Kifer Dimounn Nepli Ena Respe pou Lafami?
KIFER LI INPORTAN POU ENA RESPE DAN LAFAMI?
Kan sakenn montre respe pou so kamarad dan lafami, sa kree enn bon lanvironnman kot mari, fam, ek zanfan santi zot an sekirite.
-
Enn liv ki koz lor maryaz (The Seven Principles for Making Marriage Work) dir ki kan mari ek fam ena respe pou zot kamarad, zot touletan montre lafeksion “pa zis dan bann gran kitsoz, me osi dan bann ti kitsoz.”
-
Dapre bann resers, kan bann zanfan aprann pou montre respe anver lezot, zot ena plis konfians an zotmem, zot ena enn pli bon relasion avek zot paran, ek osi zot ena mwins problem emosionel ek mantal.
SEKI OU KAPAV FER
Koz sa an fami. Premie, fer sir ki tou dimounn dan lafami konpran ki vedir “montre respe.” Deziem, ekrir ki bann konportman presi ou atann sak manb ou fami ena ek ki bann konportman fode pa zot ena. Trwaziem, koz sa an fami pou ki sakenn kone ki zot kapav fer pou montre respe.
Donn lexanp. Eski ou kritik bann manb ou fami akoz erer ki zot fer, boufonn zot akoz zot lopinion, inior zot ouswa koup zot kan zot pe koz avek ou?
Tips: Montre respe pou ou konzwin ek ou bann zanfan, ki ou panse zot merit sa respe-la ouswa non.
Montre respe mem si ou pa dakor. Kan ou pe exprim ou, evit dir bann kitsoz kouma “to touletan okipe” ouswa “zame to ed mwa.” Bann parol koumsa pou bles bann manb ou fami, ek sa kapav fer sitiasion-la vinn pli grav.
SEKI NOU PE FER
Bann Temwin Zeova ankouraz tou dimounn dan lafami pou tret zot kamarad avek respe. Souvan koz lor la dan nou bann video ek nou bann lartik lor nou sit Internet, ek osi dan nou bann magazinn, liv, brosir ki ou kapav lir gratis, ki li an version papie ouswa elektronik.
POU BANN KOUP MARYE: Seri lartik Led pou Lafami kapav ed mari ek fam pou . . .
-
ekout bien zot kamarad
-
pa refiz pou koz avek zot kamarad
-
aret diskite
(Lor jw.org, rod “Led pou Lafami”)
POU BANN PARAN: Seri lartik Led pou Lafami kapav ed bann paran pou form zot zanfan pou . . .
-
obeir
-
ede avek bann louvraz lakaz
-
dir “silteple” ek “mersi”
(Lor jw.org, rod “Grandi Bann Zanfan” ek “Grandi Bann Adolesan”)
Get osi seksion « Les parents s’interrogent » dan liv Les jeunes s’interrogent. Réponses pratiques (volume 1). (Lor jw.org, rod « Les parents s’interrogent »)
POU BANN ZENN: Lor jw.org dan seksion Adolesan ek Zenn Adilt, ena bann lartik, bann video, ek bann aktivite personel ki kapav ed bann zenn pou . . .
-
ena enn bon relasion avek zot paran ek avek zot bann frer ek ser
-
koz avek respe ar zot paran lor bann reg
-
gagn konfians zot paran
(Lor jw.org, rod “Adolesan ek Zenn Adilt”)
Nou sit jw.org li gratis. Pena okenn fre pou peye, pa bizin fer okenn labonnman ni vinn enn manb, ek pa pou demann ou okenn linformasion personel.
