ZEOVA anvi ki so bann adorater viv dan lape. Li anvi ki zot favoriz lape sakenn avek so kamarad. Kan zot fer sa, ena lape dan kongregasion, ek sa lape-la atir boukou dimounn dan kongregasion.

Par exanp, enn treter dan Madagascar ti remark lape ki ena parmi pep Bondie, ek li ti dir ar limem: ‘Si enn zour mo anvi rant dan enn relizion, se dan sannla-la ki mo pou rantre.’ Avek letan, li ti aret ador bann demon, fer bann sanzman dan so lavi maryaz, ek li ti koumans ador Zeova, Bondie lape.

Parey kouma sa misie-la, sak lane, bann milye dimounn vinn bann Temwin Zeova ek reisi trouv lape ki zot ti pe rode. Me Labib dir ki “zalouzi . . . ek lanbision” dan kongregasion kapav gat bann lamitie ek kree boukou problem. (Zak 3:14-16) Me Labib donn nou bann bon konsey kouma pou evit sa bann problem-la ek kouma pou fer lape ant bann frer ek ser vinn pli for. Anou gete kouma sa bann konsey-la finn ed bann frer ek ser dan diferan sitiasion.

“Mo ti gagn bann difikilte pou adapte ar enn frer ki ti pe travay ansam ar mwa. Enn zour, kan nou ti pe diskite, de dimounn inn rantre ek inn trouv nou.”​—CHRIS.

“Enn ser ar ki mo ti abitie prese enn sel kout ti kennsel tou bann laranzman ki nou ti fer ansam pou predikasion. Apre li ti osi aret koz ar mwa. Mo pa ti kone kifer.”​—JANET.

“Mo ti lor enn call telefonn ar de dimounn. Enn dimounn ladan inn dir bye-bye, ek mo ti panse ki li ti koupe. Lerla, mo ti dir bann move kitsoz lor li ar sa lot dimounn ki ti lor telefonn ar mwa la. Me sa dimounn ki ti dir bye-bye la pa ti ankor koup telefonn.”​—MICHAEL.

“Dan nou kongregasion, de pionie ti koumans gagn bann problem. Enn ti koumans fer bann repros ar so kamarad. Bann frer ek ser ti bien dekouraze kan zot ti trouv sa de pionie-la lager.”​—GARY.

Kitfwa sa bann problem-la pa paret tro grav. Me sa bann sitiasion-la ti kapav bles santiman bann dimounn ki ti inplike ek sa pwa-la ti pou res lontan lor zot leker. Sa ti kapav osi afekte lape dan kongregasion. Erezman, sa bann frer ek ser la ti swiv bann prinsip Labib ek ti reisi fer lape. Ki bann prinsip Labib to panse finn ed zot?

“Fode pa zot enerve ar zot kamarad kan zot pe ale lor semin.” (Zenez 45:24) Zozef ti donn so bann frer sa konsey bien saz la kan zot ti pe retourn kot zot papa. Kan enn dimounn pa kontrol so bann santiman ek li enerve fasilman, enn problem grav kapav vinn pli pir. Sertin dimounn kapav ankoler osi. Chris ti realize ki parfwa, li ti trouv sa difisil pou ena limilite ek li pa ti kontan kan dimounn donn li lord. Me li ti anvi sanze.  Alor, li ti al demann exkiz sa frer ar ki li ti gagn diskision la. Apre sa, Chris ti fer bann gro zefor pou metriz so karakter. Kan sa frer-la ti trouve kouma Chris ti pe fer bann gro zefor pou sanze, li osi li ti fer parey. Asterla, zot pe servi Zeova ansam dan lape.

“Bann plan pa reisi kan pena okenn konversasion.” (Proverb 15:22) Kan kamarad Janet ti aret koz ar li, Janet ti aplik sa prinsip Labib la. Li ti al koz ar ser-la. Janet ti demann li si li ti fer kitsoz ki ti ofans li ouswa ki ti agas li. O-koumansman, toule-de ti santi zot inpe gos. Me amezir ki zot ti koz ar zot kamarad avek douser, zot ti santi zot pli alez. Ser-la ti realize ki li ti mal konpran enn sitiasion ki ti arive dan lepase ek ki an realite, Janet pa ti fer nanye pou ofans li. Li ti demann Janet exkiz, ek asterla zot de bon kamarad ki pe servi Zeova ansam.

