis to etidie lor sa bann kitsoz-la, plis to pou ena lasirans ki Zeova Limem nou Kreater. Souvan dan nou bann piblikasion, ena bann lartik ki koz lor bann detay ki ena dan kreasion. Fer zefor pou lir sa bann lartik-la, mem si zot difisil pou konpran. Ek pa bliye reget bann zoli video lor kreasion ki nou ti gagne dan nou bann lasanble rezional sa bann dernie lane-la. Nou kapav trouv sa bann video-la lor nou sit jw.org!

10. Ki lexanp dan kreasion montre ki ena enn Kreater? (Romin 1:20)

¹⁰ Kan to pe etidie lor kreasion, reflesi lor bann kitsoz ki to kapav aprann lor to Kreater. (Lir Romin 1:20.) Par exanp, pou ki kapav ena lavi lor later, nou soley donn saler ek lalimier. Me parmi bann reyon soley, ena sertin ki danzere, ek bann imin bizin proteksion kont sa bann reyon-la. Kouma nou pe gagn sa proteksion-la? Nou planet anvlope avek enn kous gaz ki protez nou kont sa bann rezon danzere la. Kan sa bann reyon-la vinn pli for, sa kous gaz la vinn pli epe. Eski sa lexanp-la pa montre nou ki bizin ena enn Kreater ki intelizan ek ki kontan nou?

11. Kotsa to kapav trouv bann linformasion ki kapav ranforsi to lafwa ki ena enn Kreater? (Get lankadre “ Bann Linformasion ki Pou Ed Twa pou Ranforsi To Lafwa dan enn Kreater.”)

¹¹ Dan Index des publications des Témoins de Jéhovah ek lor jw.org, to kapav trouv boukou prev lor kreasion ki kapav ranforsi to lafwa. To kapav koumans avek bann seri lartik ek bann video dan « Évolution ou conception ? ». Se bann video ek bann lartik bien sinp ki explik bann kitsoz extraordiner lor bann zanimo ek bann plant. To pou trouve osi kouma bann siantis inn esey kopie seki ena dan lanatir.

12. Kan nou pe etidie Labib, lor ki kitsoz nou bizin reflesi?

¹² Etidie Labib. O-koumansman, sa siantis ki nou ti mansione dan paragraf 4 la, pa ti krwar dan enn Kreater. Me avek letan, li ti sir ki ena enn Kikenn ki’nn kree tou kitsoz. Li dir: “Mo ti ena lafwa dan Kreasion pa zis parski mo ti etidie lasians, me osi akoz seki mo ti aprann dan Labib.” Kitfwa to konn bien seki Labib ansegne. Kanmem sa, to bizin kontign  etidie Labib pou ki to kapav ranforsi to lafwa dan to Kreater. (Zozwe 1:8; Ps. 119:97) Par exanp, to kapav reflesi kouma Labib li exakt kan li dekrir bann kitsoz ki’nn arive dan lepase. Reflesi osi lor tou bann profesi Biblik ki’nn realize, ek lor kouma bann diferan ekrivin Labib pa ti kontredir zot kamarad. Kan to fer sa, to pou ranforsi to lafwa dan to Kreater ki ena boukou lamour ek sazes, ek ki’nn fer ekrir Labib pou nou. e​—2 Tim. 3:14; 2 Pier 1:21.

13. Sit enn konsey Biblik ki montre sazes Zeova.

¹³ Kan to etidie Labib, remark bann konsey itil ki li done. Par exanp, depi bien lontan, Labib ti averti ki lamour pou larzan li danzere ek li amenn “boukou douler.” (1 Tim. 6:9, 10, NW; Prov. 28:20; Mat. 6:24) Eski sa lavertisman-la touzour itil azordi? Enn liv ki apel The Narcissism Epidemic dir: “Bien souvan, bann dimounn ki krwar ki larzan se kitsoz pli inportan dan lavi, zot malere ek zot ena plis sans pou tom dan depresion. Mem kan enn kikenn ena zis dezir pou gagn plis larzan, sa kapav rann li malere ek li ena plis risk pou gagn bann problem lasante.” Alor, lavertisman ki Labib done konsernan lamour pou larzan, li vremem enn bon konsey. Eski to konn bann lezot konsey Biblik ki’nn ed twa? Kan nou reflesi lor tou bann bon konsey ki ena dan Labib, nou trouve ki nou Kreater kone ki kitsoz pli bon pou nou, ek sa motiv nou pou touletan rod so bann konsey. (Zak 1:5) Kan nou fer sa, nou pou kapav amenn enn pli bon lavi.​—Iza. 48:17, 18.

