Kifer Dimounn Nepli Ena Respe pou Lavi?

ZWE

KIFER LI INPORTAN KI NOU ENA RESPE POU LAVI?

Kan nou fer bann kitsoz ki pa bon pou nou lasante ek ki met nou lavi ek lavi lezot an danze, sa montre ki nou lavi ek lavi lezot pena valer pou nou.

Fime fer gagn kanser ek li osi fer sa vinn pli difisil pou ki nou lekor konbat sa maladi-la. Anviron 90 poursan bann dimounn ki finn mor ar kanser poumon, finn mor akoz zot ti pe fime ouswa akoz zot inn respir lafime sigaret.
Sak lane boukou dimounn tromatize lor plan emosionel akoz bann fiziyad. Enn resers montre ki mem bann ki’nn reisi sirviv bann fiziyad dan lekol san ki zot gagn okenn blesir fizik, sa latak-la kontign afekte zot lor plan emosionel ek mantal pandan plizir lane apre.
Bann ki kondir kan zot inn sou ouswa kan zot inn pran ladrog, zot met lavi bann dimounn ki lor sime ouswa mem ki lor trotwar an danze. Kan bann dimounn pa montre respe pou lavi, se bann dimounn inosan ki soufer.

SEKI OU KAPAV FER

Protez ou lasante. Li zame tro tar pou aret bann kitsoz ki pa bon pou ou lasante kouma par exanp fime, fim sigaret elektronik, bwar ziska sou ouswa pran ladrog. Sa bann kitsoz-la fer oumem ditor ek montre ki ou pena respe pou lavi bann dimounn ki otour ou ek mem pou ou fami.

“Anou pirifie nou ar tou kitsoz ki sali lekor.”—2 Korintien 7:1.

Pans ou sekirite ek sekirite lezot. Gard ou lakaz dan enn bon leta pou evit bann aksidan. Kan ou kondir, montre ou pridan ek gard ou transpor dan enn bon leta. Pa les personn met presion lor ou pou fer bann aktivite ki danzere.

“Si to ranz enn nouvo lakaz, to bizin osi met enn ti miray otour to twa pou ki to pa met enn det disan lor to lakaz parski enn kikenn inn sap lao inn tonbe.”—Deteronom 22:8. a

Montre ou zanti ar lezot. Ena respe pou lavi vedir osi ki nou montre nou zanti anver bann dimounn ki sorti dan enn lot ras, enn lot pei, ki zot ris ouswa non, ki zot ena ledikasion ouswa non. Kifer li inportan pou fer sa? Parski se akoz prezize ek laenn ki ena otour nou ki ena sa kantite violans ek lager la dan lemond.

“Debaras zot ar tou kalite santiman amer, koler, laraz, kriye, insilt ek osi tou seki fer lezot ditor. Me zot bizin bon sakenn anver zot kamarad.”—Efezien 4:31, 32.

SEKI NOU PE FER

Bann Temwin Zeova ansegn lezot pou ena enn bon fason viv ek pou pran swin zot lasante. Nou travay lansegnman lor Labib finn ed boukou dimounn pou aret zot bann move labitid ki ti pe fer zot ditor ek bann kitsoz ar ki zot ti adik, kouma par exanp ladrog.

Nou gard enn nivo sekirite bien ot dan nou bann proze konstriksion. Bann volonter ki vinn ede pou konstrir bann lasal kot nou ador Bondie ek bann lezot batiman ki servi pou soutenir travay lansegnman lor Labib, gagn enn formasion pou evit bann aksidan. Souvan nou verifie leta nou bann batiman pou ki zot an-akor avek lalwa sekirite dan nou pei.

Nou ed bann dimounn ki pas par bann katastrof. An 2022, nou finn ed bann dimounn dan 200 gran katastrof dan lemond antie ek nou finn depans apepre 12 milyon dolar dan larzan donasion pou ed sa bann dimounn-la.

Kan lepidemi Ebola ti koumans afekte popilasion dan Lwes Lafrik (2014) ek Repiblik Demokratik Kongo (2018), nou finn montre bann dimounn kouma zot kapav pran bann prekosion pou anpes sa maladi danzere la fane. Nou finn avoy bann reprezantan pou koz ar bann group dimounn lor sa size-la: “Lobeisans Sov Bann Lavi.” Devan lantre sak lasal kot nou ador Bondie, nou finn prevwar enn plas pou lav lame, ek nou finn explike kifer li inportan ki zot fer sa. Nou finn osi explik bann lezot kitsoz ki zot kapav fer pou anpes sa maladi-la fane.

Dan Sierra Leone, enn radio finn felisit bann Temwin Zeova parski zot finn ed bann Temwin ek osi bann dimounn ki pa Temwin dan landrwa kot zot reste pou protez zot kont viris Ebola.

Enn plas kot lav lame andeor Lasal Renion pandan lepidemi Ebola dan Liberia an 2014

a Lontan dan Lorian, bann dimounn ti oblize swiv sa lord-la. Sa ti ed zot konpran ki kantite sekirite zot fami ek sekirite lezot inportan.

LEVE!