“Alor, si to pe amenn to don devan lotel ek ki la to rapel ki to frer ena kitsoz kont twa, les to don la, devan lotel, ek ale; dabor al fer lape avek to frer.” (Matie 5:23, 24, NW.) Zezi ti donn sa konsey-la dan so Sermon lor Montagn. Apre ki Michael ti dir bann move kitsoz lor sa frer-la, li ti santi li bien anbarase. Li ti deside pou fer tou seki li kapav pou aranz sa sitiasion-la. Alor, li ti al get frer-la ek li ti dir li ki kantite li ti regrete. Ki ti arive? Michael dir: “Mo frer ti vremem pardonn mwa.” Apre sa, zot ti revinn kamarad.

“Kontign siport sakenn zot kamarad, ek pardonn sakenn zot kamarad avek tou zot leker mem si kikenn ena kitsoz kont enn lot.” (Kolosien 3:12-14, NW.) Eski to rapel sa de pionie ki ti lager dan predikasion-la? Avek bonte, enn ansien ti fer zot konpran ki zot ti pe deranz ek met lezot malalez. Li ti rapel zot ki zot ti bizin ena pasians ar zot kamarad ek fer zot par pou favoriz lape dan kongregasion. Zot ti aksepte konsey ki zot ti gagne ek zot ti met li an pratik. Asterla, toule-de korpere bien ansam kan zot pres bonn nouvel.

Konsey ki trouv dan Kolosien 3:12-14 kapav ed twa pou ena limilite, pou pardonn enn kikenn ki finn bles twa, ek osi pou aret pans lor sa sitiasion-la. Me ki nou pou fer si nou finn esey pardone me ki nou pa finn kapav? Prinsip Labib ki trouv dan Matie 18:15 kapav ed nou. Mem si Zezi ti pe koz avan tou lor bann pese bien grav, li ti explike seki nou kapav fer ninport kan nou ena enn problem ar enn frer ouswa enn ser. Avek bonte ek limilite, nou kapav al get dimounn-la pou koz lor problem ki nou’nn gagne ar li ek pou esey regle problem-la.

Ena ankor boukou lezot konsey pratik dan Labib. Nou pou reisi aplik zot si nou kont lor lespri sin Bondie pou manifeste “frwi lespri.” Sa bann kalite-la se “lamour, lazwa, lape, pasians, zantiyes, bonte, lafwa, douser, metriz lor noumem.” (Galat 5:22, 23, NW.) Reflesi lor la. Enn masinn fonksionn bien kan so bann roulman ena bien  lagres. Dan mem fason, li pli fasil pou regle bann problem ek pou ena enn bon relasion ar lezot, kan nou imit bann bon kalite ki Zeova manifeste.

Sakenn parmi nou ena so prop personalite. Nou tou nou ena diferan kalite ek diferan fason pou trouv bann kitsoz ek pou exprim noumem. Sa bann diferans-la fer nou apresie lamitie ki nou ena ar lezot ek sa rann nou zwaye. Me sa bann diferans-la kapav osi kree bann konfizion ek bann dezakor. Enn ansien ki ena boukou lexperyans ti servi enn lexanp pou explike kouma sa kapav arive. Li ti dir: “Enn kikenn ki timid kitfwa pa pou santi li alez ar enn kikenn ki kontan badine, koze, riye. Sa diferans-la kitfwa pa paret tro inportan, me sa kapav kree bann problem bien grav.” Eski to panse ki bann dimounn ki ena bann personalite bien diferan zame pa pou kapav kamarad? Anou get lexanp de zapot. Kan nou mazinn lapot Pier, kitfwa nou pans enn kikenn ki fran, ki touletan dir seki li panse. Kan nou mazinn lapot Zan, kitfwa nou mazinn li kouma enn frer ki ena boukou lamour, ki pou pran letan pou reflesi avan li koze ouswa azir. Pier ek Zan ti ena de personalite bien diferan. Me zot ti travay bien ansam dan servis Zeova. (Zistwar Bann Apot 8:14; Galat 2:9) Azordi osi parey, mem bann Kretien ki ena bann personalite bien diferan pe reisi travay bien ansam.

