BANN KOUP
2: Travay an Ekip
KI SAVEDIR
Kan enn mari ek enn fam travay an ekip dan zot maryaz, zot koumadir pilot ek kopilot enn avion ki pe al dan mem direksion. Kan ena bann difikilte, sak konzwin pa pou pans zis li tousel, me zot pou pans kouma enn lekip.
PRINSIP LABIB: “Zot nepli pou de, me enn sel.”—Matie 19:6.
“Maryaz se pa langazman enn sel dimounn. Mari ek fam bizin travay ansam pou ki maryaz-la reisi.”—Christopher.
KIFER LI INPORTAN
Kan ena bann difikilte, bann mari ek fam ki pa travay an ekip pou ena tandans pou atak zot kamarad plito ki atak problem-la. Lerla, bann tipti difikilte vinn bann gro problem.
“Travay an ekip samem baz enn maryaz. Si mo mari ek mwa nou pa ti enn lekip, nou ti pou koumadir de dimounn ki pe zis res dan mem lakaz. Ek sa ti pou enn problem kan nou ti pou bizin pran bann desizion inportan.”—Alexandra.
SEKI TO KAPAV FER
FER ENN TEST
-
Larzan ki mo gagne, eski mo konsider li kouma “zis pou mo tousel”?
-
Pou mo rilax vremem, eski mo bizin lwin ar mo konzwin?
-
Eski mo gard mo distans ar bann fami mo konzwin, mem si li, li bien pros ar zot?
KOZ AVEK TO KONZWIN
-
Dan nou maryaz, dan ki domenn eski nou travay bien an ekip?
-
Dan ki domenn eski nou bizin fer bann zefor?
-
Ki bann kitsoz nou kapav fer pou ki nou amelior nou lespri lekip?
TIPS
-
Mazinn enn match tenis kot twa ek to konzwin, zot pe zwe kont zot kamarad. Asterla, ki bann kitsoz pratik to kapav fer pou ki to al ver to konzwin, pou ki zot zwe ansam dan mem lekip?
-
Olie ki to panse, ‘Kouma mo kapav gagne?’ pans plito ‘Kouma nou toulede nou kapav gagne?’
“Pa bizin kone kisannla ena rezon ouswa ena tor. Sa bann kitsoz-la pa osi inportan ki lape ek linite dan maryaz.”—Ethan.
PRINSIP LABIB: “Pa rod zot prop lintere, me rod lintere lezot.”—Filipien 2:3, 4.