14. Ki kitsoz enn letid Labib pou aprann twa lor Zeova?

¹⁴ Etidie Labib avek lobzektif pou aprann konn Zeova pli bien. (Zan 17:3, NW) Kan to etidie Labib, to aprann konn Zeova ek so bann kalite. Se sa bann kalite lamem ki to pou trouve kan to etidie lor kreasion. Kan to etidie bann kalite Zeova, to pou sir ki Li vremem existe. (Ex. 34:6, 7; Ps. 145:8, 9) Amezir ki to aprann konn Zeova pli bien, to lafwa dan Li pou grandi, to lamour pou Li pou vinn pli for, ek to pou ena enn pli bon lamitie avek Li.

15. Ki bienfe to gagne kan to partaz seki to aprann ar lezot?

¹⁵ Partaz seki to pe aprann ar lezot. Kan to fer sa, to pou ranforsi to prop lafwa. Me ki to bizin fer si enn kikenn ar ki to’nn prese pa krwar ki Bondie existe, ek to pa kone ki pou dir li? Rod bann ransegnman ki ena dan nou bann piblikasion ek ki baze lor Labib, ek partaz sa ar li. (1 Pier 3:15) To kapav osi demann enn frer ouswa enn ser ki ena lexperyans pou ed twa. Mem si dimounn-la pa aksepte repons ki Labib done, to pou gagn bann bienfe gras-a bann resers ki to’nn fer. To lafwa pou vinn pli for. Lerla, to pa pou les twa inflianse par bann dimounn ki paret intelizan ek ki pa krwar dan enn Kreater.

16. Ki kapav arive si nou pa kontign ranforsi nou lafwa ek gard li for?

¹⁶ Ninport ki kantite letan nou pe servi Zeova, nou bizin kontign ranforsi nou lafwa ek gard li for. Kifer? Parski si nou pa fer atansion, nou lafwa kapav vinn feb. Kouma nou ti trouve dan koumansman sa lartik-la, lafwa li baze lor bann prev sir ki bann kitsoz nou pa trouve, zot enn realite.  Nou kapav fasilman bliye bann kitsoz ki nou pa trouve. Kan enn kikenn pena ase lafwa, lapot Pol dir ki se kouma enn ‘pese ki pe pez lor li.’ (Ebre 12:1) Alor, kouma nou kapav fer sir ki nou lafwa res for?​—2 Tes. 1:3.

17. Ki kitsoz kapav ed nou pou gard nou lafwa for?

¹⁷ Dabor, demann Zeova so lespri sin, ek fer sa souvan. Kifer? Parski lafwa se enn kalite ki lespri sin ed nou pou devlope. (Gal. 5:22, 23) San lespri sin, nou pa pou kapav gard enn lafwa for dan nou Kreater. Si nou kontign demann Zeova so lespri sin, Li pou donn nou li. (Lik 11:13) Kan nou priye, nou kapav osi dir Zeova: “Ogmant nou lafwa.”​—Lik 17:5.

18. Dapre Psom 1:2, 3, ki privilez nou ena?

¹⁸ Anplis, li inportan ki to regilie dan to letid Labib personel. (Lir Psom 1:2, 3.) Kan ti ekrir sa Psom-la, bien tigit Izraelit ti ena enn kopi konplet Lalwa Bondie. Me selman, lerwa ek bann pret ti kapav gagn sa bann kopi-la, ek sak set an, ‘bann zom, bann fam, bann ti zanfan,’ ek bann etranze ki ti res parmi bann Izraelit, zot tou ti rasanble pou ekout lektir Lalwa Bondie. (Det. 31:10-12) Dan lepok Zezi, bien tigit dimounn ti ena enn kopi bann Lekritir. Laplipar sa bann kopi-la ti trouv dan bann sinagog. Me azordi, boukou dimounn kapav lir Labib. Se vremem enn gran privilez! Kouma nou kapav montre ki nou vremem apresie sa privilez-la?

19. Ki nou bizin fer pou nou kontign gard nou lafwa for?

¹⁹ Nou montre ki nou apresie sa privilez-la kan nou etidie Labib regilierman. Nou bizin ena enn program regilie pou lir ek etidie Labib, ek fode pa nou fer sa zis kan nou ena letan. Si nou fer sir ki nou etidie Labib regilierman, nou pou kapav kontign gard nou lafwa for.

20. Ki kitsoz nou bien deside pou fer?

²⁰ Nou diferan ar “bann saz ek bann intelizan” sa lemond-la, parski nou lafwa baze lor bann prev solid ki ena dan Labib. (Mat. 11:25, 26) Gras-a nou letid Labib, nou kone kifer bann kondision lor later pe vinn deplizanpli pir ek ki Zeova pou fer pou biento. Alor, anou bien deside pou ranforsi nou lafwa ek ed maximum dimounn pou ena lafwa dan nou Kreater. (1 Tim. 2:3, 4) Ek anou kontign atann lepok kot tou dimounn lor later pou loue Zeova ek dir bann parol ki ena dan Revelasion 4:11: “Segner Bondie, to merit resevwar laglwar . . . parski tomem ki finn kre tou kitsoz.”