Me asterla, ki pou arive si enn kikenn dan to kongregasion dir ouswa fer enn kitsoz ki fer twa ankoler? Parey kouma Zezi finn donn so lavi pou twa, li bon ki to pa bliye ki li finn donn so lavi pou sa frer-la osi, ek ki to bizin kontan to frer. (Zan 13: 34, 35; Romin 5:6-8) Li pa pou bon ki to desid pou nepli kamarad ar sa dimounn-la ouswa ki to evit li. Me plito, demann tomem: ‘Eski mo frer inn fer kitsoz ki kont lalwa Zeova? Eski li’nn rod bles mwa par expre? Ouswa eski nou personalite diferan? An realite, eski li ena bann kalite ki mo’si mo ti pou kontan ena?’

Par exanp, si li kontan koze ek twa to kontan res trankil, kifer to pa esey pres ansam avek li ek gete ki to kapav aprann ar li? Ouswa kitfwa li pli zenere ki twa. Eski to finn trouve ki kantite lazwa gagne kan nou zenere ar bann dimounn aze, bann dimounn malad ouswa bann dimounn ki bizin led? Eski to kapav aprann ar sa dimounn-la kouma pou vinn pli zenere? Seki nou pe rod dir, se ki mem si to pa parey kouma sa frer-la, to kapav fixe to latansion lor bann bon kalite ki li ena. Mem si kitfwa zame zot pa pou vinn bann pli bon kamarad ki ena, to pou vinn pli pros ar li. Koumsa, pou ena lape ant zot, me osi dan kongregasion.

Dan premie siek, ti ena de ser ki ti apel Evodi ek Sintish. Li paret ki zot ti ena de personalite bien diferan, me lapot Pol ti ankouraz zot “pou viv anakorite dan Lesegner.” (Filipien 4:2) Nou osi, nou anvi ador Zeova ansam ar nou bann frer ek ser, ek favoriz lape dan kongregasion.

Kifer eski nou bizin degaze tir dan nou leker tou move santiman ki nou ena anver lezot? Nou kapav konpar sa bann santiman-la ar bann move lerb ki pouse dan enn zardin kot ena bann zoli fler. Si nou pa derasinn sa bann lerb-la, zot pou pous partou dan zardin. Li parey pou nou osi. Si nou kontign ena bann move santiman anver lezot, sa kapav afekte tou bann frer ek ser dan  kongregasion. Me si nou kontan Zeova ek nou bann frer ek ser, nou pou fer tou seki nou kapav pou protez lape dan kongregasion.

Kan nou esey fer lape ar lezot, kitfwa nou pou etone ar bann bon rezilta ki nou pou gagne. Enn ser ti fer sa lexperyans-la. Li dir: “Mo ti ena linpresion ki enn ser ti pe tret mwa kouma enn zanfan. Sa ti vremem agas mwa. Sa ti telman agas mwa ki mo ti reponn li brit kan li ti koz ar mwa. Mo ti dir ar momem: ‘Li pena okenn respe pou mwa, alor mo pa pou ena respe pou li.’”

Lerla, sa ser-la ti reflesi lor so latitid. Li dir: “Mo ti koumans trouv mo bann prop defo, ek sa ti vremem desevwar mwa. Mo’nn konpran ki mo ti bizin sanz mo latitid. Apre ki mo’nn koz sa ar Zeova dan lapriyer, mo ti aste enn ti kado pou sa ser-la. Mo ti osi ekrir enn kart pou li kot mo ti demann li pardon pou mo move latitid. Nou’nn may nou kamarad ek nou’nn dakor pou bliye seki ti arive. Depi sa, nou pa finn gagn problem ankor.”

Tou dimounn bizin lape. Me si enn dimounn mank konfians an limem ouswa si li gran nwar, li kapav azir dan enn fason ki pa pou favoriz lape. Dan lemond azordi, se enn kitsoz ki nou trouve souvan, me Zeova atann ki so bann serviter azir dan enn lot fason. Parmi bann Temwin Zeova, bizin ena lape ek linite. Zeova ti inspir Pol pou dir bann Kretien ki zot bizin “viv enn lavi ki dign sa lapel ki zot finn gagne la ar limilite, douser ek pasians. Ki zot soutenir zot kamarad avek amour. Fer zefor pou gard linite Lespri par lape ki tini zot ansam.” (Efezien 4:1-3) “Linite” ek ‘lape ki tini nou ansam,’ se bann kitsoz ki ena boukou valer parmi pep Zeova. Alor, anou fer tou seki nou kapav pou fer lape ek linite vinn pli for, ek pou regle ninport ki problem ki nou kapav gagne ar nou bann frer ek ser.